「J故台」《去一次exchange，令我變成一個壞咗嘅人》

咁又唔係 真正嗰個已經搵唔返喇 呢個係我哋憑記憶砌返岀嚟俾大家睇

因為佢已經諗唔到一個比呢個更好嘅理由

新讀者lm

我手中一直拎住個電話，但又唔敢直視螢光幕，只係識得耷低頭合埋眼咁去等待凱詠嘅回覆。平時唔信神神佛佛嘅我，把口都開始口噏噏起上嚟，希望會得到上天嘅保祐。

突然，手上嘅電話傳嚟一下震動。

我慢慢抬起頭，見到又係一段都唔短嘅文字。

「寶寶 謝謝你對我這麼坦白 你說的東西其實我也一直在想 到底要怎樣才能跟我最愛的人可以好像那六天 那個我們最快樂的時刻一直生活下去 但好像不論如何也沒有一個好的辦法 要怪就怪我們一岀生就是兩個地方的人吧

很感謝你到了最後一刻也是在為我想 擔心我的將來 擔心我的幸福 有一件事你說錯了 就是在那六天 甚至這兩個月𥚃 世界上最幸福的人並不是你 而是有你疼愛着的我

能夠在澳洲認識寶寶你 讓你關心 讓你疼愛 讓你緊張 大概是我人生中最美好和幸福的事 我想我將來再怎麼努力 也不會找到一個比你更懂得如何去愛我 去珍惜我的人

我們的回憶不僅只是屬於你的 所以你不可以這麼自私把它們全都收起 也留一點放到我的心𥚃 讓我在將來想念你的時候 不開心的時候 被欺負的時候 生活不如意的時候 可以回憶起 曾經有一個這麼疼愛我的男生 給我動力堅持下去

我答應你 我會好好生活下去 會好好照顧自己 會找一個好的男生陪伴我 但我想我已經遇到最好的那一個了吧 哈哈

將來不論是誰在我身邊 我也不會忘記你 請你也要答應我 要找一個好女生好好照顧你 不要讓我擔心 我不介意你的心被她佔據 但也請為我在你心中預留一點位置 就一點點就可以了 好嗎？

謝謝你帶給我這麼美好的回憶 我知道你已經盡了最大的努力 所以請你不要怪自己 不要覺得欠了我甚麼 不要再說對不起 因為有了你 我這次旅程 這段人生才能算是美滿了

希望將來我們會有機會再見吧 如果那時我發現你沒有好好照顧自己 我可會生氣哦 所以請你好好保重 我愛你 再見寶寶」

嗚…嗚…嗚…嗚

睇到一半嘅時候，我其實已經再忍唔到自己嘅淚水。睇埋凱詠嘅最後一句再見，我開始不受控咁趴係梳化上邊，攬住一個咕𠱸抱頭痛哭。

凱詠…點解…點解個天要咁整蠱我呀…點解唔可以俾我係唔同嘅時間點遇到你同Charlie。

見到凱詠咁冷靜咁接受呢個消息，我原本應該好安慰至係㗎，呢個唔係就正正係你想要嘅野咩？但佢呢個回覆，咪啫係代表住我同佢由今日起會變返一對陌生人？

人真係好矛盾，人哋未覆之前你又想人哋安然接受，到人哋真係接受喇，你又想人哋一哭二鬧三上吊咩？

我真係真係好唔想凱詠同我從此就再冇半點關係。

我重新將電話中嘅文字再睇多一次，見到佢仍然係覺得識到我好好彩，有我愛佢，錫佢，珍惜佢，覺得自己好幸福。甚至到最後，佢仍然相信我單純因為我哋係一段LongD姊弟戀而決定分手，相信我係唔想浪費佢嘅青春，覺得我仲好為佢嘅未來着想而去感激我。

佢咁樣做令知道實情嘅我更加內疚，更加羞愧，但同頭先一樣，呢個唔係正正就係我想要嘅效果咩？

要佢相信我呢個咁荒謬嘅分手藉口，要佢相信我係一個好男人，要佢永遠都唔知道個真相。

我唔知呀，我呢一刻嘅內心矛盾到接近精神分裂喇。我知我應該要同佢斷絕關係，佢而家咁安然咁接受，我應該好開心至係㗎？我知我應該要呃佢呃到透，而家佢信到我十足十，我應該好滿意至係㗎？

