【宋詞趣談】小二，黎一碗東坡肉！！！(多圖餓撚勿入)

係到Post埋聲滿巴打提嘅詞
好值得同江城子對讀

半死桐‧賀鑄

重過閶門萬事非。同來何事不同歸。梧桐半死清霜後，頭白鴛鴦失伴飛。
原上草，露初晞。舊棲新壟兩依依。空床臥聽南窗雨，誰復挑燈夜補衣。

回應羅天巴打：

蘇軾三百幾首詞 得十分一係豪放詞 但就比後世認為係豪放派代表
同埋有種分類覺得佢d詞係曠達 唔係豪放
唔知樓主點睇
其實蘇軾同李白一樣都係仙境 普通人學唔到
不如講下辛棄疾點用典啦 起碼人境 讀多d書都可能做到
利申：皮已正

豪放詞雖然少，但夠突破，後人咪話佢豪放
相對婉約，豪放詞話係代表，真係得蘇辛
東坡、稼軒都係豪放，但兩者分別係邊呢？
咁就有人話，東坡果種相對稼軒嘅詞，其實係曠達
我自己都幾同意呢種講法，係今時今日都算係學術界公認

簡介基本古典文學概念：和詩
並讀〈懷澠池寄子瞻兄〉、〈和子由澠池懷舊〉

正文第七章

東坡同佢細佬子由係好好感情嘅兄弟
林語堂《蘇東坡傳》咁樣形容佢地嘅外形：
「兄弟二人，氣質不同，形貌各異。子由高大，豐滿的圓臉，兩頰附近的鬆肉很多，而東坡則健壯結實，骨肉勻停。由他的畫像，我們不難判斷，他大概是五尺七八寸身高，臉大，顴骨高，前額高大，眼睛很長而閃閃發光，下巴端正，鬍鬚長而末端尖細。」
東坡熱情，敢言，幽默
子由冷靜，慎密，穩重
人格反映文格，亦因此兩人的文學風格好唔同
同時間東坡成日得罪人，講嘢唔經大腦
而子由則比較內歛，講嘢之前會諗過先
佢地好似兩個互補不足嘅齒輪咁，成日扶持對方


東坡同子由一生第一次分別
就係子由留係京都陪老豆，而東坡出去鳳翔做官
佢地日日都好掛住對方，成日寫詩寄比對方
例如子由寫左首〈懷澠池寄子瞻兄〉

相攜話別鄭原上，共道長途怕雪泥。
歸騎還尋大樑陌，行人已度古崤西。
曾為縣吏民知否？舊宿僧房壁共題。
遙想獨遊佳味少，無言騅馬但鳴嘶。

子由呢首詩係懷念昔日同東坡一齊經過呢個地方
子由係早期曾經任命做呢到嘅主簿
不過考中進士就唔做咁低職位
「共道長途怕雪泥」
可以特別留意「怕」呢個字
代表緊子由擔心未來兩人嘅人生，會唔會有好多阻礙呢？

「舊宿僧房壁共題」
曾經係呢到一齊題詩
子由當然好掛住東坡啦
結尾「遙想獨遊佳味少」，得返自己一個仲有咩意思呢？
呢首詩充滿不捨，對人生嘅不安，同埋都幾悲觀

咁東坡收到呢首詩之後
佢就「和詩」啦，和詩係根據原著
再依照人地嘅韻腳寫詩，「同聲和應」
有人一唱，有人一和，再有人一和，可以係咁Loop
東坡呢世同子由和詩和左成世人
和詩有遊戲筆墨嘅作品，但亦都有詩人認真之作
好似東坡同子由嘅詩、詞、文往來
正係一種心靈嘅互相呼應，不斷安慰鼓勵身在遠方嘅彼此
呢首係佢最出名嘅和子由詩：



