［連登讀經團契（一）］創世記｜起初，神創造天地

佢好明顯就係問「基督徒如何看待死刑」呢個問題啦，即係信仰角度點睇死刑存廢，而唔係單純討論某段經文個情況啦…

咁樣變咗乜嘢都唔洗討論，佢只係問咗一個好基本嘅基督教倫理學嘅問題

Google嘅 聖經有題過永遠嘅嘢，我估LDS都應該有相應嘅解釋
我問係因為你之前一直講緊problem of evil
如果LDS認為有需要去outer darkness嘅人/魔鬼存在 (aka 惡)
咁problem of evil嘅問題仍然存在? 定LDS認為神唔係全能同全善?

可能你睇法唔同，我唔認同將所謂「權柄」握係個人或者部份人上嘅做法
唔知你點睇Joseph Smith，但至少彼得、保羅、同巴拿巴都唔係完美嘅
佢哋可以係領袖，但並唔代表佢哋唔會錯、講嘅嘢就係完全嘅真理
所以將一個人對信仰嘅解釋當成真理其實好危險
回教嘅穆罕默德、太平天國嘅洪秀全正正就係呢個問題
所以新教先認為要將信仰建基於聖經之上、而唔係某人或者某組織之上
呢個都係我認為「唯獨聖經」嘅精神

LDS解決Problem of Evil嘅方式係好唔同。我好high level咁講啦。
簡單啲講，世界上每一樣嘢其實都係永恆存在。每一個人，包括神，佢係永恆存在。而且世上有永恆法則係永恆存在。我哋唔信神係新教個種自有永有第一因。所以既然唔係所有嘢嘅存在係出自神，自然邪惡唔係由神創造出嚟。神係以善從惡中分出嚟。好似將光暗好開咁。
而且我哋相信嘅神都唔係主流講個種全知全能。我哋相信神有所有可以得到啲能力，同知道所有可以知道嘅嘢。
神嘅預知未來唔係絕對性嘅預知，而係因為佢有好大量嘅知識，再用經驗去推算出嚟。
而神嘅能力係受自然法則所限。當然神掌握到啲自然法則勁過人無限倍。佢可以創造世界就知佢嘅能力超出現時人類嘅想像。但佢做嘅唔係魔法。而係遵從宇宙法則而造出嚟嘅「奇蹟」。
用現代文學講，Your Ancestors Called it Magic, but You Call it Science. I Come From a Land Where They Are One and the Same. Thor
或者，奇蹟就係人類未能了解嘅科學。

而且因為今生係我哋喺前生同意嚟到啲試場嚟，唔係世界嘅全部。我哋睇緊係點解呢個試場有evil，因為場考試正正係考緊人可唔可以克服evil。

打字打到呢到，發現我之前已經答過呢幾條問題。我最後post我答案你睇。

最後，聖經寫到明個權威係畀人㗎喎
同埋其實我唔太明，我同意先知唔係完全同唔係絕對無誤。我都唔會視約瑟係完美。只有神先係完美。但唔完美唔代表唔可以有權柄。
反而，你又話保羅唔會絕對無誤，但又唯獨聖經。明明新約大部份都係保羅寫。保羅非完美即係佢寫嘅聖經內容都係非完美。咁信聖經同信先知其實係一樣。因為聖經內容都係經由非完美嘅先知寫出嚟。你會點解決呢個循環矛盾？
喺我眼中，先知唔係完美、經文唔係完美，但我哋可以知佢哋係相對可靠。最少我自己祈禱問神，由神得到嘅答案係佢哋信得過。
我唔認為一樣嘢要絕對無誤先叫可靠，先信得過。
反觀，點解會assume聖經係可信先再開始睇聖經？


……………………

喺LDS教義中，神同埋人係同一物種嚟。神係進步到完美嘅人。人依照同樣嘅方式可以成為神。
喺LDS教義中，神係我哋嘅天父唔係比喻嚟。人類係神嘅真正後裔。有完全一樣嘅潛能。而所有人都有前生。人嚟地球前已經以靈魂形式喺天庭同神一齊存在咗極長嘅時間。
另一個特別嘅地方係，喺LDS教義中，神曾是人，如今高昇成為神。

