Bottas(已硬)
2022-09-05 15:40:28
33.
的確,因為之前成日見到Derek等潘子韻收工,張正楠一直都以為佢哋兩個係情侶或者曖昧關係。
不過佢冇特別放上心。
張正楠好難界定自己對潘子韻係抱住一種咩嘅心態。
一開始,因為喺餐廳見到潘子韻同個女人嘅爭吵,張正楠對呢個女仔嘅印象並唔好。直到潘子韻喺書店返工嘅初期,張正楠對佢嘅印象都係冇變過。
意氣用事、虛榮心重、倔強執拗......張正楠求其數都數到幾樣潘子韻嘅缺點出嚟。
一般情況下,張正楠係冇可能會同呢種人變得親近。
只不過,越相處得耐,佢就越能夠全面咁認識潘子韻呢個人。
張正楠感覺到自己越嚟越接受到潘子韻嘅存在——其實唔單止係接受到,甚至可以話係習慣。
老實講,呢段時間以嚟,潘子韻上面嗰堆缺點根本冇消失過。
但張正楠而家對佢卻生唔出一絲反感。
呢個時候,Derek突如其來嘅嚎啕大哭打斷咗張正楠嘅思緒。
「我好掛住Michael呀......」
佢喊得淒厲,張正楠覺得自己連耳膜都就嚟穿。
叫住另一個男人嘅名喊得咁傷心,睇嚟佢應該係真gay……張正楠不合時宜咁諗。
潘子韻俾Derek嘅喊聲嘈醒咗,由趴喺檯面變成坐起身。
佢茫然咁抬頭。
見喊聲嘅來源係Derek,佢首先係靜咗幾秒,好似仲未回過神來咁。
應該差唔多酒醒喇掛……張正楠滿懷希望咁望住潘子韻。
然後,佢就聽到對方中氣十足咁大嗌:「收聲呀Derek!」
就好似街邊啲痴線佬咁。
Derek當然冇理佢,仍然係自顧自咁喊緊。
之後,潘子韻就好似個錄音機咁,不停重複叫Derek收聲,而Derek就繼續喊。
「收聲呀!」
「Michael……」
「收聲呀!」
「嗚嗚我好掛住你呀!」
簡直係一場災難。
企喺隔離見證住一切嘅張正楠有種直接離開嘅衝動。
不過,佢最後都只係嘆咗口氣,無奈咁準備將面前呢兩個麻煩友帶返屋企。
「唔好嘈喇,行喇。」張正楠有氣無力咁同潘子韻講,然後拉住Derek嘅手臂,將佢扯起身。
Derek冇再大喊,只係一直喺度抽泣。
而潘子韻亦已經安靜咗落嚟,乖乖咁跟喺張正楠後面。
張正楠唔知Derek住邊,所以將佢同潘子韻都一齊帶咗返屋企。
將沉睡中嘅Derek拋喺張梳化度之後,張正楠擰轉頭同迷迷糊糊咁跟埋入屋嘅潘子韻講:「好喇,你都要返屋企喇。」
潘子韻企喺原地唔郁,眼神空洞。
搞掂完一個又到另外一個……張正楠內心已經唔知嘆咗幾多次氣。
早知係咁,頭先就唔應該聽潘子韻電話!
「你屋企喺對面呀。」張正楠一邊講,一邊用陰力推住潘子韻嘅膊頭行出門口。
潘子韻一開始好順從咁隨住佢嘅節奏行咗幾步,然後又停低咗,擰轉頭望實佢。
「又點呀?」
潘子韻冇答張正楠,只係抬起雙手伸向佢塊面。
然後開始用力咁狂搣。
「喂!」張正楠反應好快咁捉住潘子韻對手,阻止佢嘅動作。
佢覺得自己今晚已經俾Derek同潘子韻折磨到咩脾氣都冇。
「咪搞喇……」
呢個時候,潘子韻終於出聲,但內容卻係一句九唔搭八嘅說話。
「你都生得幾靚仔喎。」佢一邊講一邊表情認真咁端詳張正楠,睇落好似好清醒咁。
張正楠都唔知好嬲定好笑。
「係係係多謝你,咁而家你肯返屋企未呀?」其實佢都唔知點解自己要繼續同潘子韻溝通,明知對方呢刻根本聽唔明自己講嘅嘢。
果然,潘子韻只係沉默咁將自己被捉住嘅手抽返出嚟,然後表情平靜咁望住佢。
張正楠深呼吸,決定放棄同面前呢個人溝通。
再咁拖落去都唔知幾時先搞掂。
佢決定直接行動。
張正楠彎腰,好似搬貨咁將潘子韻抱起行出門口,跟著一氣呵成咁喺潘子韻身上個袋度摷鎖匙、打開門,再放低潘子韻。
落地嗰刻,潘子韻表情迷惘咁望住張正楠,好似疑惑緊自己點解會瞬間轉移咗返屋企咁。
「嗱你自己沖涼換衫瞓覺喇,呢啲我幫唔到你。」講完之後,張正楠都唔理對方聽唔聽得明,轉身就走。
點知身後嘅人拉住咗佢。
張正楠冇好氣咁望向身後,幾乎崩潰:「又點——」
佢嘅聲音驀然中斷。
因為當佢擰返轉頭,迎接佢嘅係眼前潘子韻靠得極近嘅臉孔,同埋嘴唇上帶住酒氣嘅柔軟。
下一秒,未等張正楠辨認出呢股柔軟觸感嘅來源,潘子韻又突然退開,表情怪異咁彎腰。
張正楠呢刻仲係處於呆滯狀態,個腦好似停止咗運作咁。
於是佢眼白白咁望住潘子韻以迅雷不及掩耳嘅速度一嘢嘔咗落佢身上。