「J故台」《去一次exchange,令我變成一個壞咗嘅人》

695 回覆
221 Like 5 Dislike
2023-05-24 23:10:51
睇嚟係時候崩潰了
2023-05-25 01:39:41
Live!
2023-05-25 19:35:12

「偵測到你的帳戶有可疑的登入活動 請以+61 xxx xxx 323接收驗證碼以完成登入」



「On9㗎?我記得密碼㗎喎,咁都要逼我收code?」
「你澳洲個電話呢?」呀樂問。

「張卡扔咗九年喇,仲點會keep呀。」

原本滿心歡喜以為可以睇下凱詠嘅生活,一下子俾instagram打殘嘅我,深深不忿咁去到AppStore重新down返line落嚟,目的只係為咗知道凱詠嘅近況,想知道佢到底有冇搵過我。

「屌!做乜撚野呀?全部都要我收code嘅?」
「算吧喇,個天都唔想你再搞人哋喇,睇多兩眼算喇。」呀樂一邊將我放係佢到嘅相隊俾我睇一邊講。

「我都唔係想做D咩…我淨係想知佢呢排點呀,生活得好唔好炸嗎…」

被豬閪伯格玩弄完嘅我死狗咁樣,係instagram到search返凱詠嘅Ig account。

「佢IG都係冇改到名喎。」我將搜尋結果show俾呀樂睇。

「都唔關你事呀,人哋咪又係private,你睇到咩?」

冇錯,我呢個account嘅身份係Charlie嘅男朋友,同凱詠根本互不相識,根本唔應該知道佢嘅任何野。當日嘅凱詠男朋友已經被永久封存,就好似我嗰個account咁,就算係屬於我,就算我記得個密碼,都已經冇權利再去使用。

我望住Instagram上凱詠嘅profile picture發呆,呢張已經係唯一一張我可以睇到佢近期嘅相。雖然好細張,但佢仍然係掛住熟悉嘅微笑,仍然係嗰個甜美嘅凱詠。見到佢笑得咁開心,我都安落一D。希望佢嘅生活過得會比以前好,識嘅人都要比以前好。

唉,唔通我同凱詠真係永遠要成為陌生人?連佢嘅instagram都睇唔到?

我點都冇可能用而家呢個account去follow佢,呢到全部都係我同Charlie嘅合照,由我去exchange之前到而家,只要佢一睇到,等於直接同佢講其實我由始至終都係呃緊佢。

「咦,原來IG private咗都會見到有幾多個post同followers㗎喎。」我留意到一直停留係凱詠嘅account嘅電話上邊呢幾個數字講。

「咁…如果…凱詠有返嚟睇我呢個真account,見到我D post一路多,followers又一路多,佢咪…知我呃佢囉。」我恍然大悟,顯得有D愕然咁望住呀樂講。

「咁…都冇辦法㗎。佢要知都知咗喇,如果佢成年都冇睇過,都唔會之後先返嚟睇掛。」

「呀…shit!」我心開始囉囉攣。

會唔會一路都只係我自己以為自己處理得好好,一路都只係我自己以為佢哋乜都唔知,一路都只係我自己以為我冇令佢哋任何一個曾經為我而唔開心。

「驚咩呀,呀Y知道咗要屌你嘅話都一早屌咗喇。」

「我就係驚佢唔屌我,驚佢自己一個人唔開心。講真呀,佢鬧我一鑊金嘅我會好過D。」

「可能人哋係Line屌咗你你睇唔到啫,又或者可能人哋一早已經don’t give a shit係台灣食緊新仔呢?」

「係我真係唔拘呀,我驚唔係炸。」
「諗嚟都冇用喇,你都唔會知真相㗎。」

「係喎,你係咪仲有follow我個假IG呀?」
「有,想點呢?」
「幫我睇下呀Y仲有冇follow我呀。」

我一路睇住呀樂打開instagram,搵返我個分身岀嚟,然後係followers到逐隻逐隻字咁將凱詠嘅IG輸入。到底我係想佢仲有follow我定係想佢已經將我拋諸腦後unfollow咗我呢?我自己都唔太清楚,我淨係知睇住搜尋欄上邊越嚟越長嘅字,我就越嚟越緊張,個心亦都跳得越嚟越快。

「冇喎。」

「No users found」



我望住呀樂電話上嘅呢幾隻字終於知道答案,心入邊有幾分不爽,有幾分失落。

「咁我仲有冇follow佢呀?」我指示呀樂由followers轉去following嗰到搜尋。

結果係得到同一個答案。

「Block柒埋你喇可能。」

唉!

