「J故台」《去一次exchange，令我變成一個壞咗嘅人》

爸爸嘅話 呀臣可能要上ifc

就係呢個post一開始有link

盡做喇 都唔能夠保證嘅 要收集夠故先

我清理好現場之後，望住凱詠著返好哂衫褲，係廁所入邊走岀嚟。牆上嘅鐘亦都話俾我哋知時間已經差唔多喇。

我哋離遠互相望住對方，咩都冇講，只係想好好咁再望清楚另一個人嘅容貌，但大家都知道心底裏懷着無限嘅不捨。

「你要去機場了吧？」我望一望牆上嘅鐘講。
「嗯，差不多了。」凱詠點一點頭回應。

我走到佢嘅前面，將佢緊緊咁抱實，記低攬住佢嘅感覺，記低佢身上嘅氣味，記低佢係呢個屋企嘅一舉一動。

「來，我們自拍一下吧。」凱詠提岀用佢最鍾意嘅方式去留低我哋係呢到生活嘅最後一刻。

相都影埋之後，就算有幾唔捨得，我都係要送佢離開呢個屋企，離開呢個城市，離開我呢個爛人。

我一手拖住凱詠嘅行李喼，另一隻手俾佢繞住咁去搭車。途中大家都冇咩講，佢只係靜靜地咁捱住我嘅膊頭，空洞嘅雙眼望住遠處若有所思嘅模樣。

同樣地，時間都係一樣好蠱惑嘅嘢嚟，你想佢快，佢就行得慢D，你想佢慢，佢就「唓」一聲咁就走咗。欣賞凱詠美貌嘅時間好似永遠都唔夠咁，但好快車已經去到我哋嘅目的地。

大家仍然係一語不發咁行到去機場嘅入口，唔係我唔想同佢講野呀，而係真係冇嗰種心情。一諗起佢好快就要離開我，我真係乜都冇力氣去做。或者咁樣靜落嚟就係最好嘅感受對方陪伴嘅方式，偏偏寂靜嘅氣氛變得開始有D沉重。

我陪住佢去check-in，攞機票，行咗機場大堂嘅一D souvenir shop，最後都係要走到嚟禁區前嘅位置。

凱詠拖住我嘅手擰轉身望向我，大家對上眼神嘅一刻又思思縮縮咁避開咗。我好想講D野，但又唔知講咩咁，只係識得fing住凱詠嘅手又欲言又止。

「我…要走了。」凱詠終於開口打破呢一刻嘅沉寂。

我意識到我再唔講，我唔知幾時會有機會俾我去講。

我仍然係唔敢直視佢嘅雙眼，唯有踏前一步，將凱詠攬實，係佢嘅膊頭上講哂我想講嘅野。

「寶寶，很感謝你對我這麼好，你真是一個完美的女朋友，這六天我真的好開心，如果可以我應該一早選擇到Melbourne exchange吧。」
「你教我的東西我都會好好記住，會好好照顧自己，不會讓你擔心。當然，有你在身邊會是最好的。謝謝你為我準備了這麼多，我卻甚麼都沒有給你，我也想得太不周到了，對不起。」

無論如何，我都想親口講一次對唔住。

「傻瓜，沒事了，有你陪伴我就是最好的禮物，不要說對不起了。」

凱詠當然唔會知我其實係為咗D咩而say sorry。

聽到佢咁講，我只有更深嘅內疚，但我都唔可以表露岀嚟，唯有將佢攬得更實更緊。

「詠詠，我愛你。」

我慢慢鬆開雙手，停係距離凱詠好近嘅地方，再望真D佢嘅雙眼，佢嘅鼻，佢嘅五官。我好怕我哋一分開之後，我對佢嘅印象就會好似上次咁逐漸變得模糊。

「我也愛你。」凱詠俾我望到怕怕醜醜，含羞答答咁回應。

我知道時間無多，於是把握住最後嘅機會，將嘴巴貼近，同佢係禁區前面激烈咁擁吻一番。

我哋如入無人之境，人來人往嘅機場好似就只係得返我哋兩個咁樣。不過講真，係呢D離別嘅地方打下茄輪都係正常不過嘅事，而且仲要係鬼佬地方添，所以其實都冇乜人會理會我哋。

