【狙魔人】我係一個驅魔師，專幫人驅散妖魔鬼怪（二）

「你……話咩話？」白寧一臉愣然。

「你無聽錯，我會放棄做驅魔師。」

「點解……？」

「最初我做驅魔師係為咗陪喺若兒身邊，之後我做驅魔師係為咗贖罪同報仇，但如今呢一切都唔存在。」

所有事情已經了結。

「所以，我再無理由再繼續去做驅魔師。」

「師父唔做驅魔師嘅話……咁諗住做咩？」

「唔知，可能……做返個平凡人，重新去搵自己想做啲咩。」

「咁……」

白寧欲言又止，我哋互相沉默對視。

過咗陣，白寧彷似鼓起勇氣，將下半句講出嚟。

「咁師父可唔可以……係為咗我繼續做驅魔師？」

「為咗你……？」我腦海一片困惑。

「我……我唔係有咩特別意思，只係……」

白寧唔知點解臉頰羞紅。

「我同師父，就只有驅魔呢樣嘢連繫住我哋。如果師父唔做驅魔師，咁以後……就無人教我驅魔……」

「仲以為你想講咩。」

「以為……我想講咩？」白寧既吃驚又氣憤，「我好認真㗎！」

「放心。」我拍一拍白寧個頭，「我係話唔再做驅魔師，但暫時會繼續做落去，同埋就算我唔再做，我都會繼續教你驅魔。」

「即係……師父你終於承認我係你徒弟？」原本一臉憂鬱嘅白寧頓時雙眼發亮。

「……師父你個頭。」我摸摸下，一嘢大大刀拍落去。

「哎呀！」白寧眼泛淚光撳住個頭。

「仲有，你無必要係咁叫我師父。」

「師父……」白寧又一臉無辜，「你要逐我出師門喇？」

「收返起你個死人樣先，我意思係——」

「師父你終於承認我係你徒弟喇？」

「就算唔承認，你都會繼續騷擾我，承唔承認有意思咩？」

「Yeah！太好啦，師父終於認我係佢徒弟！」白寧興奮到跳起嚟，「咁師父你想我點叫你好？叫返你凌先生？」

「你又唔係我委託人。」

「凌仔？」

「……撩交打？」

「咁我應該叫你……」

白寧歪一歪頭，睜大水靈嘅眼睛。

「小凌？」

「……你鍾意。」

我急步向前行，將白寧撇甩身後。

「小凌！等埋我啊小凌！」白寧邊追住我邊大叫。

若兒，睇嚟我仲要繼續做驅魔師，教導呢個傻妹去驅魔。

就好似嗰陣嘅你對我做過嘅一樣。

＊

下個禮拜陸續有好多project，所以我同Shelly佢哋基本上日日上完堂都留喺自修室繼續做project。

但呢幾日阿瞳都係無返學。

「阿瞳仲未搞掂佢細路咩？呢幾日都唔返學嘅？」我邊做project邊問。

「我都唔知，whatsapp佢又無人應。」Shelly答。

「你試下打畀佢問下？下個禮拜就要present，到時佢嚟唔到就大鑊。」浩然話。

「打過啦，今朝先打完，無人聽。」

「咁奇怪？」我驚阿瞳可能係出咗啲咩意外，「我試下打。」

我拎出電話打畀阿瞳。

嘟——嘟——

嘟——嘟——

「……喂？」電話接通咗。

「喂？阿瞳，做咩呢幾日唔返學，下個禮拜要present喎。」

「哦，無嘢呀。」

「係咪未搞掂你細路？」

「我細路……係呀，佢真係好麻煩，如果你見到佢嘅話同我講聲。」

「哦……你聽日會唔會返學，如果你太忙我叫浩然做埋你嗰part。」

「唔使喇，我最近諗通咗啲嘢。」

「諗通咗……？」

唔知點解覺得阿瞳講嘅話有啲奇怪，可能要Shelly同浩然先明。

