【宋詞趣談】小二，黎一碗東坡肉！！！(多圖餓撚勿入)

文學世家蘇東坡之飄泊人生

東坡〈洗兒詩〉
人皆養子望聰明，我被聰明誤一生。
但願生兒愚且魯，無災無難到公卿。

正文第一章

蘇軾，字子瞻，一字和仲，自號東坡居士
東坡係四川眉山出世，對故鄉有深情
可惜除左青年時代，佢至老都無返過故鄉安居
佢嘅一生，大抵可以用佢仕途不順，四處流放做概括
呢邊無辦法細講佢嘅一生，先介紹幾樣重要嘢
比大家初步理解，日後係文學作品入面再慢慢講解



1.文學世家，文學史嘅三蘇
講東坡之前，一定要提佢老豆蘇洵
蘇洵係蘇軾同蘇轍嘅老豆，同時三位都係唐宋古文八大家之一
唔好睇呢樣嘢好似好簡單，可以文學史留名嘅人
背後真係「一仗功成萬骨枯」，一家出三個，真係好勁

蘇洵有幾威呢？
三字經入面有句：「蘇老泉，二十七，始發憤，讀書籍。」
佢細時唔讀書，到二十七歲先發力
起跑已經慢過人地咁多，但佢竟然可以超越同時代嘅文人
難怪中國幼童讀嘅書入面，以佢做努力求學嘅例子啦
文學史稱佢係「老蘇」，東坡係「大蘇」，蘇轍係「小蘇」



如果文學係有基因，咁一定遺傳比佢兩個仔
東坡同蘇轍(字子由)係勁好兄弟，成日互相幫助
佢地一齊高中科舉，一齊做官，但聚少離多
佢地兩個嘅共同願望，係可以成日「雨夜對床」，通頂吹水
兩兄弟嘅交情，好影響到東坡嘅文學創作
當中最出名一定係東坡寫比子由嘅「但願人長久，千里共嬋娟」

2.敢言嘅政治家，失敗嘅政客

東坡科舉高中，幾受皇帝賞識
本身應該可以好平安咁過成世人，但佢嘅性格造成佢嘅飄泊
可以用佢自己講嘅：「如食內有蠅，吐之乃已。」
只要係東坡睇唔順眼嘅事，好似王安石變法，理學家嘅守舊
佢唔理人地係咩黨咩勢力，總之都要講出黎
對佢黎講，就好似食嘢食到屎咁，無理由吞架，緊係要吐出黎啦！



做一個敢言嘅政治家，通常都無咩好下場
雖然東坡受人敬重，詩詞文章又出名，但都比唔少人攻擊
最出名就係「烏臺詩案」，當時堆人話佢嘅文字諷刺朝廷
因為佢寫唔少詩詞都講緊人民嘅困苦，一隻一隻字咁捉出黎
當時東坡仲有諗過係運佢去京都嘅船到，跳河自殺
咁當然無死啦，邊有咁快大結局

呢次係第一次東坡仕途貶，去黃州做官
後來又調京都受重用，但之後又貶去其他地方
又受重用，又貶去廣東，最後仲貶埋去當時嘅域外之地海南島
以上種種嘅受貶，最大原因都係因為佢嘅敢言
成堆唔鍾意東坡嘅人，就用佢嘅詩詞文句黎攻擊佢



另外必須一提：
東坡係一個好好嘅地方官
真係貫徹到儒家思想嘅仁德仁政
做多政策都係幫到百姓，例如治水、開醫院等等

3.幸福嘅愛情，歡愉嘅友情
東坡雖然仕途唔算順利，但佢大部份時間都過得好開心
我諗呢到除左係東坡嘅性格，深受道家思想影響之外
更重要係佢嘅愛情、友情都比左好多快樂佢