〈和子由澠池懷舊〉
人生到處知何似，應似飛鴻踏雪泥。
泥上偶然留指爪，鴻飛那復計東西。
老僧已死成新塔，壞壁無由見舊題。
往日崎嶇還記否，路長人困蹇驢嘶。

子由以實事為題，東坡則由實化虛
似乎係同緊子由講：
唔好咁傷心啦，唔好咁怕啦
人生本來就係不可知
好似鴻雁偶然立足係雪泥上面
留下嘅指印，都必然會事過境遷
而鴻雁又何曾會計較何曾會害怕呢？
前面呢四句非常出名，正在於由實化虛嘅人生共同經驗

「老僧已死成新塔，壞壁無由見舊題」
呢兩句正正係上面道理嘅延續
我地當年住過嘅僧房已經無左啦
題過嘅詩自然無埋
但係咁樣唔代表事情無發過，唔代表事情係無意義

「往日崎嶇還記否，路長人困蹇驢嘶」
東坡自注：
「往歲，馬死于二陵，騎驢至澠池」
之前經過呢頭果陣，隻馬死左，我地唯有騎驢啦
子由你仲記唔記得呀？
當年我地嘅崎嶇，我地依然彷彿身處其中
因為過去造就我地，就算有難關我地會過到啦
無呢種苦果，我地都無今日嘅成就
等我地繼續向前行，馬無左咪騎驢囉
因為我地仲有美好嘅人生，等我地不斷向前架！

回應月影成三人巴打

人生到處知何似，應似飛鴻踏雪泥。
泥上偶然留指爪，鴻飛那復計東西。
好詩

巴打可以留意埋
東坡和子由嘅詩有好多相同嘅字眼
雪泥、馬
相同嘅意象表達唔同嘅意思
好高招架

點解東坡可以咁屈機

對子由嘅感情令佢寫得咁好

高汁討論：

蘇軾三百幾首詞 得十分一係豪放詞 但就比後世認為係豪放派代表
同埋有種分類覺得佢d詞係曠達 唔係豪放
唔知樓主點睇
其實蘇軾同李白一樣都係仙境 普通人學唔到
不如講下辛棄疾點用典啦 起碼人境 讀多d書都可能做到
利申：皮已正

咩叫仙境?
咩叫人境?

仙境姐係話佢d作品渾然天成 冇乜斧鑿痕跡 睇落似一氣呵成 而且情感唔似普通人咁婆媽（或者可以話超脫左） 好似李白 蘇軾咁 呢類天才 普通人寫唔出 亦學唔黎
人境姐係好多用典 作者識好多野 但始終睇得出佢諗過度過（可能改過）首作品 同埋情感多數悲天憫人 好似杜甫 辛棄疾 普通人比心機都有可能學到d
有評論家話「蘇辛並稱，其實辛猶人境也，蘇其殆仙乎 」
黃庭堅就讚過蘇軾d詞「語意高妙，似非吃人間煙火語」

巴打解釋得好好
總之仙＞人
不著痕跡嘅天然＞鬼斧神工嘅人為
中國美學最強調嘅正正係自然美

有時我覺得真係心態決定境界
辛、杜愛國愛民的性格決定左佢地作品風格取向同境界

黃國彬有本中國三大詩人新論入面
講東坡、李白、杜甫
而又推杜甫為最高
愛國愛民嘅詩史傳統
先係古人眼中中國古典詩歌嘅最高價值

我就覺得比較黎冇乜意思 文無第一
邊個有資格去決定 都係睇下中意邊個姐

係呀，不過黃國彬強調一點好有價值：
文學當然大家各有喜好
但問題在於你自己點判斷
唔可以話李屈社都寫詩，全部都寫得好好打和啦
如果有整全嘅文學批評觀，至少自己應該可以分高下
透過分高下，會令自己文學觀更確立
有條理、有喜好咁分，絕對有助同其他人討論同深入作品

高汁討論：

蘇軾三百幾首詞 得十分一係豪放詞 但就比後世認為係豪放派代表
同埋有種分類覺得佢d詞係曠達 唔係豪放
唔知樓主點睇
其實蘇軾同李白一樣都係仙境 普通人學唔到
不如講下辛棄疾點用典啦 起碼人境 讀多d書都可能做到
利申：皮已正

咩叫仙境?
咩叫人境?

