呢度冇教主，冇組長，冇牧師，冇老師，小弟同「黎啦繼續等緊你」巴打（黎巴）暫時擔當發起人，歡迎有負擔既巴絲加入
我地暫計劃每兩星期會開一次post，聚焦一段經文進行討論
本團契無意取代任何教會/堂會，只係提供一個網上聚腳點，求神使用
歡迎任何信左耶穌既弟兄姊妹或未信既朋友仔參與討論
今次我地個post係開係「講故台」，希望大家「聽故/講故，唔好駁故」
如果覺得有弟兄姊妹解錯經
，可以用愛心指正
，可以挑戰對方想法
，但要基於經文，切勿人身攻擊，最好聚焦核心經文本身，避免離題太多。亦都歡迎各位弟兄姊妹或朋友仔放低禱告事項，我地會為你地禱告，並出公禱文記念。
FAQQ: 聖經是甚麼？
聖經分新約和希伯來聖經
客觀地講：
希伯來聖經係古代猶太文獻集，主要由律法書、先知書同智慧寫作組成，亦係耶穌在世上教導既基礎。
新約係指使徒書信（用作牧養教導初期教會），啟示錄，福音書（由使徒或者他們身邊既人寫既耶穌生平既見證）同使徒行傳，係耶穌在地上事蹟和初期教會發展的第一身見證。
信仰角度：聖經係神既話語
——————————-
Q: 聖經是否無誤？
A: 我地相信聖經真係神既話語，但唔一定全部係百份百歷史記錄。
例如創世記有好多類近神話既記載，就好似爸爸係床前講三國演義俾我聽，教我做人既道理（例如唔好學關羽咁驕傲），咁故事真係由爸爸講既，至於三國演義則不一定記錄左客觀歷史。
而新約福音書等對耶穌同初期教會既見證，就絕大部分都係真確既，雖然四福音書細節各有出入，但主要對耶穌的記載都是一致的。
當然一部分保守派基督徒信聖經一字一句都客觀上真實無誤，不過既然係開放吹水，無必要預設一個咁保守既立場。
所以今次我地開講故台，唔好駁故喇
——————————-
Q: 點解信耶穌係神？
A: 幾肯定係真既係：
1）在歷史上，耶穌被釘死在十架上(呢個係主流歷史學家既共識）
2）在歷史上，大量第一世紀基督徒為見證耶穌的復活自願殉道（冇人會為明知係假既野自願放棄抵抗咁去死，雖然間中有邪教徒痴左線玩恐襲或被誘騙自殺，但明顯係兩個nature)
3） 耶穌宣稱自己係神（上面既1同2，令我地唔相信佢係騙子或瘋子，唯有信佢係真既），並且大量第一世紀基督徒都係咁信
當然都有唔少對呢個推論既挑戰同質疑，但我地相信「耶穌係神」係最合理既推論，並且咁信。
為左避免玩泥漿摔角式辯論「耶穌是不是神」，呢度既討論，以「耶穌是神」為前設，想挑戰呢個命題請另行開post。
——————————-
Q: 聖經係咪俾人篡改過？
A: 冇證據支持聖經俾人有計劃地篡改過，間中有文士抄錯少少間中都可能會有，但由於聖經既傳播度極高，其實好難去收翻晒來改。唯一係邊本書納入正典，邊本唔入，有幾本有點爭議（馬加比一、二書、雅歌、希伯來書等），有幾本幾乎完全冇（四福音書、摩西五經等）
不過，我地都係鼓勵keep住「聽故/講故，唔好駁故」既精神，focus 翻係經文本身。
——————————-
Q: 你地係咩宗派？
A: 我地呢度唔強調宗派，歡迎新教、天主教、東正教既弟兄姊妹同任何有興趣討論聖經既朋友仔
只要求大家互相尊重，唔好惡意引戰
對惡意引戰者，我地冇懲罰機制，只建議大家主動忽略佢地，俾佢地自己玩單機，或由佢地自己之間傾。
——————————-
開始之前我地祈個禱先：我們在天上的父，你是道路、真理、生命，感謝你道成肉身來到世上，求你顯出你的榮耀來，使用連登讀經團契，祝福參與的弟兄姐妹能夠明白真理，又願你祝福眾人的家庭，又保守眾人脫離那惡者。
願國度、權柄、榮耀全歸與你，奉耶穌基督名，Amen!
有咩心事需要代禱，請放心交低，求神應允