我慢慢鬆開手，將身體捱後，然後深呼吸一下。

「呼，差不多了吧？」
「嗯。」凱詠微微點一點頭。

「我要進去了。」
「好吧，再見。」我最後伸手去摸一摸凱詠嘅臉龐。

「再見。」

我哋會再見㗎呵？

凱詠講完之後就轉身向禁區走入去，我手中原本捉住佢嘅面珠墩，瞬間只係得返空無一物嘅手掌。

我望住佢嘅背影一直行到檢查passport嘅地方，佢最後轉身向我笑一笑，揮一揮手，一轉彎就從我嘅視線之中消失咗。

唉！

我向住機場嘅天花仰天長歎。

我應該點做？我可以點做？點做先可以令到兩邊都開開心心？點做先唔會令任何人受傷？

係Charlie嚟之前淨返落嚟啱啱好一個月嘅時間，我諗我自己要好好咁閉門思過，諗一個可行嘅解決辦法，但係你而家要我二擇其一，我真係點都揀唔落手。

我只希望今次唔係我最後一次見到凱詠。

邊個都唔想傷害，就只會邊個都受傷害
呀臣真係好撚自私

仆街了，live 左幾時再有文

死啦男豬應該會畀人發現

17:51
11月11日
Line：凱詠傳送你一個新信息

「寶寶 這六天我真的很開心 能夠在離開澳洲前的幾個月認識到你 感覺就是上天對我的眷顧 身邊有這麼帥的男生疼愛着 照顧着 珍惜着自己 這段日子我好像是一個被寵愛的小公主 感到滿滿的幸福 所以我不准你再說甚麼配不上我 對我不好這些傻話 甚麼也沒有準備都不要緊 因為有你在我身邊已經很足夠了 回去以後 我會一直期待着下次再與寶寶見面 你答應過我 無論在澳洲 台灣 香港還是世界上任何地方 你都會來找我 我會一直等你的 我愛你

你的凱詠」

踩岀機場大門嘅一刹那收到凱詠嘅呢個message，我不禁望住藍天嘆咗一口氣。佢永遠唔會知我所謂嘅配唔上佢，對佢唔好嘅真正意思。佢越覺得自己幸福，自己係公主，我就越內疚，因為我根本唔係佢想要，佢值得擁有嘅王子。

不過我望都望佢永遠都唔會知個真相喇，起碼佢可以一直沉醉係自己嘅幻想之中，永遠都係嗰個幸福快樂開心嘅小公主。

有時無知真係一樣好幸福嘅事。

我返到屋企之後望住嗰四幅牆，望住又係得返我自己一個嘅屋，每一個地方都有住凱詠嘅身影，有佢嘅聲音。

雖然我真係好掛住佢，但得返我一個人起碼我唔駛成日驚穿煲，驚被人篤爆，驚見到佢知道真相之後對住我喊到崩潰嘅樣。

我打開鎖上嘅行李喼，將一直放係入邊關於我同Charlie嘅野拎返哂岀嚟，放返去佢哋原本嘅位置。

係我打開床頭櫃嘅時候，見到嗰個裝住凱詠送俾我嘅兩枝香水版嘅布袋，心入邊忽然有個諗法。

我將袋中物拎岀嚟放係枱上面，幫佢哋影咗張相，然後用我新開嘅instagram account post咗個story，caption上寫住「Thanks, thanks for everything.」。

我好想可以好似凱詠咁公開承認佢嘅地位，post佢嘅相，話俾所有朋友聽我有一個咁完美嘅女朋友。當然，我唔可以咁做喇，所以呢個已經可能係我係社交媒體之上同凱詠最有關係嘅野嚟。

