大清亡國關慈禧蛋牛治

【大清亡國關 #怪獸家長 蛋牛治】

😜香港好多怪獸家長，佢哋一心為咗啲仔女好，驚啲仔女大個搵唔到食，結果好希望佢哋可以贏在起跑線，但好多時候好心做壞事，累咗自己同時都累埋啲仔女。怪獸家長犯嘅最大毛病，就係以為自己可以睇通未來，可以睇到歷史嘅發展進程。但係，其實歷史同六合彩嘅本質非常相似，你真係估唔到佢開乜嘢冧巴。

😝20年前，冇人會知道原來識普通話係一個極大既優勢。今日嘅香港人，又有邊個可以答到我2047會發生乜嘢事呢？既然我哋睇唔透未來，既然未來係一大堆未知數，咁我哋點解要用現在嘅數據去推敲未來？空想之後嘅趨勢，從而做出一連串無意義嘅動作呢？

😍【#大清亡國關慈禧蛋牛治】語音導航！請大家記得睇完，幫手「#訂閱」我條YoutubeChannel！同埋介紹多啲人睇！


https://youtu.be/tY-QlYMFhZc

【常威中史】為慈禧平反系列（六十九）

為獨裁者平反，時候大家見啲獨裁者一做就係三四十年，或者佢哋都係唔X想嘅，因為要搵到一個人交權，做到同自己一模一樣嘅嘢，真係好X難，你睇毛澤東，劉少奇唔啱，林彪又唔啱，江青又唔啱，鄧小平又唔啱，最後要將權力交咗畀一個能力好有限嘅大好人華國鋒先生。當其時，慈禧真係好想將權力交畀劉晶，自己安安靜靜退休，唸佛睇戲，但係劉晶光緒真係冇咁嘅能力，雖然佢咁靚仔又有型。

1895年慈禧一步一步揸返權，因為《馬關條約》內差唔多二億兩白銀（600億）賠款，數目實在太龐大，慈禧一定要揸返住條數，否則拖爆大清一啲都唔奇。講番日本，甲午戰爭開打前日本嘅國庫只有3000萬兩白銀（90億，咁小）儲備，為咗打仗發行公債8000萬兩（240億）。成功收返2億（600億），賺凸8000萬兩（240億）。呢場戰爭令日本庫房水浸，之後日本喺倫敦大手購入黃金（sorry！唔係倫敦金），完成國內日圓金本位建設工作，從此以後，日圓成為一種極度有信用嘅國際貨幣流通全世界，日本國力進一步提昇，脫亞入歐，指日可待，當時，一日圓兌換一兩白銀左右，第二次世界大戰之後，日圓先比美國佬大手質低瘋狂大眨值，變為以「千」「萬」做單位，十年河東，十年河西。

慈禧半復出，整治劉晶，之前已經提過1895年有Tom boy珍妃賣官事件，慈禧重責真妃之餘，亦將劉晶身邊嘅豬朋狗友同事革走，唔俾劉晶有私人時間同陌生人接觸。1896年年頭，慈禧甚至將軍機處調去頤和園，響東門外設立軍機公所，方便自己出入辦公，劉晶衰到冇人有，個個當佢透明，正式靠邊站。

上次講過，1896年5月，李鴻章代表大清出使俄國參與尼古拉斯二世加冕儀式，同時暢遊歐洲，其實當時李鴻章有特別任務響身。為咗仰壓日本野心，慈禧決心拉攏俄國對付日本。慈禧心知肚明俄國人想要啲乜，當時俄國正興建緊西伯利亞鐵路，橫跨整個俄羅斯，直達海參威，鐵路可以一直喺俄國領土之內，但係要兜一個大彎，一係就穿過大清滿州領土直達終點，後者比前者短500公里。慈禧用呢個條件拉攏俄國，大清更加投資500萬兩白銀（15億港紙，濕濕碎）成為大清國內「東北俄路」1/3嘅鐵路股東。俄國亦都答應，如果日本再出手侵略大清，一定會出兵幫手，之後嘅日俄戰爭，正正就係由此而嚟，當然俄國亦冇諗過自己會輸畀日本仔，波羅的海艦隊全軍覆沒後，俄國嘅國運亦正式步入墳墓，列寧、托洛斯基講句多謝唔該。

