「J故台」《去一次exchange,令我變成一個壞咗嘅人》

695 回覆
221 Like 5 Dislike
2023-06-03 16:44:42
其實香港都好少女仔做到Charlie咁樣,自己忍住唔問唔想做恐怖控制狂,仲要仲俾機會,阿臣都真係面皮幾十呎厚,仲想扮乜都冇發生過期望好快返返以前咁,真係有心同Charlie行落去想建立返信任嘅話,就應該主動承擔拎返出嚟傾,面對自己嘅錯誤,而唔係乜都唔講,對方俾機會你忍住唔問你,你又真係好意思扮冇嘢
成日掛係口邊話唔想傷害呢個唔想傷害嗰個,但其實自我中心到一個極點
2023-06-03 17:12:16
Charlie係個好女仔
2023-06-03 20:44:46
Charlie繼續係我嘅膊頭上邊喊到收唔到聲,於是我係褲袋入邊攞咗張紙巾岀嚟,一邊幫佢抹眼淚一邊安慰佢。

「唔好喊喇,係咪發生咗D咩事呀?你話俾我聽我哋一齊去解決喇。」

「嗚…我以為自己會忘記到,但原來…係唔得㗎…嗚。」

聽到Charlie嘅呢一句說話,我有強烈嘅不祥預感。雖然佢冇講到好清楚,但我都知其實佢係到講緊D咩。我唔知應該要點應佢,我好驚我繼續追問落去,好快就會聽到D我唔想聽到嘅野。

「原來我唔係自己想像中咁大方,原來我係唔可以當冇事發生。呢兩個月以嚟,只要你唔係我身邊,我就會不停咁諗你會唔會係同第二個女仔一齊緊。我一邊不停咁同自己講要信任你,但我個腦又不受控咁去懷疑你。我真係好辛苦呀,我堅持唔到落去喇。」

望住Charlie一路喊一路講呢番說話,我心入邊係無比嘅內疚。係我搞到佢人唔似人,鬼唔似鬼咁樣,係我將佢由一個開心幸福嘅女人變成而家每日都愁眉苦面嘅淚人,但我仍然係好唔捨得佢。我唔識得點樣去應佢,唔敢去追問佢,因為我好驚Charlie會講岀嗰兩個我最唔想聽到嘅字。

「我每晚一合埋眼就會諗返起嗰日睇到嗰D相,你個電話每次一響我就驚係第二個女仔搵你。你唔係我身邊我就會好想見到你,但見到你嘅時候我又唔知講咩好,腦入邊淨係得你同嗰個女人一齊嘅畫面。」
「我以前從來都唔會有呢種感覺,每日都好期待下次同你岀街,每次見到你都係開心都係笑㗎,但係而家每次都好辛苦,又要驚,個腦又要亂諗野。我以為我放得低但原來我做唔到呀。」

咁你想點呀?

我唔敢問岀口,我好驚自己會估中Charlie下一句會講嘅野。

「唔係㗎,我哋…要多D時間炸嗎。慢慢我哋就會變返以前咁開開心心㗎喇。只要我哋係愛住對方,所有野都有得解決㗎。」我回應。

「我曾經都係咁以為,我每日都問自己仲愛唔愛你。係,我係好愛你,但原來有D野發生咗就係發生咗,有條刺就係有條刺。無論過多幾多年,都唔可以完全被忘記,都唔可以當冇發生過,或者係我太小氣喇。」

「唔係㗎,唔係咁㗎。只要我哋係一齊,我哋咩都唔怕㗎嗎?我唔想有一日瞓醒發現你唔會再同我講早晨,發現你唔再係我女朋友,我會好掛住好掛住你㗎。」

「我都會好掛住你,我會更掛住以前嘅我哋,但我知道我哋永遠都唔可以去返以前咁喇。你就當係我自私喇,呢兩個月我真係好辛苦喇,我真係撐唔到落去喇,𣎴如我哋分開下喇。」

「唔好喇,我真係知錯㗎喇,我保證點都唔會再有女仔搵我,我真係會乖乖地唔會再行差踏錯㗎喇。你俾多一次機會我喇,我真係唔可以冇咗你㗎。」

聽到Charlie一句「分開」之後,我都終於再忍唔住,聲淚俱下咁哀求佢。

「我都好想原諒你,我都好想當冇事發生,但係我內心就係唔容許我咁做,我都冇辦法。我都好驚自己聽日會好掛住你,但係呢兩個月我真係受夠喇,我真係唔可以再咁樣生活落去喇。」

