【無定向甜甜地】一百個斷尾故(3)

上回講到阿民喺人哋個結婚晚宴，等緊人咁喎～
等緊邊個？
望咗幾眼，雅姿就啱啱喺入口行入嚟～
大家都打返個招呼傾幾句先～
自上次婚宴之後，都差唔多成年冇見～
其實唔止呢一年，阿民一直都仲係好愛雅姿～
雅姿係阿民嘅初戀～
都已經係中學嘅事喇～嗰陣唔知邊度嚟嘅勇氣，又唔知邊度嚟嘅狗屎運，同到雅姿一齊～
不過初戀總係冇好結果嘅...
雅姿移情別戀！
阿民唔係冇再拍過拖，不過個個女友都話佢冇心嘅！
鬼叫阿民個心放咗雅姿落去，冇晒位咩～
晚宴完咗，阿民都車埋雅姿返屋企～
“吼～吼...”唔使幾耐就駛到嚟雅姿屋企樓下...
『送埋你上去？唔...怕唔怕俾你男朋友見到？』阿民係想爭取多啲時間同雅姿相處耐啲...
但一諗到佢男朋友...又好似搞到人咁...
「我同男朋友散咗喇～」雅姿帶住微笑擰擰頭，「我而家自己一個人住咋嘛～」
『散...咗吖？』
「係吖～」雅姿冇打算落車，只係解咗條安全帶，放鬆咁挨喺張凳，「佢吖...份人好火爆～我哋都嘈過好多次...」
『咁...佢有冇郁手郁腳？』阿民唔係八卦...係想關心...
「咁又冇～」雅姿擰擰頭，「都係嘈幾句姐～每次仲好快會氹返我添～」
『咁...點解今次又會散嘅？』都係嗰句...阿民唔係八卦...係想關心...
「因為佢工作上嘅問題...發咗好大好大脾氣...又話我幫唔到佢～又話我煩住佢～總之就係嫌我阻住佢咁囉...咁我都...無謂再阻住人啦～」雅姿鬆一口氣～
『咁...你仲鍾唔鍾意佢？』阿民打量住雅姿...
「唔啦～」雅姿擰擰頭，「鍾意嘅感覺早就消失咗...留低咁耐都只係諗會唔會係結婚對象...但佢都冇諗過...直到分手嗰日佢都係冇諗過會同我結婚...」
原來...係咁...
「好喇～我返上去喇～」雅姿想打開車門...
『雅姿！』阿民捉住雅姿隻手，『我...我一直都仲好鍾意你...可唔可以做我老婆？』
雅姿眼定定咁望實阿民，然後帶住微笑：「好吖～我做你老婆啦～」
下個故事又會係點呢？



準備出文

今晚出完

鍾意嘅朋友記得Like同Share俾身邊嘅朋友一齊追～

有咩記得喺下面留言講～我會一一回覆～