【古典文學】驀然回首，那人卻在，燈火闌珊處——詞中之龍辛稼軒

講到呢方面，係接受史問題
魯迅嚴格講都唔係第一個寫現代小說嘅人
係佢前面已經有人用白話文寫小說，登左出黎
接受史重點在於，有冇受人關注，納入討論
係幾近全部人眼中覺得佢係突破
就算事實唔係，個效果都係出左黎

九唔搭八講少少嘢
魯迅喺我心目中係一個精神分裂嘅痴線佬
你讀佢本《魏晉風度及其他》，再讀佢啲演講，再讀佢啲小說
你都會痴線

有人同你講：老友，中文係廢嘢嚟，學羅馬拼音甚至廢咗佢學拉丁字母重好
然後又突然同你講，老友，讀書最好讀下全上古秦漢三國六朝文，勉強夠用

我屌那星你即係咩意思，否定中文本身又要人讀呢啲唔精通中文就讀唔倒嘅書

你可以話魯迅係好矛盾，但佢係自覺呢種矛盾而加深佢嘅反省同批判
讀過小學大概都會聽過魯迅、周作人、朱自清等等呢堆作家，因為佢地寫下好多學術巨著
魯迅離唔開中國傳統，寫古詩都唔少，又研究中國小說
但正因為佢了解傳統，又著眼於中國非西化不可，批評傳統緊係更一針見血
特別係講中國民族嘅醜陋，用係今日都仲係好中
矛盾與痛苦，傳統與反抗，係魯迅一世人嘅主題
五四時代嘅影響至今未絕，不過反思已經好多
或者係呢個世代，中文學界可以走出另一條路

岩岩先睇到個post
探長有無興趣講李清照？
古代女詩人好值得探討

探長講極都係男人
小心比婦聯告呀

下個講女人

開埋現代文學？

我都想睇

探長可以先講下張愛玲，白先勇做入門

或者講下魯迅，我冇乜睇過

中國現代文學又係另一個世界
相對黎講，要講現代文學難過古典文學
因為入門門檻低，要講更多進階嘅知識
而且資源無古典文學咁多年咁豐富
睇吓放長假時再準備吓點講

民初比較特殊，嗰班人大部分古今皆通，章太炎弟子例如錢玄同、魯迅、周作人亦如是。好似魯迅本身算係半個文選妖孽，但同時又識日、俄文，睇嘅嘢會廣啲，又因為佢鍾意莊子、嵇康，所以對所謂「中國文化」嘅態度比較曖昧，如果本身熟知六朝文學，會比較容易睇到魯迅小說入面用咗非常多典故。

例如《朝花夕拾》，個名係反用陸機〈文賦〉「謝朝花於已披，啟夕秀於未振」，但當然，魯迅係因為讀太多古籍所以不知不覺用定有心用，就要靠讀者去諗。

你個post真係唔可以一次過睇晒
次次睇一段 又要咀嚼下 又搵下史料睇下
Btw 中學已經覺得佢好鬼有型

講咁耐都未有花千樹
會唔會有生子當如孫仲謀

白先勇有散文作品《樹猶如此》原來出自此處

「登覽」呢個term無聽過，中學都無講，又學到野

〈水龍吟〉係咪同樣係詞牌名？

其實古代詩詞點樣傳遍中國？
如果我係北方聽到某大學者新作品
馬上走去南方話係自己作得唔得？

巴打呢個問題好好
學術咁講，中國文學傳播論嘅問題
我地要明白，傳播絕對唔係100%流傳落黎
好多好多其實都已經消失於歷史洪流啦
好似李清照咁，好多詞都唔見左啦……
少數出名，係當時又勁嘅文學家，先有幸流傳至今
（當然有權有勢嘅人，寫得唔好，都會留低啦）

傳播，係點嘅呢？
1.官方機構，好似詩經咁成書
2.私人出版，詩詞文集
3.題字題詩，各地皆見
4.口耳相傳，呢個好大
好似詞可以唱，大家流傳開去咁
古人娛樂唔多，文人如明星
詩文等，都會競相傳誦
主要嘅形式，應該都係咁

