遇人不淑——高傲女神搬起石頭砸自己隻腳嘅故事

991 回覆
92 Like 100 Dislike
2022-08-07 22:42:19
20.

第二日嘅下晝,潘子韻到咗機場嘅接機大堂。

律師班機冇延誤,潘子韻只係等咗一陣就見到佢拖住行李嘅身影。

今日機場好少人,喺接機大堂等緊親友嘅人寥寥無幾。

律師好明顯一眼就認出咗潘子韻,微笑住向佢揮手。

潘子韻展開笑顏回應。

「Hello。」等律師行咗出嚟,潘子韻迎上去,主動打招呼:「你係咪Derek?」

「係呀,你係阿韻吖嘛。」

簡單打完招呼,佢哋就一齊離開機場。

潘子韻同Derek都係屬於外向嘅性格。雖然只係啱啱第一次見面,但佢哋兩個已經有講有笑咁,氣氛輕鬆。

呢種氛圍亦一直延續到佢哋食飯嗰陣。

Derek係一個擅長社交嘅人。食飯嗰陣佢會好生動咁同潘子韻分享自己嘅外國生活,但間中又會不着痕跡咁將話題帶到去潘子韻身上,等潘子韻都有機會開口而唔係齋聽咁悶。

因為咁,潘子韻對Derek嘅印象幾好。不過佢硬係覺得佢哋兩個之間爭緊啲嘢,感覺自己同對方最多都只可以做friend,但又噏唔出點解。

直到埋單嘅時候,潘子韻無意中見到Derek銀包入面有佢同另一個男人嘅合照。

相入面嘅兩個男人姿態親密,好明顯唔止係朋友關係咁簡單。

潘子韻內心即刻豁然開朗,然後若無其事咁移開目光。

返到屋企之後,潘子韻收到周燕珊嘅電話。

「你今日同Ann姨個仔點呀?」

潘子韻梗係冇爆響口:「ok啦。」

「ok就得喇。打鐵要趁熱,你之後多啲約下人啦,唔好淨係等人約你。」周燕珊把聲聽落好滿意。

潘子韻好無奈。

約多幾多次都冇用啦......佢心諗。

可惜佢冇辦法講真話。

佢唯有好含糊咁答:「再講啦。」

周燕珊收線之後冇耐,就到另一個電話打嚟。

今次係張正楠。

潘子韻驚訝咁挑一挑眉。

佢竟然會主動打嚟?