仙境姐係話佢d作品渾然天成 冇乜斧鑿痕跡 睇落似一氣呵成 而且情感唔似普通人咁婆媽（或者可以話超脫左） 好似李白 蘇軾咁 呢類天才 普通人寫唔出 亦學唔黎
人境姐係好多用典 作者識好多野 但始終睇得出佢諗過度過（可能改過）首作品 同埋情感多數悲天憫人 好似杜甫 辛棄疾 普通人比心機都有可能學到d
有評論家話「蘇辛並稱，其實辛猶人境也，蘇其殆仙乎 」
黃庭堅就讚過蘇軾d詞「語意高妙，似非吃人間煙火語」

我認為蘇軾嘅當行處常人亦可企及，關鍵只在胸襟。陳與義云：「但恨平生意，輕了少陵詩」(陳與義早年學杜，經靖康之變，國破家亡，始能理解杜詩，故有此語。)，周濟云：「蘇之自在處，辛偶能到，辛之當行處，蘇必不能到。」但較難及唔代表不能及、不可及、不可學不可事，否則只係自我設限。

至於李白都係踵繼前人，努力下創出自己獨特嘅詩風，絕非單單天才，曹植、江淹、謝朓都係佢學習對象。又杜甫評云：「李侯有佳句，往往似陰鏗」，「清新庾開府，俊逸鮑參軍」，當然李係唔似庾信嘅，庾信作品偏柔、唔得振作，李白孤傲、自我，牢騷亦一大堆。

龍榆生借王鵬運評蘇謂「清雄」，清麗中不脫其雄邁，反之亦然，失意之作亦透出點點希望。但去到超脫，古往今來，我只信陶淵明。

永遠的羈絆：夜雨對床
讀東坡〈辛丑十一月十九日既與子由別于鄭州西門之外馬上賦詩一篇寄之〉

正文第八章

今次讀東坡呢首詩嘅題目好長
時、地、人都有，比左我地好多閱讀嘅背景
我地不妨參考吓呢首詩嘅史料背景：
子由送至鄭州，十一月，天未明，別於西門之外，因有馬上寄子由之詩，蘇軾與蘇轍兩兄弟自少至長大未嘗小離，其依依不捨之情，從題目〈辛丑十一月十九日既與子由別于鄭州西門之外馬上賦詩一篇寄之〉 可知矣。

東坡同子由嘅感情
呢種離別嘅不捨，令佢忍唔住寫下呢首詩
大詩人只要心有所感，就算係馬上面都可以寫得出


不飲胡為醉兀兀，此心已逐歸鞍發。
歸人猶自念庭闈，今我何以慰寂寞。

東坡嘅著急，係起首就睇得出
不飲而醉，只因身在馬上搖晃，心神已隨子由而去
思情之濃烈，正如一杯烈酒
詩人醉了，故大發奇想：
子由而家返去果陣，已經開始掛住屋企啦
子由猶是如此，咁我遠離家鄉，好寂寞呀！


登高回首坡壠隔，惟見烏帽出復沒。
苦寒念爾衣裳薄，獨騎瘦馬踏殘月。

東坡或有意或無意，登上山丘回首
一個「隔」字，點出兩者距離
好似好遠，但又見到子由嘅烏帽，時隱時現
「苦寒」，詩人既有此感，更推至子由也應和自己一樣
衣裳薄薄，身寒心苦

路人行歌居人樂，僮僕怪我苦凄惻。

「苦寒」、「瘦馬」和「殘月」
和下句「路人行歌居人樂」係一對比
單對眾，行歌對獨騎，樂對苦
東坡咁樣寫，把自己推向孤寂之極致


亦知人生要有別，但恐歲月去飄忽。
寒燈相對記疇昔，夜雨何時聽蕭瑟。

二十六年嘅相聚，早知會有離別嘅一日
但東坡知今次一別可能要多年後才能再見，人生無常
時間流逝嘅悲涼，往往係離別時更加令人感傷
無力拒之，故而寄語：
「寒燈相對記疇昔，夜雨何時聽蕭瑟」
兄弟二人早年嘅約定，希望晚年退隱於家鄉
共談舊事，一起生活

