【無定向甜甜地】一百個斷尾故(3)

1001 回覆

6 Like 0 Dislike

第 1 頁第 2 頁第 3 頁第 4 頁第 5 頁第 6 頁第 7 頁第 8 頁第 9 頁第 10 頁第 11 頁第 12 頁第 13 頁第 14 頁第 15 頁第 16 頁第 17 頁第 18 頁第 19 頁第 20 頁第 21 頁第 22 頁第 23 頁第 24 頁第 25 頁第 26 頁第 27 頁第 28 頁第 29 頁第 30 頁第 31 頁第 32 頁第 33 頁第 34 頁第 35 頁第 36 頁第 37 頁第 38 頁第 39 頁第 40 頁第 41 頁

格躺 2024-04-24 18:45:17

飛揚 2024-04-24 18:48:08

飛揚 2024-04-24 18:48:29

格躺 2024-04-24 19:00:02

文

飛揚 2024-04-24 19:00:21

上回講到三伍煮緊飯，老婆阿晴就放工返嚟喇～
阿晴攰到死咁講返今日又俾Florence姐喪屌！
唉～出嚟做嘢係咁㗎啦～
三伍就邊聽老婆呻邊煮飯～
講真咁辛苦，不如唔好做～等三伍養好過啦～
但係阿晴想為個家出分力吖嘛～
好啦好啦～不過都係要三伍執手尾～
阿晴本身就大頭蝦～不過三伍就唔兜口兜面講～兩公婆有時就係要默默喺背後支持嘅～
其實三伍返工都辛苦㗎～都想搵人呻㗎～不過老婆咁多嘢呻，幾時輪到三伍吖～
冇所謂啦～
阿渣打嚟喎！話想搵埋三伍一齊參加高達比賽！
嘩十年冇打過！邊識打吖？
唔緊要喎！仲有時間操㗎喎！
就喺呢個時候...
“砰磞！”
「呀！」老婆大嗌一聲！
『點吖老婆？』三伍望過去老婆嗰邊，見佢好似想踎低，『喂唔好執啦！等我執啦！』
「唔使啦...呀！」老婆又大嗌一聲！
『喂你唔好...』唉實整損手！『喂阿渣唔講住...』
「喂唔係呢...」
『喂唔係呢我要睇睇我老婆先再講啦...』
「喂…喂...」
三伍冇理就Cut咗線！立即走過去睇睇老婆先：『點吖老婆？』
「流血...流血...」
『咁唔小心吖...都話等我嚟啦...幫你止咗血先...』
三伍幫老婆止完血，再幫佢黐埋塊膠布...再去清理埋啲玻璃碎...
一路執...一路諗...
『打比賽？』三伍擰擰頭，倒晒啲玻璃碎落垃圾桶。
下個故事又會係點呢？

準備出文

飛揚 2024-04-24 19:00:40

[Story 58－我的主角]

搬住一箱二箱上樓...

『家姐！』我一放低啲箱，『係唔係最後一箱㗎喇？』

「係吖係吖～」家姐就走嚟點點啲箱，「最後喇～」

『呼...』我就去閂返埋度門，『攰死喇...』

「總算俾我哋兩姊妹搞掂啦～」家姐就去拎兩罐可樂過嚟～

我哋兩姊妹就邊飲可樂邊抖抖...

『嗄～』我抖一大啖氣，『喂家姐...你一個搬出嚟住生唔生存到㗎？』

「點會生存唔到吖？」家姐仲係大安旨意咁～

飛揚 2024-04-24 19:01:59

『你喎...你喺屋企都唔識照顧自己㗎啦...而家仲話要搬出嚟自己一個住喎...』我呢個家姐雖然大我差唔多七年，但就仲衰過我...

啲家頭細務又唔做...

我哋間房又係我執嘅...

啲用過嘅杯又隨便放喺我張檯...好似等我洗咁...

試過我唔幫佢洗，佢真係放喺度足足成個月㗎！自己用另一隻杯㗎！

燈膽壞咗唔識換都算喇～等老豆搞掂啦～但風筒唔著就嗌晒救命咁！一睇...原來熄咗電掣！

咁少事都搞唔掂...都唔好話啲咩電器壞咗吖～爆水喉塞廁所嗰啲喇～咁仲點自己搬出嚟住吖？

飛揚 2024-04-24 19:02:57

「咩唔識吖？喺屋企唔使照顧自己咋嘛！搬出嚟住就唔同㗎啦！」家姐好有自信咁！

我又睇你捱得幾耐～

老豆就話家姐可以捱到半年...實在太唔了解佢個女喇～

媽咪就直頭冇眼睇添～都係媽咪心水清～

不過呢...應該就唔會餓死家姐嘅～

家姐煮嘢食都有一手㗎～

係囉～煮嘢食可能就係家姐唯一點滿嘅生存技能囉～

飛揚 2024-04-24 19:03:54

「喂唔好講我住～趁住而家得我哋兩姊妹，傾吓心事呢～」家姐古古惑惑咁打量住我～

『傾咩心事吖？你有心事咩？』我呢個家姐平時都傻吓傻吓咁...可以有咩心事？

「我就梗係冇啦～但你有吖嘛～」家姐搭搭我膊頭～

『有咩心事姐...』我就成條小蟹柳咁...

