[轉貼/鬼故/一齊驚] 40年圍村佬真人真事

lm

唔敢一次過睇晒

lm

樓主潛水

講明轉貼都比人屌，我係樓主都走啦

唔怪得人地話連登低質，吃力不討好，轉貼完比你睇有錢分咩

幫手汁埋啲5p 字 方便我地睇都屌
不過真心好睇

樓主潛水

無潛 係一次睇太多故 想唞唞
同埋原post個阿叔 睇佢寫嘢
我估現實都係好長氣
啲故好似越嚟越長 又累贅



繼續

46. 電話 (由一個救護員講)

我有個踢波老死, 佢本人就好想做消防, 不過衰在近視. 咁做救護都好呀. 做呢份工最基本要唔怕血, 唔怕核凸, 唔係真係頂唔順...嗰年應該係1993年啦, 我地d中五仔畢業無耐, 想搵份好d, 做政府工就最好, 人工比出面高嘛..

有晚通宵更, (聽佢講夜更最繁忙, 好多時成日出車), 接到要出車call, 地點係逢吉鄉附近,  根據個台消息係個女性, 30~40歲左右. 佢地一行三個人就出發.

去到沙埔村附近就call返上台問正確位置, 個總台話係逢吉鄉路直入到尾, 總台話有人喺路度等. (嗰時手電都未普及, 又無彗星導航), 咁揸車嗰位師兄咪直入去, 聽老死講嗰條路多數係d鐵倉, 豬場, 又多分叉路, 去到尾都無乜人住..跟住就係林村郊野公園....

差唔多去到尾, 都唔見有人喺到等, 咁又call返上台, 個台又話個女人等咗好耐都唔見佢地. 聽完, 都唔知去邊度先正確, 唯有開警號啦, 希望個病人聽到啦.. 佢地三個兜左好耐都唔見有人, 咁call上台就問清楚, 並要求報警嗰個人嘅電話, 等佢地直接聯絡.. 

當佢地出返大路就搵個電話亭打嗰個電話號碼, 點知係一個空號. 打幾次都係一樣.. 咁就call返上台話無呢個電話號碼, 但係個台就話無好能, 佢地打過去幾次比事主, 都係有人接, 咁佢地叫個台打多次啦, 個台就話接通咗, 並話比個事主聽, 叫佢唔好用電話, 話我地d伙計會直接聯絡你.

咁等個台講完, 佢地等左一分鐘後再打, 但係和之前一樣, 都係空號, 打唔到比事主...再等多幾分鐘又再打, 結果都一樣..

嗰陣佢地心諗係唔係比人玩呀, 另外又心急, 救人如救火, 時間越短, 救人機會越大.. 咁唔理啦, 再返入去兜兜啦, 如果再搵唔到就收隊.

當佢地再返轉頭入去, 差唔多去到上山嗰條路附近, 我老死就發覺有d嘢啦, 佢見到喺山腰附近有個女人企喺到, 佢地就停車, 攞個電筒望望個女人嘅位置啦, 當佢地一照, 嘩.......見個女人向佢地招手, 但係個女人就企喺個墳頭上面.. 佢地就知咩料報警啦.. 佢地立即上返車, 並開晒警號就走啦..

當佢地出返大路, 就call返上台話見到頭先嘅嘢, 個台長緊係唔信啦, 我老死話叫佢打108 問問電話公司個電話有無人登記啦. 等咗一陣, 個台長叫佢地立即收隊返去. 聽我老死講, 返到去, 都打上電話公司check, 原來個電話無人登記. 咁佢地report上去當值個大sir度, 佢話都唔係第一次啦, 做夜更成日都會有呢d call. 但係唔通唔去咩...如果真係都無辦法啦.. 

後話: 聽我老死講, 佢做到依家, 見d怪事都好多, 下次問佢邊次最得人驚先.