唔記覆埋最後抄襲嘅問題
其實古典詩詞成日有化用、挪用句子
並無現代嘅版權概念
仲會有人寫完特登偽托話係古人寫
不過如果係完全一模一樣抄襲
遲早都會比人知，何必呢
呢種情況唔普遍
就算有，後代多數會真相大白

（後改）天生我才必有用，千金散盡還復來 ----->

（原文）天生我徒有俊才，千金散盡還復來

休說鱸魚堪膾，盡西風，季鷹歸未？ 求田問舍，怕應羞見，劉郎才氣。 可惜流年，憂愁風雨，樹猶如此！ 倩何人、喚取紅巾翠袖， 搵英雄淚？

下半片著重於情感抒發，唔直接講
以兩個進、退嘅典故為句
接連上半片「無人會，登臨意」
用典本係才學嘅呈現
重點在於拋書包能否表現自己嘅情志

「休說鱸魚堪膾，盡西風，季鷹歸未」之句
出自《世說新語·識鑒》：
「張季鷹辟齊王東曹掾，在洛見秋風起，因思吳中菰菜羹、鱸魚膾，曰：『人生貴得適意爾，何能羈宦數千里以要名爵！』遂命駕便歸。俄而齊王敗，時人皆謂為見機。」
季鷹係齊王手下
有日掛住屋企嘅菰菜羹、鱸魚膾
突然話返去啦，最緊要開心
做咩要比名利官位局限太多呢！

稼軒化用此典，係到反問：
唔好再提呢種搞到人退隱嘅食物啦
西風盡處，季鷹真係返去嗱？
季鷹象徵「退」
但我地都知，稼軒係欲退不甘
稼軒放唔低家國故土
不甘於此，故云「休說」

「求田問舍，怕應羞見，劉郎才氣」
出自《三國志·魏書·陳登傳》：
汜曰：「昔遭亂過下邳，見元龍。元龍無客主之意，久不相與語，自上大床臥，使客臥下床。」備曰：「君有國士之名，今天下大亂，帝主失所，望君憂國忘家，有救世之意，而君求田問舍，言無可采，是元龍所諱也，何緣當與君語？如小人，欲臥百尺樓上，臥君於地，何但上下床之間邪？」表大笑。
漢末，天下大亂，許汜只係識置地買房
劉備批評佢剩係識求田問舍
簡直影衰祖宗十八代

稼軒對於此典
又有別出心裁嘅挪用
「羞」之一字
盡見其不甘退隱之意
稼軒都驚比有志氣嘅人睇唔起架

呢兩個典故嘅句法充滿起伏衝突
詞人先以「休」、「求」似否定「退」
但又徘徊在無法抉擇嘅苦惱，生出張力
稼軒面對家國危難
時間流逝，朝野昏庸
自己又無法一展所長
正係欲進無路


「可惜流年，憂愁風雨，樹猶如此」
焦慮、憂愁一如風雨之連綿不休
詞人講：
可惜浪費晒咁多年用呀！
稼軒此處再用典故
《世說新說·言語》：
「桓溫北伐經金城，見從前所植柳樹已長得十分粗大，慨然嘆道：『木猶如此，人何以堪！』」
桓溫係將軍，殺人無數
但係戰爭回國嘅一刻感到生命嘅局限
大將軍，都無法反抗時光流逝之悲痛
稼軒對「人何以堪」嘅存在悲痛，深有同感

倩何人、喚取紅巾翠袖， 搵英雄淚？
自古以來，英雄悲涼
往往只能靠美人聊慰己心
半點柔情，成就淒美
詞人面對這些壯志難酬嘅掙扎
家國將亡嘅苦難
唯有講：
邊個有個可以安撫我嘅人呢？
就比呢位美女，抽出絲巾
輕輕擦拭我默默流下的嘅眼淚
柔柔慰藉我難以言表嘅悲情

呢首詞非常精彩，沈鬱頓挫
用典雖多，實為詩文化結晶之呈現
我地可以由呢首詞引出後面嘅主題：
稼軒係人生困境
欲進無路，欲退不甘嘅狀況
點樣嘗試為自己生命尋找出路呢？

詩用學：古代文人點寫求職信？
齊讀辛稼軒一剪梅(游蔣山，呈葉丞相)