東坡成世人有三個老婆
第一任老婆係王弗
十六歲果陣嫁比十九嘅蘇軾
婚後二人恩愛甜蜜，十一年後病逝世
蘇軾寫過一首感人嘅〈江城子·乙卯正月二十日夜記夢〉悼念亡妻

東坡仲食埋王閏之，係王弗嘅堂妹
王弗死左三年後嫁給蘇軾，細細個已經好欣賞佢
性格小鳥依人，全心全意咁支持東坡
呢個係佢第二任老婆



第三任老婆係王朝雲，本身係蘇軾嘅妾
朝雲本身係歌妓，幾有文學天分
蘇軾三十八歲果陣贖左十二歲嘅朝雲妹妹，後收為侍妾
朝雲陪伴蘇軾好多唔開心嘅日子
朝雲死左之後，東坡亦都寫下好多感人嘅作品

東坡交遊廣闊，咩種類都有
同佢文學創作最大關係嘅係：
道士、和尚、詩人、詞人、畫家、書法家
因為佢寫文好，為人真誠，係極好嘅朋友
勁到有所謂「蘇門六學士」
黃庭堅、秦觀、晁補之、張耒、陳師道、李廌
係當時文藝界嘅明星，都係甘心拜入其門

正因為佢嘅友情，幫佢捱過好多難關
每到一個地方，東坡都受人接濟幫忙
朋友知佢窮困，成日會寄吓物資比佢
知道佢寂寞，會寫信會特登黎陪佢
東坡因朋友而開心，朋友亦都因為東坡而歡愉

《蘇東坡傳》：
他的作品散發著生動活潑的人格，有時候頑皮，有時候莊重，隨場合而定，但卻永遠真摯、誠懇、不自欺欺人。他寫作沒有別的理由，只是愛寫。今天我們欣賞他的著作也沒有別的理由，只因為他寫得好美、好豐富、又發自他天真無邪的心靈。

睇完 好正

簡介基本古典文學概念：代擬
兼談東坡早期詞作少年遊(潤州作，代人寄遠)

正文第二章

少年遊(潤州作，代人寄遠)
去年相送，餘杭門外，飛雪似楊花。今年春盡，楊花似雪，猶不見還家。
對酒捲簾邀明月，風露透窗紗。恰似姮娥憐雙燕，分明照畫梁斜。

詞嘅開始，並唔係始於宋代嘅
文體之能夠成熟，變成一個時代嘅代表
往往係經過演變而成嘅
唐代果陣已經開始人寫詞
睇返今日嘅古典詞選入面第一首往往係李白嘅詞
有學者咁樣概括詞嘅發展：
「勾萌於隋，發育於唐，敷舒於五代，茂盛於北宋，煊燦於南宋，剪伐於金，散漫於元，搖落於明，灌溉於清初，收穫於乾嘉之際。」

「少年遊」唔係題目，而係詞牌名
古人填詞，要配合音樂，按返詞牌嘅字數平仄去寫
係東坡之前，詞嘅寫作好少加題目：潤州作，代人寄遠
正因為東坡加題目，令到詞作得以脫離詞牌名限制，變成寫咩都得
亦都可以話，東坡令詞呢一樣嘢更加獨立

題目係「代人寄遠」
呢到涉及古典文學入面嘅一大傳統：代擬
換言之，文學作品唔一定係自述之作
設身處地嘅想像，代其他人表達情志，亦都好常見
雖然古人覺得呢種係遊戲之作，評價唔高
但其實都好有好多作品，例如東坡呢一首詞


去年相送，餘杭門外，飛雪似楊花。今年春盡，楊花似雪，猶不見還家。

首先要講嘅係詞大多都分上下半片
作為詞入面一個轉折位
每首詞牌不同，上下半片嘅位置都唔同
上面就係少年遊嘅上半片啦

既然係代人而寫，咁我地就會諗：代邊個呢？
可能係佢老婆，可能係其他人
唯一可以肯定，呢個係女子思念男子嘅情景
上半片好精彩嘅交代時間嘅流逝
女子依門而望，望自己嘅情人歸來
呢一個情景，係中國古代係不斷出現嘅

空間嘅轉變，往往表達時間嘅變化
飛雪飄飄，直到今年春盡，楊花飛盡凋零
一個固定嘅鏡頭，景物卻不斷變化循環
飛雪似楊花，楊花似飛雪，等候嘅人依然不歸
「猶」字盡見女子係呢個環境嘅心焦
點解點解你仲未返黎呀BB


