[轉貼/鬼故/一齊驚] 40年圍村佬真人真事

1001 回覆

898 Like 20 Dislike

第 1 頁第 2 頁第 3 頁第 4 頁第 5 頁第 6 頁第 7 頁第 8 頁第 9 頁第 10 頁第 11 頁第 12 頁第 13 頁第 14 頁第 15 頁第 16 頁第 17 頁第 18 頁第 19 頁第 20 頁第 21 頁第 22 頁第 23 頁第 24 頁第 25 頁第 26 頁第 27 頁第 28 頁第 29 頁第 30 頁第 31 頁第 32 頁第 33 頁第 34 頁第 35 頁第 36 頁第 37 頁第 38 頁第 39 頁第 40 頁第 41 頁

成功確認啪啪啪 2017-03-04 12:58:16

40. 水塘

聽我老一輩講, 喺佢嗰年代都有去幫手起大欖涌水塘, 好似係1951~1958年左右起好. 嗰時要興建咁大個水塘, 當然要好多人手, 咁政府當然會喺屯門元朗請人去做啦.

聽佢講, 嗰時d建築器材好鬼落後, 好多時主力會係人手, 所以工業意外好鬼多. 另外嗰時d鬼佬點會對華人好呀. 好多工人會透支至死, 加上嗰時醫療好落後, 聽講死嘅人都好多.如果你有屋企人都好d, 死咗有d補償, 但係你無親無故, 咁就求其葬喺山邊就算. 當個工程差唔多完嗰陣, 就要蓄水, 一蓄水就會將嗰d臨時墳頭沖爛, 連d骨沖左去水塘底. 所以d冤魂會喺水塘徘徊.

記得差唔多廿幾年前, 有次我地夜晚坐單車去個邊, 諗下捉d穿山甲, 貓頭鷹 (唔好話我地殘忍, 我地傳統背脊向天乜都可以食), 平日夜晚水塘真係好靜, 根本就無乜人行, 不過嗰邊會都會有燈, 但係好少.

差唔多去到大棠個陣, 見到前面有班人, 喺嗰到望落水塘, 唔通嗰度有大頭魚/龜? 咁我地八掛就去一齊睇吓啦. 點知乜鬼都無, 我個兄弟就問嗰班人睇咩啦. 但佢地無理我地.

咁我地就走啦. 又差唔多去到主霸嗰陣, 又見到班人又喺到望住個水塘, 今次我地又去睇下啦. 又係無野.

不過今次就發覺有d唔對路, 點解嗰班人有一兩個咁似剛才嗰班人既? 我心諗, 咦, 平日夜晚, 點解會無啦啦有兩班人喺到呢?

突然有個男人問, "請問今年係咩年呀...", 我兄弟就話玩嘢呀. 問今年係咩年. 跟住就聽到嗰班人講." 都唔知要等幾多年先走得" 聽完, 嗰時我地班傻仔都唔係好明, 但諗諗吓唔多對路啦. 咁我再留意吓嗰班人, 佢地d衣著好似唔係我嗰年代, 好似40~50年代. 死啦. 今次又撞嘢啦...點解會咁鬼黑㗎... 但我d兄弟一d都無發覺佢地唔係人.

我話我地不如走啦, 唔好阻住人地... 咁我地就返返轉頭, 一路行都無事, 當差唔多返到大棠嗰邊, 喺前面又見到頭先班人.....今次我d兄弟都覺得唔對路啦.咁唔好理咁多啦, 全速就走啦... 如是者, 我地喺返去屋企條路上, 足足見到嗰班人7, 8次, 好彩對我地無乜嘢...安全返到去, 咁就將剛才d野同d長輩講啦. 原來先知個水塘歷史....

成功確認啪啪啪 2017-03-04 13:09:49

41. 梧桐寨

雖然位置叫做大埔, 但其實離錦田就好近,  不過去嗰處都要行一大段路.喺夏天去就最好玩, 因成日落雨, 所以個瀑布特別大水, 不過嗰度成日都出意外, 好似係行山跌死同浸死.

所以我都係去過一次, 因我嗰邊長輩話好猛鬼, 叮囑我地唔好去, 怕有事發生. (細路仔點會聽大人講呀), 記得form one 嗰個夏天, 放暑假好鬼無聊, 就約4個同學仔去嗰邊游水啦, 雖然我地嗰邊都有個河背水塘, 但係去嗰邊好玩d,

當喺車路行入去都幾甘下, 行到身水身汗, 就立即沖落去玩啦. 嗰時原來都有另外一班大人喺到, 嗰班人有男有女. 我地就無理佢啦, 各自各玩... 可能早幾日落過大雨個瀑布好多水,, .

