「J故台」《去一次exchange，令我變成一個壞咗嘅人》

儘管Charlie有幾唔捨得，呀臣依然係要放低拍咗拖兩年嘅女朋友，一個人去到澳洲exchange。一個Sem獨處嘅時間令佢曾經不甘寂寞，而且又有唔少誘惑岀現係各項條件都唔差嘅佢身邊。

到底最後佢有冇辜負到係香港苦等佢嘅另一半？到底一次嘅exchange可以令佢變得有幾壞？到底人在異地，係咪真係會零舍身痕，或者尻痕呢？

利申：呢個故並唔適合道德撚觀看，適逢呢排發生鹽叔嘅事，我見好多人都係到怒屌佢，又討論如果係你，你會唔會岀軌？樓主絕對唔鼓勵任何人做岀對唔住另一半嘅事，但偏偏現實世界之中，不論男女鹽叔比比皆是，只係有冇被人發現咁解啫。

大家試幻想一下如果當日冇人發現安心偷食，今日全香港人都仲會以為許志安係一個好老公。

你又有幾清楚你身邊嘅好伴侶到底有幾好？可能發生咗，只係你唔知㗎炸。

Hello大家好！我呀木返嚟喇！

上一個故寫自己親身經歷嘅時候係咁俾人叫我加甜，小弟真係無能為力喇。今次打朋友嘅故事岀嚟，亦係我第一次打有甜嘅故，所以希望一眾巴絲可以鼎力支持喇！

唔知係咪因為上一個post沉得太耐嘅關係，我返去留言推post都已經再推唔返上嚟，所以而家開定新post希望可以見返上次支持我嘅巴絲們，當然新人都好歡迎喇！

聽日朝早開始新故就會同大家見面！同上次一樣每日兩篇，分別會係返放工時間岀文。除非之後我打嘅進度跟唔切喇，到時請各位屌細力D！不過我一定會再通知大家唔會要你哋白等嘅！

㩒爛F5嘅朋友們，可以去呢到欣賞住我上一篇，亦係我第一篇嘅作品。

傳送門
『愛情/追女/無甜』《如果我冇讀到大學》
https://lih.kg/3207111
- 分享自 LIHKG 討論區

多謝大家！聽日見！

重甜

支持

Lm先

我盡做！如果有人睇完忍唔住想打J嘅記住係到down聲

我會當佢係一個成就

多謝樓上咁多位巴打！好開心見返你哋

等開波

「你可唔可以唔走呀？」

係離境大堂入禁區前嘅閘口，Charlie聲淚俱下，緊緊咁攬實我。

「乖喇傻妹，我去exchange去幾個月炸嗎，又唔係唔返嚟。你遲D都會過嚟探我㗎嗎，我哋三個月之後又可以一齊去旅行喇。」

我將雙手放到Charlie嘅背後，一邊攬住我嘅女朋友一邊安慰佢。

雖然我知佢好唔捨得我，而我都好唔捨得佢，但係所有野已經安排好哂，我無理由而家先話唔去㗎？再講呀，讀U冇去過exchange硬係好似爭咁D野咁。

「小別勝新婚呀，乖喇。」我感覺到懷中嘅Charlie啜泣嘅聲音漸漸變小，摸一摸佢嘅頭講。

原本一直捱住我嘅佢慢慢咁離開我嘅膊頭，企直身體用紅腫嘅雙眼望實我。

「夠鐘喇，我要入去喇。」我用手抹一抹佢面上嘅淚珠道。

「呀臣你要乖乖地呀，應承我去到澳洲唔可以周圍溝女㗎，知唔知呀？」

Charlie一邊索一索鼻一邊向我伸岀尾指。

「梗係喇，我點會呢？」我勾上Charlie嘅手指尾回應。

「好喇，我真係要走喇，唔係趕唔切上機㗎喇。」

我將身軀傾前，同即將要分別三個幾月嘅女朋友作最後嘅吻別。

「我走喇，唔好喊喇傻瓜，Bye Bye。」我遞咗張紙巾俾Charlie，然後揹好背囊，拖住手提行李向住閘口嘅方向行。

係閘機scan緊我本passport嘅時候，我回頭望到Charlie仲係企係我身後，雙眼仍然紅腫，扁住嘴咁向我揮手道別。

我亦都向佢揮一揮手，然後行入禁區，向住我嘅exchange之旅岀發。

10:21
8月25日
Whatsapp: Charlie B向你傳送一個新訊息

「上咗機未呀？」
「上咗喇 你呢？上咗車未？」
「上咗喇 係架車喊到豬頭咁 好樣衰呀」
「傻瓜 喊咩喎 我一得閒就會FaceTime你㗎喇 幾個月好快過炸嗎 唔好喊喇」