講起上嚟,佢哋兩個已經冇見幾日。

潘子韻呢刻已經冇乜嬲嘅感覺,更多嘅係好奇張正楠打過嚟嘅目的。

佢梗係唔會自戀到以為張正楠打嚟係為咗道歉啦。

佢甚至有一刻以為對方只係打錯,但見部電話keep住響咗咁耐,又覺得好似唔係。

諗咗陣之後,潘子韻都係聽咗電話。

「咩事呀張生?」佢語氣輕快。

而電話另一端嘅張正楠就窒咗窒。

佢原本以為以潘子韻嘅性格好可能會直接cut線,所以佢預咗要再打多幾廿次電話對方先會聽。

點知潘子韻咁快就聽咗。

不過,喺短暫嘅訝異過後,張正楠就直入主題:「你有冇睇到個連登post?」

「吓?咩post?」潘子韻完全唔知咩事。

搞咩,特登打過嚟就係為咗叫我睇連登?潘子韻內心覺得好奇怪。

張正楠一聽佢嘅語氣就知佢一定唔係扮,而係真係冇睇到。

於是佢將電話從耳邊攞開,無視電話另一端潘子韻係咁「喂喂喂?」嘅追問聲,直接將連登個書店post send咗俾對方。

「你睇完先再打返俾我啦。」

「哦。」潘子韻一頭霧水咁收咗線。

到潘子韻終於搞清楚晒成件事,已經係半個鐘之後。

佢第一樣做嘅嘢係打開ig。同佢預計嘅一樣,佢一打開ig就有一大堆消息提示彈出。

平時佢太多人搵,所以習慣熄ig嘅通知,但呢幾日佢冇check ig,而家睇先發現多咗人follow同埋dm佢。

呢個時候,張正楠send咗個message過嚟。

「睇完未?」

潘子韻直接打咗個電話過去。

「我啱啱睇完喇。你打嚟搵我係想我返翻嚟做?」對面一接聽,潘子韻就開門見山咁講。

「係。」

聽到張正楠親口承認,潘子韻嘅心情變得特別好。

佢冇將自己嘅情緒表露半分。

「但係點解先,你本身唔係好想逼到我走㗎咩?」潘子韻一邊問,一邊悠閒咁喺度玩手指。

張正楠預咗佢會攞返呢件事出嚟講。

「我認我一開始係有咁嘅諗法,之前亦的確係對你太過苛刻,不過我而家真係好需要你返嚟幫手。」佢嘅語氣好認真。

「真係?」聽到呢度,潘子韻已經掩飾唔住嘴邊嘅笑容。

「係,其實你好幫得手。」張正楠冇察覺佢嘅異樣。

潘子韻本身仲諗住扮下嘢推多幾次,以報復張正楠之前嘅所作所為。不過唔知點解,一聽到對方用咁嚴肅嘅語氣話需要自己,潘子韻嘅內心就開始變得激動起嚟。

本身佢呢幾日仲懷疑緊自己嘅價值,但張正楠呢短短嘅幾句話卻有種莫名其妙嘅力量,令佢突然覺得備受肯定。

於是,潘子韻好可恥咁選擇咗投降。

「唉,既然張生都出到聲,咁我都係返嚟啦。」
2022-08-07 22:43:30
唔講啦
2022-08-07 22:46:54
傻腩扮曬野話唔更文最後都更咗
2022-08-07 23:13:07
對唔住 頭先語氣重咗少少 唔好意思
2022-08-07 23:13:23
//「Hello。」等律師行咗出嚟,潘子韻迎上去,主動打招呼:「你係咪Derek?」//

原來唔係林作 係鍾培生
2022-08-07 23:39:42
本身真係諗住唔更
2022-08-07 23:39:54
冇用的
2022-08-07 23:40:06
屌救撚命
2022-08-08 01:23:28
腩哥咁
2022-08-08 03:04:39
收皮啦 我腩天生麗質
2022-08-08 03:16:50
成件事好嘔心
2022-08-08 12:41:26
2022-08-08 12:41:50
估唔到大家好呢味
2022-08-08 18:52:11
今晚冇文
2022-08-09 23:38:14
Live
2022-08-10 00:37:05
今晚係有文的 不過仲寫緊
2022-08-10 00:37:16
慢慢等
2022-08-10 00:44:37
快啲打埋先食宵夜啦
2022-08-10 00:59:34
七月十四都黎緊了,冇文點過
2022-08-10 01:09:27
21.

時隔差唔多一個星期再返翻書店,潘子韻發現嚟幫襯嘅人的確多咗好多。

「早幾日仲多人呀。」一齊入倉庫攞書嘅時候,張正楠細細聲咁同潘子韻講。幾秒後佢又補充:「不過好多都係嚟搵我影相。」

潘子韻感覺佢嘅語氣好似有啲炫耀嘅成分。

佢對張正楠反咗個白眼:「巴閉喇賣書佬楠楠,使唔使喺荃新天地幫你搞返個fans meeting呀?」

而張正楠聽完佢咁講之後就好似俾佢篤中咗笑穴咁笑唔停。

潘子韻冇理佢,捧住手上嘅一疊書行咗出去。

書店多咗人幫襯,佢哋兩個要keep住將倉庫入面嘅書上架。

專心執緊書嘅時候,潘子韻feel到有人拍咗拍佢膊頭。

佢停低手上嘅動作擰過去,見到兩個年輕嘅男仔,睇個樣應該係大學生嚟。

「可唔可以同你影張相?」其中一個男仔開聲,語氣有少少怕醜咁。

潘子韻忍唔住倒抽一口涼氣。

終!於!

等咗咁耐,終於都輪到我俾人問喇!