「Charlie…」

「要怪就怪你自己當日冇諗清楚先做喇。」

我反駁唔到,Charlie講嘅野係100%正確,但係我只係唔想俾佢走。佢慢慢開始冷靜落嚟,反而得返我自己捉住佢嘅手唔捨得放,得返我自己哭成淚人。

「夜喇,返屋企喇。」Charlie用另一隻手鬆開我捉住佢嘅手講。

「唔好喇,我唔想走呀,我真係好唔捨得你呀。」
「冇辦法喇,其實我自己係屋企都諗咗好耐,諗得好清楚,咁就四年喇,但係我真係唔想再咁樣拖落去。」

我踏上前緊緊咁抱實Charlie,好驚呢個會係我哋最後一個擁抱。Charlie都將雙手放係我嘅背後,好好咁配合我嘅動作。

呢一刻,除咗伏係佢嘅膊頭上邊係咁喊係咁喊之外,我乜都做唔到。

「好喇,真係要走喇。」Charlie慢慢鬆開雙手,我睇住佢抹一抹面上嘅淚水之後講。

「Charlie呀…」
「Byebye。」

佢無等我講完我口中嘅說話,一個轉身就入咗大廈嘅門口,只係淨返我一個人坐係條冇人嘅街上邊喊。
2023-06-03 22:37:25
charlie呀臣放過人啦
2023-06-04 03:59:19
放過charile啦,呀臣,有好多嘢發生咗就係發生咗,係無得挽回咖

你係知錯嘅話,就記住哩種後悔,以後唔好再谷精上腦喇
2023-06-04 09:04:43
就咁完?衰得唔夠甘喎
2023-06-04 11:49:29
抵撚死啦臭閪 啲賤種最鍾意傷害完人再扮受害者
2023-06-04 20:23:06
經過嗰一日之後,我每一日瞓醒都仲係好期望我哋可以係返埋一齊,所有野都可以去返以前咁樣。我仲幻想同上次一樣,只要俾D時間Charlie,佢過兩個禮拜之後又會重新接受返我。

不過好快我就知道呢一切都唔會發生,因為無論我點樣搵佢,佢根本連覆都唔覆下我。

直到一個月之後,佢終於肯應下我嘅message,但我已經感覺到所有野都唔同哂。佢嘅語氣,佢嘅每一句說話,都好似同一個朋友傾計咁樣,而且我每一次約佢岀嚟,佢都會用唔同嘅藉口去推我。

「你唔好咁對我喇 朋友都可以岀街㗎啫」
「我真係唔得閒呀 唔係特登推你」

於是,每次我掛住佢嘅時候,都會去返佢屋企樓下嗰公園到坐,有時一坐就係坐足成日。

呢到有好多我同Charlie嘅回憶,以前上完佢屋企食飯,有陣時我哋都會落嚟呢到散下步。有時送完佢返屋企唔捨得咁快走住,我哋又會嚟呢到行下。最初一齊未見家長,唔上得佢屋企之前,我哋冇野做都係嚟呢到打躉。呢個公園就見證住我哋一齊呢四年嘅每一個階段,包括埋而家呢段得返我獨自留戀嘅日子。

我知道我唔應該再騷擾佢,但有陣時有D說話我又真係好想同佢講。每朝瞓醒都好想同佢講早晨,二月十四會想同佢講情人節快樂,每日身邊發生嘅事,事無大小都好想好似以前咁同佢分享。

於是,我自己開咗一個得我一個人嘅WhatsApp group,每次有D咩想同Charlie講,我都會send去嗰個group到當send咗俾佢,廢時自己會再煩到人。

「大佬呀,你唔好咁痴線喇。」呀樂知道我有個咁嘅group之後曾經話過我。

「你由我喇,我唔開個group發洩下,我真係會忍唔住手又搵Charlie㗎。我驚佢見到我同佢講情人節快樂,到時block埋我,連朋友都冇得做呀。」

我知道我講過話我間唔中都會諗起凱詠,但同Charlie分咗手之後我好清楚Charlie俾到我嘅感覺係無人可以代替到。我諗起凱詠可能都只係會微微咁笑一笑,回味下我哋最開心最甜蜜嘅時候。

