[轉貼/鬼故/一齊驚] 40年圍村佬真人真事

75. 昏迷

話說喺幾年前, 經朋友介紹認識咗一對夫婦, 佢兩個住喺西九嗰邊想搵人裝修, 住嗰度應該經濟都幾好, 但近排再見返個男人, 聽佢講受到經濟不景及投資失利, 好快要將層樓賣出嚟套現, 最慘係佢老婆, 無啦啦患咗怪病, 突然無晒知覺昏迷成半年, 連醫生都唔知咩病. 我當時聽到就安慰吓佢, 跟手講返幾句叫佢唔好過分擔心就算.

到今年年中, 又收到嗰位男人電話, 內容係將會搬屋想我再介紹裝修比佢, 另外問我有無時間出嚟食飯吹水, 心諗兩條佬有咩好吹呀, 不過我都好耐無出城飲嘢, 所以就應承佢.

飲飽食醉準備閃嗰陣, 佢同我講不如上去佢屋企睇吓, 我見時間都算早, 就去睇吓, 因我都未去過嗰邊, 都想睇下嗰邊環境. 去到佢屋企原來係面向昂船州. 咁我問佢老婆病情如何, 佢話都係咁啦, 無乜起色. 佢叫我入去睇吓啦, 咁我同佢入到房, 見佢老婆訓喺張床度, 根本就唔似係病人, 當我地兩個準備出返廳, 突然我就聽到有一下女人聲, 擰返轉頭望, 開頭以為係佢老婆發出, 但望吓又唔似.

出返廳坐, 就問佢老婆點解無啦啦係咁, 佢話都唔知, 只知個印傭見佢喺廳訓, 就到現在都未醒過. 我同佢再吹多一陣水就話 唔阻你啦, 下次再約. 準備出門口走嗰陣, 我又聽到頭先把聲, 心諗咁奇怪, 呢間係一手樓, 無理由有嗰D嘢? 落到樓, 我好奇心又返嚟, 都係返上去再望清楚. 

當我返到上去, 佢見到我就問係唔係漏咗嘢, 我話想再望望佢老婆, 佢見我咁問都好奇怪, 不過都比我入去, 再入到去, 我就將粒玉除抵, 今次就見到佢老婆個魂魄坐咗喺窗邊.

我睇完就將粒玉帶返, 跟住就出返去, 然後打電話比我個高人朋友, 我一五一十講返頭先見到嘅嘢比佢聽, 佢話聽日放工後同我去睇吓.講完之後, 我朋友問我咩事, 我就話, 你信又好, 唔信又好, 你老婆唔係昏迷, 係離魂, 唔知點解佢魂魄返唔到肉身, 我朋友聽日會上嚟幫你. 

到咗第二晚, 我同高人朋友一齊上去, 介紹完, 高人話你地兩個喺廳度等啦, 咁佢就入咗房. 大約過咗半個鐘, 見佢出返嚟, 話無事啦. 我地就入去房啦, 見佢老婆醒返及喺度喊. 話自己發咗個惡夢. 到我地走嗰陣, 高人朋友話比粒玉佢老婆, 叫佢老婆無論如何都唔好除低, 如果唔係, 就無咁好彩可以醒返. 

我問高人點解會咁, 佢話有D人天生就可以離魂, 但自己係唔知, 會當發夢. 當時運底或肉身三顆明燈(眉心及兩邊膊頭)暗咗嘅時候就唔識返入去. 要粒玉或其他方法帶返佢魂魄入去肉身到.

後話: 其實夢境同離魂有無關係, 我就唔敢講, 但有時發夢見到嘅事物, 有時會喺街上感覺曾相識. 有d陌生地方, 從來未去過, 但我去到後又知道嗰度有咩野. 真係唔知點解釋..