對酒捲簾邀明月，風露透窗紗。恰似姮娥憐雙燕，分明照畫梁斜。

下半片係描述女子依門等待之外嘅情況
「邀明月」係側筆，點解要拿起酒杯對住月亮呢？
正正係旁照出無人共飲嘅孤獨，愛人遠去嘅悲苦
空寂中舉起酒杯，聊以自慰
寒風漸漸從窗紗直透室內，身心俱冷

李白詩曰：
「舉杯邀明月，對影成三人」
李商隱詩曰：
「縱使有花兼有月，不堪無酒又無人」
正和此情此景相似



姮娥，即嫦娥
我地之前講李商隱〈常娥〉已經有講過：
「嫦娥，羿妻也，竊西王母不死藥服之，奔月。……，嫦娥遂託身於月，是為蟾蜍。」
姮娥飛月本為蟾蜍，係愛情悲劇的象徵
不死不老，係廣寒宮嘅無盡孤寂，無完結嘅一日

「恰似姮娥憐雙燕，分明照畫梁斜」
其實雙燕又何必旁人憐惜
就算無得長生不老，至少都係雙宿雙棲
姮娥對照雙燕，更顯孤苦無依
由明月到姮娥，姮娥又回到分明照
畫梁斜即係長廊上的橫渠，同時都係燕子之巢

我地不妨咁睇
真正好似姮娥咁嘅孤寂之心，正正係女子自己
係屋入面眼看月亮，聯想到姮娥
又由月光嘅照射，望見燕子嘅自由，雙燕嘅恩愛
雙眸隨著明月斜照，照出了燕子嘅歡喜
正正反映妻子嘅孤寂之心

東坡早期詞作，大多都係婉約之風
當時好多詞人都係寫愛情，寫女人，好多代擬之作
同佢日後嘅詞作相比，風格非常唔同
就等我地一步一步閱讀啦

睇完 好正

大把出緊
巴打慢慢睇

有關嫦娥嘅更多閱讀：
神話是眾人的夢，夢是私人的神話 讀李商隱常娥詩
http://deliver90.blogspot.tw/2017/03/blog-post_17.html

回應力0923巴打

東坡算唔算靠父幹

除左文學世家
東坡基本上都無靠佢老豆
因為佢老豆係好驚考試
去到好後期先做到官
果陣東坡都考完科舉高中
反而似東坡令到佢老豆更加出名

一牆之隔：古典愛情之空間意象
讀東坡蝶戀花(花褪殘紅青杏小)

正文第三章

蝶戀花
花褪殘紅青杏小。燕子飛時，綠水人家繞。枝上柳綿吹又少，天涯何處無芳草！
牆裡鞦韆牆外道。牆外行人，牆裡佳人笑。笑漸不聞聲漸悄，多情卻被無情惱。

早期嘅詞作，可以統稱為「伶工之詞」
王國維云：
「詞至李後主而眼界始大，感慨遂深，遂變伶工之詞而為士大夫之詞。」
「伶工之詞」即係酒女歌伎所唱嘅艷曲小詞，內容多數：
1.閨怨(男性幻想女性有幾慘)
2.鄉愁(遊子之思)
3.別情(代擬之作)
最大嘅特色係「非抒己情」，九成FF
係詞作入面，見唔到作者嘅影子

古人對呢堆講愛情，咁多FF嘅詩詞評價唔高
因為唔係「詩言志」嘅自我抒情，又同政治無關
呢種睇法，係到近代五四之後先一大逆轉
甚至將愛情詩放係最高嘅地位
愛情詩詞入面，東坡呢首作品絕對係一流嘅


花褪殘紅青杏小。燕子飛時，綠水人家繞。枝上柳綿吹又少，天涯何處無芳草！

睇古典詩詞嘅景物描寫，一定要記得以下八個字：
景不孤生，因情而出
即係話，古人寫景好少係獨立咁寫
往往係因為作品入面嘅情而作襯托嘅

上半片似乎剩係描繪緊大自然嘅風景
咁樣有咩意思係入面呢？
「花褪殘紅」，花已經凋謝啦
「青杏小」，但果實開始成長啦
枯死、生長，有生生不息嘅意味

「燕子」，秋離春回，代表春季嘅降臨
春天往往都意味愛情嘅渴望
萬物生長，水映照旁邊嘅青草，就好似化成綠色咁
柳綿四散，愈吹愈少，會唔會搵唔到值得托負嘅土地呢？
東坡就用一句：「天涯何處無芳草」作答
芳草四圍都有，做咩要為一棵樹放棄成個森林呀！