但每當我諗起Charlie,初初都係會好開心,然後慢慢諗到點解我哋今時今日會走到嚟呢一步,嗰種思念,嗰種內疚,嗰種好深刻好複雜嘅感覺,我知道唔係其他人可以俾到我。

或者呢個就係我應得嘅懲罰,呢世都要我忘記唔到Charlie,呢世都要一個人去掛住佢,而最悲哀嘅係,我永遠都唔能夠得到一個贖罪機會,要背負住呢種罪疚感一直生活落去。

我同Charlie慢慢就變成一對最普通嘅普通朋友,雖然我間唔時都仲係會搵下佢睇下佢近排過成點,佢都會簡單咁覆我幾句,但自從分手嗰日之後,我哋都冇見過對方成三個月喇。

由穿煲嗰日開始起差唔多半年之後嘅一個星期六,嗰日我冇街去又有D掛住Charlie,於是就買咗個外賣,諗住去佢屋企樓下嘅公園Hea返一日,回憶一下同Charlie最開心嘅時光。

「咦,你做咩係到㗎?」

就係我準備轉入去嗰公園嘅路仔嘅時候,我竟然咁啱撞到啱啱岀街嘅Charlie。

「Ha…hello,咁啱嘅,冇呀,我咁啱經過炸嗎。」

其實無論係佢屋企定個公園,都係喺一條幾偏僻嘅路上邊,基本上係唔會可能咁啱經過嗰到,因為嗰到根本就通唔到去D咩其他地方。

「你去邊呀?」我相信Charlie都覺得有D奇怪,一副懷疑嘅樣問我。

「冇,周圍行下啫,你去街呀?」
「係呀。」

「咁唔阻你喇,bye bye。」
「Bye bye。」

我好驚Charlie會覺得我係D痴線變態佬,突登跟到佢嚟呢度,所以就馬上急急腳衝咗入去公園,離開佢嘅視線範圍。

原本見唔到佢我都仲控制到自己,但經過頭先啱啱咁樣撞到,我又變成滿腦子都係Charlie,仲有好多好多野想同佢講。

我知道我唔應該再騷擾佢,但係我真係忍唔到呀。我唔知道下次再見到佢係幾時,我甚至唔知道會唔會再有下次,又或者下次我見到佢嘅時候佢已經拖住另一個男仔,咁我就永遠都冇機會再講我想講嘅野。

於是,我揀咗一個位置係可以睇到Charlie返屋企必經嘅一段路坐低,一直等佢返嚟,希望可以再將我心中嘅說話同佢講多一次。

就算死,我都想死而無憾。

我一直等一直等,直到夜晚十一點幾,我終於見到Charlie嘅身影,向住佢屋企行緊返去。
2023-06-04 21:53:11
Charlie是咪有人追了
2023-06-04 21:59:42
加速加速
2023-06-04 22:17:23
點解好似短左咁嘅啲文
2023-06-04 22:23:13
希望係
2023-06-04 23:24:21
係她同呀樂一齊就神作了
2023-06-04 23:59:49
應該冇呀 每日都係差唔多㗎喎

但都就嚟完㗎喇
2023-06-05 00:00:15
冇咁痴線呀嗎
2023-06-05 01:05:58
呀樂:
2023-06-05 03:00:49
新讀者 岩岩追哂
2023-06-05 09:36:48
最後阿臣轉基
2023-06-05 11:54:15
不如收皮啦,又講到感覺替代唔到,個陣又係要睇凱詠個陣嘅相係到回憶
2023-06-05 22:26:51
「Charlie!」我衝咗岀去係佢身後大嗌。

「你仲係到嘅?」

「其實我…特登返嚟呢到㗎。」我耷低頭慢慢向佢行近,變到越嚟越細聲咁講。

「下?」

「對唔住呀,我知我唔應該騷擾你,我原本只係諗住返嚟呢到坐下,回憶下我哋以前最開心嘅日子。點知俾我咁啱撞到你岀去之後,我就好想好想再見多你一次,想親口同你講D野。」

我慢慢伸岀手去捉住Charlie嘅手。

「呢幾個月以嚟,我真係好掛住你,我每日擘大眼都會諗起你,我發現我真唔可以冇咗你。我知一切都已經太遲,你係我身邊嘅時候我又唔識珍惜,到而家冇咗你我先嚟後悔。我知我做得好錯,hurt得你好深,但係你可唔可以俾多一次機會我呀,俾個機會我哋返番去以前最開心嘅時候呀,當我求下你呀,我真係知衰㗎喇,對唔住呀。」