留名

究竟玉係咪真係咁神奇?
係咪要開過光嘅玉先有用

41. 梧桐寨

雖然位置叫做大埔, 但其實離錦田就好近,  不過去嗰處都要行一大段路.喺夏天去就最好玩, 因成日落雨, 所以個瀑布特別大水, 不過嗰度成日都出意外, 好似係行山跌死同浸死.

所以我都係去過一次, 因我嗰邊長輩話好猛鬼, 叮囑我地唔好去, 怕有事發生. (細路仔點會聽大人講呀), 記得form one 嗰個夏天, 放暑假好鬼無聊, 就約4個同學仔去嗰邊游水啦, 雖然我地嗰邊都有個河背水塘, 但係去嗰邊好玩d,  

當喺車路行入去都幾甘下, 行到身水身汗, 就立即沖落去玩啦. 嗰時原來都有另外一班大人喺到, 嗰班人有男有女. 我地就無理佢啦, 各自各玩... 可能早幾日落過大雨 個瀑布好多水,, . 

當差唔多玩咗唔夠一個鐘, 個天就無啦啦黑鬼麻麻, 好似想落雨, 我地見咁就不如早d走啦, 怕山洪暴發, (我地d新界仔, 真係見唔少呢d情況, 一落雨d水就會好大好急), 但係另外嗰班真係好似唔想走咁, 心諗, 可能係市區入去啦, 我地雖然細個, 但係對危險好敏感, 我地就同佢地講, 哥哥, 落雨啦, 唔好再玩啦, 唔係一陣山洪暴發就走唔切呀.  佢地聽到, 都覺得我地講得對, 咁就叫其他人上岸啦..

當個天越來越黑, 黑到好似夜晚咁, 就見到有個哥哥喺水到叫救命, 咁其他人就衝落水, 想拉佢上嚟啦, 但其中另一個又叫救命, 即係有兩個人同時喺個水到叫救命, 話有嘢拉住佢地隻腳, 我地幾個細路仔當然知道唔對路啦...

好彩, 我有個同學仔真係醒目, 佢將佢掛喺身上嗰粒玉拋去水嗰度, (比我就唔會啦, 比我老豆知道, 唔打死我就奇啦), 好奇怪, 拋完之後, 嗰兩個哥哥就好似無咩事可以游返上崖.

見佢地平安無事都好, 咁其中一個哥哥就問佢兩個咩事啦, 佢地講: 頭先喺水度有嘢拉住佢隻腳, 咁我地好八卦睇下啦, 見兩個哥哥隻腳有四條紅印, 應該講係瘀痕.. 我地嗰時就知道水裡面係有d野啦...

嗰班人就問我地點解咁醒目, 拋粒玉落去啦, 我個同學仔話: 老豆教落, 鬼好怕玉, 所以就拋落去..., 個班人千多謝萬多謝我地. 咁佢地都有心, 比返幾百蚊比我同學仔話賠返比佢. 我同學仔當然無要啦, 我地新界仔真係單純到暈....

當返到屋企, 我都唔敢講話去嗰度玩, 不過就跑去鋪仔打聽吓, 知唔知嗰邊有咩嘢啦, 聽返嚟好多版本, 有d話行山嗰d人喺瀑布頂唔小心跌咗落去慘死, 有d又話好多人喺嗰邊玩浸死. 不過最後都講, 唔好去嗰邊玩....跟住又講, 叫我地都唔好去荃灣曹公潭玩, 話嗰邊更加猛.... (點會去呀, 係荃灣呀, 係山後面呀, 坐車都坐好耐啦)


後話: 其實我個同學仔點解會拋粒玉落水呢, 原來佢本身就係天生陰陽眼個位, 之前d post 都有講過佢d嘢. 佢話有個女人喺水度拉住佢地, 所以危急就拋粒玉, 我就問返, 你老豆無鬧你咩, 佢話老豆無鬧佢, 仲話佢醒目. (如果香港人個個都學我個同學仔就好, 想起以前人與人關係真係好, 但依家就.....)