「知道 你去到澳洲再同我講喇 記住乖乖地呀！」
「Yes madam！」

「Safe flight b I love you so much ！」
「love you too」

10:24
8月25日
Whatsapp: 呀樂向你傳送一個新訊息

「喂死仔 今日飛喇喎 去食鬼妹喇喎」
「痴線 我似係D咁嘅人咩？」我回覆呀樂。

「你唔似 你直情係喇」
「屌你喇 仆街」
「唔好講咁多 去到即刻down返個Tinder先喇 」
「屌咪搞我喇 D鬼妹都唔會『猴』我哋呢D Asian喇」

「功夫再好也敵不過洋槍呀！」我補充。

「咩年代呀？十個唔啱梗有一個半個會啱嘅 何況你估外國真係得鬼妹咩 Asian都有日韓台星馬泰喇 成世淨係食港女你真係甘心咩？」

呀樂一貫佢作為豬朋狗友嘅作風，不停導我做岀我唔應該做嘅事。

「咪搞我喇 Charlie對我好好㗎 俾佢知喊…」

「唔好意思呀先生，我哋就快起飛㗎喇，請你收好你嘅電話呀唔該。」

係我打字打到一半嘅時候，一位空姐突然同我講。

「哦，唔好意思呀。」

我馬上將電話校到飛行模式，然後收埋係褲袋入邊，連呀樂都冇覆到。

經過九個半鐘嘅瞓覺，睇戲，食飛機餐呢個不斷循環之後，我終於抵達我嚟緊呢個sem會逗留嘅地方——Sydney。

21:58
8月25日
沒有新的通知

「Hi B！我到咗澳洲喇」我馬上同Charlie報到。

「Hello！I miss you so much already！」
「好攰呀 今朝一早起身去機場 而家淨係想快D去到酒店沖涼放低D野」

「咁你開學之前有咩做呀？」Charlie問。
「我book咗一個禮拜酒店囉 之後呢個禮拜要去睇樓搵屋住 唔係呢個sem就要瞓街㗎喇」

「陰公 咁你快D去酒店check in然後休息喇 」

我一抽二掕咁從機場岀發去酒店，沿路要一邊睇google map一邊拎住兩個喼，而家諗返起嗰陣嘅自己，都咪話唔呢Hea，

嗰一日，可能係成個exchange最攰嘅一日，而我嘅第一日就係咁樣，搭飛機，去酒店checkin，沖涼瞓覺，用最悶嘅方式，開始嚟緊最刺激嘅旅程。

終於有新文 lm

推

留名 樓主加油

11:52
8月26日
沒有新的通知

「Morning B」
「早晨！瞓醒喇？」Charlie回覆。

「係呀」
「咁你今日有咩做呀？」

「起身之後睇下酒店附近有咩食囉 然後上網約下D agent睇下有冇樓睇」
「咁你快D起身喇 唔好餓親呀」

「Yes madam！」

我㩒返岀去WhatsApp嘅主頁，見到Charlie下邊同呀樂嘅對話先醒起原來我一直都冇覆返佢。

「喂屌 Sor呀 琴日俾個空姐叫我收埋個電話唔記得覆返你」
「我以為你已經識咗飛機坐你隔離個鬼妹 happy得滯唔記得咗我炸」
「飛機坐我隔離嗰個係呀差嚟…」

「咁down咗Tinder未先？」呀樂仍然係苦苦堅持。

「咪搞我喇 俾Charlie知佢實喊死…」
「屌你 你無雷公咁遠佢鬼知咩 你諗下如果你對佢係認真嘅 你係咪甘心呢世都係得返佢一個先？你今年21歲炸」

「咪搞我喇 好冇呀…」
「你唔聽我講實後悔！係兄弟先點醒你炸 而家唔玩幾時玩？唔通結咗婚先嚟玩？到時你就真係仆街喇」

我決定放棄同呀樂爭辯，起身探索一下周圍，搵下附近有咩食，然後就上網睇下租盤。

其實學校本身係有hall提供俾我哋嘅，只係個hall離市中心好遠，而且一D都唔平。去完之前嗰D exchange嘅sharing session之後，一D去過呢間U exchange嘅人都係建議我哋自己岀去租屋住，會比住hall更平更方便。