我開咗擴音，示意Shelly同浩然一齊過嚟聽。

「我以前讀書係為咗搵多啲錢，報答返爸媽養育之恩，但我發覺係錯，因為我發現咗另一樣更值得我投放精神嘅嘢。」

我、Shelly、浩然面面相觀，唔明阿瞳究竟想講啲咩。

「所以我會退學，唔會再返嚟做project。」

雖然唔明白，但大家都感到奇怪。

阿瞳呢個決定，實在太過突然。

「喂，阿瞳！」Shelly對住電話大叫，「你講嘅究竟係啲咩？」

「嘿嘿嘿……」阿瞳發出同佢唔夾嘅低沉笑聲，「你過嚟我屋企就知……」

咔嚓——

阿瞳講完呢句話之後就收咗線。

「喂，阿瞳……係咪有啲唔妥？」Shelly呆咗咁問。

「阿瞳平時好著緊學業，點會無啦啦話唔讀就唔讀？」浩然答。

「我哋不如去佢屋企睇下佢？」Shelly提議。

有種不安嘅預感。

即使唔係熟悉阿瞳嘅我，亦感覺到啱啱嘅阿瞳判若兩人。

做完手頭上嘅嘢之後，我哋就出發去阿瞳屋企。

不過行到學校門口時，Shelly忽然停低腳步。

「嗰個人……」Shelly指住一個企喺門口，頭髮紮辮嘅男人，「好似係阿瞳細路……」

我諗起阿瞳講過，如果見到佢細路記住同佢講。

唔通阿瞳變到咁奇怪係關佢細路事？

「我記得好似叫阿堯……喂！等等！Shelly！」浩然未講完，Shelly就向紮辮男跑過去。

「喂！」

Shelly忽然一手捉住阿堯衣領，嚇到阿堯呆咗呆。

「你做過啲咩嚟？點解你家姐無啦啦話唔讀書？」

「你……講乜撚嘢啊？」阿堯捏住Shelly手腕，捏到Shelly痛苦大叫，「佢唔讀書，關我撚事咩？」

「啊啊啊！好痛啊！放手！」

浩然即刻跑過去，將Shelly同阿堯拉開。

「你有無搞錯啊你！問你一句啫使唔使起晒鋼啊？」浩然見到Shelly表情痛苦，馬上變得怒氣沖沖，「係咪撩交打啊？」

「撩乜撚啊？我唔係嚟搵你哋！驅魔師呢？驅魔師喺邊度？」

「驅魔師……？」Shelly同浩然一頭霧水。

「佢成日話咩有個同學係驅魔師，好勁識驅魔，我係嚟搵佢嘅，快啲叫佢躝出嚟！」

「喂！你搵人有無禮貌㗎？唔該都無聲！」Shelly撳住痛苦手腕，但依然挺起胸膛反駁。

「麻撚煩……你唔講唔好怪我唔客氣。」

雖然阿堯態度極度地差，但直覺話畀我知……佢搵我係有原因。

我行到佢面前話：「我係驅魔師。」

「你係？」阿堯打量我一身，「我有嘢搵你幫手，依家已經唔理得你係咪堅。」

「關阿瞳事？」

「你真係醒，無嗰兩條友咁雷……總之廢話唔講！」

阿堯雖然一臉不屑，但語氣行間卻非常焦急。

「我屋企兩隻老嘢同埋白癡家姐黐撚咗線……好似俾嘢上咗身咁。」

深夜無聊加更

出咗好多啊

出咗好多

加速加速

Push

返緊屋企 晏啲更

夏舞 我愛你

養鬼仔

做咩向我示愛

病病地 岩岩訓醒
今晚夜少少先更

加油！推推推！

舞巴小心身體
絲打我都啱啱睇完醫生
btw推推推

多謝 開年就病
絲打都要好好休養

睇嚟，事情唔係想像中咁簡單。

因為啱啱Shelly大叫引嚟周圍人目光，加上避免張揚講及呢啲話題，所以我先帶阿堯去café。

不過Shelly同浩然堅持要嚟。

