各位早晨
星期一又要努力
上回講到穎茵啱啱失戀,日日喊到黐肺~
即係喺姊妹面前就話冇所謂~返到公司都喊,搞到工作就唔係咁好啦~
結果Kate姐都想幫穎茵散散心~約燒嘢食~
但出到嚟就知唔妥喇!擺明係介紹男仔俾穎茵識啦!
講真穎茵對牛丸真係冇乜興趣,不過又唔想得失Kate姐...只好當Friend咁同牛丸相處囉~
由初時仲會同Kate姐兩公婆陪住,到同牛丸單拖出嚟。
穎茵覺得同牛丸做Friend都OK嘅~而且牛丸都鍾意小動物~鍾意小動物嘅男人應該都唔會太差~
點知原來牛丸都唔係真心鍾意小動物!只係純粹想有隻貓陪佢,控制隻貓!
明顯就唔夾啦~
算啦~做Friend啦~做Friend都仲勉強可以嘅~
都係以做Friend嘅心態同牛丸佢哋出街食飯~
係吖~都係同埋Kate姐佢哋成班好啲~單獨就免喇~
而穎茵嘅心情都真係平復咗好多~
咁都係要多謝Kate姐嘅~識到新朋友,有新嘅圈子係可以為情療傷嘅~
然後又約咗幾次一大班人出嚟食飯...
『咦?我哋九個咩?唔係八個咩?』穎茵見Kate姐開咗九個位,就有啲好奇...
「係吖~仲有一個...呢佢嚟喇~」Kate姐指住後面~
穎茵回頭一望...有個男仔行緊過嚟...
個男仔行到去牛丸後面:「喂~好耐冇見喇~」
「喂好耐冇見~」牛丸拍一拍個男仔,「介紹返先~呢個係穎茵~呢個係Smith~」
「Hello~」Smith坐喺牛丸隔籬,帶住微笑同穎茵揮揮手。
『Hi...』Smith...都幾靚仔...係穎茵鍾意嗰類吖!
下個故事又會係點呢?
準備出文