當差唔多玩咗唔夠一個鐘, 個天就無啦啦黑鬼麻麻, 好似想落雨, 我地見咁就不如早d走啦, 怕山洪暴發, (我地d新界仔, 真係見唔少呢d情況, 一落雨d水就會好大好急), 但係另外嗰班真係好似唔想走咁, 心諗, 可能係市區入去啦, 我地雖然細個, 但係對危險好敏感, 我地就同佢地講, 哥哥, 落雨啦, 唔好再玩啦, 唔係一陣山洪暴發就走唔切呀.  佢地聽到, 都覺得我地講得對, 咁就叫其他人上岸啦..

當個天越來越黑, 黑到好似夜晚咁, 就見到有個哥哥喺水到叫救命, 咁其他人就衝落水, 想拉佢上嚟啦, 但其中另一個又叫救命, 即係有兩個人同時喺個水到叫救命, 話有嘢拉住佢地隻腳, 我地幾個細路仔當然知道唔對路啦...

好彩, 我有個同學仔真係醒目, 佢將佢掛喺身上嗰粒玉拋去水嗰度, (比我就唔會啦, 比我老豆知道, 唔打死我就奇啦), 好奇怪, 拋完之後, 嗰兩個哥哥就好似無咩事可以游返上崖.

見佢地平安無事都好, 咁其中一個哥哥就問佢兩個咩事啦, 佢地講: 頭先喺水度有嘢拉住佢隻腳, 咁我地好八卦睇下啦, 見兩個哥哥隻腳有四條紅印, 應該講係瘀痕.. 我地嗰時就知道水裡面係有d野啦...

嗰班人就問我地點解咁醒目, 拋粒玉落去啦, 我個同學仔話: 老豆教落, 鬼好怕玉, 所以就拋落去..., 個班人千多謝萬多謝我地. 咁佢地都有心, 比返幾百蚊比我同學仔話賠返比佢. 我同學仔當然無要啦, 我地新界仔真係單純到暈....

當返到屋企, 我都唔敢講話去嗰度玩, 不過就跑去鋪仔打聽吓, 知唔知嗰邊有咩嘢啦, 聽返嚟好多版本, 有d話行山嗰d人喺瀑布頂唔小心跌咗落去慘死, 有d又話好多人喺嗰邊玩浸死. 不過最後都講, 唔好去嗰邊玩....跟住又講, 叫我地都唔好去荃灣曹公潭玩, 話嗰邊更加猛.... (點會去呀, 係荃灣呀, 係山後面呀, 坐車都坐好耐啦)

後話: 其實我個同學仔點解會拋粒玉落水呢, 原來佢本身就係天生陰陽眼個位, 之前d post 都有講過佢d嘢. 佢話有個女人喺水度拉住佢地, 所以危急就拋粒玉, 我就問返, 你老豆無鬧你咩, 佢話老豆無鬧佢, 仲話佢醒目. (如果香港人個個都學我個同學仔就好, 想起以前人與人關係真係好, 但依家就.....)

(──ﾉД`)) 2017-03-04 13:12:57

繼續睇

成功確認啪啪啪 2017-03-04 13:20:55

42. 青山

講返歷史, 屯門青山喺中國歷史都好耐, 傳聞喺三國時代已經有人註守喺嗰度. 另外是珠江出入口, 所以有d人講, 屯門可能比香港還早出現喺歷史內, 不過講真個青山真係無乜特別, 如果打仗就係好好嘅戰略地點, 所以英國人都叫嗰度係Castle Peak (堡壘山).

話說我老豆嗰代, 英國人喺嗰邊起咗個靶場及d軍用設施, 作用可能怕大陸攻擊香港啩,所以嗰處好多係軍用禁區, 所以唔係好多人會去嗰度. 另外聽我老豆講, 嗰d英國人係嗰度實彈練習, 佢地練習唔會學似依家會喺電台公佈, 所以好多時都唔小心炸到嗰邊住d人.. 我諗係以前近良田村, 或者住下白泥嗰d啦. 另外有聽講有d人去到嗰邊,唔小心比d未爆炮彈炸死.

聽我朋友個老豆講, 佢嗰時住喺紫田村, (近期最出名啦, 要清拆), 有時夜晚都會去靶場執d彈殼、炮彈殼去買,聽佢講, 賣得好好價錢...另外未爆個d價錢更加好.(即係賣軍火啦...)

