序
「Happy Christmas eve !」
今晚係普世歡騰既平安夜。
雖然每年越見溫暖的天氣經已大大銳減左冬日聖誕的氣氛,之但係咁樣依然無阻一對對的愛侶在尖沙咀海旁上圍爐取暖,共渡佳節。
而我作為一個時下的青少年,當然亦希望乘著節日愉快的涼風,感受一下久違的溫暖啦!
「又到聖誕,又到聖誕!」我正以時速三百公里的速度駕駛著BMW。
咳咳對唔住,BMX先岩。
「快快手番歸先!」我俯視了一眼車柄掛著的外賣乾炒牛河配凍檸茶。
……
係呀我係無人約呀吹咩!
「無人約又點喎!」我在渺無人煙的住宅區單車路上興奮地大叫著 : 「只要我今晚可以打到俾阿詩同佢講聖誕快樂,就咩都抵番晒啦!」
一諗到陣間十二點正我就可以聽到阿詩把聲 (仲要同我講聖誕快樂) ,真係當堂就想跳番part開心舞呀!
「無比溫暖,呵呵。」
落完個急斜之後,我轉彎駛入行人隧道。
點知就係呢個時候。
「嘭!」
一陣重搥相撞既聲音,我突然feel到自己係空中飛緊。
半秒之後,我一個完美頭頂落地,成個人撻左係地下。
「啪!------」我痛到即刻禁實個頭。「嗚呀……好撚痛......」
等到痛楚散去不少,我才能夠勉強睜開眼。
「發生咩事啊頂。」我輕揉著自己個頭頂,同時抬起頭來望向前方。
當我睇清楚眼前的事物之後,我的嘴巴頓時張開得可以塞下整個合味道杯麵。
事關就在那不遠處我的單車前方,竟然躺住了一個打扮成經典聖誕老人外表的肥老伯。
拿雖然本來呢D醉酒佬係大時大節扮鬼扮馬飲到貓晒訓係街邊就好正常既,咁身為「事不關己協會會長」的我平時當然亦少理為妙。
之但係今次個問題係……
我岩先好似迎面撞到佢順便使出左招「韋馱天跳躍」。
於是乎佢依家成口白泡咁訓左係地下到,郁都唔郁。
「屌,我一個唔留神,撞死左聖誕老人?!」