但我一D都笑唔岀，心入邊只係淨返不捨同內疚兩種感覺。

好彩我仲留咗一日以防萬一，如果聽日Charlie就嚟，俾佢見到我對眼腫哂咁嘅樣，我都唔知點解釋。

我行去廁所洗一洗塊面，抹乾面上嘅淚珠，清空一下自己嘅腦袋先至再坐返係梳化之上，重新拎起個電話，望住凱詠嘅說話，開始又再打起字嚟。

「詠詠 很感謝你的諒解 就算你不說 我的心也一早預留了位置給你 無論是誰也不能把你趕走

我答應你會好好照顧自己 將來再見到你的時候 你一定能夠把我認岀來 最多就是老了一點而已 你也要好好保重 將來不管發生甚麼事 也不要委屈自己 不要令自己不開心 不要令自己受苦 因為笑的時候的凱詠就是最美的凱詠 我最愛就是看到你笑了

我知道我已經說了很多遍 但再說也是不夠的 謝謝你 謝謝你的一切 再見寶寶」

Lived

點解唔可以俾我係唔同嘅時間點遇到你同Charlie

呢條友真係好撚自私

仆乖仔

仆街 成篇都bullshit到 仲要係條女生日果日send 幾撚大心理陰影

其實阿臣有冇諗過凱詠都可能唔只佢一個
凱詠大佢幾年，台妹好撚古惑的

識第一日就主動一齊，相處得嗰幾日講到有幾愛，唔係話唔得，的確好多真係可以識一兩日就好愛 (last 唔last到係後話)，但就咁睇又唔覺得佢哋相處有咩咁特別/ 對話之中雙方有幾connected真係有幾愛，啲對話好停留係最面嗰浸，除咗有扑嘢之外好似小學生拍拖咁
當然唔排除係阿臣講俾樓主聽講唔哂嘅因素，但樓主有講過阿臣係keep住有睇樓主寫隨時補充資料，如果臣詠之間係真係有更深層次嘅對話過點會唔補充，去俾樓主寫出佢認為呢段情最特別之處

凱詠一係就係高玩古惑台妹，一係就係好容易自我感動嗰啲人
到而家都唔明點解要確認男女關係，正正經經玩下咪算，係要我愛你你愛我好似小學雞亂叫老公老婆咁然後自覺好轟烈好偉大

佢表示冇諗過 因為如果凱詠係玩玩下 根本唔會care呀臣仲有冇玩交友apps 有時一個人係咪認真或者玩玩下 真係得當事人會感受到 呀臣表示佢完全唔覺得凱詠有唔認真嘅時候

當然可能凱詠嘅演技實在係太高超喇 但佢令願呢個係事實 至少佢良心會好過一D 好似Rachel咁樣 大家玩完就算 唔駛好似而家咁成日記起佢

至於最後佢哋係點就要睇埋落去先知喇

其實阿臣係咪唔識跳返出嚟調返轉諗嘢
調返轉講，當時佢會唔會想凱詠有繼續玩app? 阿臣都唔係玩玩下架，都係認真，但佢自己本身係一個有女朋友嘅人，咁佢對凱詠都係認真，咁點解凱詠唔可以一樣係有第個而且對臣認真？ 兩者係冇衝突
我純粹係問佢有冇諗過呢個可能性，冇唔緊要，但佢個原因 “凱詠好認真”係唔成立
阿臣都好認真而且出盡奶力做到亳無破綻冇俾人發現有女朋友，咁對方點解唔可以都做到？識咗人幾耐有幾了解係佢角度凱詠都唔知佢咁仆街啦，咁同樣地佢都可以完全唔知凱詠個底係點嘅人，本身有冇男朋友

Any肥，我重點唔係話凱詠100%有，係可能性問題，同埋出嚟玩下下咁易信個個都係天真純潔搞唔掂，至少我從凱詠行為同講嘢係覺得古怪
而家就算凱詠係好pure 好true 嗰陣真係得阿臣一個，阿臣都唔洗擔心人地會因佢傷心好耐，好快係會係app 搵到第個出嚟識一日就確認男女朋友兼覺得搵到一生中最愛