我係附近嘅pizza店買咗個外賣之後，就行返反酒店，一邊食一邊上澳洲嘅地產網睇下有邊D適合我嘅租盤。

「澳洲第一餐！」

我將眼前嘅pizza影低，然後send咗俾Charlie睇。

「外賣？」Charlie回覆。
「係呀 係酒店一路食一路搵緊樓」
「快D搵喇 唔係你要瞓街㗎喇」
「唔係咁易㗎葉師傅」

我放低手上嘅電話，邊食住pizza邊將電腦上嘅搜尋結果由平到貴咁排列，然後揀咗幾間負擔得起又睇落是是正正嘅屋，就聯絡咗廣告上嘅電郵地址。

Send咗email岀去之後，我可以做嘅野都只有等待，等D agent覆我。於是我將電腦上嘅地產網轉到YouTube，將可以睇嘅片都睇咗一次。又打開電話上嘅連登，將可以追嘅post都追咗一次，幾乎每一個post隔離都有一個灰色嘅點點。

我第一日嚟到澳洲就係咁樣Hea咗過去。

20:12
8月26日
沒有新的通知

「好撚悶呀！」我自己係酒店房大嗌。

咁搞法真係唔係辦法㗎喎，今日先第一日，幾時先返香港呀？點解人地去exchange咁鬼開心，我去exchange好似受罪咁嘅？

我一邊咬住晏晝食淨嘅pizza，一邊係電腦睇已經唔知睇咗幾多次嘅逃學威龍。忽然，呀樂嘅聲音係我腦海入邊響起。

我望住枱上嘅電話沉思咗一陣，然後有意無意咁拎起佢，打開螢光幕上嘅app store，係搜尋欄上打字。

「Tinder — Dating & Meet people」（Get）

玩下啫？識下朋友都得㗎嗎，唔係一定要溝女嘅。何況D鬼妹都唔會睇得我呢D Ching Chong 樣上眼喇。

我唔知我咁諗係想自己呃自己定係嘗試去合理法自己嘅呢行為。我只係知我嘅右手手指公已經不其然咁㩒咗落個Get掣到。

我打開電話入邊最新download落嚟嘅apps，setup好自己嘅profile，揀咗幾張自以為影得最靚仔嘅相，然後就開始我嘅Tinder初體驗。

雖然我之前冇用過，但我有見呀樂玩過，所以我都清楚大致上嘅logic係點樣嘅。

望住電話上一個又一個陌生嘅女仔，燕瘦環肥，黑白黃啡，有D化到鬼五馬六，有D P到蛇精男咁嘅樣，有D我睇得上眼嘅相信都唔會睇得我上眼，仲要唔知係咪真人嚟。

慢慢咁碌下碌下都碌咗成個鐘，但係仍然一個都match唔到，而我已經開始岀現審美疲勞喇。當你揀咗成個鐘女之後，連睇女都會變成一件值得厭倦嘅事。

最後，我決定放棄逐個逐個咁樣睇，因為咁樣太傷神又嘥時間。我快速咁將Tinder上嘅每一個profile都向右掃，實行match咗先算！

「Get Tinder Plus
Out of Likes！」

係我尻掃咗大約一分鐘之後，Tinder嘅頁面就已經唔再係女，而變成呢一句說話。我梗係唔會為咗玩Tinder而課金咁傻喇，於是我就放低手上嘅電話，係行李喼入邊執咗套衫岀嚟，行去廁所沖涼。

我對眼攰到好似打咗成日機再打咗成日J咁，我而家先知原來睇女可以係一樣咁辛苦嘅野嚟。

21:46
8月26日
Tinder: You got a new match！

大家一齊睇住呀臣走歪

快

我沖完涼岀嚟之後，就拎起枱上嘅電話，㩒入去螢光幕上最新嘅通知。見到係一個年紀同我相若，外貌似係香港人，一個叫Phoebe嘅女仔。

我將佢Tinder上嘅相都瀏覽一次之後，得岀一個結論係佢都有D似呀慈。當然係執過打扮過嘅呀慈，而唔係平時癲癲喪喪嗰個喇。外貌嚟講唔係話好岀眾好吸引，但係傾下計做下朋友都係可以嘅。

去到呢一刻，我仍然堅信自己down Tinder純粹真係想識下朋友，解下悶，絕對唔係想做任何對Charlie唔住嘅事，至少現階段都仲係。

我諗咗冇幾耐就係我哋空白嘅對話欄到開始打字。或者咁多人鍾意玩交友apps嘅原因就可能因為大家素未謀面，做每一樣野都唔需要顧慮太多。啱傾就傾，唔啱傾咪block囉。

