[轉貼/鬼故/一齊驚] 40年圍村佬真人真事

有百幾篇
一個人睇到寒寒地


1. 大肚婆食泥

我記得個年我9歲左右, 個年代唔係好多人有電視, 所以圍村d人好鬼早訓.
我個年好似9點左右就訓.
好記得個日, 夏天, 差不多11點啦, 因為唔見左個大婆, 所有全村出動去搵, 我和呀哥, 老豆都出動.
個時邊有街燈呀, 黑鬼麻麻, 要用電筒, 火水燈去搵, 搵左幾個鐘, 終於係魚塘搵到啦, 成村人去睇呀啦.
但去到, 我老豆即刻叫我和阿哥返屋企, 我問點解啦, 我老頭話你地返去先, 聽日話比我地聽..
到左第二日, 我老豆話我大肚婆係個度食緊泥呀....., 我又問, 佢有無死呀....
我老豆講, 最後搬左個大肚婆去圍門, 見佢嘔返晒d泥出理, 然後就無事喎.

不過聽d老一輩講,唔係第一次發生,, 不過全部是女人, 都係嫁入村...

2. 鬼上身

都唔知係本身是圍頭仔定乜啦, 我條村發生d野都係女性

另外一件事, 應該是同一件事, 但發生次數都有20次以上, 不過係唔同人身上吧
細個最鍾意放學後就跟同d同村兄弟姐妹去山上面摘龍眼, 荔枝等, 
最記得個次, 有個姐姐行行下, 唔鬼知去左邊度, 到見番佢,發現佢講野變坐男人聲, 個時都以為佢玩野, 但係佢問左一句野就知唔對路, 佢問我地點去醫院, 我地班兄弟, 立即雞咁腳跑番屋企話比大人知啦. (我老豆話, 如果有人講點去醫院就立即要同大人講).跟住班大人去番現場, 見個姐姐比5, 6個大人捉住都可以擺脫, 佢係到講要去醫院, (個時元朗得一間). 最后見道有個長輩用手指按佢眉心就暈左啦.

番去同老豆講, 佢話鬼上身有兩個特徵, 1. 會變聲, 2. 腳掙唔到地

後話: 我老豆講得對, 我見過5, 6次都係咁

3. 黎婆婆

另外有次, 我出去踢波,  踢到11點啦,返到村口都12點啦
我見到我條村個黎婆婆坐係巴士站度, 如果你地去過新界都有留意d巴士站有個亭.
我就問, 黎婆坐係到做乜啦, (圍頭話對答)
佢話等人接佢, 我話等人接你去邊呀, 去元朗市呀, 佢話唔係呀, 
咁我就無理佢返去啦.
到第二朝, 我同我阿媽講, 我話緊晚見黎婆婆坐係出面等人接, 間住呀媽問我幾時見到, 我話差唔多12點啦. 我呀媽話佢琴日下午四點過身啦, 你係咪眼花呀, 我話點會呀, 我都同佢講野.
跟手就去佢屋掛坐白燈籠就係真啦, 我同佢孫仔, 即係我老死講番理件事啦, 佢老頭講可能最後無見我, 在村口等我吧. 

後話: 黎婆婆當我係佢個孫看待

快

4. 金塔

我條村以前路邊都放好多金塔 (用來放人骨), 都唔知邊家. 日子有功, 好多都爛左, 穿左.
個時細成日好鬼怕行個條路, 行行下就習慣左.
有晚又係去踢波啦, 到差唔多過年, 本身波牛一個嘛
返去時, 行個條路見到有4, 5 個公公婆婆係度, 但我又未見過佢地. (成條村有邊個唔會識呀)
我又多口問佢地, 你地去邊呀, 我都未見過你地, 
咁有個公公笑住同我講, 你唔識我, 但我識你呢, 你係呀細仔嘛,  個時諗左好耐, 都諗唔到係邊個?
我就問, 咁我就問你地係度做乜啦. 都好夜啦, 唔係出豬嘛, (個時都好多人養豬, 出豬多數零辰左右)
佢又話唔係, 但我見度有個婆婆望住對金塔, 好似唔開心.
咁我就話我走啦.