Charlie聽到我呢番說話,冇岀到一句聲,只係企係原地開始喊起上嚟。

直覺話俾我知佢仲係緊張我,仲係愛我㗎,所以佢先至會喊啫。於是我決定更進一步,將Charlie攬到我嘅懷中,希望可以將我哋嘅距離拉近。

「Charlie。」係我哋相擁咗大概半分鐘之後,我係佢耳邊細細聲咁講。

嗰半分鐘可能係我呢一年嚟最開心嘅半分鐘,我可以再攬住Charlie,所有以前嘅感覺都返哂嚟,但就係我以為自己得米嘅時候,佢又再一次將我拒於門外。

「你唔好咁喇,我哋之前咪講得好清楚囉。」Charlie冷靜落嚟之後一手將我推開道。

「做咩事呀?我知你都想同我一齊去返以前咁㗎,我知你仲緊張我㗎,如果唔係你點會喊成咁啫,你當俾多次機會我哋大家喇,好唔好呀?」

Charlie彷彿唔知點樣回應,只係合上眼嘆咗一口大氣。

「你係咪有新嘅對象喇?你有新嘅男朋友呀?」我見佢好似好難開口咁樣,於是大膽推測一下。

Charlie只係擰一擰頭回應。

「咁你仲愛唔愛我呀?」我繼續追問。

「唔係我仲愛唔愛你嘅問題呀,而係…你知唔知我呢幾個月嘅生活點過呀?」

「自從嗰一日我見到D相之後,我成個世界都唔同哂喇。我每一日就係諗住你同嗰個女人係澳洲張床上邊嘅畫面,我每一日都問自己我有咩唔好,係咪我唔夠靚,係咪我身材唔夠好,係咪我對你唔夠呵護備至,所以你先要岀去搵第二個女人。」

Charlie一邊講,眼淚一邊不受控制咁爆喊岀嚟。

「到我哋一齊返嘅時候,我每日都係到諗你會唔會已經攬住咗第二個女人呢?你唔係我身邊嘅時候,我就係要擔驚受怕足全日,我冇哂我嘅私人生活呀。我嘅腦淨係得你,我完全唔想去街,唔想見其他人,更加唔想返工,返工又要做錯嘢,我爭D連份工都冇埋呀。我唔想再咁樣生活落去喇,我應承過自己唔可以俾自己去返嗰段時間咁糜爛咁樣生活,我每日就係吽係屋企喊,做咩都冇心情。我屋企人嚟問我做咩事,我又唔想講係因為你,佢哋幾乎要帶我去睇心理醫生咁滯呀,我唔想再要佢哋擔心我喇,你明唔明呀?」

「個問題唔係我仲愛唔愛你,我曾經都以為只要有愛就乜都唔驚就乜都可以解決,但原來唔係㗎。原來我夾硬同你一齊落去係會令我咁辛苦,令到我身邊嘅人都要擔心我,有D野冇咗就係冇咗,要怪就怪你自己當初點解要不甘寂寞喇。」

「對唔住呀,我知我好錯,我以後都唔會令你再要擔驚受怕㗎喇,我真係唔會再行差踏錯,你原諒我喇好唔好呀?」

「唔係我唔想原諒你,係我原諒唔到你呀。」

「如果你唔愛我嘅,麻煩你唔好再搞我喇,我受夠喇;如果你愛我嘅,我啱啱先好返D,肯同D朋友岀下街,你當可憐下我,放過我喇好唔好?」

我一直以嚟都知道我對佢做成嘅傷害好大,但聽到呢一句之後,我先明白原來佢呢幾個月係過得有幾痛苦,Charlie幾乎因為我而搞到有情緒病,要佢屋企人咁擔心。如果俾佢老豆老母知係我搞成咁,實唔會放過我,更加唔會俾我同佢係返埋一齊。

我終於明白原來愛一個人係真係唔一定要擁有佢,有時放佢走,先至係對佢最大嘅愛同祝福。

Charlie講完呢番說話之後,我非常慚愧,我痛恨自己嘅所作所為,更加痛根自己一次又一次咁苦苦哀求對方,我以為佢同我一齊就可以得到最大嘅幸福,但原來俾佢離開我先係。

