美胸(Acup)
2022-07-30 04:22:01
15.
可能因為之前係咁俾張正楠剝削,潘子韻暫時冇乜想勾引對方嘅心思。
唞下先啦。佢諗。
有時都要喺適當嘅時候停手嘅。
於是,接住落嚟嘅一段時間,潘子韻一直都安分守己,真係當正自己係一個普通嘅書店員工咁。
不過為咗維護自己嘅形象,佢都係會每日化好妝先返工。
至於張正楠……
原本佢特登挑剔潘子韻做嘅嘢就係想對方知難而退。點知潘子韻竟然喺度做咗一段時間都唔走,仲幾幫得手。
重點係,潘子韻冇再做或者講曖昧嘢。
於是張正楠都放低咗要逼走人嘅心思,對潘子韻嘅要求都冇以前咁嚴格。
可能係接觸得我多之後又冇咗新鮮感掛。張正楠係咁樣解釋潘子韻突然收手嘅行為。
冇咗勾引同被勾引呢層關係後,而家兩個人變得和諧咗,一切都彷彿重回正軌。
等潘子韻再次挑起條筋,已經係半個月之後。
呢一晚,送走咗最後幾個客之後,潘子韻同張正楠打算一齊執埋啲手尾就放工。
因為係鄰居,關係又緩和咗,呢排張正楠會車埋潘子韻返屋企。
不過今日張正楠一早就講咗自己放工之後約咗人,叫潘子韻自己搭車返屋企。
本身潘子韻都冇諗咁多,直到佢同張正楠執執下嘢嘅時候聽到門口傳嚟嘅風鈴聲。
潘子韻正打算向入嚟嘅人解釋佢哋已經準備收舖。
「唔好意思呀,我哋已經——」佢一邊回頭一邊講,但當視線觸及對方嘅時候,佢嘅聲音戛然而止。
係之前喺書店門口接張正楠收工嗰個女仔。
呢刻咁近距離,潘子韻終於望清楚對方嘅外貌。
個女仔好白,仲白過潘子韻。佢嘅身型嬌小,矮潘子韻成個頭,但因為佢瘦,所以唔會變到好似個哈比人咁,反而顯得楚楚可憐。佢嘅面偏圓,雙眼大得嚟有神,水汪汪咁,好容易就激發到其他人嘅保護欲。
呢個女仔可以話係同潘子韻完全相反。
潘子韻內心警鈴大作。乜原來張正楠鍾意呢款㗎?!
但好快,佢又冷靜咗落嚟。
楚楚可憐又點啫,咪又係唔夠我靚。潘子韻對自己仍然係好自信。
呢個時候,張正楠都擰轉頭望向個女仔:「你坐喺梳化度等陣先吖,我好快就執完嘢㗎喇。」
好普通嘅一句說話,但潘子韻卻硬係覺得自己從中品嘗到一絲溫柔。
張正楠從來冇用過呢種語氣同佢講嘢。
關係緩和咗嗰陣,佢對潘子韻嘅語氣雖然有變得柔和,但都係好公事公辦,完全冇曖昧嘅感覺。
「好。」個女仔笑住答,然後就乖乖地行去梳化嗰邊坐低。
仲細咩,自己唔識過去等,係要人開口話俾你聽坐喺邊先識郁?潘子韻好不屑咁諗,忍住翻白眼嘅衝動。
坐好之後,個女仔抬頭同潘子韻對視咗。
隨即一陣只屬於兩個女人之間嘅暗湧浮現。
佢哋兩個嘅目光交集咗好一段時間,霹靂啪嘞咁火花四濺。
張正楠對此一無所知。
最後係潘子韻首先收回視線。
然後佢執好手上最後一本書,行去收銀位置後面攞袋。
「我執完喇,走先。」佢拋低一句之後就頭也不回咁離開。
路邊有一架的士經過,潘子韻連忙伸手攔截。
佢完全唔想留到最後,再望住另外嗰兩個人一齊走。
但咁唔代表佢會認輸。
一個𡃁妹啫。
上咗的士後嘅潘子韻雙眸有光芒閃爍着,內心有種熟悉嘅、熱血沸騰嘅感覺湧現。