「喂！我上次同你偷龍轉鳳，搞到我喺醫院俾人鬧咗一餐！」浩然撳住我膊頭，「今次關阿瞳事，你唔好諗住要我哋置身事外。」

「就係咁。」Shelly點頭。

逼於無奈之下，只好俾佢哋兩個住喺隔籬。

不過——

「喂？」阿堯指住我隔籬個人，「呢條女又咩料到呀？」

「我係一個驅魔師，專幫人驅散妖魔鬼怪。」白寧邊飲抹茶朱古力邊答。

「講到咁巴閉，唔諗下之前叫緊邊個做師父？」我無奈咁講。

因為應承過白寧教佢驅魔，所以帶埋佢出嚟。

周圍閒雜人等一律無視，我望向阿堯。

「阿瞳仲有佢阿爸阿媽，究竟發生咩事？」

「我都唔撚知……兩個禮拜前老嘢南美洲旅行返到嚟，成屋人就開始奇奇怪怪。」阿堯翹起二郎腿不停周圍望，答嗰陣並無望住我。

「老嘢即係邊個？」

「咪屋企嗰隻老嘢囉！仲有邊隻？」

「老嘢都有分男定女。」

「哦……咪男嗰隻囉！」

坐喺一邊嘅Shelly目瞪口呆咁話：「虧你可以同佢溝通到。」

只不過係個叛逆期嘅細路，再白癡嘅白寧我都搞得掂，何況係佢？

我繼續問阿堯：「係點變到好奇怪？詳細講嚟聽下。」

「我都唔知啊！」阿堯好苦惱咁撓頭，「咪就係有日老嘢返到嚟之後就奇奇怪怪，跟住另一隻老嘢又奇奇怪怪，然後到我白癡家姐都奇奇怪怪。」

睇嚟佢嘅詞彙非常貧乏，聽到連我都覺得奇奇怪怪。

「咁你覺得佢哋奇怪喺咩地方，點解你認為佢哋係俾嘢上身？」

「直覺掛……」阿堯面有難色，「唔識講喎。」

唔知阿堯係唔信我定唔信自己，佢雖然一副唔在意嘅表情，但其實坐姿非常忐忑，話語行間急得嚟又有點猶豫。

理所當然，正常人都唔會一嚟就完全相信呢啲嘢，更唔會相信自稱「驅魔師」嘅人。

但反過嚟講，情況已經嚴峻到令佢逼不得已嚟見我。

「無所謂，你即管講出嚟。」我嘗試安撫佢嘅情緒。

「係咪真呀，都唔知你係咪堅……」阿堯依然半信半疑。

「你唔信咁你又走嚟搵小凌？」浩然睇落好躁底，可能因為啱啱阿堯對Shelly做出嘅無禮舉動。

唔講唔記得呢個設定，浩然係暗戀Shelly。

「屌，我個白癡家姐成日話佢有個friend係驅魔師，又咩識斬妖除魔，又識超渡惡鬼，咁我咪嚟睇下咩料到囉！」

「喂，你開口埋口話你家姐白癡，你有無禮貌——」

「浩然，等陣先。」我舉手截停浩然。

佢唔係真心想向我求救，絕對唔會喺學校門口漫無目的咁等。

如果Shelly無衝上去阿堯嘅話，呢刻佢仲喺學校門口食西北風都唔定。

然而就算係咁，佢都咁樣做。

所以信佢一定會講。

「唉……就係咁……」

過咗一輪，阿堯終於好唔情願咁開口。

「老嘢話旅行嗰陣去咗個唔知咩阿茲卡班的遺跡，喺金字塔入面見到有神明顯靈喎！」

「阿茲卡班……你係想講阿茲特克？」

「求祈啦！都係嗰啲friend啦，咩天狼星啊嘛！我有睇哈利波特㗎！」阿堯一臉自豪咁講。

阿茲特克文明係中世紀中美洲一帶嘅文明，雖然屬於近代文明，但宗教方面係建基於另一個龐大嘅古文明——瑪雅文明，可以追溯到非常久遠嘅神話。

順提一提，阿茲特克同阿茲卡班唔係friend嚟。

「老嘢話嗰陣入去金字塔時唔小心扭親腳，入到去之後個所謂神明只係講咗一句話，就幫佢醫返好隻腳，跟住佢就非常崇拜嗰個神明，崇拜到癡撚咗線咁……你知唔知係點呀？」阿堯睜大雙眼問。

「係點？」我反問。