細個成日係曹公潭玩
聽過傳聞石頭上面有紅色A字即係死過人，以前好似發生過消防員事故

係元朗大lm
好多細個都聽過

76. 男友

應該喺好多年前, 有部戲叫陰陽錯, 由譚詠麟主演, 戲中男主角為咗隻女鬼拋棄前女友, 最終女鬼比一個師傅收咗而自己身受重傷.

我都有類似經歷, 不過時間都有20年前左右, 話說小弟剛剛畢業生出來工作, 之前都有講過我去咗香港嗰邊返工, 雖然短短做咗一個月, 但現在都記憶猷新.

話說當時我去做嘅職位係辦公室助理, 我上司係一個差不多30歲嘅女人叫Ada, 當時我呢個剛畢業三無人士, 無學歷, 無經驗, 無社會經驗. 佢對我都算唔錯, 肯耐心地教我. 但入職唔夠三日, 公司清潔阿姐就叫我小心佢, 話佢喺公司成日好多不尋常舉動, 例如好夜收工, 成日喺茶房對空氣講嘢, 嗰時我聽完都當無事. 直至有日我喺電梯同佢一齊, 佢喺我背後無啦啦講嘢, 我擰返轉頭望, 佢又無再出聲, 唔望佢, 佢又喺度笑, 嗰刻我真係以為佢精神有問題.

到月中有一日, 佢上晝吩咐我, 話今晚要O.T.執倉, 我係新仔當然無問題啦, 直到夜晚, 原來只有我同佢一齊執倉, 開頭都無乜事, 大家分開執, 過咗差不多一陣, 喺倉另一邊聽到佢喺度講嘢, 開頭以為佢叫我, 就走過去問佢啦, 佢話幾時叫你呀, 你快d過返去繼續執. 嗰段期間我一路執, 佢就一路自言自語, 加上個倉都比較黑, 佢咁嘅舉動真係比佢嚇餐死. 怪不得清潔阿姐都叫我小心佢. 原來佢精神有問題, 呢個係我當時心中嘅解釋.

到差不多9點, 差不多執完, 我地就出返個倉準備關門, Ada姐突然就叫, 唔好關門, 仲有一個人未出嚟, 當時我聽到就立即呆咗, 仲有一個人? 明明只有我地兩個人喺度! 邊到仲有人呀? 唔通…………..? Ada 姐見我個樣有疑惑, 就急急腳講, 度門我關, 你放工. 

經過執倉嗰晚, 我開始留意Ada姐嘅舉動, 原來佢會無啦啦就望向另一邊同空氣講嘢, 而家我有另一種解釋, 就係有隻鬼喺佢身邊, 為咗證實我無估錯, 有晚放工等人走晒, 只有我同佢嗰陣, 我偷偷除低粒玉, 原來我無估錯, 真係有隻男鬼喺Ada 身邊, 年齡同Ada姐差唔多大, 點解會咁呢, 唔同佢比鬼迷? 
都係唔好理人咁多啦, 自己做自己嘢, 唔好去惹麻煩事.

去到月尾, 我租嗰間屋都鬧鬼, 所以要辭職返元朗, 喺最後一日,  Ada 姐單獨見我, 問我點解唔做啦, 我就編咗個大話敷衍佢, 同時我同佢講, 話見到有隻男鬼喺你身邊, 我諗你都知道, 不過我唔會問咩原因, 你有你嘅理由, 不過我奉勸你小心為上, 始終人鬼有別. 開頭佢話我亂講, 但係我照講返個男鬼特徵後, 佢就啞口無言.

到去到嗰年年尾,喺街上撞返個清潔阿姐, 個阿姐同我講, 話Ada姐喺屋企跳樓自殺死咗. 我當時個心都嚇咗一跳.. 如果嗰時有同佢講或者教佢點避, 或者就可以救返一條命.

後話: 其實人鬼殊途, 點解咁多人都要去惹佢地呢, 明知無好結果都要試呢, 到最後食惡果都係自己. 奉勸各位師兄, 甚麼靈探, 切勿去試, 靈界你地係玩唔起的.