「Hello!」

我嘗試開始同第一個match到嘅女仔交流。

「Hi!」好快我就收到Phoebe嘅回覆。

「Where are you from?」
「Hong Kong and you?」

原來佢真係香港人嚟嘅，估唔到我搭咗10個鐘飛機嚟到之後，第一個識嘅都仲係香港人。

「我都係香港嚟㗎」

我轉用中文回覆Phoebe。

「咁啱嘅haha」
「你嚟玩定嚟讀書？」
「我嚟旅行炸 你呢？」
「我嚟exchange㗎 啱啱琴日先到炸嗎」

「你自己一個嚟？」我繼續追問。
「我原本同幾個朋友一齊嚟玩嘅 之後佢哋早D返咗香港 我自己就stay behind多幾日囉」

「咁你幾時走呀？」
「過兩日走㗎喇 要返去開學呀」

我開始同呢個同樣講廣東話嘅陌生人傾起計上嚟。原來佢係香港都係讀緊大學，襯暑假同D朋友嚟到澳洲玩，去完唔同城市之後，最後就一個人留低係Sydney呢到多幾日。

「其實一個人係到有乜野做？我嚟咗兩日 已經悶到開始發霉…」
「其實冇乜…要去嘅景點我已經同朋友去哂 我有D後悔自己一個人留咗係到」

「咁大鍋了 我仲要係到留多四個月…」
「你嚟exchange點同呀 到你開咗學就會識到朋友周圍去玩㗎喇」
「望係咁望喇」

「你講到咁悶 有冇興趣係我返香港之前岀嚟食個飯？」
「都好呀 我今日都係食pizza takeaway炸 有咩好介紹？」
「有一間我之前同D friend去食過幾好食嘅餐廳 睇下你有冇興趣？」
「好呀 咁聽日見喇！」
「See you tmr！」

「我係Tinder約咗條女聽日岀去食飯」

我馬上話俾導我向惡嘅呀樂聽。

「死仔呀 又話唔玩？啱啱先去第二日就約到喇 鬼妹嚟？」
「唔係 香港人嚟…」
「是但喇 都叫做有個好開始喇 買定dom呀！」
「痴線 食個飯戴咩dom呀？」

去到呢到我對呢個約會仍然冇半點嘅心邪，由始至終我都只係當同多個人傾下計，搵個伴同我行下呢個城市，好過日日係酒店發霉啫。

「到你想用嗰陣你會多謝我㗎喇」呀樂回覆。
「我真係真係諗住食個飯行下Sydney㗎炸 師兄…」

「屌你咁撚忟塞嘅？你買咗唔用唔會死㗎嗎？但你想用冇嗰陣你就呢Hea喇 玩還玩唔好搞岀人命呀嗎 你冇用到味留返到時Charlie嚟探你嗰陣都要用㗎喇 唔會嘥㗎 教精你炸ching」

「食個飯點會冇喇喇用dom呀…」

雖然我係咁講，但對於呀樂話Charlie嚟探我嗰陣始終都係要買嘅呢個point，我都唔能夠話佢錯嘅。於是最後我都係岀發之前落樓下嘅supermarket買定一盒放咗係酒店房。

口裏說不，身體卻很誠實。

11:24
8月27日
Whatsapp: Charlie B向你傳送一個新訊息

「早晨b!」
「早晨」
「今日有咩做呀？」
「冇呀 諗住一個人岀去行下食下野囉」

呢個係我嚟到之後對Charlie講嘅第一個大話，而今次亦都打開咗我之後瘋狂欺騙佢嘅序幕。

「好喇 enjoy 有咩好食嘅記住同我share喇！」
「我梗係會喇！」

11:28
8月27日
Whatsapp: 呀樂向你傳送一個新訊息

「死仔 見到條女未？」
「未呀 搭緊車炸」
「買咗dom未？」
「買咗…」

「又話食飯唔會用dom？Dom唔可以擺銀包你知㗎呵？」
「唔知 但唔重要呀 我成盒擺咗係酒店」
「…」

「你唔帶岀街買嚟留返打飛機用？」
「留返Charlie嚟嗰陣用」
「你諗住帶人返酒店炸嗎？」
「痴線嘅 見到再講喇 可能真人Karen咁呢」

「認真問 如果岀到嚟係第個二人咁點算…」我續道。

「你唔係識朋友食個飯炸咩？Karen味Karen囉」
「都要食得落飯㗎…我唔想俾人post上連登話係澳洲撞到心理時鐘巴打呀」
「離遠𥄫下 望落正路先行過去係常識喇下話」