喺有前生同埋咁嘅框架下，呢三條就變得有合理嘅原因。

1. 伊比鳩魯悖論 Problem of Evil
LDS教義中，神已經完全解決咗邪惡，人類嚟自一個完美又無痛苦嘅天庭。但人同神唔同嘅地方就係人無經歷神經歷過嘅嘢，所以神係完美但人唔係。所以神提出一個計劃，我哋宣為救恩計劃。人要離開天父，去到一個唔完美嘅地方去經歷痛苦同考驗。用經驗去學習從善惡中作出選擇。
最終每一個嚟到地球出世嘅人喺前生已經知道地球嘅考驗，喺自願嘅情況下同意嚟到地球接受呢啲考驗。
重點係，神自己都經歷過咁嘅考驗所以先成為神。神喺完美嘅世界中要故意創造一個唔完全嘅世界，畀佢嘅仔女經歷佢經歷過嘅世界，令人可以由經驗中學習同進步。
最後LDS教義中無呢個悖論，因為LDS中神嘅全知全能唔係主流中魔法式嘅全知全能。喺LDS中，神嘅全知係指知道所有可以知道嘅知識，同埋因為有咁多嘅知道，而得到所有可以得到嘅能力。而呢啲知識同能力係經由神自己嘅經歷同親身克服世上嘅一切而獲得。喺咁嘅知識同能力下，佢可以創造出無數嘅世界，畀佢嘅仔女接受考驗。
神知道你下一步會點做，唔係因為佢完美預言到你一切，而係佢前生同你相處咗無數嘅時間，佢太了解你，知道你呢個人喺呢個情況下會做啲咩。同你好了解一個朋友估到佢做咩情況類似。

2. 第一因無中生有創世論 Creatio ex nihilo
喺LDS中，神唔係無中生有咁創世。事實上物質同人嘅靈（其實呢到嚴格會稱為智能，但同一般人傾，靈會易啲明）同神一樣係永恆存在嘅。神係用呢啲永恆物質，組織呢個宇宙出嚟。如同一個人用已有物質去組織一架車出嚟一樣。
而事實上呢個組織嘅創造先係聖經中教導嘅真相。你可以花啲時間去研究一下聖經學術界中，無中生有嘅創造係後人強加落去嘅解讀。
more on:

https://youtu.be/HsNTRoxONmY?si=txjMkiRKf9uLHcJH
即係LDS中嘅神，係喺一個已經有善惡嘅世界中，除善同惡分開。而唔係創造出善惡嘅神。

4. 神聖的隱藏性 Divine Hiddenness
呢到有兩個解法，我先用LDS正式解法，我再講一個合理推敲更好但唔係正式嘅解法。
正式解法係…因為今生就係一個考驗，考驗一下人類唔喺天父面前，喺見唔到天父嘅世界中，到底會做好定壞事。每一個人嘅考驗都唔同，有某啲人嘅考驗可以係佢可以呼求神一生，但都得唔到答案，咁個考驗就係喺咁嘅情況下，一個人會過一個善嘅人生定惡嘅人生。
非正式推敲解法我個人覺得更加美麗同解釋得更好。但again呢個係非正式答案。係合理、但唔違反LDS教義。
喺LDS中有個非完全官方但極為主流嘅傳統信仰就係神曾是人唔係單純指神曾經好似耶穌咁成為神。而係天父自己曾經有段時間唔係神，而係同我哋一樣完全係一個人。佢經由服從同努力，喺佢嘅天父之下經歷過救恩計劃，變成天祖父咁成為咗神。父上有父，神上有神咁永恆落去。
咁講到尾一定要有第一個神出現去開始呢個計劃。我嘅合理推敲係，宇宙本身可以真係無神，喺第一個神出現前，人類就係喺一個尋求但尋不著神嘅處境中。但第一位神喺呢個處境中克服一切成為神。喺成為神後，佢無用呢個完全嘅知識同能力中以黑暗統治一切，而係繼續畀所有嘢自由。呢個第一位神/第一班眾神，創造出天庭，去開始上面提到嘅救恩計劃。
所以更加加固官方解法，就係Divine Hiddenness嘅人係最top嘅一班人，佢哋係經歷緊最原始神經歷緊嘅嘢。經歷緊最終極嘅考驗。

1. 人可以永恆
2. 神受限於自然

問個讀哲學既非基督徒，唔講神學只講哲學呢兩野已經屬於極精彩

就咁聽，LDS解決Problem of Evil嘅方法就係否定或者限制神嘅能力?
如果神同人係同一物種﹐咁魔鬼係唔係?
如果神係經過考驗先變成完美、而人又去接受考試
咁係唔係人經過考試就會升級變成神?

唔知係唔係聖經唔同，以我嘅理解，權威應該喺神喥，人只係負責做
喺新教嚟講，保羅、彼得等都只係跟order做嘢，無話權唔權威
彼得都只係初期教會嘅領袖，並無封過自己做乜嘢教宗、先知
而後人封畀佢嘅「權威」只係後人支持自己權力嘅手段
(有啲古代皇帝追封自已老豆嘅概念)
宗教權威正正就係耶穌要推翻嘅嘢，佢就係得罪宗教權威先畀人捉

聖經方面，普偏講法係神默示/啓示人寫嘅，所以並唔會因為作者而有誤
你信得真理就自然要覺得佢無誤，半信半疑嘅就唔係真理
唔好話聖經，你對住份食譜都要信佢好食先會跟啦


事實上呢個組織嘅創造先係聖經中教導嘅真相
我信唔同嘢就當然有啲保留
不過我都好好奇點解你會覺得LDS嘅教義先係真相?