講明轉貼都比人屌，我係樓主都走啦

唔怪得人地話連登低質，吃力不討好，轉貼完比你睇有錢分咩

我想講
原post最後更新係2013
第1個撲出嚟話轉貼唔貼link條友
話自己由第2X篇開始追 睇到而家
個圍村阿叔由2010開始貼
咁起碼都追咗成4、5年(以上)
唔叫 資深香土會員 咁係乜

又話人串緊佢
中老年真係心理脆弱

47. 工程

話說都係10年前, 我做緊建築工程, 除咗起丁屋, 都會接舊樓維修. 嗰時真係攞你命, 唐樓無電梯, 往往要行成五六層樓. 樓梯加上無乜照明, 白天都會好黑.

細個嗰陣成日聽d長輩講, 唔好喺牆邊行, 唔係就好容易喺樓梯會撞到d朋友.

有次喺長沙灣嗰邊開工做防漏工程, 日日都要來來回回去天台開工, 大約要做7日, (如果落雨就麻煩, 要延期), 發覺有幾間屋門口成日都著左紅燈, 好似嗰d神檯燈嗰種. 另外門口掛晒符, 八卦, 見到都恐怖, 但要開工, 都係唔好理人咁多嘞. 

有日, 同判頭行過, 嗰位兄台真係乜都講一餐, 問我嗰幾間會唔會係個d一樓一鳳, 我就話唔好亂講呀, 可能係呢棟樓有d嘢, 所以先掛個d嘢.佢就話"屌, 我就唔係好信嘞. 我都未驚過", 嗰時我就有d擔心佢啦....

嗰日下午, 差唔多5:30左右, 因為係冬天, 所以天好快黑, 準備收工個陣, 見班地盤工友喺到嘈嘈弊, 就去睇下啦. 我見到先前嗰位人兄喺到自言自語, 但聽清楚, 佢一時女人聲, 一時阿婆聲, 一時男人聲, 但係無一句係佢自己把聲..

我都係第一次見咁多同時上身, 呢次我都唔敢幫佢. 都唔知點幫好, 可能上晝佢得罪左d朋友, 依家嚟報復.. 個個工友都唔知點好, 問我點. 呢次我都唔知道. 唯有報警啦, 班差佬見到咁情況, 話可能係精神有問題, 叫白車送去醫院檢查, 

去到醫院情況都無好轉, 佢家人都話佢好正常架, 唔會無啦啦精神有問題, 我嗰時望見佢都好難過, 就打比我個高人朋友, 將今日嘅情況話比佢知, 
我朋友聽完, 叫我返返嗰座樓, 喺其中一間屋門口偷d符, 然後返去將嗰d符燒左佢, 然後放喺杯水到比佢飲. 

我照做啦, 返到醫院, 見d醫生護士和佢家人走開咗, 我就將d符水比嗰位人兄飲, 佢飲完, 見佢喺張床顛來顛去後就暈左,  (嗰時我都好驚, 驚搞出人命). 到佢家人返嚟, 佢就醒左, 問點解我喺醫院嘅. 佢家人一五一十講返比佢聽. 之後醫生再返轉頭, 見到佢就話不如檢查一晚.

到佢出院, 佢老婆死都唔比佢返工住, 當我工程完, 我地成班出去食飯, 佢都有去, 就問我點解係咁. 我就講返嗰日嘅事比佢聽, 另外話我朋友教我用呢個方法先救醒佢. 我更話, 以後講野, 先用個腦諗左先, 唔係以後就無咁好彩.


後話: 原來嗰棟樓之前好多人喺嗰度跳樓, 所以就成日發生怪事, 有幾間屋怕, 所以請人返嚟並將D符掛喺門口擋一擋. (我攞咗其中一間屋D符, 希望個間屋嘅人無事啦....)

48. 你識唔識我?

各位師兄, 我諗你地都有試過喺街比人問, "你記唔記得我係邊個", 或者係"好耐無見"
等我分享一個經歷比各位師兄.

有日, 有個朋友阿媽由元朗搬去沙頭角嗰邊. 我只記得喺條公路去到尾, (佢阿媽同佢老豆離婚, 所以搬返娘家附近) 我唔記得邊條村喇, 只記得嗰度得幾間屋同埋多數都係種菜. 