潘子韻內心激動萬分,但語氣卻好溫柔好nice。

「可以呀。」

潘子韻對面前呢兩個男仔露出咗一個由琴晩開始就對鏡練習咗好耐、佢自認為係最無懈可擊嘅甜美笑容。

影完相之後,嗰兩個男仔講完唔該就準備離開。

「記得follow我ig呀!」潘子韻拉住咗佢哋,話咗俾佢哋聽自己嘅ig名之後先肯放佢哋走。

心情愉悅咁目送兩個男仔離開後,潘子韻先至見到企喺不遠處嘅張正楠。

呢刻張正楠正似笑非笑咁望向佢呢邊,唔知係咪已經觀看晒頭先嘅成個過程。

四目交投後,張正楠行咗過嚟。

「頭先喺倉入面唔係表現得好不屑㗎咩?做咩而家仲宣傳埋自己ig?」略帶嘲諷嘅聲音從頭頂方向傳嚟,潘子韻覺得自己塊面有啲熱。

佢冇諗到張正楠真係咁無聊睇晒全程。

「關你咩事啫。」潘子韻輸人唔輸陣,語氣挑釁。

「咁我準備下幫你喺度搞fans meeting啦賣書婆韻韻。」

潘子韻俾呢個稱呼搞到起晒雞皮。

書店嘅上晝就喺忙碌中度過。

好唔容易捱到lunch time,張正楠決定唔再係好似之前咁兩個人輪流去食飯,因為得一個人睇舖肯定做唔嚟。

最後張正楠同潘子韻一齊去咗買外賣返嚟。

佢哋掛個「休息中」嘅牌喺書店門口之後就坐喺收銀度食飯。

「終於可以唞下......」面對唔同人行埋嚟話要影相,潘子韻嘅心情已經由一開始嘅興奮變到平淡再變到疲乏。

未等佢感嘆完,一陣電話鈴聲響起,係由張正楠部電話傳嚟嘅。

張正楠由頭先開始就一直掛住扒飯,部電話一直放咗喺檯面度冇郁過。

呢刻即使電話響起咗,張正楠都係冇拎起佢,而係開咗擴音接聽,食飯嘅動作一刻未停。

潘子韻好眼利咁睄到來電顯示嘅係女仔名嚟,於是佢一邊慢吞吞咁食飯,一邊靜雞雞咁豎起隻耳仔。

「喂?」張正楠嘅聲音模糊不清。

「阿楠,一唔一齊食飯呀?」一把柔柔弱弱嘅女聲從電話入面傳嚟。

潘子韻幾乎係即刻就認出咗呢把聲嘅主人。

就係嚟書店接張正楠收工嗰個懶柔弱嘅女仔。

當然,「懶柔弱」呢個形容係潘子韻自己加落去嘅。

「唔喇,我食緊。」令潘子韻估唔到嘅係,張正楠竟然連頭都唔抬就拒絕咗人,仲好似好冷淡咁。

唔通佢哋鬧咗交?潘子韻聽得更加入神。

「咁你放工我哋一齊食飯?」對方唔放棄咁繼續問。

「唔使喇,你住咁遠唔好特登過嚟。」張正楠聲音柔和,但嘴裏吐出嘅仍然係拒絕。

喺一旁偷聽緊嘅潘子韻忍唔住暗爽。

原來唔止我一個俾佢狠狠拒絕嘅!條女都同我一樣啫!

意識到呢點之後,潘子韻即刻覺得自己都唔係咁慘,心情頓時變得十分舒暢。

完美咁體現咗咩係「魚蛋論」。
2022-08-10 01:13:21
兵嚟
2022-08-10 01:15:29
2022-08-10 01:46:14
楠楠
腩腩
2022-08-10 01:49:05
你文盲?
2022-08-10 01:56:07
似了
吹水台自選台熱 門最 新手機台時事台政事台World體育台娛樂台動漫台Apps台遊戲台影視台講故台健康台感情台家庭台潮流台美容台上班台財經台房屋台飲食台旅遊台學術台校園台汽車台音樂台創意台硬件台電器台攝影台玩具台寵物台軟件台活動台電訊台直播台站務台黑 洞