聽佢講有一次, 佢地夜晚準備又去啦, 咁就由良田村嗰邊去, 聽佢講會好行D, 咁行到一半左右, 見前面好似有個英軍行落嚟, 嗰時就好驚啦. (始終華人都係怕鬼), 個鬼佬見到佢地, 又好似無乜野, 咁就行返轉頭. 唔通今晚又練靶? 但係又唔似喎, 都聽唔到D炮聲. 橫掂嚟咗, 不如上去睇吓啦.

但係一路上去, 個英軍又唔見咗, 算啦, 唔見好過見, 都係去靶場望望. 原來都無練靶, 都係快快手執d彈殼走啦. 但佢地去到做嘢嗰陣, 喺佢後面聽到有個人行過嚟, 佢地都唔理咁多, 可能第二班人上去啦. 咁就繼續做嘢. 突然聽到後面有把男人聲問 : 請問你地有無見到我個頭呀" 佢地擰返轉頭睇吓啦. 見到一個無頭斷臂嘅男人喺到...聽佢講, 嘩, 嗰時佢地嚇到死咁滯. 就係咁跑啦.

去到靶場入口, 見到頭先個英軍喺到, 咁就同佢講剛才見到d野, (我諗, 你地英文都唔識, 個英軍都唔知你講乜啦) 聽佢話係雞同鴨講... 但留心睇下個英軍...咦. 點解個英軍個肚好似有個大窿既... 唔係啩....連個英軍都係個d野呀...佢地都唔理咁多啦, 一路跑落山...最後安全落到山, 佢就跑去良田村個邊話報警啦. 不過諗下. 報警連自己都比差人拉啦. 加上警察一定唔信. 最後都決定無報警. 之後, 佢都唔敢再上去啦, 話見過鬼都怕黑喎

後話: 其實我都未去過青山靶場, 所以我都唔知真定假, 不過上網睇吓啦, 真係有個紀念牌喺嗰邊, 個牌寫住. "英國皇家特種部隊, 何諾軍曹, 在建造此道時, 不幸受傷身亡, 1972年5月15日"

鈦合金筆頭 2017-03-04 13:26:22

36. 生葬 (人柱)

後話: 好似喺九龍都有呢d建築物, 聽講係雷生春堂 (塘尾道, 荔枝角道交界), 真係唔好重建, 無穿無幹, 都唔好諗..

日日行過又唔覺得寒喎

冇用人柱嘛 btw 以前啲有錢估唔到咁撚核突

成功確認啪啪啪 2017-03-04 13:29:36

43. 大角咀 (一個同事講嘅故仔)

記得喺建築工程公司做嗰陣, 我有個同事由細住到大都係住喺大角咀嗰邊, (我都係去過幾次), 聽佢講住喺d舊唐樓, 位置近九龍殯儀館..嗰間野唔係好多人會幫親, 最出名就係李小龍喺嗰度出殯, 另外嗰邊係做五金行業, 一到夜晚就死城一個, 好少人會行嗰邊. 聽佢講嗰d舊唐樓, 成日都會有d古怪事發生, 點解釋都唔通嗰隻.

佢話喺嗰陣, 嗰邊有幾間戲院, 一間係麗華, 一間叫英京,另外嗰間叫金冠, 而金冠就最近九龍殯儀館.

有次佢老豆帶佢去金冠戲院睇午夜場, 其實嗰陣時午夜場係開9:30, 唔同依家11:00. 細路仔基本上點會識睇戲呀, 最鍾意睇戲有嘢食就真啦.

佢都唔記得係幾多點啦, 人屎急就要去廁所啦. 聽佢講, 個廁所好鬼陰森, (唉, 邊間戲院廁所唔陰森呀, 嗰時我地元朗有間叫同樂戲院更加陰森), 佢要開大, 咁就喺其中一格痞啦. 當佢開緊大嗰陣, 就聽到好似有個女人喺男廁度唱歌. (嗰個年代好似興唱國語歌), 佢諗, 唔通行錯入女廁? 佢都唔敢出聲, 怕比人當色狼就唔好啦. 點鬼知個女人唱咗好耐都唔停, 無理由等佢唱完㗎.

算啦, 當自己唔好啦, 加上佢都10歲左右, 應該無乜嘢啦. 佢就話, "唔好意思呀, 我入錯左女廁呀", 講完, 個女人就停咗唱歌. 然後聽到d腳步聲行近佢嗰格, 然後停咗, 最深印象就係見到個女人雙腳好白, 穿鮮紅色高踭鞋.

