美胸(Acup)
2022-07-25 00:04:35
9.
雖然一開始覺得有啲愕然,但用咗幾秒消化過後,潘子韻終於慢慢冷靜咗落嚟。
原來呢個就係佢咁難溝嘅原因?潘子韻露出一個恍然大悟嘅笑容。
知道張正楠可能有女朋友之後,她反而安心咗。
因為咁樣代表張正楠嘅冷淡並唔係因為潘子韻嘅魅力不足,而只係出於對伴侣嘅忠誠。
本來仲煩惱緊張正楠對自己冇反應,自信心稍稍被打擊到嘅潘子韻終於喺呢一刻感到豁然開朗。
女朋友……潘子韻過咗馬路後轉左,一邊繼續行一邊心不在焉咁思考。
唔專心行路嘅結果就係佢差啲被前方急急忙忙向佢呢邊走過嚟嘅中年大嬸撞到。
潘子韻慢一拍咁跳開,啱啱好勉強避免咗同個阿嬸激烈碰撞。對方行得好快,衫袖微微滑過佢嘅手臂。
明明爭啲撞到人,但個阿嬸仍然旁若無人咁掂行掂過,眼尾都冇睄過潘子韻。
換轉係平時,潘子韻一定會停低叫住個阿嬸,再同佢理論一番。
但呢刻嘅佢卻對個阿嬸嘅行為不以為意,甚至仲心情好好咁笑咗出嚟。
當然,潘子韻並唔係因為被人撞呢件事而笑。
女朋友……
咁又有咩大不了啫?
佢淡然一笑,眉頭舒展開來。
潘子韻喺感情方面可以話係無師自通——講緊喺壞嗰方面。
中一、二嗰陣,早喺「收兵」、「娘娘」呢啲詞語仲未被廣泛使用嘅時候,潘子韻已經撚仔撚到爐火純青。
當然,嗰陣嘅佢仲細,仲未夠膽去覬覦人哋嘅男朋友。佢嗰陣最多都只係撩下啲同班男同學,等佢哋幫下佢做功課、請下佢食飯之類。
就好似有啲賊淨係會搞有錢人一樣,潘子韻嘅目標亦只限單身嘅男仔。
佢自豪咁稱自己為「有原則嘅姣婆」。
直到中三嗰一年,佢當時嘅「好姊妹」溝咗個校草男朋友。
之所以要喺「好姊妹」一詞加上引號,係因為個女仔雖然同潘子韻好friend,但又會成日同其他女仔喺潘子韻背後談論佢收兵——當年佢哋嘅用詞係「發姣」。
潘子韻知道呢件事,卻唔太在意,仍然繼續同呢堆女仔維持表面嘅交好。
佢知道佢哋只係妒忌自己。
而佢樂於接受呢種妒忌。
有人講過,女仔之間嘅友誼穩唔穩固係取決於佢哋有冇共同敵人。
咁樣講法,中學至大學呢十年入面,潘子韻嘅存在可以話係對其他女仔之間嘅友誼起咗異常強大嘅穩固作用。
講返嗰個「好姊妹」。
佢樣貌一般,俾盡都只算係生得清秀。如果佢嘅五官要用四個字嚟概括嘅話,應該會係「過目即忘」。
不過佢勝在身材好。喺大家先啱啱開始發育嘅時候,佢個胸已經有D cup。
於是,喺努力咗一段時間之後,佢成功將當時隔離學校嘅校草變成佢男朋友。
老實講,嗰個校草完全係當時潘子韻最鍾意嗰type。唔單止白淨清秀、身型修長,仲要係籃球校隊嘅。
只不過潘子韻之前一直冇留意過呢個人嘅存在。因為佢嘅「戰場」一直都停留喺自己學校,冇乜注意隔離學校嘅人。
而佢個「好姊妹」喺鎖定目標嗰陣更加唔會話俾佢聽。
不過,始終仲細,呢個年紀嘅女仔或多或少都有種炫耀心態。
結果,啱啱同人一齊,個「好姊妹」就忍唔住出post同咗全世界嘅人講,仲換埋Facebook icon。
「❤️❤️❤️ @WaiYin Kong」
當見到樣貌平凡嘅「好姐妹」將同啱啱追到手嘅校草嘅合照換成Facebook icon,潘子韻首先係窒咗窒。
然後佢本來就道德觀念薄弱嘅心泛起咗波瀾。
幾乎係下意識咁,潘子韻將自己本來係卡通人物嘅Facebook icon換咗做自拍。
搞掂之後,佢去咗「好姊妹」個post度留言:「幾時一齊㗎!!收得咁埋嘅?!」
做完呢一切之後,佢先至發現自己嘅手心已經喺不知不覺間冒出咗一層薄汗,伴隨住越嚟越重嘅心跳聲。
第一次做呢啲嘢,潘子韻難免有啲心虛緊張。
但同時,佢亦清楚感受到自己嘅內心深處有一股詭異嘅興奮感破繭而出。
為咗等自己冷靜落嚟,佢去咗沖涼。
沖完涼出嚟,潘子韻有少少迫不及待咁望咗望部電話。
眾多嘅訊息提示中,一個通知有如鶴立雞群般瞬間奪去咗佢嘅注意力。
「WaiYin Kong 請求添加你為Facebook好友。」
潘子韻屏息咗一秒。
正正係由呢一刻開始,佢發現咗一樣嘢。
原來打破「原則」嘅感覺係咁過癮。
美胸(Acup)
2022-07-25 05:03:32
10.