李鴻章去聖彼德堡其實就係簽呢份密約，為咗掩飾唔畀其他列強起疑心（Especially Japan），李生仲專登訪問多四個歐洲國家，照X光製造國際新聞，撈咗個「東方卑斯麥」靚朵返嚟。李鴻章返番中國，佢以為立咗大功，慈禧會原諒佢，但係慈禧用完即棄，正式結束咗同佢30幾年嘅親密戰友關係。

中俄密約簽訂、籌備好向日本賠款後，慈禧又一次穩固咗大清帝國嘅根基，1897年初，慈禧基本上冇過問政事，交返權俾劉晶，但係劉晶一啲都唔爭氣，一事無成之餘，仲響契弟翁引領之下，識咗個新豬朋，佢叫康有為。

即係呢個時候，世界上最惡嘅人殺到！邊位？希特拉呀！

【大清亡國關慈禧蛋牛治】實體購買
https://www.382now.com/product?id=87

【大清亡國關慈禧蛋牛治】
https://play.google.com/store/books/details?id=C3hjDwAAQBAJ

夜咗唔敢睇【七不思議系列一：孽咒】
https://play.google.com/store/books/details?id=gSZnDwAAQBAJ

#常威 #慈禧太后 #晚清歷史 #李鴻章 #俄國 #西伯利亞鐵路

【大清亡國關 #CO 蛋牛治】

深宮殺人，易如反掌。為咗權力，人命只係籌碼，早年睇過一本書叫【血酬定律】，內裡講權力本身，有時候並非純粹金錢交易，而係用血嚟做交易籌碼，即係用條命嚟換取權力，牽涉人命，就超越金錢，因為錢咩都買得返，係條命就買唔番。

放返去今日嘅社會，有人問點解某啲政權可以穩如泰山？我答你，嗰啲政權嘅基石係無數人命堆砌而成，係用血嚟建立，血酬無法償還，除非有人肯用更多生命重新制定新血約覆蓋前者。和理非非永遠冇可能成功，理由亦響依處。

【#大清亡國關慈禧蛋牛治】語音導航！請大家記得睇完，幫手「#訂閱」我條YoutubeChannel！同埋介紹多啲人睇！

https://youtu.be/Yj_cQElqTKM

https://zh.m.wikipedia.org/zh-tw/%E8%A1%80%E9%85%AC%E5%AE%9A%E5%BE%8B%EF%BC%9A%E4%B8%AD%E5%9C%8B%E6%AD%B7%E5%8F%B2%E4%B8%AD%E7%9A%84%E7%94%9F%E5%AD%98%E9%81%8A%E6%88%B2