「扮咩吖？呢排睇你個樣都知你有啲嘢啦～點吖？同嗰個男仔點姐？」家姐勁八卦咁～

『邊個男仔吖？』

「仲有邊個吖？你暗戀咗好耐嗰個吖～」

『唉...唔知吖...佢條友仲掛住人囉...』

飛揚 2024-04-24 19:05:22

「咦咦好似好大粒花生喎～」

『唔講...』

「講啦講啦～點姐？你鍾意人？人哋又有鍾意嘅人吖？」

『佢仲鍾意之前一個同學囉...個同學都轉咗校兩年㗎喇...不過條戇鳩仔仲未肯死心囉...久唔久又專登路過返我哋之前中一嗰陣個班房...好似好回味咁囉...』

「嘩痴情種喎～同你一樣喎...」

『點吖？』

「唔係咩？咁跟住呢跟住呢？個男仔冇搵返人咩？」

『有啦...我就係見佢咁耐都仲係好似對人念念不忘咁...咪叫佢搵返人囉...』

「嘩你都好偉大喎～咁跟住呢？佢哋一齊咗喇？」

『唔知喎...好似就未嘅...不過見佢近排好似幾開心咁...原來真係俾佢搵得返嗰個女仔...』

飛揚 2024-04-24 19:06:41

我都係諗住講吓姐...點知又真係俾阿𧙗搵得返茵茵...

不過要搵返茵茵都唔難啦...佢咁靚女...話唔定喺連登經常有佢IG啲Po啦...

「未一齊？咁即係點吖？個男仔追緊個女仔？定係曖昧緊吖？」家姐又食晒花生咁～

『好似話都有約出街嗰啲囉...曖昧就應該唔會掛...唉唔知吖唔知吖！』一講起佢哋兩個就心都煩埋！

「哈哈哈～」家姐恥笑三聲，攬一攬住我條頸，「真係青春～」

『你都知自己老呢？』我冷眼打量住家姐...

「唔係囉！唉～」家姐無奈咁擰擰頭，「學生時期嘅戀愛係清澀啲～係唔同啲㗎～」

『係咩...講到自己好似情聖咁...拍過好多次拖咩？』印像中家姐喺中學都好似拍咗三四次拖...

飛揚 2024-04-24 19:07:26

「貴精不貴多嘅～」家姐又好似看破紅塵咁嘅樣...

『小蟹柳...』扮晒蟹...

「咩小蟹柳吖？嗱！愛要自己爭取嘅！要做佢嘅女主角！」

『咁你自己又幾時搵返個男主角吖？』

「都要有緣先得㗎～邊似得你吖～」

『緣份嘅嘢要嚟擋都擋唔住吖～』

「承你貴言～」

愛要自己爭取...點爭取先得㗎？

飛揚 2024-04-24 19:08:27

Lunch完咗返到學校，行過一樓...

咁啱又俾我見到阿𧙗又企咗喺我哋中一個班房門口...

『阿𧙗？』我行到去阿𧙗面前，『做乜又呆咗咁望住我哋以前個班房吖？你呢排唔係有搵人咩？唔係都有約出街咩？』

「唔唔...」阿𧙗擰擰頭...又擰擰頭，「我以為自己可以成為男主角...原來係連愛情大悲劇嘅男配角都冇資格...」

『嗯？』我唔係好明...

「或者我真係唔明啦...我唔明咩叫做愛啦...愛一個人有幾深到好...愛多幾多年都好...佢唔愛你...就係唔愛你...」

我睇得出阿𧙗好失望...

「係愛嘅話...就算大話連篇...佢都會心甘命抵咁盅個頭埋去...」

雖然我唔知阿𧙗同茵茵發生過咩事...

飛揚 2024-04-24 19:09:08

「愛情根本就唔會降臨喺我呢種人身上...」

『唔係㗎...』我望實阿𧙗，『唔係咁㗎...』

「嗯？」阿𧙗打量住我...

『你都可以成為愛情故事中嘅男主角...』

「我...」阿𧙗猶豫不決...

『點解要甘心做人哋嘅男配角姐？佢唔值㗎！』

「佢...」阿𧙗諗一諗...

『你都可以...我都可以...俾我做你嘅女主角！』

「你...」

飛揚 2024-04-24 19:09:33

今晚出完

鍾意嘅朋友記得Like同Share俾身邊嘅朋友一齊追～

有咩記得喺下面留言講～我會一一回覆～