當年馬丁路得搞新教出嚟都有類似嘅復原主義出發點
但佢都只係喺已有嘅聖經嘅基礎上刪減天主教嘅內容，並無新嘅概念
相反LDS同回教一樣，提出咗好多全新嘅教義、又有自己嘅經文
所以以復原主義自居我又覺得差啲信服力
做法就好似人大釋法咁，加啲新嘅條文入去然後話係基本法原意
有啲自圓其說嘅感覺

站喺你LDS嘅角度，點解Joseph Smith會比穆罕默德更可信?
兩者有咩分別?

非新教徒。係基督徒。

非也，我只係鼓勵佢進行更豐富既討論
就算我答左，都只係我對聖經既詮釋

例如：呢段經文咁講，經文咁解，經文係咁既場景下可以咁用。

就咁跳去問咁用唔係唔得，不過會失去好多樂趣

我覺得problem of evil有兩個層面，一個係點解世界上有邪惡存在。呢個就以世界本身就係自有永有咁解決咗。因為神唔係第一因，所以有邪惡都唔出奇。
而另一個層面係點解神唔消滅邪惡？咁天庭已經消滅咗。呢個世界係刻意做到唔似天庭，畀人喺自願同知情情況下嚟地球體驗神未建立天庭前嘅世界。咁樣解釋世界點解依然有邪惡存在。
而你提到嘅outer darkness，其實已經係消滅邪惡嘅存在。即係喺成個考驗完咗，神都係會消滅邪惡。
咁成個情況就係，當人要用經驗去學習時，神先會容許邪惡存在，作為教材咁利用。

神、人、天使、魔鬼全部都係同一物種嚟。
係，我哋相信人成神經，我會話其實聖經都係咁教，只係某啲地方畀人down play咗。

無錯，我當然都同意權柄喺神到，但經文都教神會畀呢個權柄畀人。彼得當然無封自己係教宗，因為教宗唔係神制定，但佢係使徒，呢個職份唔係人人有，都唔可以用錢買。

使徒行傳:8:17 於是使徒按手在他們頭上，他們就受了聖靈。
18 西門看見使徒按手，便有聖靈賜下，就拿錢給使徒，
19 說：把這權柄也給我，叫我手按著誰，誰就可以受聖靈。
20 彼得說：你的銀子，和你一同滅亡吧，因你想神的恩賜，是可以用錢買的。

仔細咁睇整部新約，我哋睇得出使徒就係有呢個權柄嘅人，而彼得就係首席使徒。使徒行傳2章同其他地方都睇得出彼得係主領整個教會同使徒運作。

馬太福音:16:18 我還告訴你，你是彼得，我要把我的教會建造在這磐石上，陰間的權柄，不能勝過他。〔權柄原文作門〕
19 我要把天國的鑰匙給你，凡你在地上所捆綁的，在天上也要捆綁，凡你在地上所釋放的，在天上也要釋放。

「普偏講法係神默示/啓示人寫嘅，所以並唔會因為作者而有誤」
咁嘅情況下，咁當先知同使徒教導時，都可以係神默示/啟示，而唔會因為佢哋係非完美嘅人而有娛。
當然，我唔相信神以外有嘢係完美，但我都覺得唔需要一樣嘢係絕對完美去相信佢可靠。我估你都有睇過醫生。你明知醫生係人，唔係絕對無誤，但你都會聽醫生指示。因為你有合理理由相信佢可靠。
我哋睇睇經文同先知都大概係咁。
食譜都一樣，世上唔會得一份食譜，我唔會盡信食譜，因為食譜都可以抄錯寫錯，我想食嘅未試一次，試完有問題未搵下係邊到出錯。

「不過我都好好奇點解你會覺得LDS嘅教義先係真相?」
關係創造個到我都有引用學術睇法。簡單啲講，無中生有咁創造係後嚟先出現嘅睇法，唔係聖經本來睇法。
所以你提到嘅「新教義」，到底真係新，定只係畀人刪減除去嘅「舊教義」？我哋相信所謂嘅新，其實係舊。
而你講啲新經文去自圓其說，老實講，猶太教都覺得基督教加新約落去係加新經文去自圓其說。
我唔明點解可以加新約，但唔可以加其他。given聖經從來都無禁止人加經文。
事實上，基督教本來就係一個不斷有新啟示嘅宗教嚟。
而點解約瑟比穆罕默德可信，係因為約瑟除咗第一2次見到神同耶穌基督外，所有嘅啟示都係最少另一個人一齊經驗。簡單啲講，有見證人。重點係個啲見證人可以同約瑟關係鬧翻，但從來都唔會否定佢嘅見證。
簡單啲講，如果約瑟係夾埋啲見證人呃人，但呢啲見證人有一半曾經或最後被開除教藉，佢哋每一個都有足夠理由去同人講，我哋夾埋講大話呃人㗎咋。但無一個人有咁做。