君知此意不可忘，慎勿苦愛高官職。
（嘗有夜雨對床之言，故云爾。）

東坡提醒彼此：
「君知此意不可忘，慎勿苦愛高官職」
記住我地「夜雨對床」嘅約定
一個「苦」字，也點出了世間原有比名利更重要的事
就是情之歸依，家鄉之根

最後再讀一次：

不飲胡為醉兀兀，此心已逐歸鞍發。
歸人猶自念庭闈，今我何以慰寂寞。
登高回首坡壠隔，惟見烏帽出復沒。
苦寒念爾衣裳薄，獨騎瘦馬踏殘月。
路人行歌居人樂，僮僕怪我苦凄惻。
亦知人生要有別，但恐歲月去飄忽。
寒燈相對記疇昔，夜雨何時聽蕭瑟。
君知此意不可忘，慎勿苦愛高官職。
（嘗有夜雨對床之言，故云爾。）

聲滿東南巴打：

今人理解古人嘅名作，往往只係從賞析出發，因為我地無法體驗古人嘅經歷，有時候古人嘅作器同我地嘅經歷有相似處，就會使人惻惻然、有所感，有所經歷，就會理解，就會有共鳴。錢鍾書《宋詩選注》講得好：

「杜 甫 律 詩 的 聲 調 音 節 是 公 推 為 唐 代 律 洔 裡 最 弘 亮 而 又 沉 著 的 , 黃 庭 堅 和 陳 師 道 費 心 用 力 地 學 杜 甫 , 忽 略 了 這 一 點 。 陳 與 義 卻 注 意 到 了 , 所 以 他 的 洔 盡 管 意 思 不 深 , 可 是 詞 句 明 淨 , 而 且 音 調 響 亮 , 比 江 西 派 的 討 人 喜 歡 。

靖 康 之 難 發 生 , 宋 代 詩 人 遭 遇 到 天 崩 地 塌 的 大 變 動 , 在流 離 顛 沛 之 中 , 才 深 切 體 會 出 杜 甫 詩 裡 所 寫 安 史 之 亂 的 境 界 , 起 國 破 家 亡 、 天 涯 淪 落 的 同 感 , 先 前 只 以 為 杜 甫 “ 風 雅 可 師 ” , 這 時 候 更 認 識 他 是 個 患 難 中 的 知 心 伴 侶 。

王 銍 《 別 孝 先 》 就 說 : 「平 生 嘗 歎 少 陵 詩 , 豈 謂 殘 生 盡 見 之 」 ; 後 來 逃 難 到 襄 陽 去 的 北 方 人 題 光 孝 寺 壁 也 說 : “「蹤 跡 大 綱 王 粲 傳 , 情 懷 小 樣 杜 陵 詩 」 。 都 可 以 證 明 身 經 離 亂 的 宋 人 對 杜 甫 發 生 了 一 種 心 心 相 印 的 新 關係。

詩人 要 抒 寫 家 國 之 痛 , 就 常 常 自 然 而 然 效 法 杜 甫 這 類 蒼 涼 悲 壯 的 作 品 , 前 面 所 選 呂 本 中 和 汪 藻 的 幾 首 五 律 就 是 例 子 , 何 況 陳 與 義 夲 來 是 個 師 法 杜 甫 的 人 。

他 逃 難 的 第 一 首 詩 《 發 商 水 道 中 》 可 以 說 是 他 後 期 詩 歌 的 開 宗 明 義 : 「草 草 檀 公 策 , 茫 茫 杜 老 詩 ! 」 他 的 《 正 月 十 二 日 自 房 州 城 遇 虜 至 》 又 說 : 「但 恨 平 生 意 , 輕 了 少 陵 詩 」，

表 示 他 經 曆 了 兵 荒 馬 亂 才 明 白 以 前 對 杜 甫 還 領 會 不 深 。 他 的 詩 進 了 一 步 , 有 了 雄 闊 慷 慨 的 風 格 。