牆裡鞦韆牆外道。牆外行人，牆裡佳人笑。笑漸不聞聲漸悄，多情卻被無情惱。

人活係空間，其實同時係到創造空間
例如你自己間房咁，都反映緊你嘅人生
建築係文化嘅直接反映，影響到人與人之間嘅關係
下半片嘅重點在於「牆」，一牆之隔
隔阻男女嘅溝通，封閉左大家見面嘅可能
係一個好好嘅例子，講中國古代嘅男女愛情點樣受空間影響

＜詩經．將仲子＞：
「將仲子兮，無逾我牆」
李商隱詩云：
「紅樓隔雨相望冷，珠箔飄燈獨自歸」
有形嘅「牆」，係用無形的禮教和社會階層堆疊出黎
男女之間嘅交流，唔係咁易架

牆可以阻擋人，但擋唔到人對外界嘅好奇心
對愛情嘅渴望，千古以黎又有咩可以改變到呢？
「牆裡鞦韆牆外道」正係表達呢種意思
古時女子愛玩鞦韆，試想像係高牆嘅圍堵之中
燕子飛天在上，水流之聲繞過耳朵，柳綿盪來盪去
或者只為看一眼外面嘅殘紅青杏
盪高到望到一眼牆外嘅世界

咁牆外嘅男子呢？
「牆外行人，牆裡佳人笑」
聽著女子盪鞦韆嘅笑聲，可聞而不可見
更加令人FF呢位女仔有幾正
呢種笑唔係為左其他人而笑，係一種純粹嘅呈現
但竟然卻引來痴心男子嘅等待，直至「笑漸不聞聲漸悄」

「多情卻被無情惱」
漸漸一切聲音都消失
得返男子自作多情嘅煩惱
其實，我地又何嘗未試過暗戀其他人
嬲自己對呢個人嘅一言一行點解咁留意
又嬲佢點解無發現自己對佢嘅深情
如果呢一首「牆」無左，唔知我地有冇可能呢？

Thanks bro

有關文學空間之「牆」更多閱讀：
身世與愛情的雙重墜落 讀李商隱春雨詩
http://deliver90.blogspot.tw/2017/04/ep17.html

回應韋小寶Westbrook巴打

蘇東坡是個秉性難改的樂天派，是悲天憫人的道德家，是黎民百姓的好朋友，是散文作家，是新派的畫家，是偉大的書法家，是釀酒的實驗者，是工程師，是假道學的反對派，是瑜伽術的修煉者，是佛教徒，是士大夫，是皇帝的秘書，是飲酒成癮者，是心腸慈悲的法官，是政治上的堅持己見者，是月下的漫步者，是詩人，是生性詼諧愛開玩笑的人。

我最欣賞嘅蘇軾畀林語堂屈鳩佢係工程師
真係好撚慘，咁有才華都做啲咁卑賤嘅嘢
真係深表同情

我諗林生無貶意嘅，佢成本都係咁讚東坡
工程師都唔叫卑賤啦，東坡係做點人起嘢果個，唔係做苦力
歷史上東坡真係參加過唔少建築工程，起個臺，又整過防堤咁

獨愛杭州：淡妝濃抹總相宜
兼讀東坡行香子(過七里瀨)

正文第四章

行香子(過七里瀨)

一葉舟輕，雙槳鴻驚，水天清，影湛波平。魚翻藻鑑，鷺點煙汀。過沙溪急，霜溪冷，月溪明。
重重似畫，曲曲如屏。算當年，虛老嚴陵。君臣一夢，今古空名。但遠山長，雲山亂，曉山青。

