末世紀的呼聲
2017-06-15 16:37:00
「做咩啊?」
「不如我地一齊搵番啲細個嘅回憶啊。」
「喺台灣搵細個嘅回憶?」
「搵回憶唔係睇喺邊嘅,睇同邊個架姐。」講完佢就轉過黎望住我。
喺明月嘅映照下,佢雙眸仍然晶瑩剔透,眼仔碌碌咁。
「啊..你話點就點啦..」
「好耶!咁瞓啦,夜啦,早抖!」之後佢又轉番過去。
上次同小霖一齊瞓好似已經係三年班嘅事,雖然只係瞓下晏教,但係都計啦。
不過細個邊有諗咁多,眼瞓咪瞓囉。但係而家經歷過咁多嘢,都唔會再咁純樸。
諗諗下我都不知不覺咁..瞓著咗。
「Woww!」第二朝起身,突然間聽到床邊有人喺到大嗌,嚇得我鳩都縮。
我攣大眼睇,竟然係隔離房果兩條契弟入咗黎。
「做咩啊..」小霖都俾佢地嘈醒咗問,我都唔知發生緊咩事,淨係覺得有啲軟冧冧嘅嘢壓住咗自己,同埋見佢地拎住部電話唔知影乜..
拎住電話?影相?shit!
我回過神望一望,我原來痴住咗小霖黎瞓!唉死啦,今次水洗都唔清。
「啊..sorry..」我發現之後即刻縮番開手。
「唔…唔..緊要。」
「哈哈,我地已經影低你地嘅通姦證據!」阿月笑住講。
「喂屌唔好亂講啦,快啲del咗去啦!」
「我唔del!啊,阿豪啊,我地好似多咗個阿四可以用啦喎。」兩個賤人...
「咩阿四啊?」阿言突然喺後面殺上黎。
「冇..冇..嘢啊 !」兩條友好似做咗虧心事咁走咗番房。
「你兩個快啲啦,就走啦,唔好嘥時間啦。」講完佢就落番去。
「啊...頭先真係..唔好意思..。」得番我地兩個,果浸尷尬嘅氣氛又再次彌漫起來。
「唔緊要...我去刷牙先!」佢急急腳咁沖入廁所,塊面仲紅曬咁。
「喂!」我叫住佢,佢即刻立曬正咁。
「係!」
「你未拎牙刷。」
「係喎..哈哈!」
佢入咗去之後,我個心跳依然冇回復正常,係咁跳係咁跳。
經過咗個咁尷尬嘅起身方式,我地好快就準備好出發,唔知點解佢好似好快當冇事發生咁,繼續同我有講有笑。
我就好似做咗佢侍從咁,佢去到邊我就去邊。