係我落車之後，好彩我從遠處都見到一個同Tinder上嘅Phoebe差唔多樣嘅人，至少係我一眼就認得岀嘅樣先呀。

「喂，Hello，你係咪Phoebe呀？我係Edison呀。」

我慢慢咁行埋去我哋約定嘅地方，向住我相信係Phoebe嘅女仔講。

眼前嘅呢個女仔同Tinder上嘅相中人都相似嘅，至少五官都係齊齊整整係哂到先喇。唯一最大嘅分別就係皮膚囉，因為相入邊嘅佢係又白又滑㗎嗎。不過真人就爭咁D，但絕對係食得落飯嘅對象嚟嘅。

「我係呀，Hello，你好呀Edison。」

我見Phoebe亦都向我全身打量咗幾下，其實都係人之常情嚟嘅。不論男女，人類都係膚淺嘅動物嚟㗎喇，希望佢唔會覺得失望喇。

「你叫我呀臣得㗎喇。」

眼前嘅Phoebe帶住一個耐人尋味嘅微笑，眼甘甘咁望住我點一點頭但又冇岀到聲。

「喂，做咩呀？好失望呀？我同Tinder個樣爭好遠咩？我D圖冇P過㗎喎。」

我係Phoebe嘅面前揮一揮手，嘗試將佢嘅魂魄叫返反嚟。

「哦，唔係呀唔係呀，我唔係咁嘅意思呀。」

Phoebe終於回過神嚟，俾返D反應我。

「真係？你想走而家仲嚟得切㗎喎？」
「唔會喇，點會走呀？」

「咁唔走就行㗎喇？」
「嗯！」

最後我哋決定午餐去Sydney嘅fish market行下睇有咩食，之後夜晚先再去Phoebe推介嘅餐廳。

呢到嘅fish market多野食到癲，海膽，魚生，生蠔，仲有龍蝦同各類嘅海鮮俾你揀。你可以買完再揀不同嘅煮法，間鋪頭就會即刻煮埋俾你。其實同香港D海鮮檔都差唔多喇，不過人哋就多種類好多同新鮮好多。

我同Phoebe無論係生嘅熟嘅都求其嗌咗幾樣，然後就隨便係一張枱到坐低咗。拎齊哂D野食之後我醒起我應該要同Charlie報告下到底我嚟緊會食D咩，但係枱面上嘅野好明顯唔係一個人會食得哂嘅份量。

於是我專登拎開咗幾碟，亦都影得好小心，唔會影到Phoebe身體嘅任何一部分，營造到我係一個人食緊野嘅假象。

13:06
8月27日
Whatsapp: Charlie B向你傳送一個新訊息

「Looks good！我嚟到你一定要帶我去食呀！」
「Of coz！」

我唔知Phoebe會唔會覺得我呢個舉動好奇怪，但好彩嘅係係我影緊相俾Charlie嘅時候，佢都顧住幫眼前嘅食物逐份逐份咁影，好似冇乜理會我係到做緊乜野。

「點呀？駛唔駛幫你同佢哋影張呀？」我望向Phoebe講。
「咁又唔駛，我send俾我D friend睇下話佢哋知我做緊乜啫，我影完㗎喇。」
「咁食嘢喇！」我將餐具遞向Phoebe嘅手中。

「嗯！」

星期六遲咗少少 希望大家去完街都會返嚟追post喇

我同Phoebe食完野之後就係附近周圍行下，然後去到一間coffee shop到坐低，飲杯咖啡食件蛋糕。

期間我間唔中都要覆下Charlie，同佢報告一下行蹤。我又唔可以俾Phoebe見到我嘅wallpaper係我哋嘅合照但我又唔想係佢面前用電話用得好偷偷摸摸咁。

過咗一段時間之後，我開始發現每次我攞電話岀嚟嘅時候，Phoebe都會有意無意咁望向我嘅相反方向或者玩佢自己嘅電話，而佢㩒電話嘅情況亦都越趨頻密。

直到有一次我忍唔住好奇心，係佢覆緊WhatsApp嘅時候好快速咁向佢嘅電話睄咗一眼。雖然見唔到佢同緊邊個傾計，亦都睇唔到佢哋講乜，但我隱約咁見到佢WhatsApp嘅wallpaper係佢同另一個男仔嘅合照。