詳細學術睇法你可以睇下呢個retired professor of Islamic Studies and Arabic人講個分別。

https://youtu.be/Q1Gy2OA73H4?si=WN2FBmDAktO4Pk5t

我同意由經文出發可以深化討論，但佢嘅問題係具體嘅倫理議題，直接回應冇咩唔妥。例如聖經《創世記9:6》似乎支持死刑，《約翰福音8:7》就顯示憐憫。正面回答結合經文不失深度，迴避反而令討論失焦。

或者你下次講到創世記九章可以分享多啲

既然美巴問聖經點睇，咁就以聖經經文出發。只有神先知道人既內心，我認為以自己意見去重新解釋其他人既想法，非常之唔合適，甚至有褻瀆神之嫌，所以應該避免。我會等美巴澄清佢條問題，睇下佢心目中係邊D聖經經文。

你咁講亦都有道理👍🏻

其實邊止咁少，仲有申命記果d，用石頭掉死果d。每段都有上文下理處境，呢個倫理問題一d都唔簡單（係簡單就唔會到今日都仲debate緊），既然問題唔簡單，我就唔想跳去conclusion

我個人討論問題既style啫

唔知我有無解錯，啫係神需要(消滅)邪惡，先可以變成神、
如果一開就無邪惡，神就唔會係神? 而現世就係神訓練更多人變成神嘅地方?

以我嘅理解聖經係話神照自己形像做人，啫係有啲共通特質但唔係一模一樣
(如果你有睇高達就類似新人類同強化人嘅分別)
我知摩門對亞當夏娃嘅理解唔同
不過對所謂主流嚟講，佢哋同魔鬼就係想成為神(或者攞到神嘅能力)所以先出事
所以我覺得考驗一說都還好，但「人可以成為神」呢個諗法有啲危險

==============================================================
權柄方面，我太清楚你講嘅權柄係乜、同點樣傳承
我無否認彼得同其他門徒有領袖嘅角色，不過佢哋並唔係有咩特權、異能

從使徒行傳8章嚟講，彼得有權柄呢樣嘢係(行邪術的)西門講嘅、仲想用錢買嚟操控
彼得聽到後即刻鬧爆咗佢、話佢心不正。而彼得由始至終都無話過自己有權柄
而你睇返其他有關「聖靈降臨/充滿」章節 (使徒行傳2章、10-11章、19章)就可以見到
聖靈降唔降臨、降去邊個喥並唔係彼得或者保羅所控制，反而係佢哋跟聖靈order做嘢

「彼得還說這話的時候，聖靈降在一切聽道的人身上。..... 於是彼得說：這些人既受了聖靈，與我們一樣，誰能禁止用水給他們施洗呢？」使徒行傳10:44-47;
「聖靈吩咐我和他們同去......」使徒行傳11:12

所以「手按著誰，誰就可以受聖靈」嘅「權柄」，只係(行邪術的)西門一廂情願嘅誤解

--------------------------------------------------------------------------------------------------------------
「我還告訴你，你是彼得，我要把我的教會建造在這磐石上，陰間的權柄，不能勝過他。〔權柄原文作門〕。我要把天國的鑰匙給你，凡你在地上所捆綁的，在天上也要捆綁，凡你在地上所釋放的，在天上也要釋放。」馬太福音:16:18-19

呢兩句係「教宗」論嘅根基。
就咁睇，耶穌好似將天國的鑰匙(aka權柄)畀彼得咁，話佢(彼得)可以捆綁、釋放任何人
但用返上面使徒行傳嘅內容嚟睇，彼得都係跟聖靈做，並無獨自決定捆綁、釋放邊個
而「你是彼得」呢個「彼得」(petros)喺希臘文係解石仔，所以馬太福音16:18成段係比嚟
意思係「你係石仔(彼得)，而我嘅教會係建基係磐石(基督自已)上」
所以陰間的權柄勝唔過嘅 唔係石仔(彼得)、而係磐石(基督)

加拉太書2章入面，保羅都有因為彼得嘅失誤而係眾人前鬧鬼佢
可見彼得嘅教會體系入面都唔係絕對/高人一等嘅

===============================================================
當先知同使徒教導時，都可以係神默示/啟示，而唔會因為佢哋係非完美嘅人而有娛[誤]
你都可以咁諗嘅。
不過我意思係以新教、天主教、怎至回教同LDS嘅角度出發
應該都承認聖經係完美無誤(或者用你講法，相對無誤)
分別只係on top信唔信聖經以外更多嘅嘢咁解

當然「聖經」嘅個概念都係耶穌死後幾百年先有，但佢嘅內容唔係
啫係耶穌叫班門徒將佢嘅福音傳開、咁彼得、約翰等等就照做、做完就交咗畀其它人死咗
但幾百年後，教會發現越傳越多花臣，發現唔對路
就決定將彼得、約翰、 雅各等等、親眼見過耶穌嘅人嘅事績嘅門徒、
加埋路加、保羅呢啲同彼得佢哋同期工作、互相交錯嘅門徒所寫嘅文章、信書收編成一本書
所以先有新約聖經、而聖經有相當嘅權威性