推薦閱讀

各位你好啊，我想講啲嘢，我響度連載一啲關於近代史嘅文章，其實係有個目的，當然我想大家到最後會買我本書令我發達，但係做出版賺得幾多？大家應該心知肚明……

可能你唔信我，但係我心裏面真係有一個想法，我真係想大家，尤其是年青人，真真正正認識近代史，你越清楚歷史，你就知道呢一刻發生緊乜嘢事……

好簡單，如果你要面對一個敵人，你必須知道佢究竟係邊個，同埋佢有乜嘢背景同埋諗法，否則最後只會被敵人撳住嚟砌，冇得翻身！

你唔想俾人蝦，就要知己知彼，百戰百勝已經冇可能，但係保住條命保住能量保住想法，就總有機會翻身……

今時今日我哋已經畀人踩到上頭殼頂，香港人一向聰明，但係依家卻俾人話我哋香港人好蠢，尤其是年青一代完全冇料到，面對呢種講法我祇有四個字回應：

X你老母！

共勉之，and等著瞧。

追完連登，追埋你FB，支持樓主

鑑古知今

俾個正評丫，課金乞兒買飯盒食

俾個正評丫，課金乞兒買飯盒食

一早正皮咗啦

【常威中史】為慈禧平反系列（七十）

今日想講一個大題目，帝國主義者侵略中國（或者叫清國），設立租界同埋殖民地，佢哋往往都有一個藉口，就係幫助「清國」（或者統稱為中國）呢個落後嘅國度，建設現代化同擺脱野蠻封建嘅古老狀態。即係話，佢哋嘅侵略行為係善意嘅，係苦口良藥，係為你好，你應該多謝佢哋都多謝唔切。

1895年馬關條約簽署嘅過程中，李鴻章曾經利用外交手段要求列強介入仰壓日本，世界上冇免費午餐，人哋借咗錢畀你，你就要還，你唔還就淋紅油收數，天經地義。上次講過，清國已經向俄國還債，容許沙皇嘅西伯利亞鐵路貫通自己本土。到咗1897年，歐洲列強都開始伸手向大清攞地。德國，一個19世紀末期，由好大喜功嘅德皇威廉二世（Wilhelm II，1859-1941）帶領下，高速崛起嘅超級強國睇準時機，要求大清攞山東膠洲灣做海軍基地，作為德國勢力伸向遠東嘅起步點。德國人提出嘅理由好荒謬，佢哋話自己幫助大清要返遼東半島，所以要攞地，咁都講得出，證明一句說話，弱國無外交。

當時掌權嘅劉晶當然唔制啦，於是德國人畀啲顏色你睇，派戰艦去膠州灣外邊遊吓遊吓，觀賞吓風景，感受吓海風，當時大清已經冇曬北洋海軍戰艦，人哋擺隊戰艦響你海邊，你就得個睇字囉。11月1號，兩個德國傳教士響山東一條村度比人殺咗。德國艦隊即刻駛入膠州灣，要求大清48小時之內作出交代，你老母啊，擺到明係搶吖。

北京紫禁城之內，當然冇人夠膽同德國開戰，日本都唔夠打？唔通會夠希特拉打咩？最後個波交比慈禧，老佛爺金口決定，德國人要乜就俾乜佢。於是1898年3月6號，大清簽紙租借膠州灣及青島比德國99年。順帶一提，簽紙嘅人又係李鴻章，李鴻章都算好使好用。

從此以後，德國人開始喺山東青島進行現代化建設。0168青島啤酒咪係德國人留低嘅傑作囉，而德國喺山東青島一帶鋪設嘅地下排水系統仲用到今時今日，個個都話正。

青島只係其中一個帝國主義者建設現代化嘅好例子，仲有日治時代嘅台灣，仲有上海，上海呢條小漁村係英國法國兩者由1842年零開始，一手打造成為國際大都會。當然大家唔好忘記仲有香港，唔係做咗100年英國殖民地，大家今日有咁開心？

除此以外，仲有之後日本親手打造嘅滿洲國，1948年國共內戰，由林彪（1907-1971），劉亞樓（1910-1965）指揮嘅「遼沈戰役」，就係成功取得滿洲國留低嘅大量軍工設施同埋城市建設，為中共打下深厚嘅戰略基礎，中國共產黨先可以穩住陣腳，長驅直進南下佔領整個江山，將蔣介石趕去台灣，取得政權，建設中華人民共和國。

歷史係奇妙嘅，同愛情一樣，前人種花，後人收割。冇帝國主義者張牙舞爪嘅侵略，亦都唔會有咁多傳奇嘅事情發生，今日喺呢度，我唔係為咗嗰啲帝國主義侵略者塗脂抹粉，但係事實擺喺眼前，唔到你唔信，尤其是身為香港人，唔通我哋真係唔使同英女皇講聲thank you？

