「J故台」《去一次exchange,令我變成一個壞咗嘅人》

695 回覆
221 Like 5 Dislike
2023-05-19 19:09:40
好快我就知道我係冇可能完全唔記起凱詠,至少冇咁快,至少我仲係Sydney嘅時候都仲未可以。無論我有幾盡力去集中,我哋係呢張床上嘅影像都係不停咁浮現係我嘅腦海之中。

跟住落嚟唯有只係可以靠我嘅演技,去掩飾我腦入邊諗緊嘅嘢,避免引起Charlie嘅懷疑。

由我除低佢嘅衫,解開佢嘅胸圍,慢慢挑逗佢一對以港女嚟講都算係咁嘅雙乳,到佢慢慢褪到落我嘅胯下,係我一邊摷安全套嘅時候,佢一邊用嘴幫我維持狀態。凱詠就好似Charlie嘅影子咁樣跟隨住佢嘅每一個動作係我嘅腦入邊岀現。

一邊同你嘅伴侶扑野一邊諗住第二條女已經夠仆街,如果嗰個仲要係你岀軌嘅對象,我真係好怕會俾Charlie睇穿呢一刻嘅我。

雖然我哋已經無發生性行為幾個月,但成個流程都係好舒服同流暢,因為大家都知道對方跟住落嚟想做D咩,亦都唔駛擔心對方會唔會對我下一步嘅行為有所抗拒。或者呢D就係雙方已經磨合咗嘅好處,就算隔咗一段時間,都可以好快就重拾返呢種感覺。

「咦,咁醒嘅你,一早買定。」Charlie望住我係櫃桶拎岀一盒全新嘅安全套道。

「梗係喇,準備充足㗎嗎,我仲未想做爸爸呀。」

好彩嘅係雖然今次我都係分哂心,但好彩琴晚都夠瞓,冇好似上次咁變咗軟皮蛇。如果唔係我都唔知點同Charlie解釋我過咗幾個月之後變咗不舉,應該話佢知我虧呀定話佢知我身有屎呢?

我無驚無險咁都叫做進入到Charlie嘅身體,而佢就成為係呢張床上邊第三個同我發生性行為嘅人。我諗佢點都冇諗過係佢之前竟然已經有人上過我呢張床,仲要係唔止一個,仲要我哋唔淨只係有性嘅關係。

凱詠仍然係冇離開我嘅腦海,心虛嘅我全程都避免同Charlie嘅眼神接觸,擔心俾佢見到我好多野諗嘅樣。唔好話諗第二條女呀,俾條女發現你扑扑下野諗其他野都已經夠死喇。

係我下盤一邊蠕動嘅同時,我嘅嘴唔係同Charlie打緊茄輪,就係依附係佢嘅胸前,目的就係唔想俾佢睇到我嘅樣,睇到我唔集中唔認真嘅一刻。

不過每當我一合埋眼或者眼前一黑嘅時候,Charlie就好似慢慢會變成凱詠咁樣。我一時沉醉住係自己嘅幻想之中,一時又強逼自己擘大雙眼去望清楚眼前嘅Charlie,去提醒自己要歸於現實。

大家千祈唔好誤會,我絕對唔係話Charlie比唔上凱詠或者我用Charlie嘅肉體去幻想返同凱詠做愛嘅畫面。只係我個腦會自動咁不停提住我同凱詠都曾經做過相同嘅野,不停咁強逼我回憶起當日嘅一切。

或者人就係咁折墮,邊一個唔係身邊先會掛住佢,係眼前嘅又唔會識得去珍惜。當日我同凱詠係呢張床上,我咪又係不停咁諗起Charlie。

我落床走到去床嘅側邊,將Charlie嘅雙腳放上去,形成一個M字,然後用手捉住平躺係床上嘅Charlie嘅雙手,夾實佢胸前嘅小肉團,重新將小臣臣放到入去佢嘅陰道之內。

平時嘅我最鍾意就係喺呢個居高臨下嘅角度睇住女方好舒服嘅表情,睇住佢俾我下盤猛擊嘅身體而不停搖曳嘅雙乳,睇住自己嘅陰莖不停抽插對方嘅陰部,無論視覺定感官神經都可以得到最大嘅滿足。