「你覺得佢知唔知呢?」我問。
「我點知佢知唔知呀大佬。」

呢個問題一直困擾住我,到底…凱詠知唔知呢?
2023-05-25 22:52:57
呀臣點解會信臺灣妹
2023-05-26 04:42:27
阿臣好天真 其實都幾乎肯定台灣妹唔係好似阿臣咁重視,應該係當佢係過客,冇乜擺係心
2023-05-26 18:50:28
之後每隔一段時間我都會再試下login,睇下會唔會有機會可以唔駛收code,但結果都係事與願違。

我試過google過收唔到code可以點做,基本上都係話只要你失去咗你登記時嘅email或者電話,就算你搵instagram,佢哋都唔會幫你搞。

我又試過特登買個vpn連返去Sydney,睇下佢會唔會唔再話我可疑登入,結果又係失敗。

我又又試過開多個假嘅分身,入邊乜都冇咁去request follow凱詠,但係佢都係冇接受到。

總之無論我用咩方法,都冇辦法睇到佢嘅instagram,冇辦法知道佢嘅生活過成點。

當初我啱啱識凱詠嘅時候,我怕將來會有咩手尾跟,所以我先特登將所有野都用澳洲嘅電話去登記。就算我俾凱詠嘅電話號碼都只係澳洲嘅電話號碼,以防萬一佢唔接受同我分手,要死lur爛lur,一哭二鬧三上吊。到時只要我返到嚟換返個香港電話,佢就點都唔會搵到我,乾手淨腳。

點知今日就係太過乾手淨腳,令到連我自己想搵返同凱詠嘅對話,睇下佢嘅instagram,搵返少少同佢有關嘅嘢都唔可以。

有時真係唔到你唔信,有D野真係冥冥中自有主宰,當日自己一手種下嘅因,點估到今日會係自己食返嚿果呢?當日太驚人哋會死lur而做得咁乾淨,點知今日想藕斷絲連嘅偏偏係自己。

時間又過多一年幾,我同Charlie都開始岀嚟做野,大家都開始有計劃一下幾時要搬岀嚟住,幾時要結婚,大約幾多歲要生仔,要唔要移民呢D關乎將來嘅問題。

我同Charlie基本上都已經認定咗對方會係陪伴自己一生嘅對象,而我亦都慢慢知道,我係唔會同凱詠再有任何關連,佢只會存活係我嘅心入邊。

當我工作唔順利,生活唔如意,夜闌人靜自己一個人掛住佢嘅時候都會叫呀樂send返D相俾我,又會睇下凱詠幾個月換一次嘅IG profile picture,知道佢仲健在,然後合埋眼,返番去當日嘅澳洲,短暫逃離一下生活嘅壓迫,做返嗰個淨係攬住凱詠,淨係記得我哋有幾sweet嘅呀臣。

我只係希望凱詠唔好改IG名,因為呢個已經係我同佢嘅最後嘅連繫。

大家千祈唔好誤會,我絕對唔係唔愛Charlie或者當佢係凱詠嘅替代品。只係當日嘅新鮮感?偷情嘅快感?完美無瑕嘅台妹?各樣野都令我永遠忘記唔到凱詠。有陣時或者我係懷念緊當日無牽無掛,天跌落嚟當被冚嘅大學生呀臣。只係需要捉實身邊嘅伴侶,唔需要擔心其他事情,嗰種乜都唔驚,死就死喇嘅青蔥歲月。

最後我都係無辦法從任何渠道得知凱詠嘅近況,我同佢就係咁成為陌生人直到而家呢一刻。

咁到底到而家人大個咗,再回望返呢段歷史,我對凱詠有咩感覺?我仲愛唔愛佢?係咪仲係好掛住佢?

