今次打算用有趣、淺白既方法去講下香港歷史

多謝快肉巴

有你呢句我遲下分享虎貌別墅既修復，有拖無欠

潛咗兩日唔見你
一出返你就即到
好感動呀

支持樓主

好撚鍾意樓主依種明明自己係教人野
但仲謙虛過聽書班人嘅態度
Keep住

咁我自己睇過果幾本書都係一知半解

有賴各位幫我百_成材先至會學到野

實在無資格唔虛心

多謝巴打

新亞畢業幫推

而家啲院長唔奶共已經偷笑

你就好啦，有機會成日食檸檬批

新亞畢業幫推x2
院歌歌詞「艱險我奮進，困乏我多情」真係唔係講笑

咁快已經兩個新亞

留名

好好睇，推

Lm

43. 由新亞書院到中文大學

喺美國既冷戰思維當中，香港被視為東方既柏林，係對抗共產主義既一個重地。而隸屬於美國耶魯大學既中國雅禮協會(Yale in China Association)都明白到香港得一間HKU係唔夠，當香港既青年無書讀就唯有北上升學，即係有機會接觸到共產主義思想

雅禮既然無辦法繼續喺中國大陸既教育事業，唯有選擇將所有預算都放喺發展香港華人既高等教育。

耶魯歷史教授Rudin考察咗香港十幾間既專上學院，發現大多都係以牟利為主，得新亞依間「手空空，無一物，路遙遙，無止境」(院友應該聽過依首校歌）既書院真係有心去保衛中國文化

於是雅禮決定選擇新亞作為合作對象，1954年開始分5年共批出12萬5千資助新亞既營運同擴展

有大水喉射住之後，1955年新亞已經規模化，行4年制，有5個學系可以讀：文史、外國語文、哲學教育、經濟學、商學

1956年暑假，新亞喺九龍農圃道既新校舍落成，有教學樓、宿舍、科學研究室同30萬藏書既圖書館，唔再手空空

而喺新亞書院發展既同時，另外仲有崇基書院同聯合書院都努力為香港既華人青年提供高等教育。為咗爭取香港政府既支持同資助，三院喺1957年2月成立咗香港中文專上學校協會，勢大先至可以引起到人既注意

至於政府方面，因為香港人口激增，HKU 已經滿足唔到大家既升學需要，亦都認同需要多一間大學。終於喺1959年開始，政府宣佈資助三院成立一所以中文授課既大學，但有幾年時間畀佢地過渡，包括提升師資、課程同學生既水平，令到三院可以真係合符一間大學既水平

1963年香港中文大學正式成立，並且會作為以中文作為授課語言既聯邦制大學，錢穆做咗第一任校長，終於鹹魚翻生。可惜既係佢做咗唔夠半年就劈炮唔做，校董會挽留到佢，不過再過多半年佢都係再一次辭職

當然唔係因為跳草裙舞啦
原因都幾耐人尋味，佢喺辭職信度寫：「半載以來，形勢已變，事無昔比，穆意志灰頹，情趣全失」

當時輿論認為辭職牽涉人事鬥爭，但係錢穆自己交代就話係自己唔識處理行政事務，希望可以專注做返學術研究。不過最主要既原因，都係因為以前新亞著重師承關係，同後尾中大著重學分既制度格格不入

一直睇冇留言
支持樓主

支持

留名支持
香港歷史原來咁好睇

有力敦倫但係無錢養 <-- 係咪指勤屌閪，懶湊仔

44. 韓戰期間既禁運政策同走私

喺二次大戰之後，世界上出現咗兩大超級強權：代表共產主義既蘇聯同代表資本主義既美國，佢地喺全球插旗同支持傾向自己既政權，逐漸形成咗冷戰既對峙局面

咁喺朝鮮半島就出現咗李承晚既南韓政權同金日成既北韓政權，而雙方都覺得自己先至係半島既唯一合法政權，亦都各自背後有大佬睇住，意識形態唔同自然就會打仗。北韓首先開火，之後美軍就用聯合國既名義出兵介入，將北韓打到接近中朝邊界

喺中國人民志願軍(其實係正規軍隊)參戰之前，美國就已經聯同英、法、日等國家對中國等既共產黨國家實施禁運。禁既範圍包括軍事裝備、尖端技術產品同稀有物資三大類。加入之後，直情凡係一個士兵可以利用既野都唔准運過去

可惜黑狗偷食，白狗當災。香港同澳門因為喺地理上屬於中國大陸既一部分，所以都連同中共一齊被美帝禁運；喺另一方面又因爲香港係英國既殖民地，要跟返英國對中國實施禁運，所以香港先至算係真正被封鎖得慘慘豬

1950年8月8日，港府對金屬機器、鋼鐵製品、化學品、化學設備、交通設備、石油、電子產品等進行規管。任何人如果想出口依d 野都需要先申請出口許可證；去到1951年聯合國大會表決通過對中國、北韓實施禁運之後，香港甚至再推出更加嚴格既出入口管制

不過香港咁做除咗因為要跟英國之外，實際上仲係為咗要得到美帝既信任，希望美帝認同輸入香港既工業原料係用喺本地正當既工業生產，從而爭取放寬對香港既禁運令

可惜美國都要花時間觀察香港，所以都拖到1952年初先至逐步取消對香港既禁運。喺1951依一年，香港既商界同工廠損失慘重，因為缺乏燃料而停產多時，而大量經香港轉口既商品亦都囤積喺香港運唔到出去，無辦法向外國付運。時任港督葛量洪都指1951年係香港「衰落同貿易凋零既一年」

因為禁運，香港出口到中國既貨由1951既16億跌到得返1953既5.4億，基本上都唔可以再好似以前咁依靠作為中外貿易轉口港嚟賺錢。不過有危就有機，香港有既係二戰後d 人湧落嚟所得既廉價勞動力，正正係因為咁樣有條件進行經濟轉型，大力發展工業生產，造就咗後來1960到70年代既經濟起飛

多謝巴打，睇到邊？