【宋詞趣談】小二，黎一碗東坡肉！！！(多圖餓撚勿入)

前言
「情之一字，所以維持世界；才之一字，所以粉飾乾坤。」
——張潮《幽夢影》

各位巴絲打好，又係我黎同大家吹吓水
之前我已經講過兩個文學家
魏晉陶淵明嘅《桃花源記》
晚唐李商隱嘅「此情可待追憶，只是當時已惘然」
讀後不禁為古典文學嘅美而傾心

上兩次我地都集中講佢地嘅詩作
去到第三講，順住文學發展，我地由詩入詞啦
唐代最出名係唐詩，宋代最出名係宋詞
而係宋詞之中，有個古今中外都極受歡迎嘅文學家
呢位，就係今次嘅主題：蘇東坡



如果要講中國最多才多藝嘅全能型文人
當推蘇軾為第一人
林語堂係《蘇東坡傳》咁樣形容：
「蘇東坡是個秉性難改的樂天派，是悲天憫人的道德家，是黎民百姓的好朋友，是散文作家，是新派的畫家，是偉大的書法家，是釀酒的實驗者，是工程師，是假道學的反對派，是瑜伽術的修煉者，是佛教徒，是士大夫，是皇帝的秘書，是飲酒成癮者，是心腸慈悲的法官，是政治上的堅持己見者，是月下的漫步者，是詩人，是生性詼諧愛開玩笑的人。」
東坡嘅生平研究極多，史料又豐富
正所謂文學離唔開時代，作者嘅人生係好重要
我講作品之餘，都會講東坡嘅人生大事



東坡真係好鬼癲，絕對係中國藝術家入面嘅天才
除左北宋首屈一指嘅詞人
詩作都係一絕，同黃庭堅並稱「蘇黃」
又係唐宋古文八大家之一，可比韓愈
加埋宋代四大書法之一，好多人都求佢一字
同時東坡繪畫自成一格，開創湖州畫派
對儒、釋、道三家都好有研究，註過《論語》、《易經》、《尚書》
係呢到嘅講解，我會以詞為主，其他偶然會講解吓

唔知大家對東坡詞嘅理解有幾多呢？
我地嘅教科書都會選入佢一首好特別嘅詞
《念奴嬌(赤壁懷古)》：大江東去，浪淘盡，千古風流人物
文學史大多片面咁講東坡詞「豪放」
但係點解「豪放」咁重要？
東坡詞有冇其他風格，其他形容？
東坡咁多首詞，點解得呢一首入教科書？
以上種種疑問，我將會慢慢解答

蘇東坡係我第一個真正鍾意嘅古典文學家
讀佢嘅詞作，令我走入古典文學嘅大門
呢個亦都係我不斷咁開Post嘅原因
希望透過我對東坡嘅熱愛，可以比大家睇見古典文學之美
希望唔會悶親大家啦

附上我嘅Blog，大家有興趣可以追埋其他文藝Post：
陶淵明：
https://lihkg.com/thread/244538/page/1
李商隱：
https://lihkg.com/thread/245419/page/1
荀子：
https://lihkg.com/thread/248191/page/1
梵谷Van Gogh：
https://lihkg.com/thread/246863/page/1

最後放返個Blog比大家分享，得閒坐車等人咪睇吓
有哂最快嘅更新同最好嘅排版：
http://deliver90.blogspot.tw/

上個Post出到第十篇
仲有好耐先會講完東坡詞
不過因為好多圖死哂，所以要再發文
不論新知舊友，鍾意嘅都留返個名，比返個正評
我會盡快貼返哂舊文
再出返最新已經寫好嘅新文

歡樂的文學美食家
談東坡平易近人之飲食文學

引子

係未入正題講解文學之前，先講講東坡點解咁受人鍾意啦
「凡有井水處，必歌柳詞」
柳永係當時都係好受歡迎嘅文學家
但隨住時代變遷，蘇軾係後世嘅影響力絕對係北宋第一人
當中最重要嘅原因，係因為東坡文字嘅平易近人
係佢眼中，無事不可入詩詞，只要係佢鍾意嘅就寫得



東坡呢種寫作態度，反映係佢將美食嘅熱情放入文學
當中最出名嘅，緊係以佢命名嘅「東坡肉」啦
歷史有記東坡肉嘅記載係咁嘅：
東坡係杭州做太守果陣，太湖氾濫成災，佢就叫左好多整防堤疏導河水
呢個防堤就係今時今日西湖十景之首嘅「蘇堤春曉」
咁百姓都愛戴東坡，過年就送左好多豬肉比佢食
東坡愛民如子，見咁多豬肉食唔哂，就家鄉四川嘅煮法分比大家食好西
「蘇東坡送嘅肉」，真係好好食，東坡肉真係正呀！