東坡早年任官，其中一個重要地方就係杭州
因為東坡反對王安石變法，得罪力主改革嘅新黨
留係權力核心嘅京都，已經無咩意思
於是東坡請求外放，皇帝就派佢去杭州做地方官

佢一生係杭州嘅日子都唔少，前後係杭州做過兩次官
東坡對杭州係好有感情，寫過一首好出名嘅詩：
〈飲湖上初晴後雨〉
水光瀲灩晴方好，山色空濛雨亦奇。
欲把西湖比西子，淡妝濃抹總相宜。
西湖好似古代美人西施咁索
無論點樣睇都係好靚

正所謂「上有天堂，下有蘇杭」
文人雅士，又有邊個唔鍾意蘇杭美景呢？
東坡幾乎將杭州當作佢第二個故鄉：
未成小隱聊中隱，可得長閒胜暫閒。
我本無家更安往？故鄉無此好湖山。
蘇杭之美，千古以來成為文人墨客筆下嘅題材


一葉舟輕，雙槳鴻驚，水天清，影湛波平。魚翻藻鑑，鷺點煙汀。過沙溪急，霜溪冷，月溪明。

東坡乘一葉扁舟，係江河之上感悟人生
經過七里瀨呢個景點，因景生情
寫下呢首以描繪景色為主嘅詞作

上半片，先用一個遠鏡去拍攝
由高俯視住：驚鴻、雙槳、舟、東坡
平靜嘅湖面反映出天空嘅蔚藍
「輕」之一字，係咪都描寫緊東坡輕鬆嘅心情呢？

正因為「影湛波平」，先會睇到「魚翻藻鑑」
魚係河中嘅翻動，水藻嘅動人，都可以清楚咁睇見
由近至遠，東坡睇見一望無際嘅景色
「鷺點煙汀」，白鷺飛係天空，好似點過雲煙咁

「過沙溪急，霜溪冷，月溪明」
空間反映時間，詞人竟然超越某時某地嘅局限
將同一個地方，三個唔同嘅時間合於一句
正午白天嘅沙溪
清晨結霜嘅霜溪
晚上月照嘅月溪
呢一條溪流不論何時，都別有一番美麗


重重似畫，曲曲如屏。算當年，虛老嚴陵。君臣一夢，今古空名。但遠山長，雲山亂，曉山青。

下半片先描述山景
直睇山之重疊，好似中國山水畫咁樣
橫睇山之曲折，又似好多個屏風排列
水景因為近而細，山景因為遠而略

由景入情，從遠山思考人生
七里瀨正位於嚴陵山嘅下方，因為嚴光而命名
嚴光係一位隱士，劉秀三次請佢出山，都唔肯
呢到東坡首先覺得嚴光「虛」渡自己嘅老年
但係，轉念一想：
「君臣一夢，今古空名」
人生到最後咪又係一場夢
嚴光、劉秀到而家咪又係死左
呢到睇得出東坡嘅人生掙扎：
既有用世之思，但又好想咁自由生活

「但遠山長，雲山亂，曉山青」
一切過去早已消失，如今嘅人又可以點呢？
詞人當然解決唔到呢個問題
只能遠看山景，等自己沉醉於呢個景色
一個山，三個景，人嘅歷史改變再多
而山景依舊不變，維持自然嘅循環之美

訓前睇番首詞
心情都好d

我都訓啦
明日再出埋佢

即刻再出
今日要出到新文為止

十一年緣盡，賢妻良母王弗
兼讀東坡亡妻王氏墓誌銘

正文第五章

王弗、東坡兩人相戀嘅故事係好浪漫嘅
話說東坡青年係家鄉果陣，跟隨中巖書院嘅王方老師求學
王方正正係王弗嘅老豆
咁當東坡已經好出眾，深得老師欣賞

有一日王方就想幫書院入面嘅池塘起個好名
就即場問大家，改咩名好呢？
就講：「藏魚池」
就話：「引魚池」
就叫：「跳魚池」
哇真係垃圾都不得了
東坡呢個時候就講：
不如叫做「喚魚池」啦！

王方同其他人一聽，即刻覺得呢個名最好
原來王弗係自己房入面都諗左個名
丫環就攞王弗題字嘅紙比王方睇
三個字：「喚魚池」
王方即刻話：「此乃天緣之合，韻成雙璧」
就將我粒女許配比你啦