昨夜洞房停紅燭，待曉堂前拜舅姑。妝罷低聲問夫婿，畫眉深淺入時無。
—— 唐．朱慶餘

稼軒 一剪梅(游蔣山，呈葉丞相)

獨立蒼茫醉不歸。日暮天寒，歸去來兮。探梅踏雪幾何時。今我來思。楊柳依依。

白石岡頭曲岸西。一片閑愁，芳草萋萋。多情山鳥不須啼。桃李無言，下自成蹊。

正文第三章

稼軒少年得意，至日後不斷追憶
好多讀者都會將眼光放在稼軒呢種掙扎
人生掙扎之於文學，係最佳嘅調味料
但我地不妨先睇更前面嘅時期：
係稼軒陷於追憶前
佢係點樣努力希望可以一展抱負呢？
稼軒係點樣盡一切嘅力量
以擺脫中國文人「士不遇」嘅文化命限？

詞題「呈葉丞相」，比左閱讀嘅定向理解我地
稼軒呢首詞，係為「社交」而寫比葉丞相嘅
係唐詩入面，成日將「遊覽」與「呈某某」合埋
寫景為實，寄託為虛
言外之意，先係文學家想表達嘅用
古代中國，詩係無所不在
係知識分子來往溝通嘅重要工具

稼軒呢首詞正能呈現「詩用」
稼軒曾經做過葉衡嘅幕僚，老細對佢都幾賞識
葉衡回京升任參知政事，即係宋代副相
哇，真係權高位重，飛黃騰達
咁稼軒緊係想再追隨葉衡
唔想再被人投閒置散
故借蔣山一遊，講出自己呢番心意


稼軒 一剪梅(游蔣山，呈葉丞相)

獨立蒼茫醉不歸。日暮天寒，歸去來兮。探梅踏雪幾何時。今我來思。楊柳依依。

上半片以蔣山之景隱喻自身嘅辛酸無奈
起首「獨立蒼茫」係實景
「醉不歸」係虛意
蔣山獨遊，雲海蒼茫，真係好獨寂呀！
呢一句已經好具體咁講出詞人心境

稼軒手中持酒，麻醉身心
士志於道，立德立功
儒家式人生理想，無一樣嘢做到
蒼茫係人生心境
獨立係落寞之情
「不歸」，唔想返去俗世
呢種唔想，含蓄咁表達傷心之情

「日暮天寒，歸去來兮」
日暮天寒，又一悲涼之景
時間推移，等到身心俱寒，詞人先肯歸去
歸去一句化自陶淵明，暗示國家處境不堪
不如學陶淵明咁退隱啦！

「探梅踏雪幾何時。今我來思。楊柳依依」
探梅踏雪，係佢冬天做葉衡幕僚時
楊柳依依，係葉衡返京，佢六月仲係舊地嘅風景
詩經：
昔我往矣，楊柳依依。今我來思，雨雪霏霏。
呢種中國文人一定識嘅典故
緊係比葉衡知道稼軒對佢嘅「思念」之情啦


白石岡頭曲岸西。一片閑愁，芳草萋萋。多情山鳥不須啼。桃李無言，下自成蹊。

白石岡：地名

下半片同係蔣山之景，再對葉衡擦擦鞋
稼軒落山，只感「一片閑愁」
「閑愁」二字，有講好似無講咁
咁係稼軒唔想直接講出愁緒嘅原因

個情況好似你想求人幫你
但無理由咁無禮貌入人地中路架
一陣人地唔想幫，咩面都無哂
稼軒不欲明示葉衡想提拔吓佢
呢種情況，最考文人功力

稼軒不愧為大詞人
將呢片愁之虛意
以芬草萋萋之實比喻
大自然嘅無窮無盡，一如稼軒之愁
正係化用賀鑄嘅：
試問閒愁都幾許？一川煙草，滿城風絮，梅子黃時雨。
睇落含蓄，但有識之士一睇就知