其實我自己都唔係分得太清楚,我有時會好想返番去幾年前重新認識過凱詠,重新同佢經歷我哋經歷過嘅事,但如果你問我佢而家就棟係我面前,我係咪會仲好愛佢想即刻同佢一齊呢?咁可能又未必喎。

咁到底我係掛住佢呢一個人定只係掛住當日係澳洲嘅佢呢?

唯一一樣野我可以肯定嘅就係當日冇同佢繼續一齊係一件正確嘅事,之後發生咗D咩大家都好清楚喇。我有諗過原本我哋咁樣LongD已經好難去維繫,加埋跟住嘅武肺,我哋真係可以唔見兩三年然後繼續一齊落去?對於呢一樣野,我自己就有好大嘅疑問喇。

佢同我分開咗之後,如果佢好命D,分分鐘嫁咗人做埋人老母都仲得喇。但係如果咁不幸,佢今日真係仲同緊我一齊,咁我哋係呢幾年入邊真係見到面嘅會有幾多日?我係咪要佢同我呢個見得幾次嘅人結婚?定係嘥完人哋幾年青春,到佢就嚟三十歲先至同佢分手?

所以某程度上嚟講,呢個可能已經係我哋最好嘅結局。就同鐵達尼號一樣,就係因為呢段感情夠短暫,夠難忘,凱詠先至可以永遠係我心目中係一個完美嘅存在,佢永遠都唔存在任何瑕疵,永遠都係廿幾歲咁青春靚靚。

相反如果我哋繼續一齊,可能就會有磨擦,會有拗撬,會開始見到對方嘅缺點。如果最後我哋係要憎恨對方咁完結,我令願好似而家咁,起碼我每一次諗起佢都係覺得開心嘅。

所以其實你問我,我自己都好矛盾,一方面我係好掛住當日嘅我哋,好想再可以攬實凱詠,一方面我又好清楚如果我哋當日係繼續一齊,都好難有一個好嘅結果。

唔知道佢係點諗呢?可能佢已經唔記得咗我㗎喇。
2023-05-26 18:54:57
故事仲未完㗎!

知道大家對呀臣仲會掛住凱詠都有好多諗法同意見 有細心留意嘅話就會發現其實我好少回應呢D留言 一嚟我廢時劇透 二嚟我始終唔係佢 好難代佢講野嘅

所以聽日會岀一篇呀臣嘅真情剖白 解答返大家嘅問題 睇下佢睇完大家嘅comment之後有D咩諗法 之後就會繼續劇情嘅發展㗎喇
2023-05-26 23:05:40
個故事完咗?
懷疑個台妹都會覺得呀臣好假,又話有幾愛自己,但其實就謊話連篇
2023-05-26 23:24:05
究竟台妹係大話連編玩玩下
定係真心對阿臣然後發現左佢玩鳩佢呢
2023-05-26 23:50:47
未完㗎 完咗我會寫得好清楚話全故完
放心
2023-05-26 23:55:13
凱詠係真係假 知定唔知 有好多野永遠都係一個謎

寫真人真事嘅特色就係好多野都只能夠從主角嘅角度岀發 因為有D問題根本連當事人自己都唔知答案

雖然聽日嘅文都只係呀臣自己一個嘅心聲 但都希望可以盡量解答大家嘅疑問 至於凱詠嘅心底話 唔好你哋 唔好話我 就連呀臣自己都唔知 我哋只可以從佢嘅感受 從佢嘅言語去自行揣測一下
2023-05-27 00:10:18
但係呀臣同凱詠分手個陣 凱詠連試吓挽回都冇
而且呀臣算靚仔 但係ig咁少人fol其實都已經唔太make sense
覺得凱詠其實可能都一早估到
2023-05-27 01:57:04
妖驗眼啦 #557第一句已經講明未完
2023-05-27 23:34:35
文呢
2023-05-28 00:25:06
呢到可能係最後會提到凱詠嘅章節,所以都想係到再講講呀臣對凱詠到底有咩諗法,亦都趁機會解答一下大家之前提過嘅問題。

首先,其實呀臣有冇諗過凱詠都可能係玩家,甚至佢先係高手中嘅高手呢?