可惜嘅係啱啱距離太遠,潘子韻睇唔清楚同張正楠一齊行嗰個女仔嘅樣。
如果唔係佢肯定會暗暗比較一下對方同自己嘅外貌。
當然,佢好有信心自己唔會輸。
畢竟佢從未輸過。
懷住微妙嘅心情,潘子韻按照原定計劃嚟到Lxxxx。
呢個時間有唔少人喺度排緊隊。
潘子韻努力抑壓自己嘅唔耐煩,彷彿掩飾般咁撥咗撥頭髮環顧四周。
正喺度同佢一齊排隊嘅大多數都係啲差唔多年紀嘅後生女。有啲係同friend一齊排,有啲係同男朋友一齊排。
佢哋嘅裝束打扮都係千篇一律,一係韓系一係日系。
潘子韻覺得自己再望落去嘅話會審美疲勞。
佢匆匆掃咗前方嘅隊頭一眼,確認距離輪到自己仲有一段時間。
於是佢低頭玩電話打發時間。
十五分鐘後,終於輪到潘子韻。
佢只係叫咗個玫瑰千層蛋糕,因為覺得望落幾靚。
當然,佢食之前亦不忘影相post story。
食完蛋糕,潘子韻又心情好好咁喺商場入面shopping。
只要係買嘢,女仔總會有無窮無盡嘅精力。
結果,等佢終於覺得攰,打算返屋企嘅時候,已經過咗兩個鐘。
拎住一袋二袋嘅戰利品好唔方便,於是潘子韻攞出電話call uber。
今次call uber唔同下晝嗰陣,成個過程都好順利,司機好快就到咗。
打開車門後,潘子韻將手上幾個大購物袋往後座隨意一掉,然後先至施施然咁坐入去。
部車以不急不緩嘅速度前進着,幾分鐘後停咗喺啱啱間書店嗰度嘅紅綠燈前。呢盞燈轉得特別慢,以至於潘子韻有大把時間仔細觀察間書店。
書店外嘅大片落地玻璃窗足以讓人睇清楚書店內部。
書店好似已經開返,此刻燈火通明。天花板上柔和嘅暖黃燈光灑落書店內獨處嘅兩個人身上,顯得氣氛格外溫馨,仲有啲曖昧。
書店入面嘅係張正楠同頭先嗰個女仔。
此刻佢哋兩個正挨住近門口嘅一個木質書櫃,但一本書都冇攞過,淨係專心咁同對方傾計。
睇個樣應該係相談甚歡。
如果有人將此情此景用相機影低,成品一定好唯美,充斥住浪漫嘅味道。
呵。旁觀一切嘅潘子韻喺心入面冷笑。
利用自己做嘢嘅書店嚟拍拖……咩員工嚟。
呢刻嗰個女仔嘅身體微微打側咁背對住窗,潘子韻只能夠勉強睇到佢嘅側面。
但呢匆匆一眼足以令潘子韻確定,自己肯定比對方更有優勢。
但係,張正楠望向嗰個女仔嘅眼神卻好柔和,唔似得面對自己嗰陣時嘅客氣疏離。
潘子韻不禁咬牙切齒。
呢個冇眼光嘅男人!
可能係因為潘子韻注視間書店嘅時間太長,不嬲都面向住出面嘅張正楠終於喺談話嘅空隙間抬頭望咗出嚟。
潘子韻完全冇閃避。
喺感覺到張正楠抬頭嘅嗰一個瞬間,她就即時切換咗表情。
咬牙切齒嘅模樣被收起,取而代之嘅係一個明艷照人嘅笑容。
但眼神呃唔到人。如果呢個時候有塊鏡喺潘子韻前面,佢就會發現自己呢刻眼中赤裸裸嘅勝負欲。
對視嗰刻,張正楠見到潘子韻眸中兩簇猩紅嘅火苗肆無忌憚咁躍動着,好似就嚟要鑽出車窗,再穿透書店嘅落地窗咁竄入佢心裏面。
張正楠一愣,對於潘子韻嘅出現感到訝異。
潘子韻依舊係眉眼彎彎,眼中充滿挑釁之色。
張正楠漆黑嘅眼睛入面有啲嘢轉瞬即逝。
呢個時候,綠燈亮起,車輛終於重新啟動。
張正楠一直凝視住窗外,直至嗰部車駛離。
「做咩事呀?」面前嘅女生好奇咁問,又順着佢嘅目光轉頭望向外面,卻一無所獲。
「冇。」張正楠收返心神,「夜喇,我送你返屋企。」
「好。」
夏夜微涼。
沉沉夜幕下,兩人慢慢咁行,途中同對方傾下啲家常話題。
「我到喇。唔該晒你!今晚好開心。」女生笑住抬頭望佢,模樣乖巧。
「返到屋企講聲。」
張正楠望住個女仔上樓之後先至轉身離開。
行咗幾步之後,佢又停咗落嚟,隨意咁挨喺一旁嘅街燈下。
打火機「噠」一聲輕響。
星星點點嘅猩紅色火光喺煙嘅末端閃爍着,若隱若現。
張正楠突然諗起潘子韻異常明亮嘅雙眸。
佢深深咁吸咗一啖手上嘅煙。