到點燈個日 (每年正月15日,個年出生的男丁會係祠堂入族譜), 咁我先記得個班公公婆婆原來係祖先.
因為祠堂有佢地d相....

我就同村長講返, 然後擇好日子重新放過個d金塔.

5. 鬼管家

有個朋友住係博愛醫院附近, 都係圍村, 聽佢講, 佢屋企有個鬼管家, 

佢唔係原居民, 佢成家租人地方住, 開頭都問題, 但有次佢老豆朋友係到住幾日
但係每朝都訓醒就係門口出面, 每日都係. 我就話吹水啦.

到我去住睇下啦, 結果一樣,都唔知邊個抬我出去, 但係佢家人就無事呢.

咁我就開始信啦, 返去同其他人講啦, 有個係有陰陽眼, 同我一切去啦.
佢話見到有個著清朝服裝係到. 不過係都唔敢入去喎.

後話, 依家過度邊左yoho town 啦

6. 照水碗 (這個不是我親眼見過)

我條村個時有個呀婆, 古古怪怪, 佢唔係原居民, 我呀媽話唔好同佢接觸. 但個時好多市區人理搵佢
開頭以為係好有錢d人理啦, 到後期先知是原來係來問米.

到有次, 我同村兄弟個呀叔死左, 咁佢和佢老豆就去問米啦. 個時都好奇想知點問米, 但佢老豆唔比我地去. 聽佢講, 佢以為係好似電視個種問米, 原來唔係, 個法器係用個水碗, 經過碗內d水接通陰陽界.
話會見到對方的話對話. (但講真我就無膽量去試啦.)

如果各位師兄知道, 請煩指導

7. 消放員

有次, 個時我都13, 14歲啦, 係我條村唔見左個細路仔, 好似係3, 4歲啦, 當時好鬼緊張, 咁我都有去搵啦, 怕又係去左魚塘個邊, 個時臨近新年, 個魚塘會放水清塘, 我諗只有一呎水, 但搵左好耐都無結果,

咁就報警啦. 個時警察懷疑個細路仔都係魚塘, 但去到有唔多似啦, 咁咪call埋消防落塘搵啦.但係都沒結果. 

到最後, 原來個細路仔理埋左係床下底, 咁d警察消防收隊啦, 但過左10分鐘後折返, 哩次係唔見左個
消防呀, 原來開車先發覺少左一個, 個時無手提, 無call機年代, 咁我地全村又出動去搵, 記得都太陽落山.

都係搵左好耐, 都係無結果, 咁有個消防記得佢頭先有落魚塘搵個細路仔, 咁又返番去睇下啦.
咁差不多4, 50人去睇下, 結果真係魚塘底搵到佢... 但個時都以經死左啦.

但明明個時好多人係魚塘都唔見佢出事? 另外只有1呎水深, 會浸死個消防?

結果, 村長覺得太危險將個魚塘填平, 我聽d長輩講, 個魚塘係有d野, 但係咩呢, 連佢地都唔知.

8. 下白泥

哩個係我老豆講比我地知

時間好似係60年代啦, 個時係中國文化大革命年代, 我聽呀叔, 老豆, 長輩講, 個時好多屍體係珠江, 后海灣漂去流浮山, 下白泥, 龍鼓灘等地方, 另外有d好次係偷渡時比鯊魚咬死.

個時我老豆, 呀叔都會去過邊做野, 有晚佢地做完野都夜晚 8, 9點, 咁就坐單車返去啦, 點知去到下白泥附近見到有個女人, 抱住個bb係路邊, 個時流浮山真係死城一個, 

咁我老豆停係度問佢啦, 個女人用國語問野, 我老豆呀叔邊鬼識聽呀, 圍頭話就流利, 可能係剛剛偷渡過來. 咁無符啦, 唯有用單車車佢地去流浮山警署啦. 

個時我呀叔未結婚, 咁佢車佢啦, 我老豆殿後啦. 咁先大鍋, 我老豆話, 行行下, 見到個女人掉左d野
夜麻麻, 有無月光, 都唔知掉左咩野,咁我老豆咪返轉頭睇下咩啦, 原來係成個手臂. 
咁又望下, 係隻腳. 

