【狙魔人】我係一個驅魔師，專幫人驅散妖魔鬼怪（二）

係咪比埋隻腳佢

Push

魔鬼？

諗法唔錯

呢個係我唯一會日日追嘅估 以前我都係儲一頭半個月一次過睇 但螺絲巴打真係好撚勁令到我追故

多謝你 其實最初選擇呢個題材 出故之後對比之前出過嘅故 發現反應無想像中咁好
不過係自己鍾意嘅野 所以有人鍾意睇已經好開心

Btw我依家叫夏舞 螺絲已經過去

其實若兒點解勁左咁多

睇住80同0仔啲曖昧真係忍唔住淫笑
古神篇聽落好期待

如果可以嘅話，希望呢個故可以再出耐啲

有解釋架
一、若兒其實係怨靈（呢個其實有好多伏筆，如果唔明再解畀大家聽）
二、佢食晒所有山魅嘅靈魂（若兒嘅記憶）

加上天魔試圖吞若兒時，俾若兒吸咗一部分能量
同埋天魔本來受到好多致命傷，所以顯得若兒咁勁

其實按本來鋪排都差唔多 我都好鍾意佢哋兩個

不過好多超自然嘅嘢都未講，完咗故之後應該會出個新po講下（偽）科學，繼續喺度同大家吹下水 可能得閒無野做就寫下外傳

hi啱啱追晒
加速

「佢掉晒啲觀音像同神櫃，然後訂製咗個雕像拜佢。嗰個咩所謂神明樣衰到死，唔講以為俾人打扁咗個鼻都算，老嘢仲要我哋起身又要拜佢，食飯又要拜佢，瞓覺都要拜佢！」

阿堯突然超大力拍咗下檯，嚇到成個café嘅人都望過嚟。

「你話，佢係咪雷啊？」阿堯仲要好大聲咁講。

我覺得你雷啲。

「咁之後呢？」我無在意周圍嘅人反應，專注喺阿堯身上，「你話你媽媽同家姐都奇奇怪怪，意思就係佢哋都信埋一份？」

「梗係唔係，最初佢哋都覺得老嘢誇大過頭，依家廿一世紀仲邊有人咁迷信？本來應該係咁……」

阿堯合埋眼睛，深深吐出一口氣。

「但之後有日，女老嘢唔知點解無啦啦信埋一份，跟住過咗幾日連我個白癡家姐都信埋一份，話拜多啲咩GDP都會高啲……」

聽到GDP，我差啲忍唔住噴咗口咖啡出嚟。

佢應該想話GPA。

「但如果阿瞳拜神嘅目的係為GPA，咁佢點會想quit u？」浩然不解咁問。

「我點知佢？可能佢拜到傻咗掛？」阿堯聳一聳肩。

「咁你又唔拜埋一份？」

「癡線，老嘢話拜得多可以導我向善，唔再黐埋我班friend度，我睬佢都有味！」

……喔？

睇落並無特別嘅理由，但直覺話畀我知係關鍵。

「總之依家成家人都奇奇怪怪，日拜夜拜，拜嗰陣仲要講一大段akekalabibibaba，拜到好似俾傳銷狗洗咗腦咁。」