係呢十一年嘅婚姻入面
東坡同王弗都過得好開心
甚至佢地嘅性格互相補足
王弗幫東坡好多事
只可惜，只有十一年
王弗就因病早逝


治平二年五月丁亥，趙郡蘇軾之妻王氏，卒於京師。六月甲午，殯於京城之西。其明年六月壬午，葬於眉之東北彭山縣安鎮鄉可龍里先君先夫人墓之西北八步。軾銘其墓曰：

君諱弗，眉之青神人，鄉貢進士方之女。生十有六年，而歸於軾。有子邁。君之未嫁，事父母，既嫁，事吾先君、先夫人，皆以謹肅聞。其始，未嘗自言其知書也。見軾讀書，則終日不去，亦不知其能通也。其後軾有所忘，君輒能記之。問其他書，則皆略知之。由是始知其敏而靜也。從軾官於鳳翔，軾有所為於外，君未嘗不問知其詳。曰：「子去親遠，不可以不慎。」日以先君之所以戒軾者相語也。軾與客言於外，君立屏間聽之，退必反覆其言曰：「某人也，言輒持兩端，惟子意之所向，子何用與是人言。」有來求與軾親厚甚者，君曰：「恐不能久。其與人銳，其去人必速。」已而果然。將死之歲，其言多可聽，類有識者。其死也，蓋年二十有七而已。始死，先君命軾曰：「婦從汝於艱難，不可忘也。他日汝必葬諸其姑之側。」未期年而先君沒，軾謹以遺令葬之。銘曰：

君得從先夫人於九原，余不能。嗚呼哀哉！余永無所依怙。君雖沒，其有與為婦何傷乎。嗚呼哀哉！

一篇寫得好嘅墓誌銘，必須出於真情
亦因為咁，九成九嘅墓誌銘都係得麻麻地嘅
東坡係呢一篇墓誌銘入面，唔需要堆砌用詞，為文造情
只係用平淡嘅語氣，簡單嘅文字，就已經表達佢嘅悲悼之情

「生十有六年，而歸於軾」
王弗十六歲果陣，就嫁左比東坡，係佢最青春嘅時候

「其始，未嘗自言其知書也。見軾讀書，則終日不去，亦不知其能通也。其後軾有所忘，君輒能記之。問其他書，則皆略知之。由是始知其敏而靜也。」
其實王弗嘅才學點會比得上東坡
會陪東坡讀書，只係為左愛情二字
而王弗陪佢果陣，好專心咁記住東坡講咩讀咩
東坡唔記得左，佢即刻可以提醒佢
呢份愛情嘅專注，真係好偉大呀！

「子去親遠，不可以不慎。」
王弗份人係好精明、現實嘅
東坡係一個文學家，成日係小事粗心
都係多得王弗一一提醒咋
真係一個成功嘅男人背後總要女人支持


「軾與客言於外，君立屏間聽之」
咁東坡係成名人物，又咁鬼好人
總係相信呢個世界個個都無惡意，人性本善
王弗好驚自己老公會比人昆
於是會聽東坡同客人傾計嘅內容
再同返東坡講，喂呢個人唔係好人黎架！

「婦從汝於艱難，不可忘也。他日汝必葬諸其姑之側。」
東坡老豆同東坡講：
王弗係你未有咩成就開始就跟你捱苦
你記得要將佢同埋你死鬼老母葬埋一齊

「君得從先夫人於九原，余不能。嗚呼哀哉！余永無所依怙。君雖沒，其有與為婦何傷乎。嗚呼哀哉！」
東坡係到講：
你而家可以同我老母一齊，咁我呢？
我將會永遠都無哂依靠
你雖然死左，但都有人陪你，唔好咁傷心呀！