我老豆講立即將架單車跑上前啦, 先發覺個女人唔對路, 我老豆叫呀叔唔好向后望, 我呀叔問點解, 我老豆講唔好問, 用全力去警署啦, 去到警署落車先發覺原來佢一早死左啦, 我呀叔原來咩住個屍體都唔知呀....但係點會同佢兩個講野呢, 返到村, 我呀叔病左2個月呀

9. 水牛嶺 (現在是元朗公園)

這個是聽回來, 由村中一個80多歲老人家講的,  唔知係唔係真
都好似有60年左右啦, 個時日本仔打過來時, 個時元朗是新界區比較人多及有錢的
個時日本仔見到乜人都殺啦, 有時捉埋成班殺, 老人家是其中之一, 那時處決地方就是水牛嶺, 那坐小山是元朗市內比較高的地方. 聽老人家講, 佢詐死先無事.

個時細個, 我地d長輩千叮萬囑我地午好去個邊玩, 我都算幾聽話, 我未去過.

到近20年, 元朗發展, 在水牛嶺要起公園, 咁先發覺好多人骨, 另外做了法事, 及起左個百鳥塔安放所有骸骨.

有無元朗師兄知否真的

10. 迷路記

個時好細個, 我諗7, 8歲左右, 記得個日放學又跟d哥哥姐姐上山玩, 不過今次去大帽山玩, (依家好似係大帽山頂停車場附近啦)

個日去玩, 玩左好耐及好累啦, 我細細個更加累啦. 咁成班人去左附近一個好大墳墓休息啦, (個時鬼咁細, 邊知個驚字呀)
咁就見好舒服就成班訓埋啦, 但訓訓下好似有把聲講 "小朋友, 就快天黑啦, 快d返去啦", 咁我就醒左啦, 我望個天都差唔多大陽落山.

個時成班哥哥姐姐都起身準備走啦, 但唔知點解, 走來就去都返到個大墳墓到. 個時, 真係每個都驚啦, 我更加驚啦, 我都喊到死咁滯.

記得個時係冬天, 太陽好快落山, 到天黑, 我地都唔知點算啦.

咁唯有係個大墳墓等啦, 希望有人行過啦, (依家諗返去, 個時邊會有人無啦啦會行過丫)

等到天真係黑個時, 望落荃灣就好光, 但係.....山上面就幾黑啦. 差不多到7點左右, 真係有人行過, 咁我地成班就問個人點走返出馬路啦.. 

我記得個人好特別, 都算高, 可能個時好鬼細粒, 著長衫, 個年代都好少見到.

咁, 個叔叔講, 小朋友, 迷路呀,  (我地成班當然和係啦), 我帶你上馬路啦
咁我地成班跟住佢走啦, 但係跟佢個陣, 佢就一粒聲都無出過, 大約行左5分鐘路走到馬路啦, 咁我地當然多謝佢啦. 

個時, 我的老毛病又理啦, 我問叔叔你住係邊架, 佢終於都再講野啦, 佢話住係頭先個度架. 另外佢又話, 剛才都同你地講左, "小朋友, 就快天黑啦, 快d返去啦" 然后就轉身向山上走..

個時我地都無留心佢講, 到差不多返到去時, 有位哥哥講, 頭先我地見個個人係鬼呀... 個時我地先知個驚字呀.

返到屋企想講比我老頭知, 但一返去就比佢老人家炳到執九彩, 個時我地吃飯時間係6:30.

留名

11. 陰陽眼

話說小弟中五啦, 要去東坪洲考察, (學校要去, 我都唔想去), , 咁就大約40人出發啦, 我地個班都好鬼奇怪, 一班學生男女差不多有90%係圍頭仔, 講英文就好差, 但係講圍頭話就"洛洛"聲. 個時miss係九龍入理教, 見我地傾計都係用圍頭話, 咁佢覺得好無引..