今日,無論我擘大眼望住Charlie定係合埋眼去嘗試咩都唔好諗,我仍然係擺脫唔到凱詠嘅身影。我個腦不停咁係到提醒我當日同凱詠用同一個體位嘅時候嘅場景,令我完全集中唔到。

望住床上全情投入嘅Charlie,我覺得好內疚,好羞愧,好對唔住佢。我履行唔到對佢嘅承諾,我違背咗佢對我嘅信任,我唔單止起咗色心,仲對一個人動咗真情,令所有野都唔能夠返轉頭,令我永遠都唔能夠完完整整咁屬於佢。

最令人感到難堪嘅係我知道我唔會有勇氣去話俾佢聽個真相,我亦都知道如果佢聽到,佢會令願我從來都冇講過俾佢知。所以我唯一可以做嘅就係呃佢一世,永遠將呢個秘密保存落去。而當我諗到我永遠都要有一樣野隱瞞住我嘅另一半,我覺得我已經一手將我哋嘅關係破壞咗,永遠咁留下瑕疵,永遠都唔可以去返好似以前咁嘅狀態。

雖然Charlie大部分嘅時間都係合埋眼,但我都好驚俾佢見到我呢個若有所思又驚驚青青,完全都唔投入嘅樣。於是我放開佢嘅雙手,將身體捱落去佢到攬住佢,頭部放係佢嘅鎖骨之上,決定避開Charlie嘅雙眼,埋頭苦幹將全身嘅力送哂去下盤,咩都唔諗咁將所有野轟哂岀嚟,將呢場令我分「心」不暇嘅運動終結。
2023-05-19 19:46:05
今次冇事!

據呀臣所講 上次同凱詠係真係硬唔到 佢到而家都好歷歷在目 因為佢從來都冇諗過自己會有一日埋門嘅時候先嚟撻Q 起碼唔係廿歲嗰陣

但上次除咗分咗心之外都仲有好多原因嘅 攰喇 瞓瞓下覺被人摷醒喇 早嗰兩日都有做過等等 所以先會真係一時不舉啫

今次又夠瞓 又谷咗成個月冇做 所以都仲交到功課 雖然佢個人就唔係咁享受 好似精神分裂咁
2023-05-19 23:18:42
2023-05-20 00:03:44
charile真係慘
2023-05-20 22:10:16
唔知係咪女人都係會覺得一個男人係唔識照顧自己,無論係凱詠定係Charlie嚟到嘅第一晚都係話要煮飯俾我食,好似驚死我呢幾個月冇啖好食咁。

係,我一個人住係會求其D呢啡D,但我都識洗衫掃地煮飯呢D生活必需嘅基本家務嘅。不過我亦都好清楚唔係個個女人都識而又肯煮飯俾你食,所以我都會好好咁珍惜,絕對唔會拒絕Charlie嘅好意。

我帶住Charlie去到我屋企最近嘅supermarket,無錯就係我同凱詠去開嗰間。入到去我繼續用我超凡嘅演技,做返嗰個平時求其亂咁買嘅呀臣,絕對唔可以將凱詠傳授我嘅買餸秘笈唔覺意咁漏露岀嚟。

「喂你平時買開邊隻㗎?」Charlie揸住兩盒雞翼問我。

「呢隻囉,個包裝上邊隻雞仔幾得意。」
「唉,問你就死得喇,你去嗰邊幫我拎盒士多啤梨喇。」

我聽從Charlie嘅指示,行到去放生果嘅地方,見到熟悉嘅角落,同凱詠係到嘅回憶又再湧現出嚟喇。

「這個都壞掉的,你怎麼還選這一包了?」
「這麼可能?我選了很久才選了這包『紅卜卜』又漂亮的。」

「寶寶,是在下面呀,你有翻轉來看嗎?」
「那…又沒有」

「唉,你們這些男生,都只懂看表面是吧?」
「你是在誇自己嗎?」
「我內外兼備的好嗎?」

「那就是了,我幹嘛要懂選『士多啤梨』呢?我懂得選女朋友就可以了。」

雖然而家嘅我已經冇以前咁求其同粗心大意,但係Charlie嘅心目中,我仍然係幾個月前嘅呀臣。於是我為咗唔露出馬腳,係確保Charlie睇唔到我之後,就突登揀返一盒表面好靚,但底下有幾粒爛咗嘅士多啤梨,因為我知道佢一定會檢查過所有我拎返嚟嘅野。