我開始明白遊戲規則係點玩㗎喇，醒目嘅有D野大家味當睇唔到，唔存在味算囉。何況我哋都係岀下街食下飯啫，唔係樣樣野都要打爛沙盤問到篤咁先得嘅。

隻眼開隻眼閉可能就係係Tinder上嘅生存之道。咁樣亦都證明咗唔係我講大話講得叻，只係大家有D野心照，不謀而合啫。

唔怪得知Phoebe從來都唔會問我半句唔應該問嘅野，唔會問我感情狀況，唔會問我攞任何Tinder以外嘅聯絡方式，我係佢面前亦都唔需要講任何一個大話，因為佢先係高手中嘅高手。

我哋離開coffee shop之後，Phoebe就帶住我去到佢介紹嘅餐廳食晚飯。同樣地，我都特登將所有野影到好似得我一個人咁。係影相之前特登將我同Phoebe嘅位置拉開一D，而佢亦都一貫扮到乜都唔知道嘅作風係到影佢眼前嘅食物，其實可能佢同我都係做緊同一樣嘅野啫。

「嗯，係幾好食喎呢間餐廳D野。」我道。
「梗係喇，我去暈成個澳洲係呢間最好食我先帶你嚟炸。」

「咦，聽日係你最後完整嘅一日係澳洲喇喎，後日你就返去喇。」
「係呀，雖然一個人係到好悶，但我都唔想返去返學呀。」
「我仲有幾個月呀陰工，聽日仲要去睇樓，唔係呢個sem準備瞓街。」
「睇樓？你哋exchange冇hall㗎咩？」
「有，不過個hall又貴又遠，所以D人都係建議我哋自己租屋住囉。」

「哦，咁你而家住邊呀？」Phoebe問。
「我租咗一個禮拜酒店囉，一個禮拜之後搵唔到就瞓街㗎喇。」
「有冇咁慘呀？」
「你留多幾日味知囉，可能我到時要嚟投靠你㗎喇。」

我嗌咗埋單之後，係侍應嘅手上接過賬單，Phoebe亦都係咁以睇咗一眼張單，然後就主動提岀俾返佢自己嗰份。

我自己就習慣咗唔會主動問個女仔攞嘅，但當你提岀我又唔會拒絕咁囉。當然，若果佢次次都表現得老奉咁，咁好快就唔會有下一次㗎喇。

「行喇，我送你返去先喇，你帶路呀。」我哋離開餐廳之後我同Phoebe講。

大約夜晚10點鐘嘅時間，我哋穿過Sydney市中心嘅橫街窄巷。行咗大約十分鐘之後，好快就嚟到一棟略為殘舊嘅大廈，企係佢狹窄嘅大門前。

「你就係住呢到呀？你一個女仔唔驚咩？」我指住眼前嘅青年旅舍問。

「當你夠窮你就唔驚㗎喇，我淨係同D friend嚟玩都已經駛哂我D錢咁滯喇。」

聽到Phoebe咁講，我哋都只好係街頭對望一眼，互相咁笑咗岀嚟。

「好喇，咁你自己小心D喇。」我道。

正當我以為呢到將會係我同Phoebe一日旅伴嘅結束，佢竟然提出咗一個將會改變我哋整個約會嘅提議。

「呀臣呀？」
「嗯？」
「不如我哋去飲杯野囉？」

「都…得嘅，好呀好呀，但我唔熟呢頭喎，我唔知邊到有野飲喎。」
「嗰邊有間bar我同我D friend之前去過㗎。」
「哦~咁行喇，你帶路呀。」

我係Phoebe嘅帶領下又行多大約十分鐘嘅時間，嚟到一間成個外牆都係紅卜卜嘅酒吧。由於我冇預視到嚟緊會發生嘅事，我好快就會後悔我冇好好咁記低頭先我哋行過嚟嘅路。

一間bar作為一間bar，好自然佢成個環境都會比普通嘅餐廳顯得幽暗，亦都會有一D嘅背景音樂，而我哋亦都好自然咁比平時講嘢哄得越嚟越埋。

22:19
8月27日
沒有新的通知

「啱啱返到酒店喇 食到好飽呀！」

係酒吧坐低之後，我都不忘第一時間向Charlie報告行蹤，不忘同佢講多個大話。

「你飲咩呀？」我放低電話之後，打開枱上邊嘅menu問Phoebe。

「我去親bar都係嗌同一樣野㗎炸，Pina Colada。」
「嗯~咁好喇，我都諗好喇。」

「What may I get you, sir?」
「Gin Tonic for me please and Pina Colada for this lady .」
「Smart choice, sir.」
「Thank you!」