我個班有兩個奇人, 一男一女, 都係天生有陰陽眼, 我地叫佢地"陰陽俠侶"

個班還有就係中一到中五都係同一班的, 所以感情係好好. 

講返佢兩個, 成日見到個d野, 講都我地都無興趣聽, 但係個次去考察就唔同啦..

個日係中大坐船去東坪洲, 船去到烏溪沙附近, 佢兩個又發作啦, 無啦啦話比miss聽, 叫船家返轉頭. 個船家當然唔會啦, 咁佢兩個就一頭一尾企係到, 我地問佢地咩事啦, 佢兩個一粒聲都唔出, 好似望住個海有d野.

特然個女好大聲同我地講 叫我地所有有掛玉墜都全部掛出理, 個時, 個miss都唔知咩事, 我地當然知啦. 但係無同佢講, 怕佢暈低.

個船家好似見我地咁樣, 真係有d野, 所以就即將隻船駛返烏溪沙啦, 差唔多到喇, 個天特然有太陽變得烏雲加雷暴,海面更加大浪添. (依家諗返無理有咁大浪), 
等下等下, 等到個天出太陽, 我地原船返到馬料水, 咁miss問佢地見到咩野.
陰陽俠侶話海裡面有好多鬼, 人數和我地一樣, 佢就話玉可以辟邪所以叫我地羅晒d玉墜出來.

依家諗起真係好多謝個兩位陰陽俠侶, 唔係真係變左水鬼都唔知

12. 陰宅

到小弟畢業要出理工作啦, 個時得屯門公路出入, 又成日塞車, 咁我就係側漁涌租左間房住啦, 個時貪方便就租唐樓住.近香港大酒店(殯儀館),咀香園上面, 小弟第一次住樓, 感覺都開心, 不過都係唔係好慣.

既得個包租公都好老下, 個日去睇房時, 成間屋都黑貴麻麻, 好少有陽光照到, 但係價錢就ok啦, $1000.00/一個月. 我出來做野都係得$4000.00, 加上係圍頭仔, 都有d錢, 所以就決定租啦.

記得第一晚入去住就d野發生, 半夜去廁所, 見到廚房有個人企係到, 又唔開燈, 但我就少理, 可能係另外一個租客褂. 如是者, 差不多每次去夜尿都係見有人企係到. 

咁又過坐一個月, 包租公上來收租啦, 我又好奇問一下, 理間屋有多少人租呀, 佢老人家講, 暫時只有你一個人喳, 我話唔係褂, 得我一個人, 但係我見到好似有另外一個人住呢. 咁個包租公話我眼花..

我諗死啦, 又係理味野呀.. 雖然以前都見過, 但今次係圍村外第一次見到. 我就要求包租公燒d野啦.

佢老人家又發脾四啦, 你可以唔租, 我話好呀, 不過佢老人家講按金就沒收... 咁我就講租埋今個月啦.
這個月真係過得好耐呀, 夜晚又唔敢返去, 訓都要開著燈訓啦. 

咁, 其實我都唔知個位人兄係男的女, 不過好似有無d惡意, 我d長輩講, 你不犯人, 人不犯你, 好能佢先係理間屋長期租客. 過左一排都見無事發生, 咁心諗, 應該無野啦. 

記得由有次, 我個同學兼朋友理搵我啦, 天生陰陽眼個為人兄, 我就同佢講理件事啦, 咁佢都好奇咁同我返去睇下. 睇完, 咁就同我落樓食野啦. 我問點樣呀, 奇人.

奇人講, 你間屋點只得一隻呀, 係10幾隻呀. 我話, 唔係褂.......咁多. 奇人話: 但全部都係很和善個種. 可能間屋無陽光照到, 所以敘晒係到啦. 不過你驚的話, 就搬啦. 我老死都話搬啦, 我又唔係你.

咁我就連按金都唔要就搬走啦, 連工都辭賣啦. 

後話: 都係搬返元朗啦, 搬返去比d同村兄弟笑死

13. 買啦, 買完就行返入去. 