記得嗰日係星期六3:00, 由元朗出發, 到咗都要行15分鐘先到, 我喺度暗叫不妙, 無車路到, 要搬好多次先搬完. 來來回回好嘥時間, 並且件件傢俬都咁大件, 無兩個人都拎唔起..

如是者, 搬完都差不多7:00啦, 佢阿媽就留我喺到食飯, 伯有叫到, 都係食完先走啦, 雖然簡簡單單, 但係嗰邊d新鮮菜真係比我地元朗好食好多.

差唔多食到21:00, 咁我都走.我朋友留喺到陪佢阿媽, 喺出返去嗰陣, 前面有個女人行入嚟. (我諗差唔多有28~35歲) 我當然讓人行先啦. 突然個女人同我講 "你記唔記得我係邊個呀?" 嗰時我望一望後面睇下係咪叫後面嘅人啦, 點知一個人都無,  都唔知個女人同邊個講, 咁我就問: 小姐, "你問邊位呀" 點知個女人就指住我講: "你呀", 當時我就講: 我?!, 小姐, 我好似唔識你, 你有無認錯人呀? 況且我都係第一次嚟呢邊, 一定唔識你. 你會唔會認錯人呢?.

咁, 嗰位小姐就話可能認錯人啦, 我都無再理佢繼續行返出去, 行行下, 又見到前面又有一個女人行過嚟, 咦, 咁似頭先個女人? 當佢行過嚟, 我望清楚d, 真係頭先個女人.. 唔通有第二條路? 個女人出咗去又返轉頭?

咁個女人又同我講: "你記唔記得我係邊個呀?", 我話: "小姐, 你頭先咪問過我囉", 個女人就話: 你頭先有見過我咩, 我話: 係呀.....跟住我無再理佢啦, 怕佢係唔係黐線...

當出返大路, 見架架綠van都滿坐, 就喺度諗吓頭先個女人會唔會係鬼呢? 無理由同一條路撞到兩次㗎... 無理由佢會講兩次" 你記唔記得我係邊個"....

諗諗吓見到架78k巴士到, 幾大都上啦, 唔係唔知又要等幾耐.. 上到車, 好似無乜人坐, 可能呢度d人習慣坐綠van啦, 唔坐巴士.. 上到樓上, 一個人都無, 任坐 , 就揀中間坐啦. 跟手下個站有人上車. 聽到腳步聲, 應該有人上緊嚟. 我就focus個樓梯, 一望, 又係頭先個女人......., 佢行過嚟, 又講: 你記唔記得我係邊個呀?", 我諗: 睇嚟又撞到嘢啦, 我今次無答佢, 只望佢一下就望窗出面..佢見我唔應佢, 就行去後面坐. 嗰時我都幾驚呀, 無理由一晚見佢3次咁多..都係落去坐安全d, 起碼有個司機大佬陪住呀...

返回上水嗰段時間, 都無再見到佢, 當架車返到上水廣場, 都無見到個女人落車, 我企喺總站等一陣, 都係無見到佢.. 我更加知道我見到嗰個係鬼..


後話: 我叫我朋友問問佢阿媽, 問一問嗰處會唔會有d野啦, 聽佢呀媽講, 好似係5~6年前有個女人喺嗰處過馬路嗰陣比架車撞死, 撞死人架車就不顧而去, 到依家都搵唔到個司機..會唔會個女人就係喺度等個司機出現呢?

屌啦一歲都記得d 野？

啲故唔錯 但好撚多錯別字

49. 畫 (好似都幾耐, 我都唔記得邊一年)

我有個同學喺屏山嗰邊住, 我地差唔多成日都去佢嗰邊BBQ, 聽佢講, 好多名人都喺佢條村起別墅, 所以有d屋好鬼靚.

有個禮拜六又BBQ, 呢次就唔係佢屋企, 係去一間好舊別墅裡面燒, 因為新業主要再裝修, 所以唔會有人理. 