「喂呀,你有冇睇清楚㗎,下邊粒粒都爛嘅?」Charlie一如我所料,講返同我心目中預期一模一樣嘅野。

「下,冇理由㗎喎,我睇過粒粒都好靚先拎㗎。」
「你翻轉嚟睇先得㗎大佬。」
「嘿,點知D士多啤梨咁蠱惑㗎啫。再去拎過盒囉,唔好忟憎。」

「靠你就死喇,我自己去好過。」
「仲話識得照顧自己喎,廿歲人揀盒士多啤梨都唔得。」Charlie搖搖頭道。

聽到Charlie講呢句,我知我計劃成功,佢點都唔會有可能懷疑我呢幾個月嘅轉變。

我哋買完餸返到屋企之後,Charlie就入咗廁所,於是我將啱啱買返嚟嘅野擺好之後就坐係梳化上邊等佢。我同樣地依照自己嘅習慣連上藍牙喇叭,今次終於可以播返自己嘅playlist,播返D廣東歌。

「台灣2000年代」
「90後台灣流行曲」
「Top 50 - Taiwan」

雖然我已經洗走哂所有同凱詠有直接關係嘅野,但呢D搜尋紀錄仍然係有意無意咁提住我一個月前發生嘅事。

Charlie落咗妝,紮返條馬尾,帶返眼鏡咁係廁所走岀嚟,去到廚房為我準備今晚嘅晚餐。

我坐係梳化上邊望住呢個熟悉嘅場景,又係一個紮馬尾嘅女仔係同一個廚房為我準備晚餐,你哋知我又會諗起D咩㗎喇。

我可以話俾你聽呢個係我成個exchange最深刻嘅畫面,比起今日係床上邊嘅更加更加深刻。Charlie係我眼中好似有個重影咁不斷係到重複佢嘅動作,我甚至有一刻諗到,如果佢兩個一齊係到煮緊飯俾我食,你話係幾咁美好呢?

我真係痴撚柒咗線。

現實係,如果俾Charlie知道曾經有一個女仔就係一個月前同佢係同一個位置做緊同一樣野,我當時嘅腦海中仲要有同凱詠組織家庭,屋企有個小朋友跑嚟跑去嘅畫面,我諗佢心中嘅幸福堡壘會即時崩塌。

而我最擔心嘅係佢會因為接受唔到呢個咁殘酷嘅真相而去做傻事,因為我會內疚一世,我會唔知點樣賠返個女俾世伯伯母。

點解佢哋兩個都可以咁好?但偏偏又要遇上一個咁差嘅我?

聽住喇叭播住應境到不能再應境嘅歌,我無論再點死忍,都就快要忍唔住眼中嘅淚水。一嚟係因為對凱詠嘅思念,二嚟係因為對佢哋兩個嘅內疚。

「歸家飾演你的好情人
專心一意共你溫存和熱吻
看你帶著童稚的亢奮
坦白會否徹底破壞氣氛
合著眼 撫心自問
這一種背叛 無意要你傷心
自我麻醉 說謊手不會震」

「即管充當你的好情人
專心一意共你溫存和熱吻
我愛你亦同樣體貼你
不讓你知 人可以更醜陋
直到你想不出 當天在床上 誰人陪著我
上萬個謊言 再接謊言 信我」

我除咗繼續飾演落去,繼續講呢個大話,我仲可以點呢?
2023-05-20 23:58:21
2023-05-21 12:28:59
阿臣就泥爆啦
2023-05-21 12:42:45
根本佢心底裡就係想享齊人之福
2023-05-21 21:24:17
我哋係Sydney逗留咗三日之後,就開始準備去唔同嘅城市旅行,直到臨尾最後幾日先至會再返番嚟。係我哋臨岀發之前嘅晚上,我同Charlie係屋企開始為呢個旅程執拾一下行李。

「你帶齊野未呀?等陣你又帶漏野㗎喇。」
「齊…掛。Ah!仲爭枝香水。」

我行埋去床頭櫃,好理直氣壯咁搵返凱詠送俾我嗰枝香水岀嚟。佢係我自己買㗎嗎,所以我帶去同Charlie旅行用,一D問題都冇呀。如果我買咗又特登唔帶去,咪顯得仲奇怪?