讀蘇軾、李白作品，亦當有這種睇法。我有時都會明白佢地嘅心境，因為我由細到大都係失意開嘅

高汁討論：

廣闊胸襟都係一種境界 好多人已經做唔到 自然學唔到 當然 又唔洗學到十足ge
天才當然都要學習 但普通人學習完都唔會有學習完ge天才咁勁

以下嘅全部只係個人睇法。

蘇軾胸襟廣闊，但畢竟仍係屬於正常人範疇，常人可理解，可做到，唔離地，所以佢偉大。當然呢個只係我自己睇法，我讀佢地作品時，仍然覺得佢地係想處於「結廬在人境,而無車馬喧」嘅環境，即喺呢個人間世有所作為，不為奸佞所患。

離題講句，屈原李白嗰種胸襟，今人觀之，就係唔健康、消極、唔正常，李白都尚可自我陶醉，屈原就唔得嘞，我懷疑佢寫〈離騷〉時已經痴撚咗線。扯遠咗，蘇軾偉大，但佢畢竟已係千幾年前嘅人，千幾年後尚覺佢空前絕後，未必因為佢偉大到無以復加，可能只係我地比佢嘅「偉大」所囿咁解。簡而言之，不必妄自菲薄，前人種樹後人乘涼，既然佢地為我地提供咁多佳作，略其蕪穢集其菁英，自然可以另創出一番新光景。

另外講一講用典，李白、蘇軾都會用典，而且有時係好著跡，一望就知，當中不乏名篇鉅製，但用典用得好，佢用咗唔會影響你閱讀，知與不知都能夠享受，所以先叫用得好，例如李白嘅行路難，又或是蘇軾嘅水調歌頭。

強調多次，只係愚見。9up太多，見諒見諒。

登徒浪人巴打：

樓主寫蘇軾、蘇轍兄弟之情，係咪準備講解水調歌頭？先留名，等睇鴻文。

小弟理科出身，無機會從正統學習中國文學，只能有時間搵啲嘢睇下嚟自學，經常覺得非常可惜。感激樓主同一眾巴打絲打分享，學到唔少嘢，再次謝過。

喺過去兩年，睇住香港嘅變化，諗到祖父母同父母，走難嚟到香港，算係搵到安定嘅生活，自己同老婆算係喺香港最繁榮嘅時代出生、長大…到咗今日，隨住大氣候變化，當呢度唔再適合下一代長大嘅時候，又唔知可以走去邊度嘞？想到蘇東坡嘅飄泊，又想到佢嘅江城子：

常羨人間琢玉郎，天應乞與點酥娘。自作清歌傳皓齒，風起，雪飛炎海變清涼。

萬里歸來年愈少，微笑，笑時猶帶嶺梅香。試問嶺南應不好？卻道，此心安處是吾鄉。

只有學超人話齋，此心安處是吾鄕…可以咁豁達就好啦！

人生四問：情理交至的完美呈現
細讀東坡水調歌頭(丙辰中秋，歡飲達旦，大醉，作此篇，兼懷子由。)

正文第十章

本文請配樂閱讀
https://m.youtube.com/watch?v=wCREDfUEd3Y

水調歌頭(丙辰中秋，歡飲達旦，大醉，作此篇，兼懷子由。)