東坡係安葬愛妻嘅山坡
種下三萬棵青松
玫瑰易凋，青松常翠
或者呢一種正正係佢忘記傷痛
表達愛情嘅唯一方法

東坡對王弗嘅深情
雖然係佢再婚之後仍然長存
十年之後，佢寫下一首好出名嘅詞懷念王弗
下一篇，就等我地一齊黎細讀呢首詞

有今生冇來世巴打：

十年生死兩茫茫 不思量 自難忘

痴線咩功力先寫得出咁平易又動人既字句
呢份詞真係千古絕唱

最後一句
待得年年腸斷處 明月夜 短松崗 成個意境出晒黎

回應硬擦膠絲打：

蘇學士真係好撚正 用詞顯淺，意境高明，連我呢啲市井之徒都睇得明，好強嘅功力呀

東坡兼具兩者之長
詞相對詩顯淺易明，加埋東坡無事不可入詞
現代人睇都好易領略當中嘅意境

佢文學成就高就真係高，但有時覺得佢人生太崎嶇，作品好多時都係為左安慰自己，唔係真係咁睇得開。
李白果啲就真係凡事都話鳩知佢果種洒脫。

其實東坡無大家想像中咁豁達樂觀
佢勝在傷心悲傷但又能夠唔沈鬱，睇得開
所以佢即使再唔開心，都能夠過一陣就解開心結
不過佢係不斷loop
其實咁樣先係一個有血有肉嘅人
人生本來係唔同階段就有唔同嘅煩惱
問題係，點樣面對
東坡唔同其他人嘅一點就係呢到

張繼聰相繼失聰巴打：

點解佢D老婆咁早死?? 以前女人好早死??

硬擦膠絲打：

大陸資料，不喜勿插：
根據林萬孝《我國歷代人均壽命和預期壽命》
夏商18歲
漢朝22歲
唐朝27歲
宋朝30歲
清朝33歲
民國35歲
1957年57歲
2013年75歲
所以，古代人生70古來希係真實情況

至情無文，至悲無語
細讀東坡江城子(乙卯正月二十日夜記夢)

正文第六章

江城子(乙卯正月二十日夜記夢)

十年生死兩茫茫。不思量，自難忘。千里孤墳，無處話淒涼。縱使相逢應不識，塵滿面，鬢如霜。
夜來幽夢忽還鄉，小軒窗，正梳妝。相顧無言，惟有淚千行。料得年年腸斷處，明月夜，短松崗。

上一篇我地講過東坡同王弗嘅愛情故事
係王弗死後十年，東坡係正月二十日夢見佢
十年過去，悲痛依然沒有淡忘
夢醒時分，東坡無法抑制自己嘅情感，寫下呢首詞



十年生死兩茫茫。不思量，自難忘。千里孤墳，無處話淒涼。縱使相逢應不識，塵滿面，鬢如霜。

上半片係好直接嘅講述自己對亡妻嘅思念
首句「兩」之一字，點出相思
在世之人思念逝者，逝者泉下有知，何嘗唔係掛念生者
就算分隔十年，都依然無法淡忘
「思量」本係刻意為之，「不思量」卻仍然難忘
只因思念已經根深柢固
睹物思人，因景思人，由夢思人
傷情觸處而發，情深又何必刻意呢

「千里孤墳」，拉出現實嘅距離
東坡夢醒之後，諗起同王弗嘅墓相隔千里
呢種「淒涼」嘅相思，本來只係得你明白架咋
你同我遠距千里，又有咩人可以同我傾呢？
東坡係千里之外淒涼，王弗都係孤墳處沈默

「縱使相逢應不識」
如果可以再次見面，睇怕你都唔會認得我啦
我已經好老，「 塵滿面，鬢如霜」
呢十年無左你嘅生活，年華老去
古時四十而稱老，東坡已經四十幾啦，已經老啦


夜來幽夢忽還鄉，小軒窗，正梳妝。相顧無言，惟有淚千行。料得年年腸斷處，明月夜，短松崗。

下半片講返東坡夢見亡妻嘅情景
夢境似真還假，如在目前，似假還真
東坡婚後不久就離開故鄉
呢到夢見故鄉，妻係軒窗打扮緊，回到初婚嘅日子
初婚正係象徵幸福嘅開端，但係知道悲劇嘅情況再現
呢一種美，未嘗唔係淒美

「相顧無言」，至悲無語
言語面對內心最真切的體驗，往往都無力嘅
語言符號，或能客觀表達，指涉外物
但講到內心之情，往往都係難以訴諸符號
情愈真切，言語愈難表達
所以東坡王弗「惟有淚千行」，係最直接表達悲傷嘅本能
呢一種相思係雙重嘅悲傷，係兩個生離死別嘅悲哀