佢粒玉都幾勁

睇原post粒玉係阿婆果代已經傳落黎
百年歷史

77. 電視

近期同以前做工程嘅同事食飯. 一大班男人食飯,  可能年紀大咗, 話題來來去去都係以前工作趣事. 飯局其中一位係我舊公司老臣子, 佢幫公司工作都40年啦. 真係老師傅一名. 到飲飽食醉, 佢老人家就講咗一個故事比我地聽, 聽落去都幾恐怖.

故事發生喺70年代初, 阿堅當時已經20歲, 當時舊社會20歲已經識好多嘢了, 佢嘅工作係一名電視機維修師父, 喺70年代, 電視機屬於奢侈品, 唔係家家戶戶都有, 尤其係彩色電視.

有日, 佢接到一位女士電話, 話要修理一部黑白電視機, 地點係九龍上海街一棟唐樓. 但係好奇怪, 位女仕要求夜晚10點鐘先上門維修. 喺舊社會, 10點鐘已經係好夜了, 當時好多人訓覺時間都係9點左右. 但係為咗兩餐, 幾夜都去啦.

依時去到之後, 就敲門, 見開門係位30歲左右女士, 而屋內除咗開門嗰位, 仲有3個年紀相若嘅女人喺度, 仲喺廳中間放置咗一檯麻雀, 睇嚟係攻打四方城, 當時阿堅見到就猜呢四個女人應該係舞女, 唔係都唔會約夜晚10點整電視. 

咁開門嗰位就帶阿堅入房整電視, 然後就去繼續佢地嘅竹戰, 阿堅佢就開始整, 嗰時整一部電視機基本至少一個鐘, 佢一路整, 一路聽住出面嗰班女人喺度講嘢, 當整好後, 佢出去廳, 諗住搵返頭先個女人, 點知出到廳, 見乜人都唔喺度, 連檯麻雀都唔喺度, 心諗, 唔通打完牌走晒? 或者落咗街? 當佢疑惑緊嗰陣, 突然聽到背後有女人問, 部電視整好未? 真係比佢嚇咗嚇, 阿堅定過神嚟就話整好咗啦, 正想搵你去試機. 個女人就話好, 整好咗就得啦.

當返返去個電視機度, 開著後, 就要教台, 舊式電視要用手追台, 但唔知點解, 點教都教唔到, 明明頭先無問題, 而家又有問題?, 咁佢再望清楚有無駁天線啦, 原來係天線鬆咗, 當佢想駁返天線之際, 個電視就突然有聲. 咦, 都未駁線點解會有聲, 咁佢就走去螢光幕望下, 見到頭先喺度打牌嗰三個女人喺螢光幕出現. 跟住就聽到電視機播出一句話: 放我地出去呀…!

阿堅見咁嘅情況, 轉頭想搵頭先個女人, 竟然唔喺度, 明明喺背後, 佢去咗邊呢, 再望吓部電視, 今次個螢光幕多咗一個人, 就係個女戶主. 嗰刻, 阿堅就明白晒, 今次佢撞鬼啦, 佢嚇到立即衝門就跑, 一直跑到落樓, 喺大街上見有人先停落嚟.

當佢望返頭先棟唐樓, 原來已經係比木板封住及準備要拆. 當佢回到家, 可能真係嚇親, 病咗成三個月.


後話: 想起我以前, 16歲以經好懂事了, 到中五畢業就出來工作, 只要肯做, 累積經驗, 一定餓唔死. 
另外希望各位年青人, 出來工作不要怕蝕底, 機會一定有, 不要鑽牛角尖去尋死, 只要未死, 凡事都可以解決.

買唔買粒嚟戴好呢？

前幾年我條女老母買左粒比我, 叫我成日戴住佢

78. 搖搖凳

睇見有位師兄幫我做咗個目錄, 真的要多謝佢, 原來小弟都寫咗咁多個故,希望各位師兄唔好厭悶吧.