咁講喇 佢唔係冇諗過嘅 甚至想佢係真添 但佢自己就feel唔到囉

真相係點就冇人知 無論係我定呀臣都俾唔到一個答案大家 呢個就係寫真人真事嘅特點 有D野作者或者主角都解答唔到大家

跟住落嚟都會再講呀臣過咗呢一陣傷痛同好掛住嘅時候之後 再諗起凱詠嗰陣會有咩感覺 但呢到就唔講住喇 再講就劇透㗎喇

我攤係梳化上邊，將我同凱詠嘅所有對話由頭碌起，聽多一次佢send俾我嘅錄音，睇多一次我哋一齊影過嘅相。嘗試合上眼重新回味一下有佢係我身邊嘅日子，眼淚又一次不受控咁流落嚟，我就係咁浸淫住係自己嘅淚水之中，係梳化上邊瞓著咗。

直到第二朝張開雙眼，我仍然係好希望會見到凱詠係我身邊，一邊搖住我嘅身體一邊叫醒我。

「寶寶，要起來了。」

當然所有野都係唔會再有可能發生，我望住得我一個人嘅屋，餐枱上亦都冇由凱詠準備嘅早餐，好清楚知道自己真係要醒喇。如果我再係咁落去，Charlie遲早會發現我有咩唔妥。

原本今日作為Charlie嚟之前嘅最後一日，我已經好好咁計劃咗呢日嘅行程。雖然我同Charlie夾定咗話唔駛送返呢幾個月我哋錯過咗嘅節日嘅禮物，但為咗作為補償，我都係決定準備一D驚喜俾佢。

我知道無論我做D咩都無辦法彌補我嘅過錯，但至少咁樣會令我嘅良心好過一D。所以今日我要買返哂佢嘅生日禮物，我哋嘅週年紀念禮物同埋嚟緊會一齊過嘅聖誕禮物，起碼可以做返丁點嘅補償。

原來一個男人無喇喇對你咁好，係真係有景轟㗎。

係我一個人遊走Sydney街頭，準備緊送俾Charlie嘅禮物嘅時候，我忽然醒起我係咪都應該準備返D野俾凱詠呢？

其實我原本已經睇中咗一份禮物，準備去搵佢同佢慶祝生日嘅時候送俾佢，當係生日禮物又好，當係我嘅贖罪券又又好。而家個trip最後都係去唔成，但我都想將嗰樣野送俾佢，一嚟會令我好受D，二嚟等佢有樣野將來每次用嘅時候都會記起我都好呀。

我打開電話嘅Line，重新㩒入去同凱詠嘅對話之中。

「詠詠」

我好似唔應該再用呢個稱呼，我要慢慢適應同佢變成朋友甚至最後成為陌生人。

我將唔適當嘅用字刪除，重新以一個朋友嘅身份去打呢個信息。

「凱詠 你可以把你的地址給我嗎？」
「幹嘛了？」

「原本你生日我打算帶着你的生日禮物來找你的 現在雖然來不成 但我打算在網上買了之後讓他寄到你的家」

「不用了吧 現在我已經不是你的女朋友 收你的禮物也不太恰當吧」
「那朋友也可以送生日禮物呀 就當是我送給你的最後一樣東西 以前我都沒有送你甚麼」

係，我知我送咩都無用，但我真係好想做返D野去補償返俾凱詠，那怕只係一DD都好呀，我內心真係好難受，每日都受住良心嘅責備。

「真的不用了 你父母給錢你是來唸書的 不要把金錢花在無謂的東西吧」
「真的不要嗎？你就當是你之前送我香水的回禮吧」

「你已經把最好的禮物送給我了 所以真的不用了」

無論我再點堅持，凱詠都係唔肯收呢一份禮物。就係咁樣，除咗我原本欠佢嘅野，我呢世人仲爭多佢一份禮物。每次當我諗起佢嘅時候，我都會記起我欠佢嘅野，呢一世都唔會忘記，因為實在太多喇。