咁佢就話: 姐姐, 我真係唔知呢度係女廁呀. 我去完就走..點知佢一粒聲都唔出企喺度. 唔理啦.

等咗成分鐘, 心諗, 唔理啦, 咁就開門出去啦, 點知一開門, 只見到雙腳, 係無上上半身. 嘩. 嗰時嚇到佢暈咗. 當佢醒嗰陣時就喺老豆背脊度. 佢老豆見佢醒咗, 就問剛才發生咩事啦. 佢就一五一十講比佢老豆聽啦.

佢老豆聽完都話驚, 佢話見你去咗好耐, 就走去男廁度搵佢, 見佢暈咗喺廁所度, 咁就抱佢走啦. 然後講我以後寧願去麗華都唔去金冠睇戲.

後話: 聽完, 我就問嗰間戲院依家點啦, 佢話個間戲院跟住變咗專放三級片, 跟手就摺埋啦. (各位師兄, 我大角咀真係唔熟, 都唔知堅定流. 如果知道煩請告知)

成功確認啪啪啪 2017-03-04 13:39:01

44. 報復

記得我細個嗰時, 好多時都口不擇言, 有時無意間講咗d唔應該講嘅嘢, 另外有時會唔小心踢到人地拜神d供品. 最多人喺街拜神當然係鬼節前後.

話說有年, 我都唔記得邊年啦, 有晚踢完波就去水邊圍村食宵夜, 行到政府合署嗰邊 (如果有元朗師兄,就知我講個位置喺邊), 唔小心踢到人地拜完神d野, 我當時又無立即講"有怪莫怪, 細路仔唔識世界", 跟住就跟住大隊去食嘢..

食完就散, 坐尾班車返去, 嗰架54號, 尾班車最多得2~3個人, (嗰時元朗邊學似依家, d人好早訓, 更加少出夜街) 我習慣坐樓上最後嗰兩排, 嗰日樓上明明只得我一個人, 差唔多出元朗大馬路, 我聽到有個阿婆喺我後面講嘢. 我就擰轉頭睇下啦, 個阿婆見到我就用圍頭話鬧我啦, 話做乜唔比佢食飯, 又話唔比佢攞錢.. 嗰時我都唔知佢講乜, 但佢不停喺到講..我就怕咗佢落樓下坐, 怕佢有神經病.

咁一路都無見過阿婆無落車, 架車到總站, 我都唔見佢, 咁就同個司機叔叔講, 樓上有個阿婆未落車啦, 個司機聽完就上去睇下啦, 佢話邊度有呀細路!. 我諗唔通佢落咗車我無留意? 咁就唔理啦, 早d返屋企, 聽日要返學.

跟住嗰幾日就. 我晚晚發夢都夢到嗰日個阿婆, 都係講返嗰晚d野, 攪到我無覺好訓. 但係我都無諗到咁嚴重. 跟手就開始發燒, 嘔, 睇醫生都唔退, 斷斷續續病咗兩個星期, 我老豆見就話去博愛睇下啦, 驚有咩事. (我細細嗰陣元朗屯門無乜大醫院, 但係我聽d長輩講, 去親博愛, 打直入, 打橫出, 所以我老死都唔想去. 咁我老豆話唔通喺度等死咩, 所以都去睇下, 去到博愛, 要留院觀察, 醫生檢查唔出係咩事. 只係比d藥但係都無乜起色. 都係咁..如是者, 喺醫院又住左三個星期,

喺醫院期間, 都係發同一個夢, 我心諗唔係比嘢攪呀...無理由㗎.. 心諗會唔會
係嗰晚踢到人地拜神d野呢..

到第二朝阿媽嚟探病, 我就講返比佢聽, 可能我比嘢攪啦. 佢聽完..就喺個病房鬧到拆天啦, 話點解唔早d講...跟住問我喺邊到踢到, 我就話喺水邊村嗰邊..
我阿媽話: 你呀, 病好咗要去嗰邊拜神呀, 知唔知, 我嗰時乜都話yes啦.

嗰晚訓, 就無再發同一個夢啦, 到第二朝醫生巡房, 話我d燒退晒, 不過睇埋聽日, 無事就出院. 我聽到真係開心到流眼淚啦.

到第二日再巡房醫生就話可以出院, 我阿媽接我出院, 唔係立即返去, 而係去水邊村嗰邊拜神, 我媽要我跪喺到拜神. 嗰時我都覺得應該, 只怪我唔小心咩..