這星期, 我去了寶福山, 參加一個長輩嘅喪禮, 突然諗起一個長輩, 係朋友嘅外婆. 佢姓梁, 都有87歲啦. 想起我地細個, 成日都去佢婆婆間祖屋玩, 梁婆婆感覺就和黎婆婆一樣好慈祥. 梁婆婆屋企有張搖搖凳, 我地去到都必定坐, 因為坐落真係好舒服. 嗰張搖搖凳, 係婆婆嘅奶奶留落嚟, 我諗最少都過百年歷史, 真實時間就無從稽考, 

有次, 喺返村中路上, 見到佢由村口出嚟, 問我有無時間去幫佢手換廚房水龍頭, 咁簡單, 當然無問題啦, 我話夜晚食完飯就過去. 當晚我去到, 見佢屋企無人喺度, 唔通婆婆去咗村口打麻雀?, 咁鬼熟., 我換完就走啦. 明天先話比佢聽水喉已經整返好.

換個龍頭都係五分鐘左右, 又見無人, 就諗不如去坐吓張搖搖凳, 真係好耐無坐過, 點知入都屋內, 都未開燈, 就隱約見到有個人坐喺張搖搖凳上面, 唔通梁婆婆無出去打麻雀? 正想話聲比婆婆聽水喉整返好嗰陣, 我發現坐喺度嘅原來唔係梁婆婆, 係另一個我唔識嘅婆婆. 佢拎住把葵扇喺度撥涼..
.
我就開聲問句 婆婆; 請問你係邊位呀., 見佢用拎扇隻手指一指牆上, 我就望一望牆上張相, 係婆婆個奶奶!…嗰刻, 我都唔知點反應, 然後佢講: 你唔使驚, 我由細睇到你大, 你地成日都嚟玩, 我知你係邊個. 當時我只係企喺門口, 見到咁情景, 我都唔敢入去. 突然係背後聽到梁婆婆把聲, 就好自然擰返轉頭, 再回頭就已經唔見坐喺搖搖凳嗰位婆婆.

梁婆婆見我個樣有啲奇怪, 就問發生咩事, 我就同佢講返頭先見到嘅事, 梁婆婆聽完就呵呵地笑, 就同我講, 佢成日都喺間屋出現嘅, 我都見怪不怪了. 但係我諗, 都死咗咁耐, 唔係會去投胎咩? 跟住梁婆婆就指向張搖搖凳講, 可能佢太喜歡張凳, 唔肯走啦…

心諗, 係唔係舊傢俬真係會好容易比鬼附上呢, 咁我屋企張酸枝椅會唔會都有呢, 張椅都好耐歷史..


後話: 經過這次, 一定不要對先人不敬, 亂話先人唔好, 唔係半夜找你麻煩就死.

79. 阿琳

喺我好細個個陣, 村d老人家成日都講故仔比我地班小朋友聽, 成語, 鬼故咩都有, 其中一個我想同大家分享一下.

話說差不多100年前嘅香港, 英國人統治, 但元朗始終唔同市區, 嗰時有法律等於無法律, 如果喺條村發生事, 都用村內法律嚟解決. 例如通姦, 偷竊等. 另外嗰時村長, 族長係好大權力. 佢地講乜就係乜. 講起舊社會, 自由戀愛係一件無可能嘅事, 男女對象必定係由父母決定, 正所謂盲婚啞嫁, 童養媳, 根本係平常事.

阿琳, 佢自從12歲死咗雙親後, 因佢唔係男丁, 無繼承權, 就比佢伯父賣咗比元朗一個望族做童養媳, 佢個所謂老公得9個月大. 去到夫家, 點會係做新抱呀, 簡直慘過今日嘅菲傭, 要服侍老爺奶奶一切起居飲食, 仲要耕田種菜. 為求生活, 所以每日都辛辛苦苦地過活. 