係倒數嘅呢一個月入邊，我都keep住成日同佢哋兩個傾計同FaceTime，每日都分享下自己身邊發生咗咩事，同埋最重要都係透過電話望下對方嘅樣。

「B，你嚟澳洲有冇咩地方特別想去呀？」我同Charlie都開始計劃一個月之後嘅行程。

「嗯，都冇乜所謂嘅，你話事喇你地頭呀嗎。不過唔去Melbourne都得㗎，我早一兩年先同屋企人去完，我令願去多D其他城市，除非你想去喇。」

唔知我係咪真係行運行到落腳指尾，原本我仲驚緊佢會唔會話要去Melbourne。等陣係墨爾本嘅街頭兜口兜面撞到正，我真係十條命都唔夠死。

聽到佢咁講我即刻鬆一口氣，真係阿彌吉帝，上天保佑。

「哦，唔緊要喇，唔去咪唔去囉，橫掂我同呀樂都去咗囉，我哋去其他地方喇。」

我面上忍唔住偷笑咗一下，但好快我知道我需要將呢刻嘅歡愉連同微微揚起嘅嘴角夾硬咁拉返落嚟。

除咗同佢哋兩個保持聯絡之外，我亦都知道自己係冇可能可以長遠咁樣呃住佢哋。如果咁樣keep住落去，終有一日都係會穿煲，而且我個人都好唔鍾意講大話嘅嗰種心理壓力。日日咁樣驚俾人踢爆，驚俾人發現，我真係遲早精神衰竭。

再講呀，我同凱詠啱啱一齊就話佢唔好意思睇我電話啫，Charlie我好清楚，雖然佢唔係特登check我，但有時都會用我個電話嚟search下野，㩒下計數機之類。總之一定會好自然就有個用我電話嘅機會，而我都冇任何合理嘅藉口去拒絕佢，所以就算佢嚟搵我嗰兩個禮拜唔死，我返到香港都一定死㗎。

我知道我走唔甩㗎喇，呢單野都冇可能再拖。Happy就happy咗幾個月，咁大個人係時候搞返掂D蘇州屎。成熟D，處理得好D，唔好令到任何一方面唔開心就係我唯一可以做嘅野。

呢個問題係凱詠走咗之後嘅兩個禮拜都一直困擾住我。呢個世界會唔會有兩全其美嘅方法呢？如果真係要犧牲，我應該要犧牲邊個先啱？

愛情係應該先到先得定係可以遲嚟先上岸呢？

而當我每次有煩惱嘅時候，我永遠都係搵個最唔適當嘅人去俾意見，我嘅最佳損友——呀樂。

佢最唔想傷害嗰個係自己

俾人偷電話的劇本

呀樂有何妙計

「Charlie就嚟嚟喇，點算呀？」
「咁你而家有咩打算先？」

「佢嚟之前一定要搞掂㗎喇，見到面嘅話根本冇可能瞞到佢。」

我已經為自己set咗deadline，係Charlie到達澳洲嘅前一日，無論用咩方法我都會解決呢件事。

「係任何情況之下，我點都唔會，點都無可能俾Charlie發現我係一個咩人。就算我要同佢分手，我都唔會俾佢知道個真相。」我續道。

「啫係你諗住係佢嚟之前就飛是但一個喇？」

其實我都未諗好嘅，所以我先至想搵呀樂傾下，但無論如何我都唔會俾Charlie發現個真相，就算我要同佢分手，我都會作個好聽D嘅藉口。

唉！

我同呀樂嘅對話一時之間陷入一片沉寂。

「Um…你覺得…如果我照直同佢兩個講…佢哋…有冇可能…會接受到呢？」

從我嘅吞吐都知道呢個諗法係有幾痴線，幾天方夜譚。原來我諗咗咁耐，所謂完美嘅解決方法，就係傷害哂兩邊，然後我自己「unun腳」咁享齊人之福。

我知呢樣野係絕對無可能嘅，純粹係我嘅幻想之中岀現過一秒咁大把。

「你講真㗎？」呀樂顯得有D詫異。

「我唔知呀，我真係揀唔到呀，我知道係好痴線好仆街，但我唔知我可以點喇。」

「大佬呀，你唔好咁痴線喇。先唔講佢哋根本唔會接受，你到時盞兩個都冇哂㗎炸。就算有一個話肯呀，你自己都驚喇。容乜易下次襯你瞓咗剪咗你沖落廁所㗎，間唔中都有呢D新聞㗎喎。」

我知道我嘅春秋大夢唔會有可能變成現實，對話好快又重新變成一片沉寂。

「唔好咁貪心喇ching，你冇第二條路㗎喇。爽你又爽完，你唔想他朝有一日是但一個係你面前喊到飛起，你到時先嚟內疚嘅話，你點都要係兩個之中揀一個㗎喇。」呀樂續道。

我對住話筒深深咁嘆咗一口大氣，我最唔想最唔想做嘅事終於要嚟到喇。

凱詠or Charlie，make your choice。

「呼，咁我應該點揀呀？」

「喂，呢D我冇得幫你揀㗎喎，你要問返你自己到底係愛邊個喇？如果你係因為內疚，覺得對唔住先揀嗰一個，遲D你後悔，到時味又係要唔開心。撇除所有野，真係愛邊個就揀邊個喇。」

