美胸(Acup)
2022-08-06 19:49:50
19.
潘子韻對書店發生嘅一切一無所知。佢正忙住應付佢阿媽周燕珊。
一開始,當電話響起嘅時候,潘子韻以為周燕珊只係打嚟催佢返屋企食飯,因為佢已經有兩個星期冇返過去。
「喂?」見到來電顯示嘅時候,潘子韻已經盤算緊應該喺星期幾返屋企食飯好。
「聽日得唔得閒?」周燕珊開門見山咁講。
「得呀。七點開飯?」
「你唔使返嚟食飯。」令潘子韻覺得出乎意料嘅係,周燕珊今次打嚟並唔係為咗叫佢返屋企食飯。
「你聽日下晝五點去機場。」
潘子韻好疑惑:「機場?」
「你仲記唔記得Ann姨個仔呀?佢之前去咗外國,聽日返嚟。」
「所以?」聽到呢度,潘子韻開始估到周燕珊想點。
「你聽日去接機,再同人食餐飯啦。你哋兩個後生應該多啲話題,好快就變熟。」周燕珊自顧自咁為潘子韻安排好聽日嘅行程。
「我唔去,我都唔識佢。」潘子韻語氣有少少唔耐煩。
周燕珊聽得出佢嘅抗拒,不由自主咁提高咗聲量:「食餐飯啫,你推三推四做乜?」然後佢又放輕語氣:「人哋好叻仔㗎,律師嚟㗎,但睇完你張相都話想同你食飯,你咪當識多個朋友囉。」
「你咁鍾意佢咪自己去同佢食囉……」潘子韻講得好細聲,但周燕珊已經聽到晒。
「潘子韻我而家唔係同你玩呀吓。」潘子韻淨係聽聲都想像到周燕珊嚴厲嘅表情。「你都就嚟廿五㗎喇,仲當自己係𡃁妹玩玩下呀?成日唔嗲唔吊咁,如果唔係我同你老豆幫你,你以為自己仲可以好似而家過得咁他條咩?」
潘子韻冇出聲。
周燕珊見佢沉默,語氣稍為緩和:「我哋已經縱容咗你好耐,而家都差唔多係時候㗎喇。你試下再拖多幾年吖,就算你求我我都唔知可以喺邊度搵個律師返嚟俾你呀。趁住而家仲算後生,見好就收喇。」
「你自己諗下我講嘅嘢啦。聽日下晝五點記得準時呀,我轉頭send Ann姨個仔張相俾你。」見潘子韻仲係冇聲氣,周燕珊都冇再繼續講落去,匆匆交待幾句之後就收咗線。
潘子韻放低電話,過咗好耐先至回過神來。
周燕珊嘅說話好難聽,但佢的確係講中晒。
潘子韻而家之所以過得咁舒服都係靠屋企人幫,如果冇咗佢哋,佢根本一無是處。
佢唯一攞得出手嘅就只有自己嘅外貌。
但過多幾年,佢可能連呢個優勢都會失去埋。
到時候嘅潘子韻仲有啲咩剩低?
其實潘子韻一直都清楚呢個問題,只係佢刻意忽視。今日俾周燕珊咁直接指出嚟,佢根本冇辦法反駁,亦冇得再逃避。
呢個時候,電話「叮」一聲咁響起。
係周燕珊send message嚟。
潘子韻拎起電話一望,只見對方send咗張相嚟,相中人係一個着住西裝嘅男仔,其貌不揚。
「聽日記得提早少少去等人哋。」周燕珊不厭其煩咁再三提醒。
潘子韻望咗張相好耐。
最後佢緩緩咁喺電話嘅鍵盤度打字。
「好」