美胸(Acup)
2022-08-22 01:45:39
27.
潘子韻同張正楠叫咗pizza食。
佢哋朝早淨係食咗jollibee,仲要係兩個人share同一個餐,呢一刻自然已經餓到極點。
外賣一到,佢哋兩個就好似餓鬼投胎咁,只顧低頭大快朵頤。
食到咁上下,潘子韻終於醒起頭先一直想問張正楠嘅一個問題。
「你以前讀會計㗎咩?」佢若無其事咁將最後一啖pizza放入口。
張正楠窒咗窒:「你點知㗎?」
「朝早幫你抹書櫃嗰陣見到入面有會計書。」
「哦……」張正楠抹咗抹手,身體自然咁挨後坐:「其實我以前係會計師嚟。」
潘子韻並唔係太驚訝,其實佢喺開口問之前已經估到呢個答案。
佢真正好奇嘅係另外一樣嘢:「你做會計師做得好地地,做乜無啦啦走咗去開書店?」
張正楠笑咗笑,似乎一早估到佢會咁問。
「會計好搵係好搵,但係太chur。我由細到大都好鍾意睇書,但做會計嗰幾年,我睇過嘅書寥寥可數。」陷入回憶嘅張正楠苦笑。
喺張正楠仲做緊會計師嘅某一日,開書店嘅念頭突然間「叮」一聲咁出現喺佢嘅腦海。
嗰個時候,佢已經好耐冇掂過會計相關以外嘅書。
佢都唔知點解自己會有開書店嘅念頭,而家諗返轉頭,可能係潛意識嘅自己覺得冇辦法再忍受嗰種淨係得數字同貨幣符號嘅生活。
就係咁,開書店嘅念頭喺短時間內佔據咗張正楠嘅心房,就好似瘋狂生長嘅藤蔓一樣。
佢嘅行動力異常地高。確認自己嘅存款足夠後,佢好快就辭咗職。搵舖、裝修、入貨……全部嘢佢都一手包辦。
張正楠阿爸一開始好反對佢辭職,但最後都係敵唔過佢嘅堅持。
「就算最後書店執笠,蝕晒啲錢,我都唔會後悔自己做過嘅一切。」張正楠講呢句說話嘅時候,眼中係滿滿嘅熱情,隱約閃着光芒。
潘子韻從張正楠嘅眼神中感覺到佢對書嘅熱愛。
真係好。佢突然有啲羨慕張正楠。
有熱愛嘅事物並為之努力嘅感覺係潘子韻從來都冇體驗過嘅。
準確嚟講,潘子韻仲係處於連自己鍾意啲咩都唔知嘅階段。
同張正楠相比,佢簡直係個一事無成嘅廢柴。
潘子韻又諗返起周燕珊第一次勸佢去見Derek嗰陣講嘅嘢。
佢喺內心嘆咗一口氣。
張正楠嘅感冒只係過咗一日就好返,所以第二日書店又再重新營業。
「你真係唔使唞多日咩?」潘子韻喺前一晚「關切」咁問。
「唔使呀。」當時張正楠溫和咁對佢笑,笑到眼睛都瞇咗起嚟:「聽朝記得準時返工喇。」
使唔使咁搏呀……潘子韻嘅如意算盤完全打唔響。
平靜嘅生活就咁樣過咗幾日。
幾日後,潘子韻久違咁再次接到Derek嘅電話,今次對方係約佢睇戲。
「咪叫咗你唔好再搵我做煙幕囉。」潘子韻一聽電話就先發制人咁講。
「今次唔係我阿媽叫我約你㗎,係我自己約你。」Derek語氣平和。
潘子韻首先係呆咗呆,然後皺起眉頭。
「你唔係轉咗性取向下話……」佢小心翼翼咁講。
乜我靚到將佢拗直咗?!潘子韻嘅思維一如既往咁跳脫。
「……」因為覺得太難以置信,Derek沉默咗幾秒先至再開口:「唔係。其實我係想有人陪,但第一個就諗起你,可能因為你係唯一知道晒我所有嘢嘅人。」
「我唔要。」潘子韻言簡意賅咁拒絕。
「你上次掉低我自己一個喺車度瞓咗成晚,我都未同你計。」
「咩……咩啫?咁你醉成咁,我都唔知送你去邊好,同埋你男人老狗怕咩喎。」見Derek攞返呢件事出嚟講,潘子韻有少少心虛。
「但我係0。」
「?」
潘子韻今次真係徹徹底底咁俾Derek打敗咗。