明月幾時有？ 把酒問青天。不知天上宮闕， 今夕是何年？我欲乘風歸去，又恐瓊樓玉宇，高處不勝寒。 起舞弄清影，何似在人間？

轉朱閣，低綺戶，照無眠。 不應有恨，何事長向別時圓？ 人有悲歡離合，月有陰晴圓缺，此事古難全。 但願人長久，千里共嬋娟。

上回講到：
東坡係密州做太守
希望同子由將來老去歸隱後「夜雨對床」
東坡願意由繁華嘅杭州去偏僻嘅密州
最大目的係為左方便同子由見面

今日講嘅呢首詞，相信識得背嘅人都唔少
教科書教過，鄧麗君唱過
可以話係香港人中文堂嘅集體記憶
都咪話唔勁，萬中挑一

呢一首詞就係東坡係密州時寫嘅
寫作嘅背景已經交代得好清楚：
丙辰中秋，歡飲達旦，大醉，作此篇，兼懷子由
中秋開P，東坡好酒但唔飲得
醉後寫詞，抒發思念子由之情

提外話講少少：
呢首詞曾被前人解釋為「忠君愛國」
話天上宮闕係國都開封
又話乘風歸去係朝見天子嘅渴望
董子遠《續詞選》：忠愛之言， 側然動人
黃蓼園《蓼園詞選》：前闋是見月思君，言天上宮闕，高不勝寒，但彷彿神魂歸去，幾不知身在人間乎？
以上解詞，都話比我地知古人有時真係好白痴嘅


明月幾時有？ 把酒問青天。不知天上宮闕， 今夕是何年？我欲乘風歸去，又恐瓊樓玉宇，高處不勝寒。 起舞弄清影，何似在人間？

上半片寫「丙辰中秋，歡飲達旦，大醉」嘅情況
文學作品入面，問句係好重要，有時更係解讀嘅關鍵
東坡係呢到用三問呈現人生嘅哲思
每一問都有頓挫、答問嘅張力對比
詮釋即提問，答案入須藉問題才能發見

詞人首問，「明月幾時有？」
東坡對月亮嘅存在發出疑問
其實都代表詞人借此一問：萬物係邊到黎架？
有雞先，定有雞蛋先？
無限加一仲係咪無限？
我地都知東坡唔係哲學家
呢一問只係一刻間嘅感嘆，既無答案
唯有「把酒問青天」，將個波射返比上天

二問，「今夕是何年？」
呢個唔係時間數字嘅詢問，而係問具體嘅存在
呢一個到底係咩年代呀？
「天上」嘅仙境，係相對於人間嘅俗世
仙境嘅環境，係咪好過人間嘅環境呢？
東坡好奇天上境況嘅變化，渴望離開俗世
因為天上代表理想嘅世界，長生不老
人間係庸俗不堪，生老病死，充斥恩怨是非、悲歡離合嘅現實世界

「我欲乘風歸去，又恐瓊樓玉宇，高處不勝寒」
東坡想乘風離開俗世，但突然又諗：
哇，廣寒宮咁高咁遠，咁咪好寂寞
李商隱詩云：
「碧海青天夜夜心」
東坡咁鍾意熱鬧，緊係唔肯啦
而且呢個世界仲有佢掛住嘅人，例如子由
呢一種內心嘅矛盾衝突，化作抑揚頓挫嘅句子

「起舞弄清影」
其實係中秋起舞，與友共歡大醉
未嘗唔係人世間嘅仙境
因此第三問，「何似在人間？」
隨即轉為東坡嘅反問，自答上面嘅矛盾
東坡知道桃花源本在心靈，人間自有仙境所無嘅溫情歡樂
同埋仙境邊有子由呢位好兄弟
既然係咁，又點需要乘風歸去呢？

轉朱閣，低綺戶，照無眠。不應有恨，何事長向別時圓？ 人有悲歡離合，月有陰晴圓缺，此事古難全。 但願人長久，千里共嬋娟。

下半片著筆抒發「懷子由」嘅心情
歡宴既散，明月流轉，西斜低照
照出了東坡一夜無眠
照出了詞人的思念之情
歡樂之後總是最寂寞，最易發出悲情
但東坡卻並不如此

第四問，「何事長向別時圓？ 」
東坡係答緊自己嘅寂寞，點解我要強求圓滿呢？
天行有常，自然變化，自有圓，自有缺
既然無法自主，在聚時盡歡，在散時知足，已經夠啦

「人有悲歡離合，月有陰晴圓缺，此事古難全」
東坡由情入理，理中顯情
人嘅悲歡離合，正如大自然嘅變化一樣
人不過都係自然之一，有圓有缺
咁樣睇，一切唔係都好合情合理咩？
古人對「命」之解脫，講順、達、安
都係知道生命有不能自主嘅限制
唯有好好咁接受呢種現實，好好咁活在當下