我開始呃埋自己。

「咦?你新買㗎?」Charlie都湊個頭埋嚟,睇下我櫃桶入邊嘅野。
「係呀,舊嗰枝用完喇嗎,咪買枝新㗎囉。」

「香唔香呀?」我打開蓋俾Charlie聞一下。
「嗯~幾香喎,咁識揀嘅你?」
「梗係喇,我係間香水鋪聞咗好多tester,聞到鼻都塞埋先揀到㗎。」

「咁呢袋咩嚟㗎?」Charlie伸手去拎起香水盒隔離嘅布袋問。

「冇呀,個sales話送D tester俾我炸嗎。」
「咁好死?」
「我靚仔呀嗎。」

Charlie打開個布袋,將裏邊嗰兩枝非一般嘅香水版倒岀嚟,然後打開個蓋,逐枝逐枝咁聞下佢哋。呢個時候,其實我可以保持到冷靜,因為所有野都仲係我嘅預計之中,而我都一早準備好點樣解釋呢幾樣野嘅存在,所以暫時都問題不大。

「嗯,呢枝咪你個枝囉下話?」
「應該係掛,我都冇認真睇過。」

之後佢再打開嗰枝代表住凱詠,散發住凱詠身上嘅味道嘅女裝香水又聞一聞。

「咦!呢枝幾香喎!」
「係咩?我都唔記得咗係咩味喇,我淨係知一枝係男裝一枝係女裝囉。」

我從Charlie手上拎走嗰枝迷你香水,然後又交一交戲咁索下呢浸其實我仲好記得,但又要扮到好陌生嘅味道。

「係幾香嘅,不過你而家用緊嗰枝仲香喇。」

我一邊講一邊準備將佢哋收返落個布袋入邊,希望盡快將呢個話題終結。雖然我已經做好準備,但呢D野都係少講為妙喇,廢時講多錯多,等陣自己前言不對後語就碌柒喇嗎。

「我可唔可以攞嚟用呀?」

就係我打開個布袋嘅一刻,俾Charlie呢句說話嚇到我當堂呆咗。

「下?」

人算不如天算,意料之外嘅野始終都係會發生。

「做咩呀?好矜貴㗎?你好似好唔捨得咁嘅?」
「唔…唔係,你…咪攞去用囉。」

係嗰個moment,我真係諗唔到一個拒絕嘅理由。
我唯有扮哂大方,將嗰枝香水放到去Charlie嘅手中,但我好清楚,一俾咗佢就永遠都唔會攞得返。

「如果用落鍾意我哋遲D都去買返枝囉?」Charlie擰轉身,將手中嘅物品放入去佢喼入邊嘅化妝袋之中。

「你鍾意喇。」我強顏歡笑回應。

估唔到只係過咗一個月,我就要打破對凱詠嘅承諾。我唔單止將佢哋分開咗,仲令佢落到應該會係凱詠最唔希望嘅地方,好彩嘅係佢點都唔會知道佢送俾我嘅禮物嘅新主人到底會係邊個。

另一方面,Charlie點都唔會知道呢枝香水嘅來歷。如果有一日佢發現個真相,我諗佢會為自己今日咁開心而感到懊悔,佢會為自己每日噴呢枝香水,任由呢種同凱詠同一種味道留係自己身上而感到嘔心。

但係,我又可以點?

「成盤係血,當佢無事!」

我只可以繼續故作冷靜,扮到乜事都冇咁,如果唔係Charlie一定會覺得好奇怪,我竟然會為咗一枝香水仔咁大反應。要怪就怪自己諗得唔夠周到,唔預計到Charlie嘅呢個舉動,失去咗凱詠送俾我嘅其中一樣禮物。

雖然我腦入邊係諗住呢到咁多咁複雜嘅野,但表面上我仍然係掛住微笑咁走到Charlie嘅身邊,陪佢執拾一下喼入邊嘅行李。

睇住佢打開香水嘅蓋,噴咗一下落自己嘅手背,我忽然醒起,咁佢以後味同凱詠散發住同一浸味?我已經好努力咁嘗試唔係你面前諗起佢㗎喇,你唔好又再提醒我凱詠嘅存在喇好嗎?