「其實會唔會係你諗多咗，拜神呢啲傳統文化喺依家社會都好普遍，佢哋只係覺得值得信奉先會咁做啫？」Shelly問。

「咁你又覺得你個friend，即係我個白癡家姐quit u唔正常？」

駁唔到。

雖然阿堯睇落個樣MK，詞彙知識又貧乏，但關鍵時個腦又轉得幾快。

「總言之就係咁，如果你係真材實料嘅驅魔師就去搞掂返你個friend，我唔想日日都要去friend屋企屈蛇，就咁。」

阿堯講完之後，就轉身離開。

「白寧。」我叫一叫白寧。

「收到。」白寧企起身，拉住阿堯件衫領，「咪走住，戇鳩仔！」

阿堯呆咗咁望住白寧，眼眉開始抽搐。

「喂……你知唔知你同緊邊個講嘢？你夠膽講多次！」

「嗯？」白寧一臉不解，「講多次咩？戇鳩仔？」

炸彈即將引爆。

「哈哈……我出去撈咁多年未試過有人咁樣話我……」阿堯握緊拳頭，「睇嚟你唔識『死』字點寫。」

「戇鳩仔，戇鳩仔。」

「你就戇鳩！戇鳩婆！戇鳩婆！」

原來事情係咁樣發展，真意想不到。

喺佢哋互相戇鳩戇鳩嘅時侯，我行到阿堯面前。

「你要委託我幫你家姐無問題，但我要報酬。」

「吓……？」阿堯不可置信咁望住我，「佢唔係你個friend㗎咩？」

「咁又點，我係驅魔師，要我幫手就要報酬，如果無就係咁先。」

我向café門口行去。

「喂！等等！」阿堯叫停我。

我背住阿堯，偷偷壞笑一聲。

委託成立，又有新工作。

呢篇係本來尋晚更嘅下半part 依家補返
今晚繼續

加緊

笑撚死 屌你係咁叫人戇鳩仔

我返屋企準備好驅魔工具之後，就由阿堯帶我哋去佢屋企。

「小凌！我哋都要去！」Shelly拉住我講。

「唔得。」我堅決反對，「跟住落嚟唔知會發生咩事，我唔可以俾你哋冒險。」

「放心喇！有我喺度，一定唔會有問題嘅！」白寧拍晒心口咁講。

「其實你先係最大問題。」我輕嘆一口氣。

前往阿瞳屋企路上，阿堯一直默不作聲行喺面前，我哋跟喺佢身後。

「小凌，神靈係咪真係存在？」白寧問我。

「存在，但又唔存在。」

「……係咩意思？」

「希臘神話、埃及神話、印度神話……世界各地神話記載神明曾經存在，而呢啲神話衍生出嚟嘅秘教，例如信奉希臘神明嘅赫爾密斯主義，信奉埃及神明嘅泰勒瑪，都存在召喚神靈嘅儀式。」