過咗幾年後, 阿琳都17歲, 但係唔知點解個肚一日大過一日, 當時社會係唔容許有呢種事, 佢老爺奶奶為咗找個姦夫出嚟, 每日都毒打佢, 最後得知就係村長所為. 佢老爺奶奶知道後當然跑去同村長理論啦, 嗰時村長權力係好大, 橫手又多, 所以比錢解決咗. 佢老爺奶奶雖然收咗錢, 但係點同村民交代呢, 最後相量後, 就屈阿琳同村中一個無賴通姦. 

到某晚, 阿琳同個無賴就比人捉去祠堂, 當時無賴都話冤枉, 阿琳就話係比村長強姦, 但係族長都無聽佢兩個解釋, 不由分說就判最嚴重刑, 就係浸豬籠. 處決地方就係近南生圍嘅錦田河. 

因當時兩個人根本無通姦, 所以臨死前就向害佢地嘅村長及阿琳老爺奶奶落咗個好毒詛咒, 就係絕子絕孫. 講真呢種詛咒喺平時無人會理, 但一對臨死嘅人落嘅話, 就真係令人不安.

時間慢慢流逝, 阿琳嘅所謂老公, 當時都唔夠5歲, 有一日被發現喺村內失蹤, 當然佢老爺奶奶打鑼打鼓去搵, 到搵到佢嗰陣時, 都已經過咗兩日. 原來係跌咗落個廢井入面, 最離奇係個廢井原本比木板封住, 佢老公係點樣跌落去呢? 嗰陣佢老爺奶奶九代單傳得一個仔, 當然傷心欲絕. 當時好多村民都諗起, 會不會係阿琳落嘅詛咒靈驗呢.. 

咁最驚嗰位當然係村長, 呢件事係因佢而起, 所以由嗰刻開始佢就提心吊膽, 下令所有村民唔可以再提起. 但要嚟嘅始終會嚟, 佢嗰兩位公子, 一個就喺出墟嗰陣, 無啦啦喺路上暈倒, 撞落塊石死咗, 另一個就半夜三更比人發現喺棵龍眼樹度吊頸死. 事情發生後, 好多村民為怕阿琳鬼魂報復, 所以都離開村莊暫避, 而村長因為失去兩位兒子內疚, 最後都投河自盡尋死.

沒有村民嘅村, 點可以叫村呢, 當時族長無計好施之下, 就向鄰村求救, 問下有無方法可以解咒. 喺舊社會, 一聽到關於鬼神事, 個個都耍手擰頭, 各家自掃門前雪. 最後聽到有人話試吓搵班道士做返場大法事, 化解一下. 當做完法事之後, 真係無再有死人事件, 但過咗一個月, 今次連族長都死咗喺個魚塘度. 所以剩返嘅村民都決定暫時搬去另一度地方. 等無事先再返去. 

聽完呢個故仔, 當時我地班小朋友當然想知係邊度地方啦, 但嗰位老人家就話你地估吓啦. 開頭我地以為講自己條村啦, 但諗深一層, 我地一定唔係望族. 最大可能就係…..


後話: 好多故仔背後都有一個道理, 最重要提醒人唔好重蹈覆轍. 雖然現今好多人都唔鍾意以前嗰套, 但係好多野, 根本道理一樣.

80. 母子

睇見之前好多師兄要求講一個鬼節期間嘅故事, 咁小弟就講一個經歷比各位師兄分享一下. 

話說小四嗰陣, 時間差不多係1979年左右, 鬼節就係暑假期間. 其實我對鬼節又愛又怕, 怕者當然係個鬼字, 而愛就係喜歡嗰種熱鬧, 有大戲睇, 有嘢食, 最重要係每家燒完衣紙後就會撒錢, 有啲撒一毫, 富有人家就撒一元, 你地諗下, 嗰個年代一元已經可買好多零食了.