咁個時都差不多11點, 行行下, 見到個婆婆係村行出理, 個婆婆問我記唔記得佢, 我諗左好耐, 話真係唔記得啦, 咁個婆婆要我再諗真d, 我笑住同佢講, 我真的唔記得呀, 我又多口問佢, 返來做節呀, 佢話係呀, 依家返去啦. 咁我問駛唔駛車你返去呀. 你住邊到呀, 佢話唔駛啦, 我慢慢行就得啦. 咁我就叫佢小心d啦. 佢話知啦, 另外講, 都無見你廿幾年, 你都大左咁多呀.. 

哈哈, 我諗, 婆婆識我, 但我好次我無印象, 咁返到去, 同d兄弟繼續啦, 個時先記得係黎婆婆, 咁我就同我老死講啦, (黎婆婆孫仔), 佢話唔係褂, 咁我地去佢屋企look look, 發覺神檯d野郁過. 

個時成班兄弟及佢老豆都上香啦.. 雖然太夜唔好上香.

後話: 我同我女朋友講, 其實見鬼未必一定是壞事呀. 不過佢就話一世都唔好比佢見到

13.再見黎婆婆

到我都差唔多30歲啦, 應該2000年中秋節啦, 我地好傳統要返圍村做節, 個時元朗以經無咁落後啦, 
成個元朗真係個不夜城. 話說放工返去做節, 吃完飯就同d兄弟吹水啦, 飲下酒啦, 見都無乜酒, 就出村口士多買啦, 買完就行返入去. 

咁個時都差不多11點, 行行下, 見到個婆婆係村行出理, 個婆婆問我記唔記得佢, 我諗左好耐, 話真係唔記得啦, 咁個婆婆要我再諗真d, 我笑住同佢講, 我真的唔記得呀, 我又多口問佢, 返來做節呀, 佢話係呀, 依家返去啦. 咁我問駛唔駛車你返去呀. 你住邊到呀, 佢話唔駛啦, 我慢慢行就得啦. 咁我就叫佢小心d啦. 佢話知啦, 另外講, 都無見你廿幾年, 你都大左咁多呀.. 

哈哈, 我諗, 婆婆識我, 但我好次我無印象, 咁返到去, 同d兄弟繼續啦, 個時先記得係黎婆婆, 咁我就同我老死講啦, (黎婆婆孫仔), 佢話唔係褂, 咁我地去佢屋企look look, 發覺神檯d野郁過. 

個時成班兄弟及佢老豆都上香啦.. 雖然太夜唔好上香.

後話: 我同我女朋友講, 其實見鬼未必一定是壞事呀. 不過佢就話一世都唔好比佢見到

14. 殭屍地

記得係1981年左右啦, 個時屯門剛開始發展, 咁我又個同學仔係屯門住, 有日同我地講, 話要去拜祖先, 問我地有無興趣一切去, 個時我地聽到有人拜祖先都會去架, 拜完有錢分嘛.

個個地方叫良田村, 即係現在青山醫院, 屯門建新村附近啦, 個時一片都係田, 草呀
咁個日我地成班跟同學仔去啦, 拜完等收錢啦, 咁附近又人係到起棺, 準備將d骨放係金塔啦. 

咁當佢地開棺就係到大叫啦, 我地都唔知佢地叫乜, 咁成班去睇下啦, 先發覺個件屍體係完整無缺. 一d都無化, 但d頭髮就好長. 

聽個位忤作講, 理度係殭屍地, 條屍點樣都唔會化架, 依家先幫你放返落去, 等再擇日幫你地火化啦. 咁我同學仔同佢老豆講, 祖先會唔會唔化架, 佢老豆講, 佢呀爺都有講過比佢知理件事. 葬係到, 真係唔化架.

個時第一次聽, 我返去問d長輩啦, 佢地都知, 良田村係殭屍地.

後話 : 現在良景村, 田景村由來就是以前良田村啦

15. 達德小學

依家聽好多師兄去個間係屏山達德小學探險, 以我經驗, 你地都係唔好去啦.

正所謂生人不去死地.