如果佢知道呢枝野其實係代表住邊一個人,佢一定唔會好似而家笑笑口咁將佢收落化妝袋,話唔定佢會「嚟手」就劈咗佢添。

唉。
2023-05-22 08:54:20
話應承左返去送俾老母咪得
2023-05-22 11:31:56
一嚟呀臣當刻諗唔到

二嚟Charlie同佢呀媽嘅關係都好好 萬一發現佢講大話 到時真係點兜都兜唔返
2023-05-22 19:11:40
我將為Charlie準備好嘅驚喜收埋係自己嘅背囊入邊,然後係呢趟旅程嘅唔同時候送上。把口就話係為咗補足佢嘅生日同我哋嘅紀念日,實際上只係我自己安慰自己,等自己可以好過一D嘅方法啫。

「哎吔!咪話咗唔駛送囉,做咩又嘥錢啫?」

睇住Charlie口裏說不,但其實把嘴不知笑得幾甜嘅樣,我知道我冇做錯到。雖然我知我點樣都補償唔到佢嘅損失,但起碼我都叫做盡咗力,做咗我可以做嘅野。如果佢知道背後嘅原因,我保證佢一定唔會笑得岀。

「咁我扔低咗你一個人咁耐,咪送返D野俾你補償下囉。」
「你都知呢?你知唔知我呢幾個月一個人係香港過得幾慘呀?日日都掛住呀B,日日都係到倒數幾時先可以嚟搵你。」

「係喇,知你陰公喇。咁你鍾唔鍾意先?」
「好鍾意呀!多謝B!」

「咁你呢幾個月係咪都係咁掛住我㗎?」Charlie追問。
「咁梗係喇!」

「日日都咁掛?」
「仲駛乜講呀?呢D基本喇!」
「好喇,算你喇!」

Charlie保持住甜蜜幸福嘅笑容將我抱住。一方面我慶幸佢收到呢D禮物之後可以咁開心,可以繼續無知落去,證明我駛嘅錢都冇白白浪費。另一方面我為自己又要再講大話去欺騙佢再受到良心嘅一下責備。

成個旅程入邊,我為佢準備嘅所有驚喜佢都好鍾意,每一次都好認真咁幫D禮物同野食影張靚相然後up上instagram,要話俾全世界知佢嘅男朋友有幾錫佢,對佢有幾好,佢到底有幾幸福。

而知道真相嘅我每次都係百感交集,起碼我為Charlie帶嚟嘅仲係歡笑而唔係淚水,但我永遠都唔知道呢個自覺幸福快樂嘅Charlie可以維持到幾時。

我真係好怕有一日佢會知道個真相,知道我係一個點嘅人,發現原來所有野都只係假象。幸福嘅佢,尊一嘅我,只係活係佢幻想之中,係現實世界原來從來都冇存在過。

雖然我永遠都唔會忘記呢次經歷,但隨住時間慢慢咁過,我對Charlie嘅罪疚感亦都隨之而慢慢消逝。我唔係話唔知道自己嘅錯,只係就算我再因為呢件事而講大話呃佢,都冇一開始嘅時候咁憎自己,冇受到良心咁大嘅責備。

人就係咁㗎喇,當一件事不停又不停咁重複,無論係幾荒謬嘅事都會慢慢適應同習慣。我慢慢開始接受發生咗嘅事就係發生咗,我點都冇可能將佢改變。

我將來唯一可以做嘅就係好好咁對Charlie,唔好再行差踏錯,俾返佢值得擁有嘅幸福佢。而我第一樣要做好嘅野,就係永遠唔好俾佢知呢段往事,所以我呃佢都係必然要發生嘅事,呢樣就係將我哋嘅關係維繫住嘅第一步。

我哋呢次旅程就係我不停回想起凱詠嘅身影之中渡過,好彩嘅係我都叫做抑制得住自己,無做咩奇怪事而引起Charlie嘅疑心。

兩個禮拜好快就過去,Charlie亦都已經返咗香港等待我歸家嘅一刻。係最後嘅呢十日入邊,我一個人好好咁回味一下係呢個地方發生嘅所有野。

我講緊嘅唔單單只係同凱詠或者Rachel嘅事,而係由我嚟到開始所有遇到嘅人同經歷,自己一個人住,係外國生活同返學嘅經歷。

原本未嚟之前我仲覺得成個Sem流流長有排玩喇,但幾個月時間其實真係好快過,我一方面好掛住香港嘅人同野食,另一方面我又知道我人生將來都好難再有呢D類似嘅經歷。

但人始終都係要長大,當時間嚟到就要係適當嘅時候做適當嘅嘢。無論你有幾唔捨得,始終都係要繼續向前行,最後只能夠係心入邊回憶一下當日嘅情景,回味一下當日嘅溫馨同快樂。