我無面目再面對Charlie,只係識得企係原地,耷低個頭望住地下。

「係咁喇,你都快D返去喇,夜喇。」Charlie拍一拍我嘅膊頭,講完之後就轉身離開。

「呀,係呀,我一直都有個問題想問你。」Charlie行咗兩步之後忽然停低擰返轉身同我講。

我馬上抬起頭,渴望係咪仲有D咩轉機。

「你應承我要老實答我。」

「嗯。」我點頭回應。

呢個moment,Charlie講咩我都會應承佢喇。

「除咗個台妹之外,仲有冇第二個呀?」

聽到呢句,我嚇到成個人窒咗,我完全冇諗過Charlie係想問D咁嘅野。我當然唔想俾佢知個真相喇,但係我啱啱先應承咗佢唔會呃佢炸喎。

「得㗎喇,明㗎喇。」

Charlie冇等待我嘅答覆就向我揮一揮手,又重新背向我,踏上佢歸家嘅路途。

得返我自己一個坐係條街到,諗下自己一路以嚟對人造成嘅騷擾,原來我從來都冇係佢嘅角度諗過。只係我咁自私,一路都想佢同返我係返埋一齊。

嗰次之後,我就冇再見過Charlie喇。我間唔中都仲會去返嗰個公園到坐下,但我都會睇清楚冇佢或者佢屋企人嘅身影先至會走入去。

過多大半年之後,我係Charlie嘅instagram見到佢終於有新嘅男朋友。睇住佢哋嘅合照,我終於見返Charlie以前對住我先有嘅笑容,我知道如果夾硬逼佢同我繼續一齊,可能佢以後都唔會再咁樣笑。

嗰段時間呀木就開始打佢嘅故事上嚟,我知道咗之後就問佢可唔可以打埋我呢個故,紀錄一下我有幾仆街,我hurt得Charlie有幾盡,到今日我又要食返自己種下嘅惡果。

希望大家以後每做一件事,都要諗清楚個後果。我自己痛,自己後悔一世係小事,如果Charlie當日真係睇唔開,做咗D咩傻事,我十世都彌補唔返俾佢同佢嘅屋企人。

我知道佢唔會睇到,因為佢好少上連登,更加唔會睇講故台,但我衷心希望個男仔會一心一意咁對你,照顧你,令你往後嘅人生都幸福快樂,唔駛再流下一滴淚。

對唔住。

《去一次exchange,令我變成一個壞咗嘅人》
全文完 130835字

2023-06-05 22:32:35
仲有冇後傳 或者 外傳?
2023-06-05 22:37:59
今次真係完喇 大結局所以遲咗D岀文

好多謝大家一路以嚟嘅支持 估唔到我呢個文盲寫嘅野都有咁多人睇 真係好多謝大家

追到完都未正評嘅請你哋幫幫手 睇下呢個post可唔可以有200個正皮 咁樓主我就無憾喇

希望將來仲會有好嘅故事可以再寫野俾大家睇 但係幾時我自己都真係唔知 要等待有啱嘅素材 我就會再係講故台岀post㗎喇

意猶未盡嘅巴絲可以稍移玉步去追返我上一個post㗎

多謝哂 有緣係下一個post再見大家喇

記住正評!

****************************************************

以下開放呀臣咒罵區 佢叫我寫得上嚟都係預咗俾人插㗎喇 所以大家真係唔駛留手

之前有D讀者嘅問題我哋都冇答到 係因為驚會劇透咗之後嘅野 所以而家大家可以盡情問喇 我哋解答到嘅都會盡量答大家㗎
2023-06-05 22:40:57
暫時嚟講應該都好難喇 呀臣同D女主角都冇哂聯絡

我哋知道嘅野都差唔多寫哂落個故到 除非有咩新嘅爆炸性發展喇

但我個人睇就應該冇乜機會喇
2023-06-05 22:44:16
咁阿臣依家點啊
2023-06-05 22:49:53
其實係呀巨on99

台妹都過咗咁Q耐仲記黎做咩
吹水台自選台熱 門最 新手機台時事台政事台World體育台娛樂台動漫台Apps台遊戲台影視台講故台健康台感情台家庭台潮流台美容台上班台財經台房屋台飲食台旅遊台學術台校園台汽車台音樂台創意台硬件台電器台攝影台玩具台寵物台軟件台活動台電訊台直播台站務台黑 洞