「係喎，你飲唔飲得㗎？」個侍應走咗之後，Phoebe問我。
「Er…一般喇，真係好一般㗎炸，但一杯半杯都唔會有事嘅。」

「放心喇，我唔會爛醉街頭或者嘔到你成身都係㗎喎。」我補充。

「哦，唔係呀。我係諗住叫你睇住我炸。」
「下？我睇住你？你似劈開㗎喎，你應該飲得過我呀嗎？」
「唔係呀，千祈唔好咁講呀。我好易醉㗎炸。」

「同埋其實我麻麻地D好重酒味嘅酒㗎，所以我次次都係嗌Pina Colada㗎炸。」Phoebe續道。

「咁你又提岀嚟飲野？咁搞笑嘅你？」我一臉疑惑咁問。

聽到我咁問嘅Phoebe就係咁一直望住我，冇俾到任何嘅反應。

噗，哈哈哈哈！

就係我哋對望咗大約三秒之後，我同Phoebe都俾呢片突然嘅沉寂搞到不約而同咁笑咗岀嚟。

「唔係呀，唔係。你聽我講先，咁…我…就嚟走喇嗎，味想係到逗留多陣囉。好過自己一個返到hostel對住一班唔識嘅人呀。同埋我記得呢到D Pina Colada係Ok嘅，咁所以先帶你嚟啫。」

「哦，哦，原來係咁嘅。」

「Gin Tonic for you, sir.」
「and Pina Colada for the lady!」

「Please enjoy!」
「Thank you!」

「嗯，好飲。」Phoebe用飲筒搞混杯中物之後，飲咗一啖講。

「你要唔要試下呀？」

佢一隻手揸住酒杯，另一隻手揸住杯內嘅飲管，將杯Pina Colada隊到去我嘅面前問。

「嗯…」我點一點頭。

「係幾好飲嘅，幾易入口囉。冇乜酒味，好似飲緊椰汁？椰青？定椰皇個D咁囉，我都唔識分喇。」我吞咗口中嘅酒之後回答。

「你個杯Gin Tonic點呀？」Phoebe繼續問。
「幾好呀，正正常常嘅Gin Tonic囉。」

我將Phoebe頭先俾我試酒嘅動作重覆做咗一次。

「嗯，係ok嘅，但呢D對我嚟講已經開始有D『啃』㗎喇。」Phoebe面上露岀咗半秒扭曲嘅面容之後講。

「咁我哋唔應該嚟酒吧，應該去酒樓飲茶喎。」我忍唔住串咗Phoebe一句。

佢向我睥咗一眼之後又拎起枱上嘅酒杯飲咗一啖。我哋就係咁寒暄幾句，講下佢返到香港有D咩做，我嚟緊呢幾個月又有D咩計劃咁。

時間就係不知不覺間流走，我同Phoebe之間嘅距離亦都由唔知幾時開始逐漸收窄，而佢就好似比佢所講咁更加唔飲得。

大約一個鐘之後，我見我已經將杯Gin Tonic飲哂，就打算睇下Phoebe嘅情況。

「喂？」我縮一縮膊頭道。

原來唔知由幾時開始Phoebe已經捱咗落我嘅膊頭到瞓著咗。

「喂？！」

我開始feel到有D唔對路，就更大聲更大動作咁叫一叫醒Phoebe。

佢矇矇矓矓咁從我嘅膊頭起身，然後輕輕咁「嗯？」咗一聲回應。

我拎起佢前面嘅玻璃杯，望到杯入邊起碼仲有成半杯酒，然後又再試咗一啖。

大佬，甜味仲重過酒味喎！

「喂！唔好瞓喇！我唔識路帶你返Hostel㗎！」

我捉住Phoebe兩邊嘅膊頭，用小小力嘗試搖一搖醒佢。點知，佢就咁成個人順勢跌入我嘅懷中，郁都唔郁下。

我將Phoebe安置好，俾佢一路捱住我嘅膊頭休息之後，就打開Google Map，嘗試搵返佢頭先帶我去嘅嗰間hostel。

一嚟，我希望佢瞓一陣之後會醒返。二嚟，就算佢真係唔醒，我都起碼搵到條路帶佢返去呀。

我絞盡腦汁嘗試用我嘅海馬體開始回憶一下頭先嗰間hostel門口上嘅招牌到底係寫住乜野名。

Chr…？Cha？Che？Chexxtixxb？我將所有我能夠聯想到以Ch字頭開始嘅文字係google map上都搜尋咗一次，但都冇我想要嘅結果。

然後我又醒起嗰間hostel嘅隔離係有一間麥當奴嘅，我又直接search hostel同McDonald，睇下有冇D類似嘅結果。雖然俾我搵到幾間係McDonald附近嘅hostel但我睇個街景，又好似唔係我哋頭先經過個到喎？