講返, 嗰年我食完飯就喺村口等人燒街衣, 等佢地燒完去撒錢, 好運嘅每次執執埋埋都有兩三元. 去到最後見就嚟燒街衣, 等佢地就完準備嗰陣, 我地發現有兩個細我地一兩年嘅小朋友同我地一齊等, 但係唔識嘅. 

就如現今小朋友一樣, 如果唔識當然唔會一齊玩, 咁我就向其中一位小朋友講: 呢度我地等咗好耐, 你地去其他地方等啦, 點知嗰兩位細路好似聾耳陳一樣, 對我講嘅嘢充耳不聞. 正當想過去趕走佢地, 燒衣嗰家人就開始撒錢, 我就暫時唔理佢地. 因為大事要緊.

到人家開始走, 我同阿哥就一窩蜂喺地下執錢, 但我留意到嗰兩位細路, 佢地繼續企無學似我地, 只係靜靜地望住我地執錢. 到我地執晒, 佢地都無動靜. 我就諗住分啲錢比佢地兩個啦, 點知佢兩個對我地一啲反應都無, 見佢地都唔理我地, 咁我地就走喇. 

到第二日夜晚, 我地又依時去執錢, 又見到佢地兩個, 不過今次多咗一個女人, 我諗, 可能係佢地阿媽啩, 但佢地係邊個嚟呢, 因為真係未見過佢地, 又唔似隔離村嘅人, 如是者差唔多每晚都見到佢地三個, 每晚都係企喺度而無行動, 我覺得好奇怪, 但又無話比長輩知我見到佢地三個人.

到七月十四正日嗰晚, 係鬼節嘅尾聲, 亦係村內睇神功戲同燒街衣嘅最高潮, 我就好似返工咁, 忙過不停, 差不多到夜晚11點, 我又出村口睇下仲有無人燒街衣, 一如以往, 嗰三母子又企喺度, 因為見到佢地企足咁多晚, 又好似唔好意思執, 所以我決定將今晚執到嘅, 分啲比佢地. 

去到佢地三母子前, 我就話分啲比你地啦, 見你地晚晚都企喺度, 又問佢地係邊條村啦, 因為都未見過佢地. 佢地就淨係望住阿媽, 好似想出聲又怕比人鬧, 到最後個阿媽就出聲話: 小朋友, 我地喺度等人, 我話: 都好夜啦, 等人, 你地每晚都喺度等, 點解唔入去搵呢, 個阿媽就講: 小朋友, 你仲細個, 到你大個就會明白. 嗰時我真係好唔明點解佢咁講. 到我老豆嚟搵我, 再回頭就已經唔見佢地.

我同老豆就講返呢排每晚都見到嗰三母子, 老豆問我見到幾耐, 我話都有成個星期, 開頭佢都好驚咁, 但係佢又同我講: 鬼節就係離咗世嘅人, 返嚟取祭品, 可能你頭先見到嘅就係返嚟取祭品的, 我話: 見佢地咁多晚, 都係靜靜地喺村口等, 會不會無人燒嘢比佢地㗎, 我老豆講, 都有可能㗎. 咁我問點算, 老豆話, 今晚係鬼節最後一日, 我地睇完神功戲去燒d衣紙比佢地啦.


後話: 如果無親無故嘅孤魂野鬼無親人拜祭, 我都覺得好可憐, 就好似現今社會, 弱勢人士得不到幫忙一樣, 所以有得幫就盡量去幫. 幫完人不必計較有無回報, 最重要係個心會舒服好多.

正阿 樓主快d up

80. 母子

睇見之前好多師兄要求講一個鬼節期間嘅故事, 咁小弟就講一個經歷比各位師兄分享一下. 

話說小四嗰陣, 時間差不多係1979年左右, 鬼節就係暑假期間. 其實我對鬼節又愛又怕, 怕者當然係個鬼字, 而愛就係喜歡嗰種熱鬧, 有大戲睇, 有嘢食, 最重要係每家燒完衣紙後就會撒錢, 有啲撒一毫, 富有人家就撒一元, 你地諗下, 嗰個年代一元已經可買好多零食了.

