「我沒事我沒事。」
我捉住Rachel嘅前臂,將佢㩒返低去原本踎緊嘅位置,嘗試將我哋之間嘅距離拉返遠一D。
為咗避免我哋兩個身處於一個咁尷尬嘅姿勢,我好快就一邊捽住自己個頭一邊起返身。
「起來吧,我沒事了。」我一邊向Rachel伸岀手扶佢一邊講。
好彩嗰一日之後個天都冇再整蠱我,我呢D血氣方剛嘅少年唔係咁襟考驗㗎炸。
「你做咩係咁搞個頭啫?」
到夜晚同Charlie FaceTime嘅時候,個頭仲係隱隱作痛咁。搞到我成日忍唔住手走去捽佢,就係因為我咁多手搞到我一路同Charlie facetime嘅行為都變得好奇怪。
「冇,今日晏晝撼到個頭,而家好似有D腫腫地啫。」
「陰公囉,你撼到邊到呀?」
「枱底炸嗎。」我指住地下,望住今日捱住嘅枱腳同Charlie講。
忽然,今日眼前一「黑」嘅畫面又係我嘅腦海中浮現出嚟。唔係真係暈低嗰隻黑,係冷衫嗰隻黑。
諗起嗰個畫面,我不禁望住同一隻枱腳發咗陣吽哣,然後吞咗一啖口水。
「你冇喇喇捐落枱底做咩呀?」
就係我仲回味緊,唔係,係回憶緊之際,電腦裏頭又傳嚟Charlie嘅聲音喇。
「喂!你撼傻咗呀?做咩唔理人啫?望住個地下做咩呀?」
「無,晏晝跌咗枝筆咪捐落去執返囉。」
人真係好犯賤㗎,你越逼自己唔好諗你就越會諗,咁到底要點樣先至可以唔諗一樣野呢?
10:18
9月19日
WhatsApp: Clara 已傳送你一個新訊息
「Another working day!」
過幾日之後,Clara又send咗一張佢返工時候嘅相嚟。講真,傾咗成三個禮拜,乜野喜好,興趣全部你諗到可以傾嘅野都傾哂喇。我同佢已經係進化到只係得返同對方分享下而家做緊D咩可以傾,有時我都會影下我上緊堂嘅情況俾佢睇嘅。
我原本都諗住冇野講就由佢冇野講喇,但佢又好堅持每隔三兩日都會搵一搵我㗎喎。咁都唔係辦法㗎,於是我就諗住約Clara岀嚟食下飯,睇下會唔會有D咩可以令我哋之間有返D共鳴,多返D話題咁喇。
「I am just wondering if you have time to hangout and have dinner with me? So we can meet in person!」
經過三個禮拜之後,我終於忍唔住問Clara喇。
「I'd love to but I just can’t. Others from working, I need to get back and stay with my grandma.」
「Also, I don’t really have money to spare and have dinner outside.」Clara補充。
***加密內容為中文翻譯
其實佢一直都講到自己好慘咁嘅,屋企嘅狀況又唔係咁好,個grandma又病得好似好嚴重咁,咁我都無謂強人所難喇。不過我好奇嘅係,我以為我諗住玩Tinder識「朋友」已經好痴線㗎喇,原來係有人諗住玩Tinder識筆友㗎喎。
「No worries at all, family first for sure. So you basically cook at home all the time?」
「Yea, and I will bring my own lunch to work as well.」
***加密內容為中文翻譯
就係咁,我就繼續同Clara keep住用文字嚟展開激情對話。
12:26
9月22日
WhatsApp: Rachel已傳送你一個新訊息
「明天又是在你的家 好嗎?」
見到Rachel呢個message,我係有遲疑過一秒嘅,但其實由始至終都係我自己思想污穢得滯係到胡思亂想啫。根本人哋咩事都冇,又冇諗咁多野,人哋淨係諗住上嚟正正常常咁樣做下assignment炸嗎。
「okk」
「那我明天自己上來吧 這一次我懂怎麼走了」
「好的 你找不到再call我吧」
第二日,我就如常起身刷牙洗面換件衫之後諗住煲煲水,然後一邊煮個意粉一邊等Rachel嘅來臨。點知時間一分一秒咁過,佢仍然係未岀現,而平時嘅佢一向都好準時㗎。
13:10
9月23日
沒有新的通知
於是我拎起個電話諗住搵下Rachel,睇下佢會唔會有D咩意外或者發生咩事令到佢遲咗喇。就係呢個時候,我就聽到有人敲門嘅聲音喇。
「嘩,你做甚麼來了?」
我一開門見到全身濕哂嘅Rachel著住白色花花長裙,全身冇一個地方係乾爽嘅。頭髮上仲滴住水咁樣係我嘅門口岀現,我先發現原來岀面一直落緊好大雨。