我聽d長輩講, 其實個間小學點解會荒廢, 及后變成猛鬼學校. 話說, 未有日軍打到理之前個間小學都出名猛鬼, 但只是對外姓人. 可能個時是英國人係屏山山頂起左個警署開始啦.我d長輩講, 個山頭本來就是安放屏山姓鄧祖先的. 加上係風水地, 比英國人係度起警暑, 所以個班山魂, 鬼魂去晒達德小學啦. 另外, 你地唔係鄧氏子孫, 去人家地方, 人家當然唔歡迎你啦, 到時發生甚麼事, 貴客自理啦

講返呀, 你屋企無啦啦有個陌生人來, 你都唔鍾意啦, 可況是鬼, 所以覺位師兄, 有d野唔好去掂呀

16. 打醮

我地元朗分好多個鄉, 每個鄉又有好多條村, 所以每年都差不多都有打醮活動.
其實我都唔係好明出處了, 但是原居民都要出d力啦.

有d村好鬼有錢, 會叫d明星唱歌, 5年前水頭村就請張學友唱歌.

話說我條村10年才打一次醮, 個晚我都有請我d朋友參加啦, 睇下做大戲, 吃下盆, 開心一下啦
咁理d神功戲係比d先人睇, 會做到好夜, 我就負責聯絡d戲班的.

如是者, 差不多深夜2點坐右啦, 理一次真的是見得最多一次啦. 

我在村公所賭錢啦, (唔好話我地聚賭, 是村活動之一), 見到出面個戲棚好多人叫好, 我就望望隻表啦, 都咁夜, 班老人家唔駛訓呀, 包括我老豆啦.

咁村長當時做莊, 我老死都買大d啦, 點知佢老人家叫我出去睇下啦, 話晒我都是負責嘛, 
我就死死地去睇下啦, 由后台望出去, 見到全部坐位都坐滿, 但係有d人係未見過,當時差不多全部係公公婆婆. 

咁個領班同我講, 你見到呀, 我話見到咩呀, 跟住佢就拉我返去后台, 佢話做左咁多次神功戲, 第一次見到野. 

我聽完, 就無理佢, 返去村公所啦, 個死鬼村長問咩料, 我話, 你繼續啦, 今晚賭天光先走.
我老死當然知我見到咩啦, 不過就心底笑坐出理.

到第二朝去舖仔飲早茶, 個班死仔問我係唔係見到班先人, 我話係啦. 佢地都估到. 

原來個村長一早就知...妖

支持樓主先

17. 筆仙 (這個我聽番來, 因為我無可能係現場)

我記得個時我中一, 中二左右啦. 個時係屯門元朗唯一一間女子中學出過事

個間名叫妙法寺劉金龍紀念中學,d校服好似新法書院一鬼樣. 記得好似有班中四女學生放學後係班玩筆仙, 我個個年代好多人玩架. 不過我地無玩過, 因我班有兩個奇人, 聽佢地講都夠啦.

話說, 好似有4, 5個一切玩啦, 點知唔知點請走佢, 咁個班女仔就好鬼驚啦, 咁就跑左出班房.

點知第二日返學上堂啦, 好記得好似係第一堂啦, 特然個層樓所有筆都飛晒上天花板, 好似係4樓啦. 

個時d呀sir / miss 點鬼識處理理d怪事呀,所以就報警啦, 個時因為元朗屯門偏遠, 所以就唔會有記者, 電視台報導啦.

聽番d呀sir都唔知點處理, 所以就去隔離妙法寺搵個和尚睇下啦. 個和尚睇左都唔知點算, 所以就通知另外一間寺幫手啦, 聽番好似用警車車佢地過來念經點攪點喳.

不過我都係聽番來, 所以很難知道係咪真.


如果各位知道, 請賜教小弟.

18. 細路仔 (呢個係我個女的故事了)

到我結婚生仔啦, 唉, 點知生左個女, 雖然我好鍾意女, 但始終我係原居民嘛, 所以又少左個丁(男丁有地分, 女丁乜都無).

話說我個寶貝女1歲個陣, 成日係我屋企望住隻窗笑啦, 笑得好開心個種. 我老婆都唔知佢笑咩

咁, 我就問番我老豆啦, 佢話呀B好鬼似你細個, 都係鍾意望住隻窗笑, 咁我就無再理啦.