到最後我買咗一條頸鏈，一個銀包同一條裙作為俾Charlie嘅三份禮物，至於凱詠，我咩都俾唔到佢。

22:42
12月10日
WhatsApp: Charlie B傳送你一個新訊息

「B 我而家去機場喇 好心急想快D見到呀B呀！」
「我都係呀！」

從文字上嚟睇我好似好期待好興奮好雀躍咁，現實中嘅我係個電話面前一D都笑唔岀。因為我要係Charlie嚟之前毀滅證據，將所有同凱詠有關嘅野全部清除。

我將凱詠嚟之前我做過嘅野重複再做一次，包括打掃全間屋，換上新嘅床單被鋪，確保冇任何一條長頭髮留低，亦都冇任何女性係到居住過嘅痕跡。

第二，除咗物質上嘅補償之外，我都搵咗一D澳洲岀名嘅餐廳，希望以同Charlie補祝唔同節日做藉口，帶佢食返D好野，當係另外一種補償喇。

最後，我帶開床頭櫃，同上次一樣將用剩嘅安全套扔咗，換上一盒全新未開封嘅Condom。

係我閂埋櫃桶之前俾我見到凱詠送俾我嘅香水，我有一刻諗過我需唔需要處理埋佢呢？但其實我一路都有搽香水嘅習慣，所以話係我自己買嘅都冇咩啫？而且呢樣始終係凱詠送俾我嘅禮物，我真係唔捨得就咁就扔咗佢。

至於嗰兩枝香水版仔，我更加唔會扔喇，話哂我都應承過凱詠點都唔會俾佢哋分開。就算而家人唔可以一齊，我都想佢哋可以一齊。

萬一Charlie真係發現到，味當係個sales送俾我嘅禮物囉。如果特登收埋呢兩枝野而又被人摷到，咁咪仲可疑？

呀臣咁搞法真係好易製造悲劇

佢都冇得揀 手都分咗 而家可以做嘅就係好好咁係Charlie面前扮演佢好男人嘅角色

但係佢又放棄唔到台妹

岩既，細路仔果陣係會覺得內疚啊，
誤咗人哋啊，對唔住啊，玩弄感情咁，
試多幾次就好平常，屌咗，開心過就算啦
你嘆人時人嘆你，無手尾跟，執到啦

反而如果女主角係香港都各有各玩，
咁就真係柒撚哂，係到扮情聖，懶係內疚，
做咗傻仔咁

加速，想知之後仲有幾壞先

清理哂成間屋嘅罪證之後，就輪到我電話入邊唔見得光嘅野喇。我打開instagram，登岀我嗰個為咗呃凱詠而開嘅account，然後再登岀Line，Del埋個apps，Del咗佢嘅contact，將所有同凱詠聯絡嘅渠道都鏟除得一乾二淨。

我咁樣做一嚟當然係驚Charlie會睇到呢D唔應該岀現嘅對話喇，二嚟就係我都驚凱詠會突然係呢兩個禮拜入邊搵我。萬一俾Charlie咁啱睇到，我真係水洗都唔清喇。

最後我打開電話嘅相簿，重新睇過呢兩個月嘅每一張相。有我哋嘅合照，有佢send俾我嘅自拍，有我哋對話嘅cap圖，呢D全部都唔可以留低。

我逐張逐張咁掃過呢D犯罪證據，逐張逐張咁將佢哋消滅，將我同凱詠嘅一切一切抹走。

但人腦唔同電腦，係電話入邊我㩒個掣就可以將任何野永久刪除，唔留低半點痕跡。係我個腦入邊，凱詠永遠都會佔有一席位，點抺都抹唔走。

其實我自己都好矛盾，到底我係想唔想記起佢呢？一方面我其實好怕自己對佢嘅印象會越嚟越模糊，好怕自己過多幾年已經會唔記得佢嘅樣，唔記得佢把聲，唔記得佢嘅笑容，但記起佢又會勾起我對佢嘅思念，我對佢嘅內疚。