對我哋嚟講，聖經/耶穌嘅教導就止於呢班人嘅見證喥、end of story、並唔係不斷有新啟示
所以耶穌死後幾百年出出現嘅穆罕默德、千幾年先出現嘅Joseph Smith & Friends所提出嘅新嘢
(我知LDS覺得係原意，但以宗教發展史嚟講係無前例嘅新概念) 我哋就十分有保留

當然LDS學者會話LDS點樣同回教唔同、回教學者會話佢哋點同LDS唔同
但對我哋嚟講，寫咗2個月定幾十年、用咩語言寫、文容長短、內容本身其實無分別
兩者都係突然彈出嚟話自已發現信仰上有獨有嘅解釋、兩者都話自己有異象
所以兩者都符合聖經預言「假先知」行奇事、代表上帝發言、尋求榮耀嘅形容
"If it looks like a duck, swims like a duck, and quacks like a duck, then it probably is a duck."
至少要我信某人突然提出，顛覆所有基礎嘅事，需要有萬分充足嘅理由同解釋


老實講，猶太教都覺得基督教加新約落去係加新經文去自圓其說。
係嘅，所以技術上嚟講猶太教同基督教係信同一個神、不過係完全唔同嘅宗教嚟

但至少新約聖經係一班唔同嘅人根據耶穌嘅事跡寫出嚟
唔係耶穌自已話自已係神個仔、再自己寫本書話自己有咩經歷、再自己創立自己教會咁
呢個都係我信新約、但唔信摩門經、可蘭經嘅原因

(唔係話你呃人，我相信你同我自已、好多新教徒、回教徒、LDS教徒一樣，都真心信自已信緊嘅嘢係真嘅，我只係講點解我唔會輕易信基於一人嘅信仰觀)

路過補充下

聖經入面無話唔畀「取人性命」，記載中嘅以色列人都打過唔少仗、神都直接間接冧過唔少友
而基督教都無明確話唔可以自衛殺人、參軍等等

可能你會問，十誡唔係話「不可殺人」咩?
如果你睇英釋版，呢句係寫"You shall not murder"，唔係"You shall not kill"
所以大概意思係唔可以因私利、怒氣而「謀殺」，保家衛國、無得選擇嘅情況則不限

當然，創世記、出埃及記、約書亞記等都係聖經舊約經文嚟
我哋依家用嘅新約就好似你咁講，偏向憐憫，但都無話唔畀自衛殺人或者參軍
所以喺非謀殺嘅情況下，聖經無好硬性嘅SOP/規則去跟
一般都會自行決定，盡量用能力內最合適、最少嘅傷害嘅行動
有興趣可以睇真人真事改編嘅《鋼鋸嶺》，Andrew Garfield嘅角色點樣參軍又唔殺人

但以死刑嚟講，連耶穌喺十架上隔離嘅死囚都可以得到救贖
人類、信徒又憑乜嘢認為另一個人無藥可救，從而決定了結一個人嘅性命?
所以好多基督徒覺得死唔死刑係可以選擇嘅情況，處決死囚係非必要嘅武力，所以反對死刑

我覺得你有少少get錯。一樣嘢係唔係神，同佢消唔消滅邪惡無關係。宙斯都係神，但佢似乎無打算同無能力消滅邪惡。神係一個title嚟。

如果我睇聖經，亞當都生咗個仔，形像同自己相似，咁佢個仔同佢又係神同人咁嘅分別？
我當然知主流係點睇，但正如耶穌唔同意主流猶太教睇法，我都唔同意主流基督教睇法。
創世記:5:3 亞當活到一百三十歲，生了一個兒子，形像樣式和自己相似，就給他起名叫塞特。
而我睇耶穌咁講
約翰福音:10:34 耶穌說：你們的律法上豈不是寫著，『我曾說你們是神』嗎？
35 經上的話是不能廢的，若那些承受神道的人，尚且稱為神，
啟示錄:3:21 得勝的，我要賜他在我寶座上與我同坐，就如我得了勝，在我父的寶座上與他同坐一般。
魔鬼同聖徒嘅分別，就係魔鬼要神交出一切，聖徒係從父神承繼一切。
一個強奪王位同一個承繼王位嘅分別。

而我唔同意你對權柄嘅解釋。11:12講嘅吩咐一同前去明顯同使徒嘅職份係兩樣嘢嚟。

哥林多前書:12:27 你們就是基督的身子，並且各自作肢體。
28 神在教會所設立的，第一是使徒，第二是先知，第三是教師，其次是行異能的，再次是得恩賜醫病的，幫助人的，治理事的，說方言的。
29 豈都是使徒嗎？豈都是先知嗎？豈都是教師嗎？豈都是行異能的嗎？

當然最終個權柄喺神到，但就咁睇聖經，無信徒階祭司嘅新教教義為前題，應該好少人會覺得使徒同其他人係一樣。

…………

我唔同意你對磐石嘅解釋係基督。因為咁啱我係識希臘文，的確如你所講，彼得係同磐石係玩緊個食字，但呢到係磐石喺文法上明顯係指向彼得。而且彼得個名同磐石嘅字都無大細石之分，根本就係同一樣字嚟。所以呢節係講緊耶穌授權彼得去成為教會嘅在世嘅磐石。

Matthew 16:18
18 κἀγὼ δέ σοι λέγω ὅτι σὺ εἶ Πέτρος, καὶ ἐπὶ ταύτῃ τῇ πέτρᾳ οἰκοδομήσω μου τὴν ἐκκλησίαν, καὶ πύλαι ᾅδου οὐ κατισχύσουσιν αὐτῆς.