你覺得唔啱聽，隨便開口屌我。但係受人恩果千年記，你夾硬抹去事實當冇發生過，就係你唔啱囉。


#常威 #慈禧太后 #晚清歷史 #李鴻章 #德國 #青島

【大清亡國關慈禧蛋牛治】實體購買
https://www.382now.com/product?id=87

【大清亡國關慈禧蛋牛治】
https://play.google.com/store/books/details?id=C3hjDwAAQBAJ

課金乞兒買飯盒食

【大清亡國關 #郭嵩燾 蛋牛治】

🍐1875年豆十二要做三件大事，第一件事就係派人出外國考察，睇吓洋人點解咁威咁勁，郭嵩燾係第一個會操流利英語嘅大清官員，但係好可惜，好似郭嵩燾呢類人物喺之後出現嘅次數亦都唔多

🍐大清亡國係亡响自己手上邊，係亡於佢哋根本冇辦法同整個世界資本主義接軌。做人嘅嘢，不進則退，讀書如是，做嘢如是，放喺社會同埋歷史上面亦如是。我在三再強調多一次，我對香港充滿希望，我對香港人亦都充滿希望，因為我對自己都充滿希望，但係首先，我哋要明白同承認自己有咩不足之處。如果你認為係冇，就係最大嘅問題所在🤕

🚿【#大清亡國關慈禧蛋牛治】語音導航！請大家記得睇完，幫手「#訂閱」我條YoutubeChannel！同埋介紹多啲人睇！

https://youtu.be/Qjj5Luqe--U

留名, 點解唔開係學術台

【常威中史】為慈禧平反系列（七十一）

德國人就咁就要咗膠州灣同青島，講真真係so easy，其他人睇見咁Jet so？冇理由唔搶埋一份架？

於是繼德國人之後，俄國人又開口要租借旅順港，之前已經講過，西伯利亞鐵路合作計劃俄國佬已經響大清攞過著數，但又要割地，初初大清當然唔肯制，俄國崇禎尼古拉二世打算派海軍陸戰隊強行登陸，攞咗旅順再算。但後來，佢哋採取另一種和平友善嘅方法攞地，就係畀錢，不過唔係畀錢大清，而係畀錢李鴻章。簡單啲講係行賄，如果大清有ICAC，己經可以拉人封艇！不過大清當然冇ICAC啦，就算今日嘅中華人民共和國都未有啦，香港勝在有ICAC，邊個搞出ICAC？要記住啊，係六呎七吋高嘅麥理浩爵士。

行賄價錢係50萬兩白銀，折算1億5000萬港圓，李鴻章袋袋平安，就簽紙將旅順租借俾俄國人25年。寫到呢度真係火都嚟，喪權辱國真係自己攞嚟衰，雖然「貪污」響中國人文化係天經地義並唔犯法，但上次講過李鴻章已經完全失勢，當時佢亦被褫奪北洋大臣一職，理論上冇正式官職響身，我真係唔明點解佢仲有權簽紙割讓旅順港，唯有講句，大清嘅制度真係亂柒咁嚟，你係完全估佢唔到，你係完全估佢唔到。

俄國好似曾江「得」一聲，又得咗！英國同法國當然不甘後人，1898年大英帝國租借咗山東半島原本嘅北洋海軍基地威海衛，租約同時都係25年，加埋拓展香港地界，即界限街以北嘅「新界」，租借期99年，就係呢單嘢，先引申出1997四個不祥數字。法國租借廣州灣25年，去到呢度，大清沿海嘅重要戰略據點，差不多完全落入列強手上，後世所謂列強瓜分中國就係咁解。據說每次割地，豆斗同劉晶都哭哭啼啼，呼天搶地，但有卵用麼？鬼叫你窮？鬼叫你打輸甲午戰爭？