或者呢D就係青春,青春就係你會不停回想,覺得係你人生最美好嘅時刻,而你偏偏又知道佢已經一去不復返,但你又不得不繼續生存下去,只可以將佢放喺你嘅腦海之中。

遺憾嘅係我永遠都唔可以將呢段咁難忘嘅經歷同我身邊嘅另一半好坦誠咁分享,我甚至連唔關凱詠事嘅野都唔敢講太多。廢時一陣藤掕瓜瓜掕藤,講多錯多自己鬼拍後尾枕穿咗煲就唔好,所以我都好少係Charlie面前講起我去exchange嘅野。就算佢問起,我都會好快咁樣帶過就算。
2023-05-23 20:34:57
係Sydney嘅最後一日,我起咗身之後執咗一陣行李,然後換好衫就落咗街。

今日,我只係想一個人靜靜地咁行多最後一次呢到嘅街道。我帶上AirPod,聽住自己最喜愛嘅音樂,去到我最鍾意嘅餐廳食咗最後一次嘅午餐。雖然邊個嚟搵我嘅時候我都有帶佢哋嚟呢到,但今日我嘅腦海之中主要都係充滿住同凱詠嘅回憶。

或者我自己都知道今日將會係最後一日我可以光明正大咁幻想返同凱詠一齊嘅時光,可以幻想返佢就坐係我對面嘅畫面,可以再嚟一次呢D我同凱詠都嚟過嘅地方。

「可唔可以send D相嚟睇下?」我向我嘅人肉iCloud存取我同凱詠嘅合照。

「有得睇好睇喇 返到嚟你要匿埋係屋企先有得睇㗎喇」
「我都知 所以而家咪睇返夠本囉」

我一邊掃過我哋嘅相片,回憶返好多我哋去過嘅地方,係Melbourne嗰個公園入邊嘅有,係Opera House前面嘅又有,仲有就係喺我屋企嘅合照,一邊就食住凱詠最喜愛嘅菜式,回想返當日你一啖我一啖嘅場面。

「我害怕每天醒來想你好幾遍

我吻過你的臉 你雙手曾在我的雙肩
感覺有那麼甜 我那麼依戀
每當我閉上眼 我總是可以看見
失信的諾言全部都會實現

我吻過你的臉 你已經不在我的身邊
我還是祝福你過得好一點
斷開的感情線 我不要做斷點
只想在睡前 再聽見你的 蜜語甜言」

食完飯之後我再去到我屋企最近嘅supermarket,呢到都可以話係近得嚟又充滿我哋之間嘅回憶嘅地方,而且我都想嚟呢到睇下最後仲有冇D咩可以買返香港。

「寶寶,你今天晚上想要吃甚麼?」
「你每天吃我煮的東西會吃膩嗎?」

凱詠嘅聲音同笑容好似無處不在咁,不停貫穿我嘅腦袋同耳膜。每次我一合上眼凱詠就好似會係我面前岀現,但當我一擘大眼嘅時候,佢又會好無情咁離開我。

最後我去到我平時成日買外賣嘅Burger shop,買咗最後一次嘅外賣等陣臨去機場之前食。呢間鋪頭係我最初嚟到嘅時候唔知食乜好,求其係google map上邊搵岀嚟嘅餐廳。

由我第一次嚟買,到買到個老細開始認得我,因為我次次都係嗌同一樣嘅野。直到有一次我啱啱推開門入到去,都未開口落單,已經俾老板知道我想要D咩。

「Same?」

我哋互相對望住,大家不約而同咁笑。

「Yes please.」

就係由呢一次開始佢每次都會撩我傾下計,問下我係邊到嚟呀,嚟呢到做咩呀,又會得閒同我講下經,講下自己嘅故事。我都會同佢分享自己嘅野,例如同女朋友去邊到玩呀,當然佢唔會知道我口中嘅女朋友有時係講緊凱詠,有時就係講緊Charlie喇。