以弗所書:2:19 這樣，你們不再作外人和客旅，是與聖徒同國，是神家裡的人了；
20 並且被建造在使徒和先知的根基上，有基督耶穌自己為房角石。
21 各〔或作全〕房靠他聯絡得合式，漸漸成為主的聖殿。

一座建築物係唔會起喺房角石（基督）上，而係起喺磐石根基（使徒先知）上。同以弗所書一致。

而當然，我之前都講過，除咗神，無人係完美，所以彼得會做錯唔出奇，保羅都會做錯，一個有嚟自神權柄嘅人唔代表係完全。保羅喺加拉大書責備完彼得後，佢都係稱佢為「柱石之一」，依然係彼得做首席使徒。我睇唔到人唔係完美就否定咗權柄。
甚至睇返舊約，摩西都有做錯事，葉忒羅都鬧責備過摩西。咁最後神同摩西講嘢定葉忒羅講嘢？

而我明你作為新教徒，本質就係反對人有權柄。但我睇聖經，似乎唔同意呢個睇法。而且都無解決到使徒係未完全但聖經係完美嘅矛盾。相對可靠似乎先解決到個矛盾。

…………

「應該都承認聖經係完美無誤(或者用你講法，相對無誤)」
其實係得新教先信聖經係完美無誤。即係相信耶穌係基督嘅人中，得少於40%嘅人有機會咁信。但新教中都有自由派唔信完美無誤，水巴已經唔係咁信。我諗大部分新教徒都唔信世界係6個24小時創造出嚟。你講緊嘅比率就會更小。

「但幾百年後，教會發現越傳越多花臣，發現唔對路」
咁邊個畀權呢間使徒死後200年嘅教會去決定乜嘢包括喺聖經內，乜嘢唔包？
使徒們未死前已經有好多「假先知」、「假師傅」引進異端。
彼得後書:2:1 從前在百姓中有假先知起來，將來在你們中間，也必有假師傅，私自引進陷害人的異端，連買他們的主他們也不承認，自取速速的滅亡。
邊個confirm決定聖經嘅呢班人唔係越傳越多花臣嘅一部份？

而我都唔同意福音同啟示要止於個到，最少我睇唔到聖經有支持啟示會止於佢哋呢班見證人到。如你搵到嘅不妨share下。
反之，彼得就接受過新啟示，所以我搵到否定呢個睇法嘅例子。

當然我都明你會覺得有人突然彈出嚟「顛覆所有基礎嘅事」同「信仰上有獨有嘅解釋、異象」等。但老實講，耶穌對猶太教嘅人未exactly就係咁。喺猶太教眼中，耶穌唔乎合猶太教對假彌賽亞嘅預言咩？你花啲時間睇下猶太教拉比點睇耶穌？
咁點解你又信到耶穌？因為你有認真研究過嘛。
我都一樣，我就係研究完覺得有「萬分充足嘅理由同解釋」。

「係嘅，所以技術上嚟講猶太教同基督教係信同一個神、不過係完全唔同嘅宗教嚟」
首先，猶太教徒唔會同意猶太教同「信經基督教」信同一個神。猶太教中，神唔係三位一體。
所以猶太教同「信經基督教」係信緊唔同嘅神。
而當然，你都唔會咁睇，喺你眼中，猶太教嘅神不嬲都係信經基督教嘅神。
同理，派信經基督教同LDS代入去，exactly一樣。

「但至少新約聖經係一班唔同嘅人根據耶穌嘅事跡寫出嚟，唔係耶穌自已話自已係神個仔、再自己寫本書話自己有咩經歷、再自己創立自己教會咁
呢個都係我信新約、但唔信摩門經、可蘭經嘅原因」
咁呢到你對整個LDS嘅誤解就大啦，摩爾門經唔係約瑟自己寫本書話自己係先知。係古代猶太人（主前600年）離開耶路撒冷，由神帶領去到美洲，佢哋嘅民族紀錄嚟。成本書都係圍繞住耶穌基督，而唔係約瑟。
而且你話耶穌無建立自己教會？啱啱上面耶穌先話「馬太福音:16:18 ……我要把我的教會建造……」
而你因為耶穌無親手寫，而係後嚟由他人手寫所以更可信……我睇唔到個因果邏輯關係。
最初正正就係耶穌自己話自己係神個仔，係使徒們信佢，佢哋先再寫嘢出嚟。