「但願人長久，千里共嬋娟」
《易經》最後兩封：
六十三卦既濟
六十四卦未濟
圓缺循環不休，吉凶禍福相生
呢一種古人普遍對人世宇宙嘅觀念
東坡由四問表達情理交至嘅完美呈現
情深而見理，見理而豁達
所以其情不流於自傷而能發之成願

呢一種祝福祈求，成為千百年來至今
一代又一代流離失所，遠在異鄉嘅人之願望
千里係無法改變嘅事實
但我地仍然可以長久安穩地睇住同一個月亮
咁樣，唔係已經足夠啦咩？

聲滿東南巴打：

少少個人意見。
〈水調歌頭〉最後一句「千里共嬋娟」，來自謝莊〈月賦〉：「隔千里兮共明月」，呢點唔少學者、注本都提過，例如夏承燾。不過佢點樣化用，就無咩人點講。

〈月賦〉：
美人邁兮音塵缺，
隔千里兮共明月。
臨風嘆兮將焉歇，
川路長兮不可越。
…
月既末兮露欲晞，
歲方晏兮無與歸。
佳期可以還，
微霜沾人衣。

先解釋點解佢唔係獨創。
「千里共嬋娟」，嬋娟即嫦娥，呢度代指明月。
咁其實成句不過係「千里共明月」，自然係由「隔千里兮共明月」而嚟。
但點解人人都只係記得呢句，唔記得謝莊句嘢呢?
原因在於蘇軾係截取其意，而非引申、補充。
有時候化用前人詩句好，唔一定係「補充」、「濃縮」，「截取」都好。
細味〈月賦〉，畢竟講嘅係無奈、講嘅係世情，直譯如下：

美人遙遠啊音訊全缺
隔著千里啊共看明月
隨風只能嘆其將停歇
川路長得不可能穿越

先講共明月，後講不可越，重在不可越、難越，重在「止」。
但當然，後四句講嘅係「規勸」，意指珍惜當下。
蘇軾則先講「不可越」，後講「共明月」，意思無補充過
—甚至唔夠〈月賦〉豐富。
但成首詞就活起上嚟。原因係呢首詞係述人情、兄弟之情，唔係規勸。
所以又寫咗前後赤壁賦，算係和〈月賦〉餘音之嬝嬝，所以一定要並讀。
當然，將七字濃縮成五字，某程度上都係更進一步。

如果將呢部分改改：

月既末兮露欲晞，
歲方晏兮無與歸。
臨風嘆兮將焉歇，
川路長兮不可越。
美人邁兮音塵缺，
隔千里兮共明月。

回應聲滿東南巴打：

至於點解世人記得〈水調歌頭〉唔記得〈月賦〉，因為〈月賦〉產自六朝。

呢樣其一。

另外重要係東坡寫得好具體，由個人至眾生，將呢個中國「團圓」嘅精神／希望好充分咁表達出黎。特別係講到兄弟—家庭之情，正係中國人傳統最重視嘅嘢，而又偏偏成日因為戰亂、流離，根本做唔到。東坡呢到正提供一個比較好嘅態度，點樣面對呢個缺憾。

和詩之外，亦有和詞
讀子由水調歌頭(徐州中秋)及東坡月調歌頭(余去歲在東武，作水調歌頭以寄子由。今年子由相從彭門百餘日，過中秋而去，作此 曲以別。余以其語過悲，乃為和之。其意以不早退為戒，以退而相從之樂為慰云)

正文第十一章

吓又讀水調歌頭？
唔係得一首架咩？
其實呢兩首係比較少人提及
但又能夠呈現東坡子由兄弟之情嘅詞作

話說，自從東坡上次寫完大家都知嘅果首水調歌頭
東坡雖然係密州同係濟州嘅子由近左
但係都無機會見面呀！
子由讀完呢首詞一年後，先有得再次見面
因為東坡又要離開密州，去徐州做官
七年分別，終於再次見面

