Bottas(已硬)
2022-09-11 13:31:18
35.
返到屋企之後,潘子韻涼都未沖,第一時間就打俾Derek。
「我要同你講樣嘢!」一發現對方接聽咗,潘子韻就迫不及待咁開口。
Derek嗰邊有啲嘈,佢應該仲喺街。
「搞咩,我啱啱先收工......除非係好似『你琴晚同張正楠酒後亂性咗』呢種程度嘅事啦,如果唔係嘅話等我返屋企先講。」
潘子韻猶豫咗一下。
錫咗張正楠算唔算係「酒後亂性」呢?
佢嘅短暫沉默令Derek誤會咗。
「唔係呀?你真係同佢扑咗嘢呀?不愧係你喎,咁快手嘅?」佢嘅聲音由疲憊變為激動,此刻顯得有啲高亢。
「唔係呀。」潘子韻慌張咁否認。「其實我係......琴晚飲醉酒錫咗佢一下。不過今日喺書店嗰陣佢完全冇提過呢件事,好似想扮冇嘢咁。」佢把聲變得有啲苦惱。
Derek誇張咁笑咗一下:「扮咩飲醉酒吖,你借啲意咋下話。」
「你都痴線,我對佢真係冇嘢囉。」
「仲扮乜吖,如果真係冇嘢,你點會單純因為錫咗啖就成個未拍過拖嘅𡃁妹咁苦惱吖。」
「……」潘子韻諗唔到反駁嘅說話。
「不過,」幾秒後佢又開口:「我琴晚錫完佢之後仲嘔咗落佢度……」佢爭啲唔記得咗講重點。
「……」今次到Derek沉默。「你係勁嘅。」佢語氣帶點無奈。
最後潘子韻同Derek傾咗成晚,得出結論係:真係溝唔到。
「我之前仲俾佢見到我素顏着睡衣嘅樣。」
「你都係放棄算啦。」
「不過老實講,你又可以唔使咁悲觀嘅。」Derek最後補咗句,「可能佢唔介意你素顏同嘔落佢度呢,我覺得佢似係重視內涵嘅人嚟。」
「如果真係咁嘅話我好似仲更加冇希望……」潘子韻爭啲喊出嚟。
「又係喎……」
第二次嘅讀書會日期定咗喺半個月後。
今次討論嘅呢本書厚過上次,所以張正楠一確定好主題就即刻俾咗本書潘子韻。
「大把時間俾你睇,冇藉口偷懶啦。有咩唔明可以問我。」
潘子韻一臉痛苦咁接過書。佢有時覺得張正楠唔去教書真係嘥晒。
佢究竟幾時先肯放過我,唔再迫我睇書……潘子韻覺得再係咁落去,佢可能會忍唔住一把火燒咗間書店。
不過而家咁樣其實都有樣嘢好嘅。
就係潘子韻可以喺書店休息嘅時候借問書嘅藉口去張正楠屋企。
潘子韻每次都好厚面皮咁留喺張正楠屋企成日先走。
而對於佢嘅忽然好學,張正楠冇絲毫懷疑,仲好滿意。
「孺子可教也,睇嚟你仲有得救。」
潘子韻笑而不語。