如果用返你嘅邏輯推論，你都唔應該信基督教
我覺得可能你表達得唔好或我理解錯啫，你可以再講嘅。
而當然約瑟死後都有好多人寫返約瑟嘅嘢，約瑟絕大部份啟示都唔係佢自己寫，而係好似福音書咁，佢講人哋寫。所以如我用一個教外人咁睇，我睇唔出你嘅基督教同任何其他宗教有分別。
所有你否定LDS嘅嘢，都可以用嚟否定基督教。你支持基督教嘅證據，都可以用嚟支持LDS。

奉勸各位香港嘅基督徒，唔好再喺度做好自己。

我哋基督徒係要嚟改變世界，而唔係被世界改變，如果個個都淨係掛住做好自己的話，歷世歷代嘅基督徒係唔會殉道。

一樣嘢係唔係神，同佢消唔消滅邪惡無關係 / 神係一個title
呢樣我諗「主流」基督教會認同
但我聽你之前講LDS嘅講法，神唔係曾經係人、
係因為消滅咗邪惡、攞咗經驗值先高昇為神咩?
因為咁，人先要做同樣嘅事情，嚟地球呢個試場賺經驗值，從而成為神?
定我理解錯你之前講嘅嘢?

如果我睇聖經，亞當都生咗個仔，形像同自己相似，咁佢個仔同佢又係神同人咁嘅分別？
咁至少字面上，有主動同被動、因同果嘅分別

「生了一個兒子，形像樣式和自己相似，就給他起名叫塞特」
意思係個仔生得似我老豆所以改佢個名叫塞特
同「神照着自己的形象造人」
神特登造到令人有佢某啲特質唔太一樣


約翰福音:10:34 耶穌說：你們的律法上豈不是寫著，『我曾說你們是神』嗎？
要解呢句首先要知佢引用嘅「律法」同「神」係指乜嘢
一般理解係指詩篇82篇，「在諸神中行審判 」中諸神嘅「神」
呢個「神」喺希伯來文可以解其他嘢，例如掌管法規嘅人、審判官等等
(好似廣東話話人「好神」、「女神」，都唔係直接解神明嘅意思)
所以只睇翻譯版就話係多神論唔太正確
現代好多神學院都要學生學希伯來文，就係為咗唔好有呢啲誤會


無信徒階祭司嘅新教教義為前題，應該好少人會覺得使徒同其他人係一樣
新教唔係「信徒階祭司」 而係根本無「祭司」呢樣嘢
「祭司」呢個職位主要嘅工作就係代表人民同神溝通、代表神同人溝通、獻祭等等
但耶穌死同復活之後，由於耶穌已經獻祭咗自己、人無需要再獻祭，亦可以直接同神溝通(祈禱)
所以基督教係無「祭司」(或者其他「權威」)呢個職位，變咗今日常見嘅牧師同傳道人


一座建築物係唔會起喺房角石（基督）上，而係起喺磐石根基（使徒先知）上。
以我嘅理解，當時房角石應該係成個建築底部角落最大最食力嗰舊石
類似現代嘅地基 (現代有地基同其他技術，房角石先變咗教會裝飾)
當然你都可以話房角石都係坐喺地上面
不過以弗所書2章成章都講緊基督嘅恩典，如果最後話 使徒先知(地) > 基督(石) 又唔太合理
「各〔或作全〕房靠他聯絡得合式」呢個「他」都係講緊房角石(基督)

以弗所書4章都係同樣嘅講法 - 「惟用愛心說誠實話，凡事長進，連於元首基督，全身都靠他聯絡得合式，百節各按各職，照着各體的功用彼此相助，便叫身體漸漸增長，在愛中建立自己。」


作為新教徒，本質就係反對人有權柄。但我睇聖經，似乎唔同意呢個睇法
又唔係成本聖經嘅，舊約時期好明顯係有權威人仕去代人同神溝通嘅
所以繼上，需要祭司、先知等等嘅角色
但耶穌嚟到，週圍同人講道、行神蹟搞大龍鳳，又叫啲門徒跟住做，明顯係要將信仰普及化
如果耶穌只想繼續沿用舊約嘅做法，咁其實佢唔先週圍走，就咁同彼得講嘢就得
耶穌就係週圍去講道、動搖到信仰權威嘅權益，先得罪班猶太人搞到要針十架嘅

成個新約都好強調基督，亦都多次講能力同權柄喺基督喥
如果抽其中兩句就話基督將呢個權柄畀咗某某人似乎有啲斷章取義

同埋退一萬步講，就算真係有，點解呢個權柄會突然飛咗去Joseph Smith喥?
啫係天主教主張、彼得開始條繼承鏈係錯嘅? 如果係錯嘅咁真正嘅繼承權又係邊個定?
彼得起碼係耶穌喺一班人面前講嘅，並喺馬太福音記錄
如果只係彼得自已寫本書話耶穌授權畀自己，咁可信性就會低好多


