是咁的，照顧過我嘅護士死咗 完

支持支持

就喺我同媽媽嘈到天昏地暗，公說公有理，婆說婆有理嘅時候，我地嘅鐵閘就被人用力拍打，發出低沈嘅金屬聲。

「金！伯母！」啪啪啪。係阿連把聲。

我地兩個一時休戰，我出去開門，就見到阿連成個人慌哂咁。

「阿金！有無睇連狗呀？」

「我都未買新電話。」

「唔好理咁多住喇，快啲同伯母落街掃貨啦。」

我聽到一頭霧水：「掃乜貨？」媽媽都好奇行咗埋嚟。

「超級肺炎爆咗喇，依家連狗討論區好多個post都講緊呀！」

媽媽黑人問號咁嘅樣：「咩超級肺炎呀？新聞都無報。」

「係囉facebook同啲網媒都無新聞出過喎。係咪連狗啲人危言聳聽咋？」

「唉你自己啦！」阿連遞咗部手機畀我。

我上網睇新聞，但所有官方媒體都無任何關於依種病例喺香港爆發嘅訊息。

不過連狗討論區已經好多人開post話有親人中咗超級肺炎，仲有幾張心口發黑嘅相，話香港已經爆發咗，但政府將所有媒體嘅報導㩒哂落嚟。

我頓時記起大約個幾星期之前，林林生日嗰日喺救護車上問啲救護員做咩咁攰嘅事。佢地由凌晨到朝早不停送老人家同小朋友，而個個病人都咳到出哂血，鎖骨至胸口嘅範圍發哂黑。

同啲相展示嘅畫面不謀而合。

即係⋯⋯政府個幾星期之前已經知超級肺炎傳咗入香港。

「頂你個肺，又好似當年沙士咁封鎖消息。」人類總是要犯同樣的錯誤，當年大陸政府將疫情消息封鎖先會導致病毒傳入香港。

當日大雄有提過十八子話中國有人確診超級肺炎，但之後就無哂相關新聞⋯⋯

今時今日估唔到連香港傳媒都被落封口令，如果唔係有唔受監管嘅討論區傳播消息，真係死咗都唔知咩事。

雖然口話唔睇落去，但都係會繼續睇
偽毒金加油

「係咪有人惡作劇呀？」

媽媽仲係好懷疑，佢平時只會睇cctvb新聞，連網都唔多上，加上佢生活嘅年代香港傳媒仲有公信力，應該好難相信今時今日爆發疫症都無人報。

「趁未係太多人信，我地落去掃定啲生活用品同食物先。今次隻超級肺炎好勁，香港隨時變疫埠架。」阿連真係好驚青，騰哂雞咁。

「有無咁誇張呀？」

「嬰幼兒同長者致死率係百分之一百，成年人都有三成機會死呀！唔講得笑架，行啦！」

媽媽被阿連說服咗，入屋拎銀包著外套。

而我，突然心跳加速。

我一手拍落阿連膊頭借力先企得穩。

唔⋯⋯唔好⋯⋯

「阿金？做咩面都青埋呀？」

「你啱啱話⋯⋯咩人嘅致死率係百分之一百話？」

「嬰幼兒同長者呀。」

我用阿連嘅手機打電話，嘟嘟、嘟嘟、嘟嘟、嘟嘟⋯⋯無人聽。再打，都係無人聽。

媽媽著完鞋走出嚟：「行喇行喇，去買野。仔？你做咩？」

「⋯⋯你地去買野，我要去醫院。」

「痴線啦咩時勢呀仲去醫院！」

「我去拉十八子走呀！佢小兒科架！一定有份照顧中咗肺炎嘅bb，如果佢咩都唔知實會中招！」

「打電話咪⋯⋯啊！」

阿連頓時明白我啱啱打畀邊個，即刻塞咗個口罩畀我戴叫我快啲去。我拎住佢個手機就衝咗出去，不停打電話畀十八子。

仲係唔聽電話⋯⋯佢實係做緊野，激死！

「司機，廣華醫院！快！」

唔係吓話？啱啱先為林林喊餐飽，依家又十八子...
唔好啦金仔，求下你 唔好咁殘忍
或者乾脆殺左偽毒金，比佢同林林團聚算喇

十八子

唔好死啊

金仔係咪真係要改名做照顧過我既都死撚晒先安樂

無人信我依個故係happy ending

未開始追呢個post都要鬧樓主
最衰都係你 琴晚食住night food追post係到有沙入眼
都係做呢行好有代入感

淨係林林已經sad end左一半

直接改做除咗主角冚家剷都得喇

之前話過仲有一個人會死 而死唔死會影響結局
會唔會係大雄死 搞到十八子為咗佢唔同金仔一齊

原來林林都鐘意金仔
十八子唔好有事

次次都冚家鏟悶唔悶啲

我飛的去廣華醫院嘅途中，以最快速度睇哂有關超級肺炎嘅整合懶人包。