話說有個星期日, 我好早起身啦, 咁呀B都起左身啦, 咁咪開D奶佢飲啦, 點知聽到呀Ｂ又係度笑啦,　我就係廚房出理啦, 望呀佢笑咩啦.

咁我見到隻窗出面, 有3個細路仔引我隻B笑, 我就望住佢地, 諗下係邊個個仔女啦, 但係好似未見過. 
會唔會係D外姓人D仔女呢. (現在圍村無所謂啦, 外性人都可以係到住啦)

咁我就問佢地啦, 你地咁早出理玩呀, 小心D呀.  咁其中有個細路女同我講: 叔叔, 你細個個陣我都又同你玩架.

哈哈, 個陣我得個笑住, 小朋友, 你知唔知叔叔幾大呀, 你先得5, 6歲, 點會同我一切玩呢.

咁其中又個男仔同我講, 我由細睇到你地大啦,, 咁我唔係好明啦, 咁我就出門口睇下佢地, 點鬼知一出去, 乜人都無..., 咁我諗, 唔會褂, 朝早都見到.都係唔好同我老婆講, 廢時麻煩.

咁我就去搵我老豆啦, 我話見到頭先D野, 點知佢話係咪見到3個細路仔, 2男一女呀. 我話: 係呀, 老豆
你點知架. 佢話:  佢都見過一次, 都係我1歲時見到, (我諗, 你D野有遺傳架)

咁我就去搵D年長長輩啦, 佢老人家同我講, 呢個幾個係土地公, 土地公好鍾意同D小朋友玩架.
無野架, 等你個女大小小就睇唔到啦, 我話我都睇到呀. 老細, 點知呀B睇都幾耐呀.

做人老豆真係會緊張D, (以前我無諗過), 咁點算呢, 我就無我老死奇人啦, 佢都話無事架, 順其自然啦

咁, 如時者, 等我隻B兩歲就無理D野啦, 所以我每年過時過節都回去村口土地公燒野啦. 希望呀女大左平平安安就好啦.

後話: 我個女都8歲幾, 真係遺傳左我D野, 日後慢慢UPDATE

繼續

19. 義塚

咩叫做義塚呢.就係有d人將d無人認領的屍體埋葬係某個地方, 我知最出名係沙頭角沙嶺啦

其實我地屯門元朗都有, 不過就無乜人知, 其中兩個係稔灣, 龍鼓灘, 另外一個係屯門蝴蝶村附近 (近紅樓個邊), 呢個故仔係一個世世代代做忤作的朋友講比我知. 

做得忤作, 跟本就無可能轉到行, 連我個朋友都係, 家族生意, 佢都要繼承啦.

咁, 個年代又係60年代啦, 之前我老豆, 呀叔個單野個年代 (原來佢地去個到做邊野就係幫手將d無人認領d屍體放係義塚)

話說我朋友個老豆因為係個時差不多日日都有屍體飄晒係流浮山, 下白泥, 龍鼓灘等地方, 所以佢就同佢老豆搬去個邊住啦. 方便做野. (個時我地元朗交通真係發達到你唔信. 一個地方去一個地方都要成個幾鐘.) 聽佢老豆講個時d屍體好奇怪, 係一堆堆綁住, 睇理係比人殺死然後順水流流到香港.

有日, 佢又收到流浮山警處通知, 要去稔灣附近執屍啦. 佢發覺呢次好特別, 全部都係女性. 個個都係后生女, 合共五個.  其中一個就好似係剛剛死坐無耐. 咁, 佢就叫埋當地村民幫手抬佢地去義塚啦, 聽番每條屍收10元, 係個個年代10元好多架啦.

咁準備落葬個陣, 奇怪事就發生, 發覺其中有條屍唔見左, 咁好大鍋架嘛, 個警察同佢都周圍搵啦, 問d村民又話唔見. 最后就都搵唔到, 咁係記錄就改返四個. 聽佢老豆講, 少左10元幾唔開心. 