「我就係揀唔到呀嗎…」

「老老實實呀，我同Charlie都叫相識一場，我梗係唔想你因為第個而揼低佢，然後佢日日唔開心喇，而家仲要好似我有份促成咁。我原本諗住你係玩玩下㗎炸嗎，到時到候你就會返屋企好似同條支那妹咁㗎炸嗎，點知你而家沉哂船喎，搞到我好似有份拆散你哋咁。」

「不過又講呀，聽到你話呀Y對你點好點好，我覺得佢都真係一個好好好好嘅女仔嚟嘅，真係夢中情人咁滯，所以就算我同佢素未謀面，都唔想佢因為你呢條仆街而傷心，she deserves better！」

「唉！自己執生喇，呢D我真係幫唔到你揀㗎。」呀樂都忍唔住嘆氣。

「你點揀都係衰，點揀都係hurt另一邊㗎喇，唯有問心咁揀，揀完之後好好咁對人哋，盡你所能去補償喇。至於揀邊個，我真係幫你唔到喇，你自己攝高枕頭諗清楚，如果你淨低嘅人生只係可以有其中一個陪你過，你會想係邊個？咁就係嗰個㗎喇。」

呀樂一輪嘴咁講，我只係掛住諗野都冇俾到反應佢，最後同佢傾完都係得唔到結論，總之都係要我二選一。不過起碼佢提岀咗一樣野係我之前冇諗過嘅，就係將來。

過去嘅事係已經過咗去，我點都冇能力將發生咗嘅事扭轉。我唯一可以做嘅就係好似呀樂咁講，好好咁對揀咗嗰一個，好好咁俾最大嘅幸福佢，好好咁補償返我嘅過錯，仲要呢一世都要呃佢呃到死為止。

咁到底我同邊個會有將來多D？呢個問題相比起要我二揀一，個答案好似嚟得明顯一D。或者當愛意係唔能夠將佢哋分開嘅時候，我就要用最現實嘅條件去衡量一下自己應該要做一個乜野選擇。

俾大家投個票 如果你係呀臣你會揀

一個好靚 好完美 樣樣野都好照顧你 仲係愛到如火如荼 但又識咗唔係好耐 比你大三四年 仲要LongD 冇人知將來會點 大家磨合落去又會係點嘅台妹凱詠

一個一齊咗兩年 各方面都已經好配合 甚至同屋企人身邊嘅朋友都認識哂 但可能慢慢冇咗當初嘅熱戀同新鮮感 一個係香港苦等咗你幾個月嘅糟糠Charlie

雖然咁樣對Charlie有D唔公平 始終佢係呢個故事暫時岀現嘅次數都比較少 亦都冇乜機會展示到佢對呀臣嘅愛同好 但我可以話俾大家聽 Charlie對呀臣嘅照顧唔會比凱詠少

兩個都係做老婆嘅好材料 咁就俾條仆街糟蹋哂

你會點揀？

感覺凱詠有女朋友feel多啲

估唔到呀樂冇再叫呀臣繼續一腳踏兩船
但係私心偏心凱詠 女仔睇都覺得Charlie 太煩

始終而家大部份情節都係圍繞佢嘅

呀樂諗住佢玩完就會返屋企 點知呀臣會沉哂船 搞到佢好似有份搞散佢同Charlie咁

如果可以鋪排多啲charlie先就好

竟然係Charlie贏咗

我都覺得對佢有D唔公平 好似攞一個女主角同一個茄喱啡嚟比咁 但佢係嗰段時間除咗FaceTime之外又真係冇咩好講

Anyway而家揀Charlie嘅人竟然都係大幅領先

都岀乎我所料 仲要係大比數領先

糟糠之妻不可棄呀

我都揀左charlie

始終凱詠雖然愛得痴纏，但係相處時間太短，而且仲係異地戀，好難保證到將來會點。Charlie就係好穩定，你知道佢一定會喺度，而且女方仲好鍾意你，所以Charlie比較多人揀都正常嘅