「多情山鳥不須啼。桃李無言，下自成蹊。」
傻架，山鳥邊到會「多情」？
其實呢到係詞人以鳥自喻
呢種啼叫，唔係好似自己嘅詞作咩？

稼軒多情只因有歷史懷抱，只因對家國有情
但佢竟然話：唔好再叫啦
你再叫，都唔會有「知音」聽到架啦
以退為進，緊係話比葉衡聽自己無人理

最後詞人以「桃李無言，下自成蹊」作結
揶用《史記．李將軍列傳》句子
桃樹有花果，下面自然多人行到變成一條路
反轉頭歌頌葉衡唔需要成日自我宣傳
就有好多Fans擁護佢
至此，「呈葉丞相」顯題
稼軒希望葉丞相呢個咁勁咁有知人之明嘅人
能夠了解自己嘅才能抱負
比一個機會我
一定唔會令你失望架！

現代文學成日話話「美」同「用」不能並存
其實「用」和「美」絕非對立，互為顯隱
稼軒此詞兩者兼有，正是力證
而葉衡不久後推薦稼軒「慷慨有大略」，受召朝中
任倉部郎官，或者此詞真係有「用」啦！

現代冇咩人寫得出，包括我

你個post真係唔可以一次過睇晒
次次睇一段 又要咀嚼下 又搵下史料睇下
Btw 中學已經覺得佢好鬼有型

全詞結構之奇妙，在於最後一句
單睇前面九句，全係少年反金嘅回憶
最後一句竟然跳回當下嘅悲嘆
「可憐白髮生！」
呢一句，到底隱含多少嘅悲憤？
係哀人生嘅不遇
係怒世人嘅冷漠
係對朝野嘅憤慨
係恨反金嘅無奇
…

last一句可憐白髮生，好一個反高潮，太突然了，有電影畫面feel

稼軒破格之舉
文學貴創新，然創新非大文學家不可
我地讀過嘅四位文學家
無一位唔係勇於破格

汝中文系乎？

求題解
探長可以詳述下破陣子嘅含義？
我一睇以為辛棄疾要破咩戰陣？上網睇係古時一首戲曲名，即係參考典故？

破陣子，係詞牌名
九成九我地睇書都係睇到呢個解釋
咁要理解，我地要更進一步去問：
咩係詞牌？
點解會有呢樣嘢？

我地睇返以前嘅古詩
詩經都係有音樂
只不過呢種文學嘅音樂後黎失傳
得返文字記錄
文學起源，同音樂係好大關係
世界大多古文學都離唔開音樂
同今日嘅文學觀相距幾遠

有呢種認識
我地可以再睇返詞嘅發展
都係好著重音樂嘅
有學者咁樣概括詞嘅發展：
「勾萌於隋，發育於唐，敷舒於五代，茂盛於北宋，煊燦於南宋，剪伐於金，散漫於元，搖落於明，灌溉於清初，收穫於乾嘉之際。」
唐代有官方機構教坊，專門培訓官妓
教佢地好多娛樂嘅音樂、舞蹈
宋、元、明都有，清代先無
宋詞之詞牌，九成九出於呢個機構
所以我地成日見到：「唐教坊曲」四字

咁樣，我地再查破陣子詞牌
應該可以理解佢嘅解釋
http://sou-yun.com/QueryCiTune.aspx?id=326&page=1&lang=t
由唐《破陣子樂》，演變為詞嘅破陣子
可以話係音樂嘅演變
本身係：
秦王所製，舞用二千人，皆畫衣甲，執旗旆。外藩鎮春衣犒軍設樂，亦舞此曲，兼馬軍引入場，尤壯觀也。
稼軒用之，自然更加有味道啦

同理，五月天呢首都係其中一種演變
入陣曲本身係中國戲劇最早嘅戲劇
https://www.youtube.com/watch?v=DDs5bXh4erM

收乜撚嘢穫於乾嘉之際
滿清入關華夏中國乜都毀滅晒啦

李清照都有一剪梅？

紅藕香殘玉簟秋。輕解羅裳，獨上蘭舟。雲中誰寄錦書來，雁字回時，月滿西樓。
花自飄零水自流。一種相思，兩處閒愁。此情無計可消除，才下眉頭，卻上心頭。

同一詞牌，好多人都寫過

寫詞係咪一定要跟詞牌嘅平仄格律
類似近體詩咁