美胸(Acup)
2022-07-26 16:46:59
12.
一個星期之後嘅夜晚,潘子韻如願以償咁收到張正楠send俾佢嘅message。
「潘小姐,我仲未收到今個月嘅租金,你係咪唔記得咗過數?」潘子韻淨係透過文字都想像到對方平淡嘅語氣。
「唔係呀,我等緊你搵我咋嘛。」
潘子韻將呢句嘢send咗出去之後忍唔住竊笑。
唔使諗佢都知對方呢刻面上嘅表情肯定好精彩。
只可惜佢哋兩個係隔住個mon嚟交流,如果唔係潘子韻真係想好好欣賞下張正楠嘅反應。
「麻煩盡快喺呢兩日內過數。」不出所料,對面自動無視咗潘子韻咁唐突嘅回覆,只係冷冰冰咁作出提醒。
潘子韻冇再覆張正楠。佢爽快咁過咗錢,然後cap低紀錄send俾對方。
本來佢仲打算調戲多張正楠幾句,諗咗諗又決定算數。
第二日,張正楠嘅書店迎來咗一位不速之客——潘子韻。
「歡迎光臨。」當門上嘅風鈴發出聲響時,本來一直坐喺收銀位置,低頭睇緊書嘅張正楠下意識咁抬頭。
見到企喺門口嘅係潘子韻,佢不自覺咁窒咗窒。
潘子韻似乎好滿意佢嘅反應。
佢步伐優雅咁行入書店,扮晒驚訝咁開口:「咦?張生?乜你喺度返工㗎?」語氣要幾誇張有幾誇張,但面上嘅表情卻毫無訝異之色。
「係呀。」張正楠都懶得拆穿佢。「你嚟買書?」佢唔知潘子韻出現喺呢度係想點,淨係打算快啲打發佢走。
點知潘子韻就好似估到佢心入面諗咩咁。
「唔係呀!」佢踏前一步,笑容肆意張揚:「我係嚟見工㗎,你老細呢?」佢向張正楠展示自己手中嗰張唔知係幾時從書店門外撕落嚟嘅招聘啟事,嘴邊嘅笑意染上咗一絲狡黠。
張正楠沉默咗兩秒。
「我係老細。」
潘子韻並唔意外:「咁你請我啦!我有相關經驗㗎,之前返開圖書館。」
張正楠知道佢有經驗,但佢仍然覺得好莫名其妙。
當初睇完屋,張正楠問起潘子韻嘅收入嗰陣,對方一早就表明咗自己淨係返part time,但有屋企人俾錢佢。
當時潘子韻仲俾咗自己嘅銀行存款金額張正楠睇,數目確實唔少。
自從嗰陣時開始,張正楠就當咗佢係嗰啲無聊得濟出嚟體驗生活嘅有錢女。
咁到底呢個女仔而家又係食錯咗咩藥,先至忽然走嚟呢度見工?張正楠覺得有啲頭痕。
「潘小姐,你知我呢度係請緊全職㗎可?」
潘子韻語氣輕快咁回答:「我知呀。」
「咁你點解唔繼續去返part time,而係走嚟呢度?」張正楠循循善誘咁追問。
佢突然覺得自己呢刻有啲似中學嘅長氣駐校社工。
「因為我屋企人話唔再俾錢我租屋。如果我唔返份全職工,就冇錢交租㗎喇……」潘子韻收起笑容,睫毛微垂,聲音細如蚊蚋。
張正楠一時之間都分唔清佢講嘅嘢到底係真定假,低頭沉默思考。
梗係假㗎啦。
潘子韻微微斂眸,強忍即將溢出嘴角嘅笑意。