講吓呢間別墅, 係帶點英式設計, 有三層高, 全白外墻, 喺元朗真係好少見. 不過點都係人地屋企, 所以我地燒嘢食都喺出面.

燒到七七八八, 酒都飲到咁上下, 有個女仔提議入別墅睇下. 我就無興趣嘞, 不如你地入去啦. 成間屋又無電, 撞到嘢就唔好啦. 

可能真係飲左酒, 平時好細膽, 都會180度變晒, 好似有5, 6個女仔入咗去睇下. 我地成班男就喺到猜枚, 吹水.

嗰班女仔好快就到天台, 喺個天台度叫我地, 話呢度好好風, 叫我地上去睇下, 咁其他男仔都上去, 只有我和我同學留喺到燒野食.

嗰班男仔上到天台, 又係叫我地上去啦, 不過今次唔知係眼花定飲醉, 見到天台上面嗰班同學多咗個人, 遠睇嗰個人係著清朝官服.

我問同學佢又無睇到, 話邊有呀, 你飲大咗呀?.. 我再望上去, 真係喺到, 不過太遠睇唔清佢地個樣.. 

我就喺度叫佢地快D返落嚟啦, 但佢地好似聽唔到我叫咁, 我點叫佢地都無反應, 我同學都覺得好奇怪, 問我咩事, 我直覺就話個天台有D唔對路. 

我和我同學跑上去天台睇下, 見到有兩個女仔訓咗喺地下, 我問咩事, 班同學都話唔知, 只知道無啦啦暈咗喺地下...

我地就試下拍醒佢地, 點拍都無反應, 唔係啩, 唔會無啦啦訓低啩? 突然喺我背脊傳來一D寒意, 個隻寒, 好難形容嗰隻.. 我都係第一次感受到..以前都未試過. 咁我望返轉頭, 原來天台有間房喺到, 嗰種寒意好似喺嗰間房傳出嚟.

我直覺話我知, 呢間房有D嘢喺度, 但係人點都有好奇心, 我就行去嗰間房睇吓, 嗰度門鎖住咗. 我就行去窗嗰邊望入去, 間房乜都無, 只係掛咗張畫, 我用電筒射入去望清楚, 見張畫係一個著清朝官服嘅人. 就好似頭先係地下望上天台嗰個人一樣.

我再睇清楚D, 見張畫嗰位人兄雙眼好似望住我.. 係好嬲嗰隻..想殺死我嗰種眼神. 我見到都唔敢再望落去. 我班同學問我見到咩嘢, 我話無嘢. 快D抬兩個女仔落去啦.

我地抬個兩個女仔落返去, 跟手再拍拍佢地, 呢次佢地醒番. 我地問佢地咩事啦, 佢地話都唔知, 不過其中一個女仔就話背脊比人打咗一吓就暈咗. 見佢地無事, 我話不如早D走啦. 去我同學屋企嗰邊繼續.

其實當我落返去地下, 再望返上天台, 見到頭先著清服嗰位人兄企喺度望住我地, 不過只有我望到佢. 可能佢唔鍾意有人騷擾佢.

後話:  聽老一輩講, 人像畫多數會比先人附上, 所以你唔係佢家人或後代, 都唔好買返屋企放.

50. 地盤

嗰年我剛入行做工程無耐, 有個老一輩工頭講比我聽嘅故事.

香港好多公路都要將d山剷平, 或將d土地平整, 但係好多時都不經意將先人墓地或年代久遠嘅棺材整咗出嚟.

話說70~80年代, 政府發展屯門新市鎮, 所以決定起屯門公路, 各位都知這條公路係沿山腰而起. (我都唔明白點解咁起),所以要將某d山墳清走. 對中國人嚟講當然不吉利. 如果有親人喺度仲可以賠償或搬遷, 但係有d無人理或年代久遠就由政府代為處理.

