美胸(Acup)
2022-08-13 00:54:25
23.
星期五夜晚,潘子韻如常咁同張正楠一齊放工。
喺佢企埋一邊等待張正楠鎖上書店門嘅時候,佢手中嘅電話突然響咗一聲。
潘子韻望一望部電話,發現係Derek send message俾佢。
「星期日得唔得閒一齊食飯?」
潘子韻覺得有啲意外。
自從上次一齊食完飯,佢哋兩個都冇再聯絡過。潘子韻知道Derek嘅性取向,所以都冇放喺心上。
不過佢而家又約我係因為啲咩呢?
未等潘子韻諗清楚,佢部電話又「叮」一聲咁響起,今次係周燕珊。
「Derek約咗你未 係唔係約星期日」一睇到呢個message,潘子韻就知咩事。
肯定係屋企人俾壓力啦。
呢個時候,張正楠已經鎖好門,向潘子韻招手:「行喇。」
「哦。」潘子韻應咗聲,目光仍然停留喺電話螢幕上。
其實佢一啲都唔想赴約,不過又覺得Derek都有啲慘。
最多到時同佢講清楚,叫佢唔好再約我囉。潘子韻暗暗下定咗決心。
佢決定應約。
星期日當晚,潘子韻同Derek面對面咁坐咗喺一間高級餐廳入面。
因為知道自己同Derek冇可能發展,佢嘅態度隨意咗好多,好專心咁食嘢。只有當Derek問佢嘢嘅時候先會間中抬頭回答一兩句。
還掂都係做下樣啫。潘子韻完全唔覺得有咩問題。
直到Derek突然開口。
「其實我有同你發展落去嘅打算,唔知你點睇?」
潘子韻本身飲緊水,聽到呢句之後佢爭啲直接噴咗啖水出嚟。
佢艱難咁吞咗口中嗰啖水,難以置信咁開口:「吓?」
「我係認真。」Derek好誠懇咁望住潘子韻。如果唔係之前見到佢銀包嗰張相,潘子韻好大機會會信佢。
望住Derek真誠嘅表情,潘子韻無名火起。
點解呢排個個都輪住嚟呃我?我望落有咁蠢咩?
「阿Derek,」潘子韻放低手中嘅刀叉,優雅咁抹咗抹嘴:「如果你真係想同我發展,咁點解之前呢段日子你完全冇搵過我呢?而家第二次見先無啦啦話想發展?」
Derek好似冇諗過佢會咁樣反問,一時語塞。
「仲有,」潘子韻冇放過佢嘅打算,索性攤開嚟講:「如果你同我一齊嘅話,你喺外國嘅男朋友仔點算呢?」
話音剛落,佢就見到Derek嘅面色以肉眼可見嘅速度變得蒼白。
潘子韻先唔得閒理對方而家呢刻係點樣嘅心情。
「你唔好再諗住搵我做煙幕喇,我會同我阿媽講話我哋性格唔啱所以冇再聯絡。」講完之後,佢唔等對方回應就直接起身離開。
「你埋單。」佢臨走前不忘加多句。
潘子韻離開後,着住西裝嘅男人不發一言咁自己一個坐喺原位,顯得格外孤獨。
兩日後,潘子韻再次收到Derek嘅message,當時佢正喺書店做緊嘢。
「今晚得唔得閒,可唔可以出嚟傾下。」
潘子韻放低手上嘅工作,唔耐煩咁打字:「我同你又唔熟 有咩好傾?」
呢個時候張正楠嘅聲音傳嚟:「返工時間玩電話,信唔信我扣你人工吖嗱?」
潘子韻只好收返埋部電話,亦嚟唔切睇Derek之後嘅回覆。
收工嗰陣,潘子韻跟張正楠走嗰陣先發現Derek企咗喺書店門口。
「陪我傾下。」Derek個樣好憔悴。
「你走啦,我哋真係冇嘢好傾呢。」呢刻潘子韻淨係想快啲返屋企瞓覺。
不過對方充耳不聞,固執咁企喺原地望住潘子韻,好似只要潘子韻唔應承同佢傾佢就唔會走咁。
雙方僵持咗幾秒。
最後係潘子韻首先敗下陣來。
「唉好喇好喇怕咗你。」佢煩躁咁摷咗摷自己個頭,然後轉身同張正楠講:「我同個friend走先。」
張正楠淡然咁點咗點頭。
上咗Derek架車之後,潘子韻收到張正楠send嚟嘅message。
「多仔到 呢個幾深情喎」字裏行間充滿促狹嘅意味。
潘子韻懶得解釋咁多,淨係覆咗個反白眼嘅emoji。