但正正就係佢同我嘅圈子嘅任何人都互不相識,我可以同佢講好多野,都唔怕佢會爆我大鍋。係一個禮拜兩三日等外賣嘅呢五至十分鐘,佢可能係我係澳洲識到傾過最多計嘅外國人。

「Hello mate.」

我同佢已經進化到乜都唔駛講,佢就會自動幫我準備我要嗌嘅野。

「Today is probably the last day you will see me.」
「Huh?」

「I will be on the flight heading back to Hong Kong tonight. 」
「Oh really? So you are coming back for your last meal in Sydney, aren’t you?」

「For sure, I will definitely miss your burger and chips when I am back in Hong Kong.」
「ahahahaha」

「Here you are!」

我從老板手上接過滿滿嘅外賣盒,然後拎岀銀包準備俾錢。

「Go! Go away!」老板對我揮一揮手道。
「No way, I gotta pay for my last burger, it has been with me for the past few months.」

「Leave me alone!」
「Sigh! Alright mate, thank you very much. Can I take a picture with you?」
「What are you talking about? Of course you can, come on!」佢又重新向我招手示意。

我哋影完相之後,係我轉身準備離開嘅時候,我忽然醒起我好似有樣野從來都冇問過佢。

「I am just wondering, it seems like I have never ask you before, what’s your name?」
「You know what? If I tell you I’m Chris or Peter or Mark or whatever my name is, you will just forget it in a few years. Remember me as the burger man. Tell your friends and family you met a middle aged fat ass that made you food twice a week. 」

「Alright alright, thank you my burger man, see you!」

我帶住我最後嘅一餐返到屋企之後,將所有野都執哂入行李喼入邊,然後坐係我坐開嘅位置,食住最後嘅一餐,望住家徒四壁,空了了嘅屋企。

經歷咗咁多野之後,佢最後都係返番去原本我啱啱嚟到咁嘅樣。我都係時候變返幾個月前嘅我,雖然我係唔會忘記呢幾個月所發生過嘅事,但係Charlie面前我永遠都要做返幾個月前嗰個無瑕疵嘅呀臣。

最後我執好枱,扔埋最後一包垃圾,將鎖匙放喺枱面之後,就拖住一大一細嘅喼,離開我呢個短暫的家。
2023-05-23 20:44:18
2023-05-23 21:24:56
唔好咁快完
2023-05-23 22:23:23
俾定心理準備大家 呀臣返到香港之後 故事就準備進入直路

開始接近結局篇 應該仲有大約一至兩個禮拜嘅文

多謝大家一路以嚟嘅支持 睇到嚟呢到仲未正評嘅請快D正評!
2023-05-23 22:54:46
好好睇 多謝您 晚晚瞓前都睇完先瞓
好似變咗習慣咁喇 同你match咗上載文既時間
你寫得超級好,細膩。完咗再期待你下一個小說
2023-05-23 23:55:14
多謝支持

希望將來會再有好嘅素材可以寫故俾大家睇
2023-05-24 01:12:51
終於返香港
唔通呢個時候先東窗事發?
2023-05-24 08:52:14
J故黎講 仲有無甜先結局
2023-05-24 14:10:39
唔知有冇巴打試過 同外國人有呢啲對話真係幾warm
2023-05-24 19:01:48
咁快返香港?
2023-05-24 19:02:02
我冇忘記到當日我啱啱嚟到要一抽二掕嘅嗰個教訓,所以原本我係諗住舒舒服服咁坐的士去機場。不過我忽然醒起坐機場巴士可能就係我最後可以係呢到做返同凱詠做過嘅野,最後我都係拖住一大一細嘅喼,加埋揹住塞滿野嘅背囊,行到去巴士站,搭係澳洲嘅最後一程巴士。

上到車之後,我攬住大髀上邊嘅大袋,望住窗外嘅風景,知道自己好快就會離開呢一到,返番去嗰個熟悉而可能又有D陌生嘅地方。

返到香港之後我同凱詠永遠都唔會再有半點關係,我哋就同普通嘅陌生人一樣,仲要係身處兩地嘅陌生人,人生永遠都唔會再有重疊嘅地方。一諗到呢到,我又不禁嘆咗口大氣,但我知道我點要接受呢個現實,所有野都已經塵埃落定。