「我將所有野Del哂喇」

我同唯一我可以暢所欲言嘅呀樂講。

「之前我send俾你嗰D相 你好好幫我Keep住喇 你而家係唯一擁有呢D copy嘅人嚟㗎喇」

「得喇 得閒想睇問我攞 我Send返俾你」
「真人iCloud？」

「駛唔駛set返個密碼？等陣原來係Charlie用你個電話問我就好笑喇」
「如果佢講得岀凱詠或者呀Y呢個名 我諗佢睇唔睇到D相都冇乜分別喇」

有意又好，無意又好，我甚至怕Charlie會睇到我同呀樂嘅對話，於是將同佢嘅WhatsApp都做咗D手腳，Del哂所有有可能令我穿煲嘅野。

呢間屋，呢個電話同埋我，所有野表面上都好似去返我啱啱嚟嘅咁樣，乾乾淨淨，冇留低任何破綻咁去迎接Charlie嘅來臨，但大家都知道所有野都已經唔同咗。

我同Charlie嘅感情永遠都會留有瑕疵，只不過佢自己仲未知道啫。

到第二朝起身，我打開電話嘅相簿，已經再見唔到我想睇到嘅野。我知道當我掛住凱詠嘅時候我唔會再可以好似以前咁，係自己嘅電話就睇到我哋嘅合照。

今日將會係一個全新嘅開始，我要係Charlie面前忘記凱詠，繼續扮演我呢個好男人嘅角色，繼續欺騙佢，繼續令佢以為自己好幸福，因為呢樣就係我唯一可以為佢做嘅野。

我帶住乾乾淨淨嘅電話去到機場等待Charlie，好快就見到佢拖住一個行李喼，係禁區入邊行岀嚟。

我唔知大家有冇試過同另一半分開幾個月之後重聚，呢種感覺都幾奇怪。明明係自己最親嘅人，明明我哋成日都FaceTime，但硬係有種少少陌生，少少尷尬，唔知應該講咩嘅感覺。

到底係因為我哋分開得太耐？定係因為我自己身有屎先會咁呢？

「Hello！」Charlie行到我去嘅面前，「yee」起棚牙講。

「Hi。」我好似同一個第一次見嘅人打招呼咁回應。

我係咪應該攬落去呢？

我唔知咁樣係咪屬於正常，幾個月冇見令到大家都好似唔知點咁，唔知跟住落嚟應該點做。好彩嘅係睇嚟唔只係我，我feel到Charlie霎時之間都有D不知所措。

我哋兩個就係咁對望咗幾秒，唔知講乜好，又唔知應該點做咁企咗係到。

「噗嘖」

雙方都被一瞬間嘅沉寂搞到忍唔住笑咗岀嚟，最後我都係踏前一步，將好耐冇見嘅Charlie擁入懷中。

希望呢種咁奇怪嘅感覺唔會一路持續落去。

係同一個地方，做同一個動作，好難令我唔諗起當日係到送凱詠機，回憶返我哋最後一次見面嘅畫面。

我依附係Charlie嘅肩膊之上，佢點都唔會知我嘅腦入邊其實係到進行緊一場大戰。感性不停提起我同凱詠係呢到留低嘅足跡，而理性就話俾我知眼前嘅係Charlie，要清醒喇。

「行喇，帶你返屋企先喇。」

我一手拖住Charlie嘅行李喼，一手拖住佢個人，帶佢踏上返我屋企嘅路途。

好快我就發現，好多野都實在太相似，你好難怪我會經常諗起凱詠。我哋去過嘅地方，坐過嘅車，食過嘅野，除咗身邊個人唔同之後，根本上所有野都係呢個城市入邊發生，你叫我避得去邊啫？

離開咗機場之後去搭同一架車返同一個屋企，唔通呢D又會冇凱詠嘅身影咩？

希望呀臣今次真係生性
charile是無辜的

阿臣要好好珍惜眼前人呀

好彩嘅係嗰種奇怪，陌生，唔知點好嘅感覺隨住我哋上到車，慢慢多返D交流好快就消失咗。Charlie係車上邊繞住我嘅手，捱係我嘅膊頭上邊同我傾計，我好快就重拾返我哋以前拍拖嘅感覺。

我帶佢返到屋企之後，其實每一步我都有D心慌慌。雖然我已經幫間屋大掃除咗，但都驚有D咩遺漏，有D咩唔記得咗清理。萬一佢打開是但一個櫃桶，拎住一樣我唔expect會岀現嘅野問到我口啞啞咁就大鑊喇。