佢地相聚百幾日，一齊過埋中秋
可惜嘅係，中秋過後隔日，佢地又要再次分別
今日一別，不知何年何日先有得再見
子由諗起去年東坡嘅水調歌詞
一向好少寫詞嘅佢，都忍唔住寫返首表達感情


蘇轍 水調歌頭(徐州中秋)

離別一何久，七度過中秋。去年東武今夕，明月不勝愁。豈意彭城下，同泛清河古汴，船上載《涼州》。鼓吹助清賞，鴻雁起汀洲。

坐中客，翠羽帔，紫綺裘。素娥無賴西去，曾不為人留。今夜清尊對客，明夜孤帆水驛，依舊照離憂。但恐同王粲，相對永登樓。

《涼州》：涼州詞，內容多和離別有關
帔：披肩
素娥：嫦娥，借代月亮

上半片先講佢地久別重逢嘅情況
我地分開左七個中秋啦
上年你係東武城寫嘅水調歌頭，令我好掛住你
又邊到估到今日我地相聚係彭城
一齊咁開心咁泛舟，又邊諗到即將要分開呢？
良辰美景，有樂助興，人生一大快事

下半片寫得好悲傷
時間嘅流逝，分別嘅必然
就好似月亮唔會因為人嘅想法而停留
時間，係「無賴」，「不為人留」
「今夜清尊對客，明夜孤帆水驛，依舊照離憂」
正因眼前景物，令人更加不欲離別
今日一別，新黨掌權，我會唔會好似王粲咁
一樣要因為仕途不順而歸隱呢？


東坡 水調歌頭(余去歲在東武，作水調歌頭以寄子由。今年子由相從彭門百餘日，過中秋而去，作此曲以別。余以其語過悲，乃為和之。其意以不早退為戒，以退而相從之樂為慰云)

安石在東海，從事鬢驚秋。中年親友難別，絲竹緩離愁。一旦功成名遂，準擬東還海道，扶病入西州。雅志困軒冕，遺恨寄滄州。

歲雲暮，須早計，要褐裘。故鄉歸去千里，佳處輒遲留。我醉歌時君和，醉倒君須扶我，惟酒可忘憂。一任劉玄德，相對臥高樓。

安石：謝安
鬢驚秋：頭髮已經花白
劉玄德：劉備

東坡見到子由咁傷心，忍唔住要安慰佢
「余以其語過悲，乃為和之」
上半片全以東晉嘅政治家謝安生平敘事
謝安本來係隱居東海，四十歲先開始正式出仕
所以「中年親友難別」
等佢成功之後，都依然想返東海
「雅志困軒冕，遺恨寄滄州」
可惜身困官位，始終都係返唔到去

下半片就講，咁我地應該點面對呢種「遺恨」呢？
「歲雲暮，須早計，要褐裘」
咁我地一定要及早準備歸隱嘅事啦
「故鄉歸去千里，佳處輒遲留」
不過回歸故鄉好遠嘅，沿途係風景名勝到玩吓都好呀
呢到似乎係講緊現實再困難，咪當佢係一處風景囉
落雨又有咩好怕喎？


「我醉歌時君和，醉倒君須扶我，惟酒可忘憂」
最緊要，係我地兄弟兩個人健在
唔開心咪飲吓酒，出左事咪大家扶吓對方
一杯酒，足以忘憂
呢一句寫得好，將東坡子由嘅兄弟之情
用平淡嘅生活事情充分咁表達出黎

「一任劉玄德，相對臥高樓」
劉備曾經勸過一位隱士許汜出仕
但許汜唔do，劉備就笑鳩佢
呢到東坡自喻許汜，理得天下人點睇
最緊要我地自己開心，想退咪退囉
等我地早日「夜雨對床」，一定得架！

巴打終於出返哂啦

今日明日都會出新文
希望大家入返哂黎睇文啦

巴打出文未

而家出

推埋呢頁新開始

推埋呢頁新開始

幫推