Bottas(已硬)
2022-08-27 23:42:53
30.
潘子韻捱夜睇書嘅結果就係第二日返工冇精神。
「嘩,喪屍呀?」張正楠俾潘子韻面上嗰兩個勁明顯嘅黑眼圈嚇咗一跳,好唔客氣咁講。
潘子韻眼瞓到連反駁都懶,只係拖住緩慢嘅腳步行去收銀嗰邊坐低。
下晝,當見到送貨嘅車停喺書店門前嗰陣,坐喺收銀嘅潘子韻覺得自己個頭開始隱隱作痛。
呢一日係新書送到嘅日子,意味住潘子韻同張正楠又要執書喇。
偏偏係今日……潘子韻忍唔住打咗個好誇張嘅喊露。
佢抬手扶咗扶額,然後認命咁企起身,打算行去開門俾捧住幾箱書嘅送貨工人。
不過張正楠嘅動作比佢更快。
喺潘子韻仲未企起身嗰陣,張正楠已經快步行咗去門口,然後擰轉頭示意佢坐返低。
唔使佢郁,潘子韻當然係求之不得,所以佢即刻聽話咁坐返低。
「照擺入去下話。」送貨嘅工人唔係第一次送書過嚟,所以一入門口就熟門熟路咁行咗去倉庫嗰邊。
「係呀,唔該師傅。」張正楠跟喺佢哋後面。
送貨工人離開後,潘子韻同張正楠就係時候着手處理新書。
於是潘子韻企起身,準備好工作。
點知張正楠叫佢坐返低。
「而家咁多客喺度,都係唔好搞住喇,你專心收錢啦。」
「哦。」潘子韻疑惑咁環顧四周。
呢刻並唔係高峰時期,書店其實算少人。
但老細話唔搞就唔搞啦。潘子韻冇放喺心上。
夜晚,放工時間都未到,張正楠就叫潘子韻自己走先。
「你頭耷耷咁,一陣啲客唔知嘅分分鐘以為我壓榨員工添呀。你走先啦,我執埋啲手尾就走。」
雖然覺得奇怪,但眼瞓咗全日嘅潘子韻一聽到呢句就有如啱啱放監嘅囚犯咁,好識趣咁即刻攞袋走人。
有得早走梗係走啦。佢心諗。
呢晚潘子韻一返到屋企就即刻沖涼瞓覺。
佢一邊沖涼一邊對自己發誓以後唔會再捱夜。
真係開始老喇……
因為實在太攰,幾乎係喺個頭一掂到床嗰刻,潘子韻就即刻瞓着咗。
係喎,張正楠好似仲未問我本小說嘅情節……
臨瞓着前,佢迷迷糊糊咁諗。
由於今次瞓足成晚,潘子韻第二朝起身嗰陣覺得自己終於都精神返啲。
佢神采奕奕咁到達書店,然後哼住歌咁打開倉庫門,打算趁而家處理定一部分新書先。
等一陣張正楠返到嚟再一齊執書,分分鐘可以喺開舖前搞掂!潘子韻滿意咁喺腦海中快速盤算。
潘子韻諗得太過投入,所以當佢打開門,見到琴日被隨意放置喺倉庫地下嘅幾箱新書消失咗嗰陣,第一反應竟然係覺得啲書俾人偷咗。
唔係。佢好快回過神來,然後行返出去,轉而認真審視書店內嘅書櫃。
果然,琴日先到嘅新書此刻已經整整齊齊咁被安置喺專放新書嘅書櫃中。
望到此情此景,潘子韻忍唔住窒咗窒,一個猜測浮現喺腦海。
唔通張正楠見我琴日太頹,所以唔叫我幫手,而係自己一個執好晒啲書?