其實所有大家有諗過冇諗過,諗到諗唔到嘅野,我都有諗過。佢會唔會係Charlie派嚟試探我㗎呢?會唔會係捉我黃腳雞呢?會唔會係想氹我做D犯法野呢?會唔會係倫敦金呃我錢呢?

基本上係網上邊識一個人之前,我都會對佢有好大戒心,所以我係諗過哂所有嘅可能性,包括佢會唔會係玩家之中嘅玩家。

但好老實咁講,初初認識凱詠嘅時候我根本冇諗過自己會咁投入係呢段感情入邊,加上我自己本身都身有屎,所以佢係咪player我真係唔係好care。我反而比較擔心佢會因為太投入,而當佢發現個真相嘅時候接受唔到去做D咩事傷害自己或者我多D。始終啱啱認識,都未係好清楚佢嘅脾性,有D人一觸動到佢嘅神經,佢係會爆炸㗎嗎。

所以如果佢係player,我覺得仲好添,一嚟我唔駛內疚,二嚟我亦都唔駛擔心自己嘅人身安全,又唔駛擔心我會唔會害咗人一世,要自責一世。之前曾經有巴打問我係咪唔識掉轉諗㗎?我都唔會想佢玩apps喇。講真,我無任歡迎,佢玩得嘅話啫係佢對我都唔係太在乎,咁起碼佢唔會做D咩傻事先呀。第二,到穿煲嘅時候,我都有D野係手反駁佢呀嗎,我真係令願咁樣都好過見到佢喊苦喊忽。

內疚有時真係最大嘅懲罰,我唔知大家係點喇,我自己真係好佩服D人玩完條女,人哋喊哂口佢都可以頭也不回,don’t give a shit咁走咗去,我自己就真係唔得喇。係,我係貪玩貪心,但如果我見到一個女仔因為我而咁樣,我會覺得自己好衰,我真係會內疚到夜晚都瞓唔著。

咁當然到之後我真係越嚟越愛凱詠,但係我都係完全feel唔到佢對我有半點異心,起碼我哋仲一齊嘅時候冇,起碼嗰六日入邊都冇。有D人可能會話佢高手,做戲好,但起碼人哋就算唔係全心全意咁對我,都令我覺得佢係呀。

好簡單正常人拍拖都會想post下相話俾人知自己嘅另一半係點點點掛,咁起碼佢有做到呀。啫係如果佢係有一個用咗三五七年,有五六百個followers,過百個post嘅account嚟專呃人,咁佢都唔係一個player咁簡單,佢直情係一個詐騙集團喇,有成五六百人幫佢呃我。

所以就算我當佢真係老千喇,大家都係呃大家喇,佢都好明顯高我幾班呀。起碼比我嗰個得二三十人,一個post都冇嘅account有說服力得多。個問題就係,就算佢唔係一心一意,佢起碼做到毫冇瑕疵咁令我覺得佢係。相反,我真係唔覺得自己做到同樣嘅野。

呢樣亦都牽涉到第二個問題就係我見好多人話點解要確認關係呀,點解要咁快岀post呀咁樣?我又唔覺得有咩問題喎,如果人哋由一齊嘅時候都已經係認真嘅,咁諗住公開個問題又係邊呢?喂大佬,我都想岀post呀,我唔岀得炸。所以我唔係幾明大家斟酌嘅位係邊,如果佢肯公開承認同我嘅關係,咁唔係更加證明到佢係認真㗎咩?至少唔係一拖二三四先喇。

總括嚟講,我有諗過凱詠會唔會都只係同我一樣,但我感受唔到亦都唔相信佢係。

以上我講嘅都係講緊我哋仲一齊嘅時候,跟住落嚟就講下我哋分開咗之後。

有巴打話,可能佢同我分開之後都好快有第二個喇,所以我唔駛咁戇居係到內疚喎。其實有好多野我哋永遠都唔會知個真相,到底當日凱詠係咪對我一心一意呢?到底佢知唔知我一直都呃住佢呢?到底佢而家點呢?佢有冇諗起我呢?定係已經唔記得咗我?結咗婚未生咗仔未?