日本人睇住事情嘅發生，心裡邊仲難過，當然唔係替大清難過，而係替自己難過，響佢哋嘅角度，只係覺得歐洲列強瓜分咗佢哋原有嘅戰爭利益，佢哋都係受害者之一（？）。甲午戰爭係日本人打嘅，幾萬條人命係日本人付出，但得到最大嘅利益竟然係從來冇做過嘢嘅西方列強。亦因為呢個緣故，日本國內民衆仇洋嘅心理更加熾熱，佢哋明白，唔想再受洋人欺壓，就一定要更加強大。之後日本國內右翼橫行，軍人當道，國民共識東亞係佢哋嘅，唔係歐洲列強嘅。「軍國主義」同「大東亞共榮圈」就係由此誕生，之後幾十年生靈塗炭，其實大家都有責任。

如果有一個叫「攞中國人著數榜」，排第一嘅一定係俄國佬，地緣關係，佢哋同我哋太近喇，就好似墨西哥好近美國、波蘭同德國一樣，想避都冇得避。數數埋埋，大清連同之後嘅民國加中共，俄國人合共掠奪本來屬於中國人嘅土地，直情有一個美國咁Q大，好撚奇怪，一個比長洲大小小嘅釣魚臺島屌足幾十年，反而從來就冇人去追究俄國人？所以有時，同人借錢千祈唔好借十零廿萬，要借就借夠一億幾千萬，世情都係咁，細數會追你還錢，大數反而唔敢搞你。

政治方面，俄國人對中國嘅影響更加前無來者，1921年中國共產黨係由「第三國際」（Third International，即共產國際）親手建立，布爾什維克革命勝利後奪權嘅蘇維埃（Soviet）向中國輸出共產主義同革命。除咗中共，冇蘇聯提供嘅資金同埋軍備，冇鮑羅廷（1884-1951）空降來華，蔣介石嘅廣州政府亦冇可能響1927年完成北伐，打敗北洋軍閥統一江山，同樣冇蘇聯嘅資助同直接介入，中華人民共和國亦唔可以響1949年建立起嚟。唔係要以糧食代替盧布還債畀蘇聯，脫離佢嘅控制，中國亦唔會有三年大饑荒，死3500萬人！

到咗今時今日，俄羅斯依然同中國息息相關，雖然俄羅斯行資本主義，中國仲行緊社會主義，但大家無分彼此，搭埋同一條船，共同抗衡大美國單邊主義，百年好兄弟，其實從來冇分開過片刻，呢啲就可能叫做真正嘅愛情。

【大清亡國關慈禧蛋牛治】
https://play.google.com/store/books/details?id=C3hjDwAAQBAJ

【大清亡國關慈禧蛋牛治】實體購買
https://www.382now.com/product?id=87


#常威 #慈禧太后 #晚清歷史 #李鴻章 #帝國主義者 #俄國

我有冇需要去學術台開個貼？

推推

【常威中史】為慈禧平反系列（七十二）

自從1895年打敗甲午戰爭，大清帝國陷入咗畀列強瓜分、予取予攜嘅局面，伸手就要，易過借火。劉晶當權，有求必應，只要你開聲就得。1898年5月29號，鬼子六恭親王去世，恭親王在世嘅時候，係大清洋務派領袖，隨住佢嘅死，大清進行咗30年嘅洋務運動，可以講亦宣佈正式全盤失敗。