其實話處理就係將個墳頭整爛, 然後將副棺木送去沙嶺再安葬. 另外處理過程會不小心將先人嘅骨整散, 所以真係無乜人鍾意做.

聽個工頭講, 佢嗰年都係剛入行無耐, 而佢負責路段就係深井至大欖涌段. 話就係做工程, 其實就係雜工一名, 上面叫做乜, 佢就做乜. 

有日, 個鬼頭管工叫佢四個人將近青龍頭附近一個墳頭清理, 個時佢諗, 唔係啩, 叫我地去做埋呢d野, 唔多吉利, 邊個中國人唔怕鬼呀, 但係為咗份工, 點都要做. 佢地買咗幾份冥鏹燒完就開工.. 

咁佢地開始用剷泥機將其中一個墳頭剷開, 點知架機無啦啦死火, 個鬼頭管工都試吓, 一樣開唔著, 咁唯有用人手.. 

上頭叫到, 無奈都要做.. 咁佢地就將個墳頭打爛, 然後將副棺木拉出嚟. 可能個棺木實在太殘太霉, 所以穿咗底. 連先人d骨頭跌返落去...個鬼頭見到, 就叫佢地幾個落去將d骨攞返上嚟. 嘩, 唔係啩, 咁邪, 佢地幾個點都唔落去...最後個鬼頭無奈話見唔到, 你地想點就點.. 佢地幾個就決定將d泥舖返落去先.

如是者.. 過左幾日, 個天就成日落大雨, 地盤慣例, 落雨天就唔開工, 當無雨先再開工, 佢地幾個返到現場, 見到個棺材坑比雨水浸滿晒. 算吧啦, 等過兩日用水泵吸乾水, 然後再作打算.


到第二日返工, 其中一個好似發燒無返工, 到第三日, 又有個無返工, 到第四日, 又多一個無返工, 咁個鬼頭管工就問佢, 點解佢地幾個無啦啦病到返唔到工, 我朋友點知喎?

到嗰晚佢放工返去, 離遠見到好似有個人入咗佢屋企, 聽佢講, 嗰時住喺石蔭村, 走廊黑麻麻, 咁佢以為有人老爆, 就跑過去啦, 見到鐵閘同門都無事, 心諗唔通眼花睇錯隔離?

食完飯, 佢隱約聽到有把聲, 好凍呀, 好凍呀. 比返間屋我呀. 開頭以為係電視聲, 但係嗰把聲好似係d阿婆聲. 但唔知邊度傳過嚟.

到訓覺嗰陣, 把聲越來越清晰, 佢問老婆聽唔聽到啦, 佢老婆話佢痴線, 邊到有呀. 

第二朝起身, 嗰把聲就無咗, 佢就照常返工, 不過琴日無覺好訓, 所以無乜精神. 但佢返去個棺材坑嗰陣, 就諗唔通嗰把聲係佢…?

佢再諗下, 都係去問一問佢地, 第一個工友話係呀, 佢聽到有個阿婆叫佢, 但係點都唔知邊度嚟? 第二第三個都係同樣答案.

佢已經知道答案, 嗰把聲一定係個墓主, 可能比水浸住, 加上個墳頭比我地打爛, 所以搵我地. 嗰日唔係眼花, 係見鬼, 個墓主係入咗去佢屋企.

聽佢講, 佢落樓下d紙紮舖問點樣做, 個老細話, 先將d水吸乾, 然後叫忤作去將d人骨放喺金塔, 然後燒一間紙紮大屋, 幾個紙紮公仔同埋衣紙, 喺嗰個地方燒咗佢, 叫佢誠心誠意講對唔住, 你都係打份工, 大人有大量. 佢唯有照住跟做啦, 

約好咗忤作, 個忤作就話, 你地點解咁做呀, 唔怕有報應呀, 佢話, 就係知有報應所以先搵你啦. 佢將坑d水吸乾, 忤作就落去, 好小心執d骨攞上嚟, 然後用白布將每條骨抹乾, 然後再用太陽晒, 等d骨裡面全乾再放入金塔, 個忤作講, 你地唔死都算奇蹟啦..快d燒衣紙啦.

