美胸(Acup)
2022-07-09 00:24:34
2.
出咗餐廳嘅潘子韻氣沖沖咁行去搭的士返屋企。
食餐飯都撞到葉太,今日真係唔好彩。
潘子韻身上嘅衣物因為潮濕而牢牢咁黏住佢嘅皮膚,漿住漿住咁,令佢煩躁不已。
因為佢頭髮同件衫都濕笠笠咁,沿路有唔少途人用奇怪嘅目光打量佢。但因為佢個樣嬲到想殺人咁款,啲人都唔敢望佢太耐,只係匆匆掃咗佢一眼就移開目光。
就連上到車,個的士司機都頻頻透過後視鏡望佢。
大家都當咗佢係痴線婆。
潘子韻嘅心情可謂係跌到落谷底。
好唔容易返到屋企,佢即刻除低身上嘅衣物衝入浴室沖涼。
沖完涼之後,潘子韻赤裸咁行咗出廳。
佢換上乾淨衫之後,厭惡咁望住地上被佢頭先隨意掉低嘅濕漉漉嘅衣物。
佢毫不猶豫咁將佢哋掉咗落垃圾桶。
佢唔想以後每次望到呢套衫都諗起今日唔愉快嘅經歷。
潘子韻咁大個女都未試過好似今日咁狼狽。本來佢今日仲計劃好食完飯去shopping,但今日喺餐廳嘅經歷令佢興致全消。
潘子韻頹廢咁癱喺床上,不由自主咁回憶起今日係餐廳發生嘅一幕幕。
尖銳嘅指責、鄙夷嘅目光……一諗到呢啲,潘子韻就嬲到咬牙切齒。佢忍唔住開始咗賽後檢討,喺腦海中不斷回憶起自己頭先反擊葉太嘅情景,思考自己有咩地方回擊得唔夠狠、應該點樣鬧得好啲。
喺床上苦苦思索咗一陣,終於俾佢諗到一段最完美嘅台詞。既字字鏗鏘,又不失優雅。
只不過就算佢呢刻諗到都已經無補於事,佢一早錯失咗還擊嘅最佳時機。
「頭先應該要咁樣鬧佢㗎嘛,點解我嗰一刻諗唔到……」潘子韻忍唔住扼腕嘆息。
冇得真係再鬧多次葉太,潘子韻唯有靠幻想。佢陶醉咁陷入咗自己想像出嚟嘅同葉太對鬧嘅小劇場之中。
鬧鬧下,潘子韻竟然不知不覺咁沉沉睡去。
等佢再次醒返,個天已經黑晒。
佢其實係俾雨水砸落玻璃窗嘅聲音喚醒嘅。
今日呢場雨落得異常凶猛。玻璃窗被豆大嘅雨水拍打着,不斷發出清脆嘅啪啪聲,間或夾雜住窗外呼呼嘅風聲,彷彿喺度呼救緊咁。
一開始,潘子韻根本唔想理。佢將棉被拉起冚過自己個頭,試圖繼續瞓。
不過好快佢就發現呢個行為根本阻隔唔到啲雨聲,而且咁樣蒙住個頭仲好焗。於是佢唯有不情不願咁將棉被扯開,煩躁咁坐咗起身。
潘子韻睡眼惺忪咁望向窗外。呢個時候嘅天空烏雲密佈,伴隨住好似永遠都唔會停嘅滂沱大雨。窗外大樹嘅枝椏隨著雨水激烈嘅拍打不停晃動,彷彿下一秒就會折斷。
望住出面風雨交加嘅景象,潘子韻嘅心情冇因為瞓咗一覺而好轉,反而變得更加鬱悶。
正垂頭喪氣緊,佢個肚突然「咕嚕」一聲響起,提醒佢而家已經係食飯時間。
潘子韻晏晝嗰餐只係食咗幾啖,葉太就過咗嚟。當時佢俾葉太撥到成身水,嬲都嬲飽咗,根本冇心情理嗰碟斧頭扒。
到咗而家,潘子韻摸咗摸自己餓到就嚟凹入去嘅肚,只恨自己當初點解唔打包埋啲嘢食返嚟。
一向揮霍無度、浪費開嘅潘子韻第一次明白到珍惜食物嘅重要。
佢無奈咁嘆咗口氣,頹廢咁拖住腳步行去廚房搵嘢食。
潘子韻唔識煮嘢食,平時根本唔會用到廚房,所以佢個廚房係空蕩蕩嘅,成為咗全屋最整齊嘅地方。
佢望都冇望廚房其他地方一眼,徑自行咗去雪櫃。
打開雪櫃門之後,潘子韻悲哀咁發現雪櫃入面只有一支蛋黃醬、幾支啤酒、一個腐爛咗嘅梨同埋唔知點解會出現雪櫃入面嘅一包薯片。
「……」潘子韻唔死心咁打開冰格。
不出所料,入面空空如也。
佢覺得自己就嚟喊出嚟。
事到如今,潘子韻決定叫外賣,但佢唔肯定呢個天氣仲有冇外賣送。
正當佢打算行入房攞電話嚟睇下嘅時候,佢聽到門外傳嚟一陣腳步聲,然後係鎖匙嘅碰撞聲。過咗冇耐,對面屋傳嚟開門嘅聲音。
對面屋返咗嚟。
聽到對面屋嘅動靜,潘子韻腳步一頓,望咗大門幾秒。然後佢狡黠咁轉咗轉眼珠,衝咗入房。
再次從睡房中行出嚟嘅時候,潘子韻已經穿戴整齊,仲化咗個裸妝。佢好有機心咁紮咗個懶係隨性嘅髻,仲噴埋淡香水。
搞掂晒所有嘢之後,佢喺門口嘅全身鏡度照咗照,然後自信滿滿咁行出門口,㩒咗對面嘅門鐘。