我淨係知當日我真係呃咗佢,我唔會自己衰完就諗人哋可能都係咁啫,咁我唔衰呀咁樣。你可以話我on9話我忟塞,但係我唔會用一樣假設性嘅野去同自己真實做過嘅衰野作比較,然後自己安慰自己,話俾自己聽其實我唔係咁衰啫。

再講呀,佢同完我一齊之後同第二個一齊就算係好短時間之內呀,我都唔覺得有D咩問題呀。我同佢一齊exactly同一段時間都同第二個一齊喇,咁我仲有咩資格去要求人哋呢?唔通要佢為我守生寡咩?老老實實,我真係希望佢搵到個好男仔,可以隨時陪伴係佢左右同佢長相廝守㗎。

之後又再講下,好多巴打話我傻,仲咁認真對待呢段關係,仲會記係腦入邊,會掛住佢,人哋根本當我過客,一早忘記咗who is呀臣喇。

咁好老實講,呢樣野我控制唔到㗎喎。我係會掛住佢就係會掛住佢。大把人明知要做兵,俾人撚,俾人綠帽,咪又係唔捨得放手,咁嗰D唔傻咩?相比之下我都算係咁喇下話,只係喺心入邊諗下佢,諗下當日嘅場境,咁我會諗起就係會諗起㗎喇,我自己都冇辦法㗎,愛情本身就係傻㗎喇。

最後簡單講幾句,你可以話我stubborn,話我on9,話我傻話我蠢,但到咗今日,我間唔中都仲係會諗起佢,會掛住當日嘅我哋,而當我諗起我點呃佢,對佢講嘅每一個大話嘅時候,我又會內疚又會自責一下,even我知道可能佢已經唔care。

呢個就係我到而家對凱詠嘅諗法。
2023-05-28 00:25:23
Sorry 今日遲咗
2023-05-28 02:11:32
凱詠點都好,最緊要charile唔使傷心
2023-05-28 15:28:07
完了?一日睇晒好爽
2023-05-28 19:51:31
「幾時先六點呀?好難頂呀」

係一個如常嘅工作天,我無聊到要WhatsApp呀樂搵佢陪我傾下計,等時間可以過得快D。

「好得閒?」
「都幾 得閒到又開始亂諗野」
「諗咩?」

「呀Y 唔知點解無喇喇係office坐坐下忽然有D掛住佢」
「大佬呀 你唔好咁痴線喇 你返咗嚟就嚟兩年㗎喇…」

「我都唔想㗎?我係會坐坐下就諗起佢咁有乜計啫」
「你坐係office嗰陣諗好喇 唔好係呀嫂隔離嗰陣諗添呀」
「你當我傻㗎咩?呢兩年嚟我練到講大話都講得好流暢 佢絕對唔會懷疑㗎喇」

「btw可唔可以send D相嚟」我追問。
「痴漢 無得救㗎喇」

望住一張又一張同凱詠嘅合照,我腦海中嘅記憶又重新浮現返哂岀嚟。

由上一秒我仲係身處辦公室之中,一下子又好似返番去澳洲,返番去當日嗰個公園,攬住凱詠同佢傾下計,影下相。咁樣簡簡單單已經係最難能可貴嘅快樂。

其實到底呢D相係幫我減輕對佢嘅思念定係令我越嚟越掛住佢呢?