後話: 聽佢講, 做完哂所有野之後真係聽唔到嗰d聲, 開頭佢都唔信世上有鬼, 依家佢就百份百信. 不過講真比著你, 你間屋比人打爛, 加上比水浸住你, 唔發火就奇啦.

巴打唔好放棄 追緊

屌 live啦
追撚死人 個阿叔愈嚟愈長氣

51. 鐵鏈 (這個是近期發生嘅故事)

話說小弟去廣州出差, 住喺一間好出名5星級酒店幾日, 我都係第一次住, 因為職級關係, 我平時只可以住3星級, 今次同日本老闆去, 所以叨佢光有得住.

我地兩個分開兩間房, 一間喺6樓, 我大老闆住, 一間喺五樓, 我自己住. 大老闆話出差唔好喺同一層住喎, 佢話有咩事唔會一鑊熟. 我都唔知佢諗咩.

第二朝食早餐嗰陣, 我老闆就同我講, 你夜晚訓嗰陣有無咩特別野, 我話一覺到天明, 無乜事, 我問佢點解咁問, 佢又唔講..

到夜晚都係嗰d無謂應酬啦, 食吓飯, KTV, 然後就返酒店. 喺架車到, 我老闆講: 今晚同我調轉房訓, 我就問why? 佢話this is an order.. 

唉, 老闆咁講, 我邊有辦法呀, 我問佢要不要搬行李. 佢話唔使.. 嗰時我都覺得有d奇怪....點解要調房?

返到老闆間房嗰陣, 我見隔離有對夫婦剛剛出嚟. 個女人睇嚟面色唔係好, 好似有病咁. 面青口唇白, 但都係無謂理人咁多嘞, 喺內地唔同香港, 你幫人可能咬返你一啖.

入到房都無乜特別, 同我間房一樣, 不過多咗陣雪卡味. 咁都係唔好理, 快d沖涼就去訓.

訓訓下, 突然比d聲整醒咗, 嗰種聲係鐵鏈拖地聲, 但係就好細聲嗰隻.. 好似喺走廊傳過嚟..但無啦啦一間酒店點會有呢種聲呢.. 咁我就打開門睇吓啦, 打開門一個人都無, 但嗰d聲就真係聽到. 好似係越來越大聲嗰隻. 唔通係樓上傳過來.

既然唔係我層樓就算罷, 繼續訓覺好過.. 當上床想訓嗰陣... 我腦裡面諗, 呢種聲好似邊度聽過.. 但一時唔記得..

第二日吃早餐, 我老闆問我有無特別嘢發生, 我就話無, 不過聽到d鐵鏈拖地聲. 我老闆話, 佢第一晚都聽到, 所以先同我調房. 原來佢都聽到, 唔怪之得要同我調房啦.

如是者, 今晚差唔多11點返酒店房, 今次見到個男人喺隔離房出嚟, 見佢跑得好急, 當然人家的事, 無謂做八公啦.

咁沖完涼就訓覺, 明天準備返香港, 點知今次未訓都聽到嗰d聲, 唔通真係夜晚先嚟做維修保養?. (好似電梯維修咁啦), 我就打去前台問, 佢地話唔會咁夜先做維修, 但係叫咗佢地上嚟, 佢地又聽唔到. 話無呀, 一d聲都無呀..

咁算啦, 開頭諗住換房, 不過住埋今晚就走, 快d訓好過啦. 但係嗰d聲真係好似越來越大聲, 我走出門口再睇下, 不過出面乜都無.. 正想閂門嗰陣, 喺耳邊好似聽到,"唔關你事, 就唔好理", 我再望下周圍, 一個人都無...唔通我又幻聽?

返到房.. 明明係聽到d聲, 但d聲喺邊到傳嚟呢... 咦, 嗰d聲我知道咩嚟啦. 就立即返到床開行個iphone聽歌. 唔理咁多啦.