如是者, 咁又過左幾日都無人通知有屍體, 咁佢就去幫手採蠔啦. 有d收入都好呀. 佢話發覺其中有個女仔好似個日其中一個屍體個樣, 但心諗, 邊有可能呀, 如過真係都唔會光天白日出理啦.另外就諗可能佢無死到, 所以係呢度住啦.

咁又過左幾日, 差不多日日都見到佢, 但就發覺佢有點異味, 好似係屍臭, 但心諗無可能架..
咁就同佢老豆講返啦, 佢老豆聽完當然鬧到佢死死下啦, 咁大件事都唔同佢講.

咁佢同佢老豆走去睇下啦, 見佢係間屋仔到住, 佢老豆就一個人入去啦, 佢老豆就無入去啦..

不過聽佢講, 聽到個女仔係度喊, 過左一陣, 見佢老豆抱起個女仔出來, 個時d村民都唔知咩時, 就問佢老豆啦咩時啦, 佢話個女仔跟本就係死左好耐, 不過連佢都唔知, 所以講比佢聽個事實. 聽完就喊然後就無晒動靜. (可能就係現在講活死人啦)

因義塚係葬d無名無姓的人, 所以知道佢係邊個, 所以就將佢葬係靈渡寺個邊, 由佢老豆比錢, 佢話呢件事係佢個仔唔好才出錢...另外佢老豆就寄信返去個女仔大陸個地址等佢d家人善後.

唔知香港其他地方, 有無出現同樣事情發生, 有的話, 多謝分享.

20. 我的陰陽眼

到現在起, 我都經歷左好多奇怪事, 由細細個到依家, 我都無諗過我點解會見到, 可能真係由細見到大啦. 更加以為住係鄉村, 見到係必然, 所以都無特別去知點解.

咁有日, 我老婆無啦啦同我講起, 你全家都係得你見過, 你呀哥就無見過, 係唔係有d野呢.
聽佢講又有d道理喎..

我就問我老死, 奇人啦, 佢就話, 有d係天生陰陽眼, 有d就經過某d事就有陰陽眼. 咁你細個經歷過咩事呢, 我點知呀老友, 有都唔記得啦.

咁, 有次家族吃飯啦, 我就問下d長輩親戚, 我細個未懂性個陣時經歷過咩事啦, 佢地都話唔記得啦, 太耐邊記得呀. 個時我望到我叔想講d野, 又比我老豆阻止. 咁我又問我哥, 佢又話唔記得.

咁算啦, 無謂挑起條根啦, 點鬼知我老婆有八卦, 係都要我去問. (真係服左佢, 有要驚有要知)

咁我就去問前前任村長, 依家都未死, 睇佢都80幾, 但係都好健壯. 點知想開口問, 佢以經話唔駛問, 佢話唔會講. (難道你係神仙, 我未問你都知). 佢話呢個係村的秘密喎.

個陣頭都痕埋, 係咩秘密咁巴閉呀. 唔同我唔係我老豆生? 定係執番理呢 (個時都好多呢種case) 我諗, 算啦, 逆來順受啦, 可能聽完自己都頂唔順, 無謂在追落去啦.

如是者, 好似係前年過年, 有d移問左去荷蘭的長輩返理過年. 我都係第一次見, 做後輩當然去拜年啦. 
咁就知道我的秘密啦.

話說我先介紹我係邊個啦同個長輩, 點知, 個長輩就好快講左句 " 哦, 你係個次死左幾個鐘番生個靚仔呀. 都咁大個呀. 哈哈" 個時見到我老豆個表情唔多好, 其他長輩就叫佢收聲啦. (個時我係屋企出生的, 唔係醫院生, 個個年代, 我地元朗都好多同我case一樣) 個時我都唔知佢點解咁講, 之後就慢慢諗下啦, 可能就係呢件事令我見到d野? 另外我都懷疑自己是不是比搵替身, (可能我先係隻鬼, 搵左我自己).

呢件事, 我老婆聽完都打冷震呀.. 其實我係邊個至真呢.... 呢個問題依家都係到諗左好耐.

後話 : 有d野, 你唔去問好過問呀. 問完令自己都唔開心.