不過，呢種故仔有好多版本，都好難話完全準確
但從東坡嘅詩文，我地的確見到佢係好鍾意食人地隻豬嘅
佢曾經寫過一首打油詩〈豬肉頌〉

黃州好豬肉，賤價如糞土。
富者不肯吃，貧者不解煮。
慢著火，先洗鐺，少著水，柴頭罨煙焰不起。
待他自熟莫催它，火侯足時它自美。
每日早來打兩碗，飽得自家君莫管。

罨：掩蓋

古時豬肉係好廉價嘅食物，並唔係咩高尚嘢
而東坡成世人偏偏鍾情呢種「賤價如糞土」
正所謂You are what you eat
東坡除左係讀書人，更重要係佢都幾草根
佢自稱：上可以做天子嘅忠臣，下可以同百姓做朋友
呢種「飽得自家君莫管」嘅貼地諗法，係佢好吸引人嘅地方



東坡有幾鍾意食豬肉？
〈戲答佛印〉
遠公沽酒飲陶潛，佛印燒豬待子瞻。
採得百花成蜜後，不知辛苦為誰甜。

東坡成日同和尚道士做朋友
佛印係東坡嘅僧友，成日去搵佢吹吓水
佛印為左歡迎東坡黎寺院，竟然整隻燒豬加啖酒
等東坡係人世間嘅所有不快都溜走
睇得出東坡份人幾大魅力，連和尚都為佢開方便之門



〈東坡羹頌〉
東坡羹，蓋東坡居士所煮菜羹也。不用魚肉五味，有自然之甘。其法以菘若蔓菁、若蘆菔、若薺，皆揉洗數過，去辛苦汁。先以生油少許涂釜緣及瓷碗，下菜湯中。入生米為糝，及少生姜，以油碗覆之，不得觸，觸則生油氣，至熟不除。其上置甑，炊飯如常法，既不可遽覆，鬚生菜氣出盡乃覆之。羹每沸湧。遇油輒下，又為碗所壓，故終不得上。不爾，羹上薄飯，則氣不得達而飯不熟矣。飯熟羹亦爛可食。若無菜，用瓜、茄，皆切破，不揉洗，入罨，熟赤豆與粳米半為糝。余如煮菜法。應純道人將適廬山，求其法以遺山中好事者。以頌問之：
甘甘嘗從極處回，咸酸未必是鹽梅。
問師此個天真味，根上來麼塵上來？

東坡係一個生性豁達嘅人
一生中不時都面對窮困嘅生活
係無啖好食果陣，佢自創「東坡羹」
其實即係青菜糙米湯，慘過食雞翼魚蛋湯
但東坡係到講「不用魚肉五味，有自然之甘」，諗得好樂觀
仲話最啱修道之人食，原汁原味絕無人造添加色素

〈惠州一絶〉
羅浮山下四時春，盧橘黃梅次第新。
日啖荔枝三百顆，不妨長作嶺南人。

其實東坡真係一個好貪食嘅人
呢邊係佢人生晚年，去左廣東嶺南
佢竟然好誇張咁講日日都啪三百粒荔枝
真係好味到想留係做嶺南人
搞到我突然都好想啪幾粒

古人食時令嘢唔係咁簡單
始終交通唔發達
東坡人生差唔多走哂成中國
雖然都幾慘，但有一得著，就係食遍中國啦


〈春江晚景〉
竹外桃花兩三枝，春江水暖鴨先知。
蔞蒿滿地蘆芽短，正是河豚欲上時。

唔止今時今地嘅日本人
就連宋代江南人都好鬼鍾意食河豚
有「拼死吃河豚」嘅講法，當然都有一定危險啦
東坡呢到正正係用生命係飲飲食食
人生一大享受，莫過於享用美食



最後再講一封東坡寫比佢細佬子由嘅信：
惠州市井寥落，然猶日殺一羊，不敢與仕者爭買，時囑屠者買其脊骨耳。骨間亦有微肉，熟煮熱漉出，漬酒中，點薄鹽炙微燋食之。終日抉剔，得銖兩於肯綮之間，意甚喜之，如食蟹螯；率數日輒一食，甚覺有補。子由三年食堂庖，所食芻豢，沒齒而不得骨，豈復知此味乎？戲書此紙遺之，雖戲語，實可施用也。然此說行，則眾狗不悅矣。

