范蠡西施：稼軒愛情與家國之理想人生
並讀辛稼軒杏花天(嘲牡丹)、洞仙歌(開南溪初成賦)
《稼軒詞》的「美人」是嬌豔之傳統佳人，又是縹緲絕塵之夢中知音、心中家園；是作者自身性別角色異化的替身，又是詩人美好內在世界的對象化；是詩人心靈慰藉、躲避風雨的港灣，又是生活中詩人貶斥、驅使、遭受非人待遇的奴僕，她們無論是確有所指的佳麗，還是做為自我際遇之借代、江山之喻體、精神之象徵，都充分體現了作者對於人類生命價值的崇高期待。
——舒紅霞、劉歡〈《稼軒詞》「美人」的文化意蘊〉
正文第十章
古典文學用典，必然有所寄託
考察大文學家留下嘅作品
除單篇評價，宏觀整體咁睇都好重要
特別係好似稼軒呢種成日用典故嘅詞人
透過詞人有意無意咁連續運用相同嘅典故
可以睇出詞人深層嘅情志
稼軒寫詞，成日都用歷史人物
男嘅有廉頗、項羽、荊軻、韓信……
女嘅有楊貴妃、趙飛燕、王昭君、陳皇后……
男嘅多係英雄豪傑
女嘅多係絕世美人
表達嘅情志無法一概而論
但講到稼軒，以范蠡、西施典故最重要
西施，更係歷史美女中出現最多嘅
一共有八次，反覆出現
我地一定要追問：
西施有咩咁特別？
點解稼軒會咁鍾意講西施？
稼軒 杏花天(嘲牡丹)
牡丹比得誰顏色？似宮中太真第一。漁陽鼙鼓邊風急，人在沈香亭北。
買栽池館多何益，莫虛把千金拋擲。若教解語應傾國，一個西施也得。
鼙鼓：騎兵用嘅小鼓
我地先讀一首小詞
上半片係以牡丹比喻楊貴妃
先讚楊貴妃「似」官中第一美女
再用「漁陽鼙鼓」批評
「漁陽鼙鼓」，即係講：
唐玄宗寵幸楊貴妃，荒廢政事
安祿山以「清君側」之名
於漁陽舉兵叛唐事
即係我地成日講嘅安史之亂
下半片歌頌西施
做咩要比咁多錢種室內嘅花？
又有幾人睇到，有益於世？
如果講到全國最善解人意嘅美女
一個西施已經超越哂其他人
上半片以歷史典故評價楊貴妃
下半片嘅歌頌，其實都係出於西施一生
越王勾踐之能夠反攻吳國
都係因為西施以美色報國，迷惑吳王
係犧牲肉體嘅女間諜
西施嘅存在，甚至比成支軍隊更重要！
稼軒眼中，西施遠超楊貴妃
自然無女人比西施更值得歌頌啦