超級肺炎會經飛沫傳播，咳嗽同打乞痴嗰陣見到同見唔到嘅口水花都好，只要接觸到人體任何黏膜都會傳染到。

潛伏期係七到十日，起初會有傷風咳嗽症狀，鎖骨至胸口部位會開始泛灰。隨住時間過去，患者會出現高燒、咳血、昏迷嘅情況，胸口亦會由灰色慢慢轉黑，發出腐肉臭味。

嬰幼兒同長者會喺潛伏期完結後兩三日內急速惡化，胸部全黑，肺部大量內出血而死。

嬰幼兒同長者致死率係一百，而成年人有七成機會救得返。

去到醫院，我戴起口罩就急急腳衝入去，喺極多人嘅走廊以最快速度走向小兒科病房。

病床佔用率超過負荷，有病人要坐凳，仲有人頂唔順坐喺地上。

好多病人不停咳，見到佢地嘅心口泛起灰色。亦有人太辛苦就地失禁，周圍都有屎尿痕跡，醫生姐姐清理完一邊又要跑去另一邊幫手清潔。

即使戴住口罩都聞到醫院內嘅腐臭同屎尿味。

霎時間，依個場景令我諗起當年讀歷史嗰陣見過嘅鼠疫同義祠示意圖。點解香港嘅醫院會淪落到好似一八九四年嗰陣咁嘅樣？

順帶一提當時嘅鼠疫都係廣州傳落嚟香港。

我盡量貼信牆行避開匆忙嘅醫護人員同病人，快步行去小兒科病房。

一到步，就見小兒科護士空群出動，睇嚟連本身夠鐘放工嘅人都要繼續留喺度做野。

我喺病房內搜索十八子嘅身影，終於見到佢，啱啱幫個小朋友打完針。

十八子要處理用完嘅針筒同拎新藥過嚟，急步走出病房嘅時候見到我。

「薯片？點解你會喺度架？」

我咩都無講，就捉住佢隻手走。

「喂！喂喂喂！咩事呀我做緊野呀！」

真係冚家剷

都話係happy end唔係冚家鏟

答應大家只會死多一個人，而且結局係sweet你

仲要死多個

十八子個男朋友

上個post唔夠正皮救唔到嗰個

死老母？

阿連+金仔

十八子知道唔可以同我鬥力，因為咁又會搞到我骨折。

「魏牘金！停呀！話我知咩事先啦！」

「超級肺炎喺香港爆發咗，我嚟帶你走架！」

「停！！！」十八子好大聲咁命令，我亦即刻停低。

「邊個同你講架？」

「連狗已經個個post都講緊。」

「連狗班友你都好信嘅？有人講支爆講咗十幾年㖭啦。仲有呀，新聞都無報。」十八子忍唔住扮連狗公仔喺度笑。

「靠傳媒死得啦！依家啲報紙已經封鎖哂相關嘅報導喇！」

「有無咁誇張呀？」十八子非常質疑我嘅講法。

「我唔係同你講笑架，你唔覺今個星期醫院多咗好多病人咩？你有無照顧過一啲個胸灰灰地色嘅小朋友呀？」

「有，啱啱嗰個都係啦。」

「係超級肺炎嘅初期症狀嚟，睇落好似普通傷風感冒，會咳。之後胸口會愈嚟愈黑⋯⋯咪住⋯⋯點解你會唔知嘅？」

我突然發覺有啲唔協調嘅感覺。

「我都無睇連狗好多年啦，都話嗰陣見到啲網民鬧阿⋯⋯」

「唔係呀。你無睇啫，大雄呢？」

十八子一時語塞，對答唔到。

「佢咁關心你，之前一有新聞就即刻同你講，有咩理由佢睇到咁大鑊野唔同你講？」

十八子視線想移開，但我用雙手將佢嘅頭固定。

「你係前線人員，佢無理由知道超級肺炎爆咗都唔同你講。」

佢輕輕力將我雙手捉住，放返落嚟。

「⋯⋯對唔住呀薯片⋯⋯我呃咗你⋯⋯」

呃我？

「其實我⋯⋯同大雄已經分咗手。」

「做咩要呃我？你換畫好平常之嘛。」

「咁我見你心情咁差唔想影響你吖嘛！我同大雄拍多過一個月，你會覺得我係認真，你會覺得我同佢分手會唔開心，我唔想你擔心我同更加唔開心吖嘛，咪呃住你先囉！」十八子眼泛淚光咁講。

原來十八子嚟我屋企過夜，咁多日不停照顧我，並唔係無同大雄嘈交，亦唔係大雄無怨言。而係嘈到分咗手，所以十八子唔會再聽到佢嘅怨言。

為咗我⋯⋯連自己真心鍾意嘅男仔都可以反面。

依個女人⋯⋯真係無論幾時都照顧緊我嘅感受，搞到我有少少感動。

但依家唔係感動嘅時候。

「依啲遲下先再講啦，請假先啦，超級肺炎殺到嚟喇。」

我想捉住十八子隻手，但佢縮開咗。

而佢露出嘅表情，我從來無見過，係前所未見咁堅定。

「如果真係殺到嚟，我更加要留喺度。」

因為，我係一個護士。