「我想去沖個涼先呀。」

搭咗成九個鐘飛機嘅Charlie又係同凱詠一樣，係行李喼入邊拎咗化妝袋，衫褲同毛巾岀嚟之後就入咗廁所。

我趁住呢個空檔再檢查多次間屋，打開每個開得嘅櫃桶，確保真係冇任何唔應該岀現嘅野留低。

「沖完喇？」我望住成頭濕漉漉嘅Charlie係廁所行岀嚟問。

「嗯！」
「入邊有風筒呀，你可以攞嚟吹頭。」我指住嗰個已經俾我反復check過嘅衣櫃講。

Charlie一邊吹頭又一邊來回廁所咁行嚟行去，又梳頭又搽野又化妝咁樣，都係一貫女人沖完涼會做嘅野喇，而我就一直乖乖地咁坐係梳化上邊等佢。

「喂！」

就係我就差唔多等到瞓著嘅時候，已經換好哂衫化好哂妝嘅Charlie坐低係我嘅旁邊叫我。

「Ah？搞掂喇？」我烏下烏下咁回應。
「做咩呀？瞓著喇？」
「哦，唔係呀，係咪行得喇？」

就係我仲係到恰緊眼瞓嘅時候，Charlie突然一下標前，將我緊緊咁抱實。

「終於見到你喇，你知唔知我呢幾個月過得有幾辛苦呀？」
「傻瓜，冇事喇，我而家味係你身邊囉。」

我成個人醒咗一醒，雙手放係Charlie嘅背上將佢抱住安撫一下佢。之後我哋再慢慢鬆開雙手，好近距離咁望一下對方久違嘅面容。

「死喇B，你好似瘦咗呀。肯定係成日唔食野，兩餐縮埋一餐食喇。」Charlie摸一摸我嘅面頰道。

「邊有呀，係咪你肥咗炸？」我搣一搣Charlie嘅面珠墩回應。

「痴線，我不知keep得幾好。」

跟住落嚟又係一陣嘅沉默，不過同上次唔同嘅係今次絕對冇頭先嗰份尷尬同陌生感。相反，我哋互相望住對方嘅雙眼，身體微微咁向前傾，直到嘴巴掂到對方嘅嘴巴，慢慢將我哋之間嘅隔膜打破。

我哋一邊係梳化上擁吻，我一邊將Charlie抱起放到我嘅大髀之上，大家都知道對方嘅諗法，大家都知道跟住落嚟應該要做D咩。

或者呢D就係我哋拍咗兩年幾拖嘅好處，雙方都已經有默契，知道對方嘅習慣喜好，可以省卻唔少嘅猜測同試探。

「我啱啱先換完衫化完妝炸喎。」
「冇人叫你自把自為咁快做哂D野㗎。」

「呀！」

話口未完，我就將Charlie成個人抱起，準備將佢帶到去床上。

我嘅雙手係Charlie嘅臀部之下交疊，一邊抖住佢，一邊向住床嘅方向前進。就係我哋差唔多到達，我正準備要將佢放係床上面之際，忽然我好似見到自己同凱詠瞓係床上嘅身影。

成個畫面就好似我哋瞓緊覺嘅時候我靈魂出竅，見到係床上熟睡嘅自己同凱詠咁樣。

我頓時俾呢一下幻影嚇到呆咗，好怕Charlie會feel到我心入邊諗緊D乜野。

「嗯？做咩呀？」依附係我身上嘅Charlie見我成個人定哂形，於是忍唔住問。

「哦冇，我諗緊張床會唔會頂唔住啫，佢個樣睇落好似唔係好穩陣咁。」

其實我一早就知道答案，仲係到做過好多次實驗添，好彩我講大話嘅技巧已經接近爐火純青嘅地步，完全冇半點遲疑咁講岀嚟。

「冇咁易呀嗎。」

Charlie講完之後就用手箍實我條頸，慢慢將我拉落床上再次熱吻一輪，而每當我合埋眼嘅時候，腦袋總係不受控咁浮現岀唔應該諗到嘅畫面。

大佬呀，你集中D喇，等陣你好似上次咁掛住諗第二個扯都扯唔起嘅話你點同Charlie解釋呀？

不幸嘅係，當我越用力嘗試將自己拉返嚟現實，就越會諗起唔應該諗起嘅人。

仆街啦，硬唔起交唔到功課

硬唔到….

又硬唔到

其實係咪真係會咁誇張會硬唔到