末世紀的呼聲
2017-06-19 16:29:35
第二日我地就去安平老街,我地等咗好耐巴士先有車。
上到車之後我好快就瞓著咗,但係其實架車好「鄧」,我好快就有番知覺。
我feel 到阿楓一路都扶住我個頭,而我都瞓咗喺佢膊頭。呢一刻我真係覺得好溫暖。
因為我曾經幻想過呢一幕好多好多次,終於發生喺我身上。
隔咗冇耐佢都瞓著咗,佢都瞓咗落黎。
我想永遠留住呢一刻,所以我就用電話自拍咗一張相..一張彌足珍貴嘅相。
「如果永遠係咁就好..」我自言自語,有得揀嘅話,我真係想個旅程咁快完..至少可以停留喺呢一刻。
我地到咗之後就去咗個博物館,我對果啲嘢冇乜興趣,反而阿楓就好有,所以我無論幾悶都陪佢行完去..呢個已經係我最大嘅樂趣。
反而老街我就好興趣,果到好多古靈精怪嘢買,好過癮,好似廟街咁。
「咁興奮嘅你?」佢問我。
「我好少出黎行呢啲街啊麻,好少見到呢啲古靈精怪嘢。」
「喂阿楓,你睇下,呢個好似你!」阿月指住廟出面個扮孫悟空嘅人。
「屌你啦,似你啊!」
「真係好似喎,成日跳跳扎咁。」阿言講。
哈哈,真係幾似,諗番佢細個咁活躍嘅樣就覺得好笑,呢啲嘢都得我同佢先知架炸!
「行完未啊?行完就搭番車出去啦,我地今晚打邊爐!」阿晴講。
「好啊屌,我等咗呢日好耐!」阿星好雀躍。
食完餐好好食嘅火鍋之後我地就番番民宿玩..大冒險!
末世紀的呼聲
2017-06-19 17:41:12
「啦,我地今次又玩下大冒險!」阿星講,我地沖好曬涼之後又圍埋一齊玩。
「不過就唔咁麻煩,每人派一張牌,其中有兩張就一樣嘅,邊個抽到一樣嘅牌就要懲罰!」
「下,嘩咁咪每輪都有2個人輸?」阿晴問。
「咁樣先刺激啊,阿星可!」子妮講。
「咪係!啦,我派啦。」
「一、二、三,開啊!」
第一鋪就抽中阿言同阿晴。
「Wowww!合巹交杯,之後po IG!」阿星嗌!
「咁有幾難?」阿言講。
「係喎..咁諗過個!」
「痴線,邊可以諗過個。」佢反駁。
「咁算!照做!」
其實我好羨慕佢地兩個,可以分開咗都喺得番埋一齊,仲愈來愈甜蜜,可能真係佢地好彩,可以咁快遇到佢地鐘意嘅人。
我諗我仲要等下啦…但係仲要等到幾時呢?
同佢地玩其實都幾開心,個個都好就得大家,好為對方著想,唔會因為一己私利搞到大家唔開心。
去到阿晴同阿豪比人罰,都笑到我肚痛,阿豪真係好重!
然後就到阿楓同阿月俾人罰,佢地好似去行刑咁,見到佢地千年殺對方都真係睇到都痛..
然後我地再玩多咗幾輪,今次終於抽中我同阿楓…
「嗯...你地咬住百力枝兩端,咬到得番2CM!」阿言唔知邊到拎咗包百力滋出黎。
「咁樣....」我講。
「好啊,黎啦!」其實我個心而家跳得好西利,咁樣會同阿楓距離好近..
但係呢個機會真係可一不可再..所以我都係選擇咗爽爽快快咁玩!
「嚼、嚼、嚼..」我地一啖一啖咁食,食掉百力滋,距離都愈來愈近..
我一直慢慢咁咀嚼,唔太敢食得太快..我驚一個唔覺意會…
到咬碎枝百力滋果一刻..
我同佢嘅嘴唇..好似真係有意無意咁..觸碰咗一下。
我頓時個腦好似放空咗咁..
講好咗我唔可以咁過份..但係我又控制唔到自己…
我覺得自己好衰..做埋啲咁禁忌嘅嘢..我仿佛已經唔記得佢係有女朋友..
係喎..佢係有女朋友..仲要係我好朋友,,
「我..去一去廁所。」佢講..果然佢都係顧忌緊小涼。
之後佢地見都已經夜,所以就各自番房。番到房之後我就上咗床,冷靜下自己。
我一直要自己忘記頭先果一刻,但係又瞞唔過自己內心,其實我心底係好享受頭先果一分鐘,果種矛盾感覺真係好煎熬。
佢番到黎之後,我地都尷尷尬尬咁,無言以對。
「哈哈..瞓囉!」佢講。
「好啊..」
上到床之後我地都各自愣開咗,冇講嘢。
但係我一直都瞓唔著..我好唔開心。
如果我地係情侶咁玩頭先個遊戲你話幾好。