【無定向甜甜地】一百個斷尾故(3)

[Story 48－第二初戀]

喺一個婚宴上，我拎住杯酒，望望...

唔係望主人家，係望望啲賓客...

我又緊張...又期待咁望望...搵搵...唔知今次會唔會遇到呢？

今次我都專登著得靚仔啲...差啲都同班兄弟著得咁隆重...俾人誤會...

不過望咗咁耐...搵咗咁耐...都係唔見...

莫非今次...佢唔會嚟？

當我又走去睇吓啲相...又望吓入口...咁啱就俾我望到雅姿行入嚟！左右望咗兩眼！

然後雅姿望到我，就帶住微笑咁行埋嚟我面前：「阿民～你今次都有嚟吖？」

『係吖～係吖～估唔到上次阿穎同Danny嗰餐撞返你，今次阿偉同Bonnie呢餐又推到你～你今晚...』我打量雅姿一眼，『好靚呢～』

「多謝～」雅姿帶住微笑點點頭，「你都係～」

其實自上次阿穎同Danny嗰餐之後，都差唔多已經過咗成年。

呢一年...唔係...唔好話呢一年，呢十年其實我都仲係好掛住雅姿...

雅姿係我嘅初戀...

十年前，我哋都仲係讀緊中學...嗰陣我對雅姿可以話係一見鍾情。

雅姿唔單止靚，又活潑～經常帶住笑面～笑得好燦爛～

所以成為我哋嘅校花係當之無愧～

我每日返學就總係會俾雅姿吸引住...不論係喺操場上PE堂...定抑或係喺班房上堂...

其實我都暗戀咗佢好耐先敢同佢表白！

『其實我...我鍾意咗你好耐...可唔可以做我女朋友？』

講真...而家諗返都唔知自己嗰陣係那來的勇氣～

又唔知邊度嚟嘅狗屎運...

「好吖～我做你女朋友啦～」

又竟然俾我得米喎！

同雅姿拍拖都好開心～雖然就冇乜嘢做嘅～

都係一齊做功課溫書～放咗學就拖吓手仔行街睇戲食飯～

或者係初戀嘅關係掛～簡簡單單就已經好開心～

不過有人話過...初戀永遠都冇好結果...

雅姿喺放學嘅時候突然同我講：「我哋分手啦...」

『點解吖？』一時之間，我接受唔到...

「我鍾意咗第二個...」雅姿唔願直視我...

『我對你唔好咩？』我已經對雅姿好好...

「你又對我好...佢又對我好...有得揀點解唔揀個風趣幽默啲...」雅姿頭也不回咁走咗去...

自嗰日之後，我哋都再冇傾過一句計...亦冇對望過一眼...

雖然日日都總會有機會喺學校見，但就好似當對方透明一樣...

其實嗰段日子都好難捱...好難先捱到中學畢業上大學...

然後我哋就真真正正完完全全失去聯絡...

咁多年嚟，我當然都有試過拍拖啦～

話多就一定唔多㗎喇...一隻手都數得晒...

每次都唔會好長添～

總係會俾女朋友話：「喂你有冇聽我講嘢㗎？心不在焉咁嘅？」

只係拍咗三四次拖，女朋友都係話我個心冇佢哋...然後就分手...

我都唔知點先叫個心有佢哋...

或者真係...我個心太細...一直都放咗個人喺心裡面...念念不忘...必有迴響...

講真嗰句...我冇嬲過佢...從來都冇...

由戴帽嗰日，到拍過幾次拖...到深明我唔可以愛上其他人，我都冇嬲過佢...

愛一個人愛到盡頭並唔係恨...

『同對新人影返張相先？』

「好吖～」

我同雅姿就走去同對新人影返張相～然後又傾幾句～又坐埋同一圍檯，一齊聽個MC講笑～一齊睇早拍晚播～一齊食～

到散宴之時...

『係呢有冇人接你吖？』我問一句雅姿。

「冇吖～」雅姿擰擰頭。

『咁...我車你？』

「好吖～」

“吼！吼～”車雅姿返屋企...

我都唔想揸得咁快...想慢慢揸...想可以同雅姿相處得耐啲...

因為過咗今晚，又唔知要等幾耐...仲有冇機會再見...

之但係香港嘅公路就係咁，你趕時間想快咩？唔係撞車就係壞車塞死晒條路！

你想慢啲咩？成條路都暢通無阻...

“吼～吼...”唔使幾耐就駛到嚟雅姿屋企樓下...

『送埋你上去？唔...怕唔怕俾你男朋友見到？』我係想爭取多啲時間同雅姿相處耐啲...

但一諗到佢男朋友...又好似搞到人咁...

「我同男朋友散咗喇～」雅姿帶住微笑擰擰頭，「我而家自己一個人住咋嘛～」

『散...咗吖？』

「係吖～」雅姿冇打算落車，只係解咗條安全帶，放鬆咁挨喺張凳，「佢吖...份人好火爆～我哋都嘈過好多次...」

『咁...佢有冇郁手郁腳？』我唔係八卦...係想關心...

「咁又冇～」雅姿擰擰頭，「都係嘈幾句姐～每次仲好快會氹返我添～」

『咁...點解今次又會散嘅？』都係嗰句...我唔係八卦...係想關心...

「因為佢工作上嘅問題...發咗好大好大脾氣...又話我幫唔到佢～又話我煩住佢～總之就係嫌我阻住佢咁囉...咁我都...無謂再阻住人啦～」雅姿鬆一口氣～

『咁...你仲鍾唔鍾意佢？』我打量住雅姿...

「唔啦～」雅姿擰擰頭，「鍾意嘅感覺早就消失咗...留低咁耐都只係諗會唔會係結婚對象...但佢都冇諗過...直到分手嗰日佢都係冇諗過會同我結婚...」

原來...係咁...

「好喇～我返上去喇～」雅姿想打開車門...

『雅姿！』我捉住雅姿隻手，『我...我一直都仲好鍾意你...可唔可以做我老婆？』

雅姿眼定定咁望實我，然後帶住微笑：「好吖～我做你老婆啦～」

今晚出完

鍾意嘅朋友記得Like同Share俾身邊嘅朋友一齊追～

有咩記得喺下面留言講～我會一一回覆～

三句預告

[Story 49－艱辛老闆]

喺自己個倉裡面...

『喂明仔明仔！啲貨點咗未㗎？』

已經將[Story 48－第二初戀] Upload上Penana

好準時

然後兩嘢又話
你又對我好
佢又對我好
咁我點解唔揀個風趣幽默嘅

試過咁多次之後 今次唔會㗎喇

未決定

江山易改本性難移

決定咗記得講嚟聽聽

話唔定玩夠想收心養成呢