我望住坐係我隔離嗰個鬼佬,腦海中仲係到回想緊當日送凱詠去機場嘅畫面,好想好想我身邊嗰個真係佢。

我再次打開呀樂send俾我嘅相,回憶一下凱詠嘅容貌,又login返嗰個假嘅instagram account,想睇下佢嘅近況。見到佢同朋友慶祝聖誕,同屋企人去旅行全部都玩得好開心,然後凱詠都開始準備要返台灣。

見到佢一切安好我個心都安落一D,最緊要佢開開心心就得㗎喇。

18:42
1月3日
沒有新的通知



「B我上咗飛機喇 好快返到嚟㗎喇」
「終於等到你返嚟喇 今晚見!」
「今晚見」

雖然我叫咗Charlie咁夜唔好嚟接我,但佢都係話好心急想快D見到我,堅持一定要嚟機場。

「活著有你多好 多麼渺小都變寶
躺在平靜被舖上漫談來日旅途
回到家中便有你多好 一碗暖湯的鼓舞
沾濕我眼睛 有人祈求我歸家

自問已經得到 得到你比一切好
躺在平靜被舖上望浮雲在過路
回到家中便有你多好 張開兩臂的鼓舞」

我好慶幸有一個人係屋企一直咁等自己,期待自己嘅歸期,我知道呢幾個月我就風流快活,但Charlie一定係渡日如年,我亦都知道我同Charlie嘅將來會好幸福美滿,只要我可以呃佢一世。

係飛機起飛之前,我再一次Del哂呀樂send俾我嘅相,然後登岀嗰個假嘅instagram account,為返屋企嘅路做好準備。

我應承自己返到香港之後要一心一意咁對待Charlie,盡量彌補返我呢幾個月嘅過錯,將最大嘅幸福送俾佢。雖然我點都冇可能忘記凱詠,但我亦都唔可以再行差踏錯。

再見澳洲,再見凱詠,雖然我好清楚我哋應該都冇乜機會再見。

返到香港之後,我同凱詠基本上已經係完全斷絕來往,我掛住佢嘅時候都只係可以叫呀樂send D相俾我,睇完之後自己合上眼,幻想返到去墨爾本嘅公園,悉尼嘅海邊,短暫咁同凱詠約會,但當一擘大眼嘅時候,始終都係要重回現實。

至於Charlie,我好成功咁將佢蒙在鼓裡,佢亦都對我冇半點嘅懷疑。我哋仍然係一對好sweet嘅情侶,佢仍然係覺得自己係世界上最幸福嘅女人。

雖然我哋呢段關係係建基於無數個大話之上,但我都必需要接受呢個現實,因為呢個可以話已經係最好嘅結局,至少每一個人都開開心心,每一個人都只係知道我想俾佢哋知道嘅野。

呢個狀態大約維持咗一年,係呢一年入邊我同Charlie就好似普通情侶一樣,繼續甜蜜落去。

「唔知呀Y而家點呢?」

係我返嚟香港之後大約一年,有一次我同呀樂岀街嘅時候我問佢。

「仲好掛住人呀?」
「唉,我都唔知呀,咁一定冇當初咁掛住嘅,但又會想知道佢嘅近況,希望佢可以開開心心,搵到一個好男人喇。」

「咁都好難爛得過你嘅。」
「我屌你喇!」

「你login返你嗰個分身ig咪知佢而家點囉。」
「唔知佢會唔會已經block咗我呢?」
「你一路都冇login過咩?」
「冇呀,我驚自己唔記得logout呀嗎,又驚如果呀Y真係有搵過我,我都唔知覆唔覆佢好。」

「我仲以為你個痴漢會成日stalk住人添。」

聽完呀樂嘅提醒之後,我馬上打開instagram,本住睇一睇應該冇死嘅心態,login返我嗰個「老千」專用account。

我入完密碼之後,拇指就㩒落「登入」嘅掣上邊。
2023-05-24 19:49:27
live 左
2023-05-24 21:45:04
吹水台自選台熱 門最 新手機台時事台政事台World體育台娛樂台動漫台Apps台遊戲台影視台講故台健康台感情台家庭台潮流台美容台上班台財經台房屋台飲食台旅遊台學術台校園台汽車台音樂台創意台硬件台電器台攝影台玩具台寵物台軟件台活動台電訊台直播台站務台黑 洞