今次打算用有趣、淺白既方法去講下香港歷史

左衛門佐 2018-02-06 20:56:09

留名

科學怪人 2018-02-06 22:15:43

15. 由借錢文化講撕紙銀行

作為香港人，每日收到一兩個推銷電話係係家常便飯
當中最常聽到既都係乜嘢低息貸款之類

而家香港銀行多過米鋪，係鐵一般既事實，借錢都係人地求你
不過喺香港開埠初期，想借錢，特別係用於做生意係難過登天既一回事

喺1850年代，隨住香港貿易同航運業務發展，怡和、寶順等既大洋行都設有銀行業務部

不過因為始終多個香爐多隻鬼，實際上果d 洋行唔會輕易批出貸款畀其他急需發展既細洋行

為咗應付香港同中國公司既借貸需要，英資銀行例如渣打、有利等都喺香港開設分行

可惜始終分行如果要批出大筆貸款既話都需要請示英國總行，而以當時既通訊條件嚟講就顯得費時失事，要急用基本上無可能批得出

咁大英輪船公司既香港分公司負責人蘇石蘭有一日就收到某個船長傳來消息，話有一間總部設於孟買既「中國銀行」（非中共國企）準備喺香港設立總部，並且會對往來中國同日本既貿易直接提供貸款

船長仲教路話如果可以趕喺中國銀行公開招股之前認構既話一定可以勁賺7成

不過蘇石蘭就覺得，畀人賺不如自己做
佢睇得出香港商界對於本地銀行係有實際需要，於是就有一個目標，就係要搶喺中國銀行開張之前快手另外創立一間銀行

為咗快手，蘇石蘭用咗短短5日時間同哂喺香港既洋行聯絡，並且撰寫撕紙銀行成立既計劃書，點都要搶喺中國銀行之前招股

兵行險著，蘇石蘭甚至未經過部分洋行既同意(只係畀人地睇過計劃書而人地根本未有表示)，就頭版刊登宣佈各大洋行既老細作為臨時委員會既成員，令到香港大眾都誤以為撕紙銀行係各大洋行既支持，對於往後既招股都非常有利

撕紙銀行強調自己直接對中國既貿易有興趣，喺香港同上海投資者都有得認購股份

只係短短一星期，喺香港招股既部分，已經超額認購

過咗兩三個禮拜，「中國銀行」既特使先至喺到香港招股，可惜一股都無人認購，亦都搵唔到任何有資格既人做董事，未開門先收皮