17:19
11月5日
沒有新的通知
今日係凱詠嚟之前嘅最後一日,我梗係把握機會做好時間管理,好好咁同Charlie FaceTime埋今日,減低佢起疑心嘅可能性。
「唉,諗起嚟緊呢幾日就煩。」
「做咩事呀B?」
「D project mate好煩呀,又話一定要見面傾,一定要逐樣逐樣執到正。嚟exchange啫,求其pass咗有野交味算囉。」
「啫係你聽日要去傾project呀?」
「咩聽日呀,嚟緊幾日都要喇。又要溫下mid term之後個業主又話有人上嚟整野,煩都煩死。」
「整咩呀?」
「一日話整廁所,一日話整冷氣喎。咁我又邊到都唔去得,淨係可以坐係屋企睇住佢哋整野。」
「唉,總知嚟緊呢幾日有排搞喇,都唔知有冇時間可以咁樣同你FaceTime傾下計。」
「咁點算呀?我會好掛住你㗎。」
「都冇計喇,我都好掛住你呀。最多我哋今日傾耐D之後我一有時間我就會打俾你㗎喇。」
「好喇,我會乖乖哋等你電話㗎喇!」
我終於知咩叫擘大眼講大話,我開始由初初每次呃完Charlie之後都會好內疚,覺得自己好衰變到而家已經冇乜感覺喇。
可能當一樣不停重複重複又重複,無論係幾錯幾癲幾荒謬嘅事,人類都會慢慢習慣。我唔係話唔知自己錯自己衰呀,而係我會問自己「係,我係呃佢呀,咁我可以點啫?」
唔通我講個真相俾佢聽?話佢知除咗佢我仲有第二個?話佢知我從來都冇安份守己經常岀去搞三搞四?定係同凱詠講我良心發現喇,聽朝唔好去機場唔好嚟呀咁樣?
我只可以繼續呃佢哋,由第一個大話開始,已經注定冇得返轉頭㗎喇。
03:04
11月6日
Line: 凱詠傳送你一個新訊息
「早呀寶寶 我在家準備岀發去機場了」
「你會很累嗎?」
「哎喲!你怎麼還沒睡?一會怎麼有精神來機場接我」
「我睡了 只是剛好去廁所醒來看到你的信息」
呢個當然唔係事實喇,邊有咁多咁啱呀。我一諗到聽日佢會嚟就成晚都唔係幾瞓得著,唔知我哋會做D咩呢?唔知盒安全套會唔會用得著呢?唔知會唔會穿煲呢?
「好了 快點去睡!不然你明天沒精神了」
「你也是呀」
「我會在飛機上休息 你也快點去睡!」
「好了好了 明早見」
「一會見囉 有甚麼新消息我會通知你的」
第二日一早我就起身gel頭換衫岀發去到機場,差唔多八點鐘我就到咗接機嘅地方等凱詠岀嚟。
07:56
11月6日
Line: 凱詠傳送你一個新訊息
「剛下機囉 很快就可以見到寶寶了」
「我也剛到了 你一岀來就可以見到我 等不及了!」
覆完凱詠之後,我亦都不忘安撫一下我另一個女朋友。等Charlie有個心理準備,我嚟緊都會冇乜時間去覆佢。
「唉 晨咁早就要返去傾project 班友都癲㗎」
Send完呢個message之後,我就將同Charlie嘅對話archive同mute咗,以防凱詠用我嘅電話嗰陣,會有D唔想見到嘅message彈岀嚟。
大約過多十分鐘,我就見到凱詠拖住一個Hand carry嘅喼,係禁區入邊行岀嚟。
佢急步向我嘅方向衝過嚟,然後張開雙手,緊緊咁將我攬實。
「寶寶,終於可以見到你了,你知道我有多想你嗎?」佢依附係我嘅膊頭上,係我耳邊講。
「難道我不是嗎?」我亦都用一隻手將佢攬住,另一隻手來回撫摸佢背後嘅長髮安慰一下佢。
我哋就係咁係機場緊緊咁攬住對方成分鐘,好似要將冇見冇得攬嘅日子都攬返夠本為止,先慢慢鬆開手,睇下對方嘅容貌。
講真,我同佢見咗三日,分開咗三個禮拜。凱詠嘅樣係我腦海中其實一日比一日模糊,我都好好趁住呢個機會,refresh一下我對佢嘅記憶。
「你看你,是不是很累呀?」我用手摸一摸佢化上淡妝,略帶倦容嘅面問。
凱詠見我一直望實佢,含羞答答咁擰一擰頭回應。
望住佢因為怕醜而搞到塊面紅卜卜,咁可愛嘅樣,我又忍唔住抬起佢嘅頭錫咗佢嘅嘴一下。
凱詠亦都將雙手放到去我嘅頸後,將我呢個吻延續落去。同頭先一樣,好似要將呢段冇得錫嘅日子都好好補償返先捨得放手。
「該不會是我看起來太醜,你才問我累不累吧?」
係我哋放開嘴嘅一瞬間,鼻頭仍然係掂住對方鼻頭咁sweet緊嘅時候,凱詠突然問我。
「當然不是了,我的『詠詠』永遠都這麼漂亮的。」
「吔!你是不是三個星期不見我,一見我就要氣我了!都說了不準這樣叫我!」
凱詠馬上鬆開雙手,打破我哋甜蜜嘅時刻,然後大力咁打落我嘅身上一下。
「不是了不是了,快走吧。」
我伸手去幫凱詠拖佢嘅喼,另一隻手拖住佢帶佢離開機場。
凱詠將另一隻手都繞住我,捱係我嘅膊頭上邊,變返好sweet嘅我哋向住岀口離開。
「詠詠!」
我又忍唔住整蠱佢,叫佢一聲。
佢冇應我,只係用繞住我嘅手搣我嘅手臂一下。我知道,佢又一次慢慢習慣呢個稱呼喇。