夏舞
2019-02-13 21:53:03
*
第二日,我同穆爾泰喺教堂準備。
白寧並無罷休,再三咁不停騷擾我纏繞我,係都話要跟埋去。
「我要去!小凌!我要去!」白寧死命扯住我手臂。
「今次太過危險,我驚你會出事。」我嘗試鬆開佢隻手,可惜唔成功。
「我唔驚!無我喺度我先驚你會出事!」
……無你喺度我先唔會出事下話?
「夠喇!」
我用力甩開佢隻手,然後輕輕拍一拍佢個頭。
「下次,下次我會帶你去。」
白寧呆咗呆,如同聽話小貓乖巧咁望住我。
「你講㗎!下次唔可以再掉低我!」
「嗯。」
我同白寧道別之後,行到穆爾泰身邊。
「講完拜拜?」穆爾泰問咗句。
「嗯。」
「真係諷刺,依家嘅你竟然好似當日若兒咁。」
「……的確有少少似。」
我同若兒都帶住一個不知天高地厚,永遠唔聽人講嘢嘅頑劣徒弟。
「出發喇。」
之後,我同穆爾泰去到阿瞳屋企門口。雖然出面睇落與一般別墅無異,但裡面存在住非常強大嘅靈體。