同日晚上,放工不久之後我的屋企。
「啊~~~攰死我喇!!!」我沖完涼之後頭都仲未乾就一野攤左落床到。
望住房間白雪雪的天花板,我又開始沉醉於自己的冥想之中。
呢幾日……真係發生左好多事呀可?
無論係當上聖誕老人,定抑或係遇上莉芙,甚至係同阿詩拉近距離,仲有就係個個關於女孩的「夢」------
一切一切,都黎得好突然、好倉猝。
快到好似我都未了解得切周遭的事物,就已經被順勢推波逐行。
「所有野就好似走馬看花咁。」我徐徐閉上眼。「眨下眼,啐一聲就過左。」
「哈哈。」
......
咦。
唔係喎咪住先。
「啐一聲就過左?!」我立馬瞪開雙眼坐直了身子。「講起上黎,由我遇到聖誕老人個晚開始計起,好似都過左好多日架喇喎!」
「如果係咁既話!------」我伸手取過手機直接打開熒幕。
「12月30日 22時48分」
……
「仆街喇!」我抓狂道。「乜原來聽日就係除夕喇?!」
「點解頭先莉芙無提我架呢?乜佢唔係好著緊架咩?」
「唉最衰我呢幾日實在太多野上心啦,搞到成個人都游離晒,連幾月幾號都無留意添!!!」
稍為冷靜了一點之後,我隨即wtsapp莉芙。
我 : 莉芙!!!
好快莉芙就上左線覆我,睇黎佢同阿詩都應該番左屋企hea緊。
莉芙 : 仲諗住俾d時間你放工番屋企沖涼休息下之後先公審你添!做咩啊,想自首呀?
我 : 關於頭先過數個件事遲下先再講啦!事關依家有件事更加重要!!!
莉芙 : 嗯?
我 : 原來聽日……原來聽日就係除夕喇!!!
係我段信息send左出去之後,莉芙好快就由「上線中」off左line。
「咦?去左邊呢?」我心裡疑問道。
點知就係我奇怪緊的時候,手中的電話突然無故震動起來。
於是乎我俯視一看,就發現係莉芙打電話過黎。
我徐徐按過接聽鍵,把手機放在耳邊 : 「喂?」
「呀!!!!!!」
莉芙的高頻叫聲從另一端傳過來,響徹我整個房間。
「聾喇!!!」我震耳欲聾地把手機拉遠。
「今次弊家伙喇!!!」莉芙仍然係到嚎叫。
「搞咩啊你。」我苦笑說。
莉芙這才死死氣地說 : 「我唔記得左聽日就係除夕啊!!!搞到岩先小生約我聽日去街既時候,我仲大安旨意咁拉埋家姐落水,話咩三人行必有我師焉,一於就三個人一齊行街咁講添……」
「哈哈!」我取笑莉芙道。「乜你唔係好睇重聽日架咩,搞咩會咁失策呀!」
莉芙越講就越沮喪 : 「本來我一直都仲記得架!但只不過係因為!!!------」
講到去呢到既時候,莉芙突然間停左落黎。
「因為?」我好奇道。「因為咩?」
聽筒寧靜了片刻,莉芙才腼腆的開口。
莉芙吞吞吐吐說 : 「咁係因為之後我一直係到諗緊你同家姐岩先出去過數個單野,所以咪……咪分左心囉……」
老實講,我諗當任何人聽到莉芙用呢把嬌滴滴的語氣講呢番帶點曖昧的說話既時候,都應該會當場心臟病發暴斃。
好明顯啦,我都唔例外。
聽到莉芙呢番說話之後,我的心跳隨即瞬間加速起上黎。
「……欵?!」我不知所措的說。「咁……咁即係咩意思……?」
「即……即係……」隔住部電話我都feel到莉芙正臉紅耳赤。「嗚呀~~~!唔知呀~~~!」
嗚呀!莉芙真係好可愛呀!!!
唔通真係學剛才阿詩所講,莉芙對我……真係有意思?
「係呢莉芙,其實你------」正當我鼓起了勇氣想詢問莉芙對自己的睇法既時候,莉芙卻開口打斷了我的說話。
「拿,總知咁啦!」莉芙嘗試冷靜下來道。「Santa你聽日就乖乖地等我電話啦!我會叫你去扮偶遇我地,然後我再偷偷地同小生遛走,等你同家姐去睇煙花!」
我打算勸多一次莉芙其實唔洗咁趕急 : 「之但係------」
「唔洗但係啦!咁好既增進感情機會,點可以浪費!」莉芙的聲音睇起黎好著急咁。「一於就係咁,好無?」
「er……你點話點好啦。」我都免得令莉芙傷心的說。
同莉芙傾完聽話收線之後,我重新攤軟在床上。
「嗯……」我側身把被單擁進懷內。
「莉芙,究竟你心裡面係到諗緊d咩呢。」
夜已漸深,睡意使得我眼皮越來越重,最後眼前一黑徐徐朦朧地進入了夢鄉。