又第二朝起身, 準備攞埋行李走, 聽到出面好嘈, 就望下咩事啦, 聽個服務員講, 昨晚隔離房個女人好似無啦啦死咗. 心諗唔會係病死啩, 前日見佢都好地地, 不過面青口唇白. 唔通昨晚嗰把聲係......

當然咁大件事, 我老闆邊會唔知呀. 佢問我知唔知, 我話知呀, 不過無深究... 都係快d返香港好過.

後話: 其實嗰d聲, 我到現在起只聽過2次, 聽親都唔係好事. 另外聽聞過嗰d聲係無常去捉嗰d死咗靈魂去地府. 所以聽親都無好野..

依個我以前睇過 好正但搵唔返
多謝巴打

d字應該係用語音打嘅

以前有追開，回憶返哂黎

52. 黑房

記得細個嗰陣, 我老豆話要見識世面, 所以就全家出咗去深水埗住. 嗰年應該係三年班左右. 其實我和阿哥, 阿媽都唔願意去, 但老豆話去, 無奈都去啦...

搬出市區, 對我地呢班新界仔嚟講真係好大影響, 我地習慣一出門口就可以玩, 但搬上樓就好唔慣, 又無河, 又無樹, 好鬼悶. 仲要做插班生.

記得嗰間小學好近工業大廈, 而對面就係深水埗軍營. 我地住嗰度就係舊深水埗碼頭附近. 嗰時我都係第一次見渡海輪, 好新鮮.

講返有一次, 我地個女班主任無啦啦發起顛, 我都唔知咩事啦, 好似話我默書唔合格, 話要困黑房. 我其實點會怕黑, 我住開新界, 個時夜晚真係伸手不見五指. 另外加上係細路仔, 好鬼單純話好...

咁就被佢帶到一間黑房, 其實就係士多房. 臨入去前個班主任話, 你下次默書會唔會再好d, 我話: 我都唔識, 點默都唔好啦. 佢聽完見我無乜悔意, 就叫我入去然後關門, 個間黑房關門後真係同我間房一模一樣. 我見到咁嘅環境, 唔訓就奇.

就喺黑房訓訓下, 突然聽到有個人同我講嘢: 你又係比老師罰入黑房呀. 我諗, 唔通又有人學似我比老師罰喺黑房? 我就話, 係呀. 你都係咩, 你邊班架? 我係3D班㗎. 

咁嗰位同學就話但係你唔驚咩, 我話我唔驚, 我屋企仲黑過呢間房, 都習慣晒, 跟住嗰位同學話:你都好大膽下. 我就話依家喺黑房無咩做, 一陣小息嗰陣, 一齊去買汽水啦. 佢話唔去得, 佢要比人罰好耐. 所以一陣你自己去啦. 我話好啦.

咁我就唔理佢繼續訓覺, 都唔知過咗幾耐, 個班主任拍醒我, 話: 你真係一D都唔驚, 見到你真係激死. 我話: 我都唔驚, 有個同學陪我嘛, 佢仲同我講嘢, 所以點會驚呢!

班主任見我咁講, 佢就去士多房睇吓, 但係除咗我地, 一個人影都無. 佢就話我講大話, 話細佬仔講大話呀, 係唔好, 你明唔明呀, 我話真係有人同我講嘢㗎. 佢聽完就火都嚟埋, 擰我耳仔話: 叫你唔好講大話你仲唔聽, 仲編個大話. 你真係無藥可救. 今日你唔使上堂, 罰企到放學.

後來我同阿哥老豆講返, 佢就話可能你聽錯, 一係就發夢, 後來我喺嗰間小學讀唔夠三個月就搬返元朗. 我老豆講話市區好複雜, 同埋好難適應.


後話: 喺我地嗰個年代, 做學生真係好怕老師, 有小小錯就打呀, 罰呀.但點樣都會尊敬先生老師. 唔同現在d學生, 打佢小小又話投訴, 太過保護對孩子唔係咁好.
( 嘩 屌你咩
死廢老喺度歌頌體罰)

留名