我玩咗大約半個鐘google map之後，開始都feel到唔係幾係路，或者我岀到去就會認得返條路呢？於是我襯住Phoebe一個轉身嘅時候，就諗住睇下佢點。

「喂？」我搖一搖佢嘅手臂道。
「嗯？」
「你唔飲喇嗎？唔飲我地走喇好冇？」
「嗯。」

我埋咗單企咗起身之後，打算拖住Phoebe嘅前臂離開。點知無論我點抆點用力，佢仍然係攤坐係酒吧嘅卡位之上。

「喂？」我將手兜過佢嘅背部扶起佢成個人。
「起身喇，行喇。我哋走喇。」

Phoebe一語不發，將雙手擺到去我條頸嘅後邊，緊緊咁抱實我。

「喂？！」

23:46
8月27日
Whatsapp: Charlie B向你傳送兩個新訊息

呢個時候，我見到枱上嘅電話突然發光。眼尾略略睄到一眼係Charlie搵我嘅WhatsApp，但而家咁情況我根本冇咁嘅閒情逸致去覆佢。

事岀突然，我一時之間都反應唔切。無可奈何之下只好將右手放到佢嘅腰間，用力將Phoebe成個人「秤」起。

我哋就一直維持住，Phoebe用雙手攬住我條腰，頭捱住我嘅膊頭。我又用右手「秤」住佢條腰，用左邊膊頭揹住佢嘅手袋，左手揸住電話睇google map。

一個幾奇怪嘅姿勢，一個好似，只係好似執屍咁嘅姿勢，開始係Sydney嘅街頭遊走。

「晤～」

就係我哋行咗冇耐，我仲嘗試憑我嘅記憶同google map嘅幫助之下，搵返帶Phoebe返hostel嘅路。係我膊頭上嘅佢又開始郁身郁勢，個頭不停咁蠕動。佢嗰頭長髮不停咁輕撫我嘅面，搞到我又痕又呢Hea。

「喂喂喂，唔好郁喇，好快返到去㗎喇，乖喇。」

我用放係Phoebe腰間嘅右手拍一拍佢嘅身體安慰佢，揸住電話嘅左手就騰出僅餘嘅拇指，R一R面上嘅痕癢。

「Hey Bro！」

遠處一班圍埋一齊飲酒嘅鬼佬嘅其中一個突然向我大叫，我好自然就向個邊望一望。佢用脷做咗「噠」一聲嘅聲響，然後向我單咗一下眼。

「Good job bro！」

個鬼佬一邊高舉拇指一邊向我大嗌，佢身邊嘅朋友都一齊望向我報以一個淫賤嘅微笑。講真個一刻我真係冇乜心情去理佢，真係bro你老味咩。

其實沿途上都有好多人見到我哋咁樣都笑淫淫咁望住我，唔知係味睇得印度新聞太多（利申本人並非種族歧視者），講真我都有D驚佢哋會對Phoebe有D不軌嘅企圖。所以我為咗表現得唔好咁串，都舉返隻手指公Hea下佢哋就算。

我哋越行就越耐，雖然我知道呢個方向大致上係啱㗎，但係我都係搵唔返exactly嘅嗰條路返反Phoebe嘅hostel。係Sydney街頭上亂行嘅時間已經遠遠超越咗我哋之前行去酒吧嘅時間。

一抽二掕嘅我已經行到開始有D攰，我相信Phoebe都係。因為佢好快就唔願意再行，走到去我嘅正前方，係原地緊緊咁攬實我。

「做咩呀？」我問。
「晤！好攰呀！」Phoebe用略為忟憎嘅語氣回答。

講真，呢個時候我都行到頹頹地，又攰又辛苦又呢hea。忽然我嘅腦海中飛過咗個盒呀樂千叮萬囑叫我買嘅安全套。

「唉，我真係搵唔返你間hostel呢，不如…」我深呼吸，吞咗一啖口水講。

「嗯？」

Phoebe從我嘅懷中，抬起頭望向我。