而且都無解決到使徒係未完全但聖經係完美嘅矛盾
咁都係睇你信乜嘢，如果你覺得神係唔係全能，咁佢默示嘅聖經都係唔完美，反之亦然
問題只係神有無能力令到唔完美嘅信徒寫出完美嘅書
所以你之前話唔完美嘅Joseph Smith有機會講出完美嘅道呢點係合邏輯
分別只係我哋信乜嘢


其實係得新教先信聖經係完美無誤
邊個confirm決定聖經嘅呢班人唔係越傳越多花臣嘅一部份？
兩個問題我一齊答

首先咩叫無誤先 我嘅理解「唯獨聖經」係指當中嘅道理、價值觀等等
啫係例如約翰寫啓示錄時預見未來、見到大疆無人機攻擊緊人
咁佢唔知咩係無人機，寫咗有「一群蝗蟲去襲擊」，對我嚟講唔係「錯」
同理，創世記話神6日創造天地，我會理解係指分咗6個階段，而唔係現今人類嘅144小時
如果你話信聖經完美無誤係要word by word啱晒，咁我都唔係

至於現代嘅聖經係唔係真。OG版原文，呢個都係講個信字
不過千幾年前所有副本都係人手炒出嚟，炒漏兩隻字、寫錯字嘅個別錯體版本可能會有
要出現大規模炒寫作假並廣泛流傳嘅機會我又覺得唔高


最少我睇唔到聖經有支持啟示會止於佢哋呢班見證人到
可能我講得唔清楚，我唔係話神唔會再同個別嘅人傳達訊息
但係聖經入面耶穌已經將完整嘅福音表達出嚟，已經係完整嘅，無需要加減

技術上嚟講聖經無明文話唔畀「加」，所以好多教派要改都係加唔係減
但對我嚟講，完成咗嘅嘢又點解要加?


猶太教徒唔會同意猶太教同「信經基督教」信同一個神/猶太教中，神唔係三位一體
佢哋唔信耶穌，咁當然無聖子、無三位一體etc
但耶穌口中嘅父、猶太教中全能嘅神、聖經中舊約嘅神，係指緊同一個「神」

同樣道理，有基督徒話摩門教、回教嘅神同基督教嘅神唔係同一個，呢個我有保留嘅
我覺得你哋都係based on聖經中嘅神，只係大家相信嘅同一個存在但唔同嘅形容啫

至於呢個對神嘅分別會唔會影響得唔得救，就係另一個問題
呢個我都好奇，喺你LDS嘅角度，我繼續信新教、跟住做嘅話，死後會點?


摩爾門經唔係約瑟自己寫本書話自己係先知。
問題唔係摩門經嘅內容，而係佢嘅由來，呢喥我講長啲:

例如中史，你會信有漢朝，因為三國時期嘅記載有提過漢朝，而之後嘅唐朝又會提返三國咁
所以你就算懷疑當中嘅細節內容，你都會確信呢段歷史係真實存在

聖經一樣，新舊約都係當代人寫好、跟住就喺猶太人或教會中間流傳，唔係爆出嚟
中間提到嘅戰爭、政權、王、人物等等都會喺其他史料上出現過，可以互相考證

但係摩門經中嘅內容係完全獨立嘅，並無其他資料支時到
入面提到嘅摩羅乃，無喺其他教派嘅聖文中出現過
入面提到嘅尼腓人，無喺任何美洲/猶太歷史資料、文物中提及過
Joseph Smith聲稱係原文嘅金書，佢班Fd以外無人見過
(摩西攞完十誡都可以攞落山畀大家睇，天使收返呢個借口有啲牽強)
但基於呢啲完全無人考證到嘅資料，佢建立咗自己嘅教會、自已做埋領袖
你唔覺得成件事好有利益衝突、好sus咩

你話耶穌最後都有教會，但其實耶穌同好多初期信徒一樣，都係殉道慘死
佢哋見過耶穌，並喺佢死後繼續放棄事業、家庭、錢財、怎至生命咁獻上一生

相反Joseph Smith咁住大屋、做市長，而佢嗰11個證人有10個離開咗佢
如果摩門經真係堅嘅話，Joseph唔係應該全時間週圍去傳摩門教、而唔係做市長咩?
班證人又唔係應該好似耶穌班門徒咁，寧願殉道死都唔走先啱咩?

（之前打左一半，以為已經覆左但原來冇添）

咁又唔係全部人都咁激既，可能佢地單單以為「教會人數增長」就係好，咩都唔洗理，咁就向mega church 取經，取到連聖經既內容都唔記得。

記得果時小組話要全部人買一本Joel Osteen 既成功神學書黎睇，結果係一位（唔係好睇聖經既）組員表達不滿，佢話：連聖經都未睇好，仲睇埋D聖經以外既書！？

所以，唔一定要由我指正，神要用邊個指正都得。