講返, 嗰年我食完飯就喺村口等人燒街衣, 等佢地燒完去撒錢, 好運嘅每次執執埋埋都有兩三元. 去到最後見就嚟燒街衣, 等佢地就完準備嗰陣, 我地發現有兩個細我地一兩年嘅小朋友同我地一齊等, 但係唔識嘅. 

就如現今小朋友一樣, 如果唔識當然唔會一齊玩, 咁我就向其中一位小朋友講: 呢度我地等咗好耐, 你地去其他地方等啦, 點知嗰兩位細路好似聾耳陳一樣, 對我講嘅嘢充耳不聞. 正當想過去趕走佢地, 燒衣嗰家人就開始撒錢, 我就暫時唔理佢地. 因為大事要緊.

到人家開始走, 我同阿哥就一窩蜂喺地下執錢, 但我留意到嗰兩位細路, 佢地繼續企無學似我地, 只係靜靜地望住我地執錢. 到我地執晒, 佢地都無動靜. 我就諗住分啲錢比佢地兩個啦, 點知佢兩個對我地一啲反應都無, 見佢地都唔理我地, 咁我地就走喇. 

到第二日夜晚, 我地又依時去執錢, 又見到佢地兩個, 不過今次多咗一個女人, 我諗, 可能係佢地阿媽啩, 但佢地係邊個嚟呢, 因為真係未見過佢地, 又唔似隔離村嘅人, 如是者差唔多每晚都見到佢地三個, 每晚都係企喺度而無行動, 我覺得好奇怪, 但又無話比長輩知我見到佢地三個人.

到七月十四正日嗰晚, 係鬼節嘅尾聲, 亦係村內睇神功戲同燒街衣嘅最高潮, 我就好似返工咁, 忙過不停, 差不多到夜晚11點, 我又出村口睇下仲有無人燒街衣, 一如以往, 嗰三母子又企喺度, 因為見到佢地企足咁多晚, 又好似唔好意思執, 所以我決定將今晚執到嘅, 分啲比佢地. 

去到佢地三母子前, 我就話分啲比你地啦, 見你地晚晚都企喺度, 又問佢地係邊條村啦, 因為都未見過佢地. 佢地就淨係望住阿媽, 好似想出聲又怕比人鬧, 到最後個阿媽就出聲話: 小朋友, 我地喺度等人, 我話: 都好夜啦, 等人, 你地每晚都喺度等, 點解唔入去搵呢, 個阿媽就講: 小朋友, 你仲細個, 到你大個就會明白. 嗰時我真係好唔明點解佢咁講. 到我老豆嚟搵我, 再回頭就已經唔見佢地.

我同老豆就講返呢排每晚都見到嗰三母子, 老豆問我見到幾耐, 我話都有成個星期, 開頭佢都好驚咁, 但係佢又同我講: 鬼節就係離咗世嘅人, 返嚟取祭品, 可能你頭先見到嘅就係返嚟取祭品的, 我話: 見佢地咁多晚, 都係靜靜地喺村口等, 會不會無人燒嘢比佢地㗎, 我老豆講, 都有可能㗎. 咁我問點算, 老豆話, 今晚係鬼節最後一日, 我地睇完神功戲去燒d衣紙比佢地啦.


後話: 如果無親無故嘅孤魂野鬼無親人拜祭, 我都覺得好可憐, 就好似現今社會, 弱勢人士得不到幫忙一樣, 所以有得幫就盡量去幫. 幫完人不必計較有無回報, 最重要係個心會舒服好多.

51 真係假得滯，邊有老細會講this is an order of

留名

51 真係假得滯，邊有老細會講this is an order of

Yes

巴打，你啲錯字會唔會太多

有幾個圍村傳說有聽過
利申阿媽係圍村人

留名
利申：半個圍村仔

終於live

Live左

Push