春泥
2019-07-11 01:00:57
Chapter 14 請求
布正麗對蔣天誅的背景及事跡略有所聞,所以她知悉阿興居然與這位教父級的黑道人物有所聯繫亦著實嚇了一跳,而當來到蔣天誅的家,瞧見阿興這樣毫無忌諱去與蔣天誅說話,也著實替他抺一把汗。
蔣天誅愕然道:「你要我幫你阿哥?究竟係咩一回事?」
站在一旁的布正麗擔憂阿興在言語上得失蔣天誅,又害怕他把事情交代得不清楚,於是她便把一切娓娓道來。
蔣天誅看著與阿興一同前來的少女外形亮麗出眾,而且還覺得對方與亡妻年輕的時候有幾分相似,他怪責自己當遇到一些長相特別漂亮的女人時,總會覺得對方或多或少擁有亡妻的特質。
布正麗說畢後,蔣天誅問道:「妳叫咩名?妳同老虎仔係咩關係?」
「我叫布正麗,係阿興個大哥,即係成皇志嘅朋友,成皇志係依件事上,其實無做錯到,我地今日嚟都唔係想追究啲咩?我地知道天誅公係蔣天殺先生嘅大哥,既然蔣天殺先生都唔打算再用成皇志,希望你可以勸喻佢同成皇志無條件解約。」
蔣天誅想了想,然後搖頭道:「我已經不問世事,你朋友得罪咗唔應該得罪嘅人,佢執返條命算係咁架喇!天殺咁做有佢嘅道理,始終佢上面有生意,佢唔做返啲野畀個交代官幹,隨時會畀人為難。」
阿興插言道:「我阿哥只係阻止個鹹濕佬搞個女仔,嗰鹹濕佬犯咗法,阿哥仲畀佢打成咁。」
蔣天誅道:「老虎仔,你仲係細,好多野都唔知,依個世界係咁架啦!誰大誰惡誰正確。」
布正麗道:「天誅公,聽人講江湖中人裡面,你份人就最公道、最義薄雲天架喇!成皇志係依件事上面好冤枉,唔通你覺得因為對方財雄勢大,佢應該袖手旁觀睇住自己朋友畀人強姦咩?」
蔣天誅道:「靚妹,妳唔駛畀高帽我戴,個個嚟讚我幾句,就要我幫手,我咪好唔得閒。成件事係你朋友不自量力,去強出頭,怪得邊個啊?」
阿興怒道:「伯伯,你有無搞錯?當初你救咗我同榮仔,我仲以為你係好人,點知你咁是非不分,我成家興無你依啲朋友,我唔會再同你捉棋。」
「阿興,你唔可以對天誅公咁無禮。」布正麗轉向蔣天誅道:「天誅公,我知道我地嘅請求,對你嚟講好為難,但係如果你唔幫成皇志,無人可以幫到佢,佢依家咁難得先做出咁嘅成績,如果畀人雪藏咗幾年,無人會再記得佢架喇!」
蔣天誅搖頭道:「你地走啦!我只係一個聞到棺材香嘅老人家,只係想過多幾年嘅好日子,出面嘅事我唔想理,亦都唔論到我去理。」