1895至1898年依兩三年間，慈禧仍然退居幕後，大清不思進取，叻仔劉晶對整個局面完全失去控制能力，再咁落去，帝國瓦解亦都係理所當然……

1898年戊戌年，之後發生咗非常重要嘅事件「戊戌政變」。以下係一般人師奶阿叔對戊戌政變發生過程嘅睇法（或稱之為中學史觀）：

『首先，一級大好人改革者夜葬真妃嘅光緒皇帝見到大清積弱同被列強瓜分，於是接納咗梁啟超康有為等人嘅改革意見，聯同幾個有識之士，大刀闊斧進行全國性嘅深入改革，企圖挽救搖搖欲墜的大清帝國。起初改革過程非常順利，大清欣欣向榮，人人都like，呢個亦都係大家口中理解嘅「百日維新」內容。但係喺呢個時候，邪惡同守舊嘅老不死女巫婆慈禧太后突然復出奪權，出手阻撓改革，要求大清重歸回頭路。於是光緒同埋「戊戌六君子」等人決定發動一場兵變，徹底清除慈禧太后影響力，佢哋首先聯絡喺天津小站練兵嘅太陽能電筒袁世凱，袁世凱表示同意join group，但轉頭條杏加橙即刻向頂頭上司榮祿篤背脊，榮祿將兵變嘅事講畀慈禧太后知，於是萬惡嘅慈禧先下手為強，搶先一步發動政變，鎮壓異己，囚禁光緒，六君子人頭落地。一場可歌可泣，足以挽救大清同千千萬萬水深火熱同胞嘅大改革全盤刹停。於是，大清完全失去希望，繼續封建保守，最後亡黨亡國，責任全部喺慈禧一個人身上。』

睇電影同睇電視劇，大家都好鍾意忠奸分明，復仇者聯盟要有滅霸（Thanos）做大佬比Superheros打。戲劇世界裡邊，總要有正義嘅一方同邪惡嘅一方。隨後國共兩黨重構大清歷史，呢個流傳咗百幾年嘅「戊戌政變」劇本有極重嘅戲劇成份，抹黑慈禧已經唔使多講。我常千戶想提出嘅係，忠奸分明劇本嘅好處係，要配合廣大民眾嘅知識水平，寫出真相可能大家都睇唔明。簡單啲畀套電視肥皂劇你睇，大家就以為自己乜都知道曬。唔係愚民政策，政策本身要有「愚民」存在先得架。

不過最離譜嘅係，「戊戌政變」個標準劇本係將忠奸調轉咗黑白調轉咗，忠變咗奸，黑變咗白。有人講中國近代史就一堆「屎」，夾硬執質你食，食到你屎都話香，其實一啲都冇誇張到。

下次繼續戊戌年發生嘅事……

【大清亡國關慈禧蛋牛治】實體購買
https://www.382now.com/product?id=87


【大清亡國關慈禧蛋牛治】
https://play.google.com/store/books/details?id=C3hjDwAAQBAJ

【三島悠亞作品系列】
https://goo.gl/skc493

#常威 #慈禧太后 #晚清歷史 #戊戌政變 #光緒

【大清亡國關 #Tom Cruise 蛋牛治】

好多人都鍾意將中國同日本比較，最近北海道地震大家有又比較一次，好多傳媒都講日本人非常之守秩序，地震之後互相幫助，真係一個亞洲民族典範，大家睇到，就非常之羡慕日本人。

我常公子反而睇到另一件事，2004年福島核電廠事故之後，日本人似乎仍未得到教訓，其實日本依個國家身處一個地震頻繁嘅塊板上，應唔應該用核能發電，係好值得商榷嘅。福島事故發生之後，日本仍冇反思核能發電。反而德國因為福島事故，國內大力取締核電廠，推動改用環保發電國策。

我再講多次，人比人比死人，尤其是千祈唔好同猶太人日耳曼人比……

【#大清亡國關慈禧蛋牛治】語音導航！請大家記得睇完，幫手「#訂閱」我條YoutubeChannel！同埋介紹多啲人睇！

https://youtu.be/Lszv-20Z19k

最後冇事

【常威中史】為慈禧平反系列（七十三）

未講戊戌年發生嘅事之前，首先要講吓一對即將登場的主角。

1862年至1895年間，成個大清現代化過程始終抱住一條阿婆紮腳布唔肯放，就係所謂「中體西用」。清國人從來冇諗過放棄傳統嘅儒家思想哲學宗法系統。即所謂君君臣臣父父子子。佢哋諗住學習西方嘅技術同科技，加埋中國果套固有嘅天下無敵傳統思想，就可以一躍成為一個現代化國家，殺出一條新血路。直到佢哋比對岸一個小國---一個響短時間內全盤西化、全盤學習西方文化制並徹底拋低自己原有文化同生活習慣嘅---日本徹底打敗之後，先至完全被嚇到瀨屎，知道唔改唔得。