「你記住換電話都要backup咗呢D相先 你真係我嘅最後copy喇大佬」
「得喇 500蚊一年ICloud subscription fee」
「you know I love you ga」

「死撚開喇」
「btw你聽日得唔得閒?」呀樂追問。

「做咩呀?」
「有套戲想睇 Go?」
「聽日唔得呀 聽日係我同Charlie四週年」

「Oh 有咩搞?」
「Book咗weekend嘅staycation囉」
「Stay咩cation呀 咪啫係搵間靚D嘅酒店爆房」

「咁Book咗weekend去爆房囉」
「咁你記住Del返D相喎」
「得喇 第一日岀嚟行咩?我收工之前會Del㗎喇」

「唔阻你哋做爸爸媽媽喇」
「爸你老母咩!」

「Edison。」

就係我同呀樂傾得興起嘅時候,坐我後面嘅manager忽然呼叫我嘅名。原本我悠閑嘅happy Friday就咁被佢破壞咗,,令到我最後嗰幾個鐘都忙到隻狗咁,最後我仲要OT埋先至可以收工。

19:39
11月16日
WhatsApp: Charlie B傳送你一個新訊息



「仲未收工?」

「啱啱收喇」
「陰工囉 星期五都要OT」
「跟D變態中女老姑婆係咁㗎喇 又冇朋友又冇拖拍 生活咁枯燥乏味 咪拉埋D細嘅嚟用工作麻醉自己囉」

「咁你快D返屋企執野喇 聽日仲要帶我去玩㗎!」
「Yes madam!」

武肺嚟咗之後,搞到全香港都冇得去旅行,逼於無奈之下唯有留係香港消費,令到「爆房」呢個活動忽然興起咗。

Charlie亦都扭咗我好耐,叫我都同佢去下Staycation,最後我就plan咗趁住四週年呢個日子帶佢去,為佢,為我都留下一個永世難忘嘅回憶。

當日我哋行咗成日街,又坐咗我哋第一日拍拖坐過嘅天星小輪,去返我哋一齊嘅地方影相之後因為我哋買嘅package包埋一餐係酒店餐廳入邊食嘅晚餐,於是我哋就返咗酒店食呢一餐好好咁慶祝。

好快終於要進入Staycation嘅重點環節,我哋上到房之後我坐係書枱嘅前邊,將Charlie一手攬落嚟我嘅大脾之上,然後張嘴係佢嘅嘴上狂舞,手開始放係佢嘅背部漫遊。

「喂呀,沖埋涼先喇,岀咗成日街咁污糟。」
「咁你快D去喇。」急不及待嘅我打咗Charlie嘅patpat一下講。

由於Charlie覺得我沖涼用嘅水太凍,而且兩個人一齊沖又要爭個花灑,另一個又會凍親,所以我哋都甚少一齊沖涼。我只有趁佢沖涼呢個空檔,拉下筋,按摩一下行咗成日嘅雙腳,為之後落嚟嘅事做好準備。

「到你喇。」Charlie係廁所入邊走岀嚟講。

我係背囊入邊拎咗衫褲之後,就向住廁所嘅方向前進。

「喂,你個電話呢?」Charlie問。
「做咩呀?」
「Send返今日D相俾你囉。」

「嗱!」我將電話係褲袋入邊拎岀嚟,向Charlie遞上。
「咁你順手幫我差埋電喇。」我續道。
「嗯,你快D去沖涼喇。」
2023-05-28 19:52:14
未完㗎!
2023-05-28 19:55:14
玩完了 一定無del哂 Charlie 係電話睇到啲合照
2023-05-28 22:13:04
2023-05-28 22:17:39
可唔可以話係同個喺嗰邊識嘅朋友影嘅相
2023-05-28 22:48:12
我最期待嘅畫面出現啦
2023-05-29 00:32:37
爆啦
吹水台自選台熱 門最 新手機台時事台政事台World體育台娛樂台動漫台Apps台遊戲台影視台講故台健康台感情台家庭台潮流台美容台上班台財經台房屋台飲食台旅遊台學術台校園台汽車台音樂台創意台硬件台電器台攝影台玩具台寵物台軟件台活動台電訊台直播台站務台黑 洞