返到村, 又喺村口土地公度又拜, 我乜都做啦. 唔怕咩....

後話: 呢個係我見咁多, 搵我報復的一個. 不過都係自己唔好在先.. 對唔住阿婆, 我嗰陣真係唔小心, 有怪莫怪, 細路仔唔識世界, 你大人有大量.

唱k大波仙 2017-03-04 13:46:44

陣間可能會有人屌你唔放link，侵犯版權

成功確認啪啪啪 2017-03-04 13:52:48

45. 土地公

喺我阿爺嗰年代, 我條村d女人, 好多都係喺出面嫁入去, 嗰時元朗交通真係方便到你唔信. 所以d女人多數係元朗, 屯門, 上水, 大埔d人.. (其實我出世個年代都差唔多啦)

如果你娶到個係九龍及香港住. 嘩, 真係光宗耀祖..如果係鬼婆更無得頂啦. 但係, 喺出面嫁入去, 好多時文化, 習慣都同鄉村人唔同, 加上嗰個年代, 讀過書d人真係少之又少. (所以依家都被標籤為野蠻人...唉)

話說差唔多70~80年前左右, 我條村有個兄弟放洋回來, 佢老哥喺我條村都好有地位(族長嗰房人), 喺英國留學回來並娶咗個女人回來(可能係同學啦), 聽老豆講 (嗰時我老豆都好細個), 個女人好似喺香港嗰邊住, 都有d家底. 加上讀過吓書..所以比我條村d女人識好多嘢..應該講係比成條村d人識嘢...

有一晚, 喺祠堂出面好嘈, 我老豆去睇吓咩事啦, 原來嗰個女人入咗祠堂, 比d長輩鬧啦, 個女人都鬧番佢地轉頭 (嗰時女人係嚴禁入祠堂㗎, 我都唔明白我地d中國人點諗.., 你睇依家咪成日有女人行入去..)

咁放洋嗰位兄弟, 當然say sorry, 話佢老婆唔知規矩, 但係佢老婆都唔係人咁品呢.. 喺到話我地成班牛屎, 鄉下佬等啦..., 咁全村d男人聽到當然火都嚟啦. 聽我老豆講, 當時有個男人就係佢後腦打咗佢一嘢, 然後就見個女人訓低咗..

咁嗰位兄弟第一時間睇下佢老婆, 見佢無晒反應, 就喺到鬧啦, 問邊個打佢老婆....(邊會有人認呀..) 可能嗰嘢真係好大力, 之後見到個女人都好似唔同晒, 平時巴巴啦啦, 依家就唔多出聲, 但係日復日就知佢俾人打傻咗, (所以我都憎d扑頭黨) 過咗一排更聽到佢跌咗落個井死咗..

到過左七七嗰日朝早, 成條村就好嘈, 話有人喺村口上面掛臘鴨(吊頸), 聽到d村民講, 死嗰個好似就係打個女人嘅人....當時差佬調查後都話佢自殺 (嗰時差佬多數唔會理村d事), 並無可疑. 咁又過咗一排, 今次就到佢老公吊頸.. 位置一模一樣..

今次就嚴重得多啦, 連續死兩個人, 嗰時村長認為係個女人返嚟報復, 所以請d道士做法事.. 希望平息一下..

但係不幸事就不斷發生, 今次就到個女人個老爺....聽到呢到, 我都話好猛呀... 唔通要佢成家人死晒先安樂..

繼續聽我老豆講, 話阿爺唔知邊到搵咗個阿伯返嚟, 嗰時成條村都識呢個阿伯, 當時我老豆太細, 佢就唔識係邊個啦. (後來就知道個阿伯係個高人, 佢專幫人睇風水山地), 佢老人家講, 話我地條村陰氣很重, 加上有人做埋d傷天害理既事, 所以怨氣都好重.....

所以就建議兩件事, 一係就將村口嗰棵榕樹斬咗佢, 話佢擋住d陽氣入村, 一係就起個土地廟鎮住d野... 村長當然唔會斬樹啦, 因我地成條村d人都契咗比榕樹. (我都一樣, 可能想我地好似榕樹咁, 長命百歲啦), 所以就起咗個土地廟..之後日子就無再發生過事. 所以我地條村都好尊敬土地公. 每年過時過節都會去拜神.

後話: 聽我d長輩講, 土地公公唔係樣樣都鎮, 佢覺得係報應嘅事, 佢點都唔會幫, 所以做人, 唔好做d傷天害理嘅事, 唔係邊個都唔會幫你.

凍檸啡 2017-03-04 13:55:15