簡單啲講，19世紀末期嘅清國，已經係一個設備技術現代化嘅國家，但政治制度仍然處於中世紀時代。對於政治制度改革嘅呼聲，孫中山康有為梁啟超唔係第一批，早有李鴻章淮軍幕僚馮桂芬（1809-1874）、知識份子容閎（1828-1912）提出過改革整個大清嘅政治制度，追上大時代。

容閎要提一提，佢係廣東珠海人，係第一批留學美國嘅中國人，獲得耶魯大學榮譽法學博士學位。但係響大清傳統士大夫嘅陣營裡面，佢哋微弱嘅聲音冇俾人哋重視到。而真真正正將中西理論結合，並轉化為政治行動，矢志推動變法，禍延家國且名揚天下嘅人，就係康有為（1858-1927）。

正確來講，康有為提出嘅改革就係四個字：「政治西化」。

康有為係廣東佬，佢嘅大弟子梁啟超亦都係廣東佬。不問而知佢哋嘅先進思維其實都係嚟自英國殖民地香港。其實由19世紀開始，中央政府就視香港為顛覆基地，呢個根深蒂固嘅概念，到今日都仲未改變過。

康有為係廣東南海人，大孫中山八歲。佢一個同鄉叫洪秀全，即耶穌細佬。南海康家係書香之家，世代做官。佢嘅祖先做過二品大官，佢老老豆豆康達初亦都喺江西撈過知懸，據康有為自己講，佢哋已經係十三代讀書人。康有為同好多依一類大人物一樣，自細就係一個神童。孫中山係神童，梁啟超係神童佢都係神童。佢11歲就讀完四書五經，之後博覽群書，喺鄉下好有星味。但係佢一直都考唔到鄉試做公務員，13年間，神童康六考六敗，真係冇面見江東父老，對於一個自負極高嘅知識份子嘅心理打擊可想而知，洪秀全就叫樣黐X咗線。

但係神童康冇放棄過，終於去到36歲，佢博咗條老命終於響鄉試中舉，行運一條龍，兩年之後，38歲佢仲喺北京考中埋進士，所以有啲嘢千祈唔好放棄，衹要有恆心鐵柱磨成針，當然家底要夠厚先。如果將件事放喺今日去睇，有個柒頭考大學考到36歲先考到，我諗大家都會覺得佢係痴鳩線嘅。但係中國古代嘅讀書人，考試做公務員似乎係佢哋唯一嘅出路，康有為彈起之後推動變法，當中一條就係廢除科舉，睇嚟佢對考試制度的確係恨之入骨。

半生行行企企嘅佢，周圍宣揚理念，談論政治，結交朋友，擴充人脈，竟然畀佢撈咗個「聖人」嘅朵返嚟。識人好過識字又一個好例子。如果用今日嘅概念去講，聖人康就係一啲叫公共知識份子嘅物體，公知呢享人你可以話完全冇用，但係佢又可以好有用。佢哋可以代表住一個社會、甚至國家民族嘅良心，佢嘅言論可以代表社會上面大部分（或小部份）嘅意見同價值觀，時來運到佢哋可以做埋官，更加可以影響政治同歷史嘅發展方向。捷克前總統茨拉夫哈維爾（Václav Havel，1936-2011）就係近代最成功嘅例子。

做得唔好嗰啲，咪好似我常千戶咁X樣，四個字：廉價文人。


#常威 #慈禧太后 #晚清歷史 #戊戌政變 #康有為

【大清亡國關慈禧蛋牛治】實體購買
https://www.382now.com/product?id=87

【大清亡國關慈禧蛋牛治】
https://play.google.com/store/books/details?id=C3hjDwAAQBAJ

課金乞兒買飯盒食