呢個儀式就係若兒同龐亮曾經用過嘅儀式嘅正確版——降神術。

「但後世嘅人雖然召喚到魔鬼，但從來無成功召喚到神靈。」

「點解嘅？」

「原因至今唔明確，但推斷……神靈已經滅絕。」

「滅絕……？」白寧非常驚訝，「神靈唔係應該好強大嘅咩，點解會滅絕嘅？」

「有無聽過『吸引力法則』？」

「無喎……係咩嚟㗎？」

「思想對現實事物會產生吸引力，例如你打麻將差隻紅中就食大三元，當你心中期待下一隻摸到嘅牌係紅中，抱持呢個正面想法，下一隻牌就會摸到紅中。」

「即係心想事成？」

「嗯。」

想法會化為能量，影響現實，呢個係吸引力法則背後嘅理論。

吸引力法則係New Age一個核心概念，如果要探討其實可以追溯到古希臘哲學家柏拉圖講嘅唯心論，思想先於物理形態，不過呢個後話。

雖然心諗紅中摸到紅中，呢個想法影響現實物理嘅諗法可能過於浮誇，未必個個認認同，但思想會化為能量影響現實確係事實——

比喻話，詛咒就係其中一種，而信仰亦係另一種。

「當你信奉某個神明時，不知不覺間就會釋出能量傳遞畀神明。一個人嘅信奉或者微不足道，但一百萬人、一千萬人信奉嘅能量會非常強大。」

「咁……」白寧依然一頭霧水，「呢樣關神靈被滅絕咩事？」

「無人信仰嘅神靈，就會失去能量支持，而除咗東亞一帶神話，世界各地神話都喺漫長嘅歷史中被基督教催毀。」

「因為無人再信奉佢哋，所以佢哋就被滅絕。」

「前提係，如果神靈係需要信仰先可以存在嘅話。」

唔經唔覺，我哋到達一間別墅面前。

原來阿瞳屋企係咁有錢。

「兩隻老嘢同白癡家姐應該喺屋企。」阿堯拎出鎖匙，打開大門。

一推開門，裡面卻一片昏暗。

「搞乜鳩啊……日光日白閂晒窗簾，又唔開燈。」

「阿堯等陣。」我拉停阿堯，「我行先，你跟喺白寧隔籬。」

「哦……」

雖然阿堯話佢屋企人只係瘋狂崇拜神靈，但眼前情況並唔似咁簡單。

死寂一片，空氣凝結。

有種異樣嘅壓迫感，好似一入屋就被盯上。

我手放入落褸袋，壓低身姿，放輕腳步，慢慢行入大廳。

叮、叮、叮——

如同敲打玻璃杯嘅響聲從屋內傳出，接踵而來係音樂嘅聲音。

節奏低沉緩慢，旋律偏向高音，但聲音並唔清脆，好似用參差嘅木管同木製結他彈奏出嚟，拍子卻伴隨與之不夾嘅清脆玻璃敲打聲。

前奏過咗十零秒，一道不男不女，尖銳而沙啞嘅聲線開始隨唱。

「你睇，又唔知播埋啲咩歌——」

「殊。」我食指放喺嘴巴，示意阿堯收聲。

我並唔擔心瘋狂崇拜神靈嘅阿瞳佢哋，但偽裝成神靈嘅靈體卻值得警戒。

有唔少妖魔鬼怪會偽裝神靈，以此誘惑人類。

我一步一步行入去，見到漆黑之中有幾支蠟燭擺喺飯檯同茶几上。

「小凌？」

喺燭光背後，有道模糊嘅臉容。

「你點解會喺度？」

就算望唔清對方臉容，憑聲音已經認得出係邊個。

然而，對方嘅語氣陌生得令我不寒而慄。

「阿瞳……？」

「你係嚟信奉我哋偉大嘅神？」阿瞳雙目無光，彷如失去靈魂嘅木偶。

但同被怨靈附身又有啲唔同，阿瞳無失去意識，亦無俾任何靈體附身。

佢並唔係被操縱意識，反而更似係被洗腦。

「嚟喇小凌！嚟崇拜偉大嘅神……」阿瞳一步一步慢慢行過嚟。

嗰位所謂神靈嘅靈體唔喺呢度。

「我哋要將對方本體搵出嚟——」

忽然，有對手從後捉住我。

「信奉我哋偉大嘅神啦！」

「阿堯……？」

阿堯從後將我抱住，呢刻嘅佢面無表情，語氣變得非常陌生。

「嚟喇……嚟喇……」阿堯雙手愈嚟愈用力。

真係麻煩。

我捉住佢隻手俯低身，用屁股升起佢個人將佢嘅重心轉移，然後再一嘢將佢向前撻落飯檯！

喀嘞！飯檯上蠟燭被掃跌，我即刻將蠟燭踩熄。

突然，額頭一片刺痛，意識受到侵襲。

「小凌……」若兒忽然出現眼前。

「若兒……？」

「好耐無見喇，你有無掛住我呀？」

已經完全消失喺呢個世上嘅若兒，再次出現喺我眼前。

「Ah Puch大人真係好勁，佢竟然可以令我死而復生，再次企喺呢度。」

原來係咁。

佢並唔係附體他人，操縱他人意識，而係針對人心脆弱之處，然後給予對方援手。

一旦人最脆弱嘅地方被揭開，意志就會變得非常薄弱，而之後只要給予安慰，就好容易操控到對方嘅諗法。

不過呢招，對而家嘅我無用。

我伸出手向前一撥，虛假嘅若兒如同流水倒影散去。

「點解……點解你唔肯接受Ah Puch大人？」

阿瞳同阿堯企喺飯檯前面，但表情變得異常猙獰。

「小凌，點解……」白寧嘅聲音從身後傳嚟，「Ah Puch大人……？」

唔通……連白寧都被對方洗腦？