東坡話發現羊脊骨係好鬼好食
「熟煮熱漉出，漬酒中，點薄鹽炙微燋食之」
睇到佢嘅料理手法，真係不得不話佢好識食
東坡仲要好鬼風趣咁講：
「然此說行，則眾狗不悅矣」
如果個個都咁鬼識食，買哂骨頭返去整
咁街邊嘅野狗仲點會有骨頭可以食呢？

東坡嘅樂觀、風趣、平易近人
一一可以由佢嘅飲食中可見
仲要我無提嘅，東坡仲好鍾意飲酒釀酒
一個真正用生命享受美食嘅人
亦都代表佢能夠享受人生嘅美好
希望經過我之後嘅介紹，令你都可以好似東坡咁啦

用廣東話寫嘅論文真係好易入口
樓豬加油

用廣東話寫嘅論文真係好易入口
樓豬加油

我都盡量希望比返香港人睇
希望係香港推廣文藝出返幾分力
多謝巴打支持

即刻留名正皮

巴打呢個就係正確示範啦

咁多個文學Post,
暫時最鍾意東坡,
探長巴快手出返哂堆文,
等緊睇新文架

盡快出返哂
今個周末要出新文
費事大家等咁耐

即刻留名正皮

巴打呢個就係正確示範啦

留名正皮

探長巴一次過出返咁多Post
會唔會頂唔順架

用廣東話寫嘅論文真係好易入口
樓豬加油

呢樣真係好重要
最重要寫得好清楚

作為香港人即刻要支持吓

個標題好似唔同左咁

之前餘燼巴打嘅留言

由小學雞果陣已經好鐘意肥坡
成日都想買關於佢既生平/詞既書
巴打有冇推薦

如果講入門書嘅話
林語堂本《蘇東坡傳》係幾值得睇

呢本香港書局都應該會有

其實入門定出門定開門定閂門我全部都冇問題
自問文言文還可以
香港冇既話我係台灣/大陸訂都OK

咁就好啦
仲有本叫《蘇軾詞新釋輯評》
北京書局出，都好值得參考，係目前收蘇詞最多嘅版本

lin登新人巴打留言

終於講到我最愛的東坡，研究左幾年
豪放詞黎講真係無得輸，雖然被李清照話「至晏元獻、歐陽永叔、蘇子瞻，學際天人，作為小歌詞，直如酌蠡水於大海，然皆句讀不葺之詩爾，又往往不協音律者。」但意境黎講，超哂班

巴打真識貨
東坡雖然的確有佢講嘅問題
但呢種係小事啦，東坡當詞係獨立嘅文學作品去寫
唱唔唱到，反而無咩所謂

lin登新人巴打留言

終於講到我最愛的東坡，研究左幾年
豪放詞黎講真係無得輸，雖然被李清照話「至晏元獻、歐陽永叔、蘇子瞻，學際天人，作為小歌詞，直如酌蠡水於大海，然皆句讀不葺之詩爾，又往往不協音律者。」但意境黎講，超哂班

巴打真識貨
東坡雖然的確有佢講嘅問題
但呢種係小事啦，東坡當詞係獨立嘅文學作品去寫
唱唔唱到，反而無咩所謂

lin登新人巴打：
無錯，婉約詞寫到太重覆，豪放詞一出，一洗天下文氣
所以佢一讀完莊子就話「吾昔有見於中，口未能言，今見《莊子》，得吾心矣！」個種超脫既思想，完全係「燕雀安知鴻鵠之志」

笛笙由竹生巴打：

東坡手詷好正，雖然冇乜絢麗嘅用詞，但係意境深遠，而且我唔係話睇咗佢好多詞都覺得佢題材好豐富
不過我都係鍾意柳永同李煜多啲

馬鞍山顏真卿巴打：

東坡手詷好正，雖然冇乜絢麗嘅用詞，但係意境深遠，而且我唔係話睇咗佢好多詞都覺得佢題材好豐富
不過我都係鍾意柳永同李煜多啲

平白中見深遠係好高難度

陶潛都係擅長呢味

豪華落盡見真淳
真係唔簡單，唯造平淡難

人生到處知何似
應似飛鴻踏雪泥
泥上偶爾留指爪
鴻飛那復計東西

淺白到好似口語
但果種瀟灑出晒黎

佢個語氣表面瀟灑，但暗含蒼桑，其實只係夾硬說服自己

咁複雜嘅情緒都表達淋漓，真係捨佢其誰

探長巴一次過出返咁多Post
會唔會頂唔順架

長痛不如短痛
而家圖源係返自己個blog
至少唔擔心有日會再出咩意外

個標題好似唔同左咁

改少少
費事同舊Post一樣

多謝絲打留名