「料得年年腸斷處」
東坡係到幻想亡妻係月夜松岡嘅哀苦而腸斷
呢個「千里孤墳」嘅亡妻，都因為思念東坡而腸斷
上半片嘅「縱使相逢應不識」同下半片呢句都係「假設」
由實事中化虛設，前說自己嘅不堪，後談妻子嘅孤寂，互相呼應
全詞都係用十年嘅「相思」
將上下片緊緊連繫，將生者死者牢牢扣連


至情無文，語言藝術嘅再多修飾
好多時都係為左補足感情嘅不足
當一個人最真切欲言嘅時候，直接咁講，已經係最好
後世嘅文評家成日話東坡愛拋書包，引典故
而係呢首詞入面完全無呢樣嘢
或者可以用黎一證東坡係呢首詞嘅至情至性

回應聲滿東南巴打：

巴打會唔會再講自己對呢闋詞嘅睇法?

等大家都分享吓先
我解讀比較著重都係「相思」
前人多都係講東坡單向嘅悲傷
其實呢首詞最精妙嘅地方，係東坡嘅悲傷入面
係包含埋亡妻對東坡嘅思念
係一種「雙重」嘅悲痛

同埋補充一點：
千里孤墳，始於千里，終於千里
東坡呢世人再無機會到亡妻墳前相見
終其一生都無走入故鄉

膝頭哥食辣椒醬絲打：

李清照嘅
尋尋覓覓 冷冷清清 淒淒慘慘戚戚
同蘇sick嘅
十年生死兩茫茫 不思量 自難忘
一樣咁sad

btw巴打會唔會講下李清照？

戈登探長巴打：

李清照呢首都係絕妙好詞
大家嘅情都好真好深
李清照有機會實講
睇睇點樣穿插吓，做個比較

聲滿東南巴打：

9up幾句

讀到「 夜來幽夢忽還鄉，小軒窗，正梳妝。相顧無言，惟有淚千行。」
有少少身同感受，但當然唔係死別、亦唔係愛情。
細個時父母事忙，無暇照顧家庭，所以我喺某段時間得自己一個。
記得有晚瞓教夢見自己遇到阿媽，因為發夢，所以口不能言，然後眼白白睇佢慢慢離去。
醒返就好似蘇軾咁講，「惟有淚千行」。
呢點同尤袤所謂「胸中襞積千般事，到得相逢一語無」嘅感覺略有不同，大概感情太激鬱，無法言語罷。
唔係言語無法表達自己心中所想，而係心中根本咩都無諗。

自己覺得過片過得好，因為佢(表現得)夠平淡，夠普遍。
夜來幽夢，所指唔一定係從前，可以係依家，好平淡嘅一件事。
只係物是人非。
就好似「黯然銷魂者，惟別而已矣。」
又或者係「悲莫悲兮生別離」
有咩悲哀得過別離呢，就係別離後又夢見相思果個人或者事物，可望而不可即。
又或者相顧有言又如何，可以傾到幾多嘢，最後都係要醒，咁不如唔講嘢重好。
別離唔一定係「愛情」，可以係「親情」，甚至係「志向」，甚至係「人生」，所以呢闋詞真係填得好好。

雖然我鍾意賀鑄嘅半死桐多啲。

9up幾句

讀到「 夜來幽夢忽還鄉，小軒窗，正梳妝。相顧無言，惟有淚千行。」
有少少身同感受，但當然唔係死別、亦唔係愛情。
細個時父母事忙，無暇照顧家庭，所以我喺某段時間得自己一個。
記得有晚瞓教夢見自己遇到阿媽，因為發夢，所以口不能言，然後眼白白睇佢慢慢離去。
醒返就好似蘇軾咁講，「惟有淚千行」。
呢點同尤袤所謂「胸中襞積千般事，到得相逢一語無」嘅感覺略有不同，大概感情太激鬱，無法言語罷。
唔係言語無法表達自己心中所想，而係心中根本咩都無諗。

自己覺得過片過得好，因為佢(表現得)夠平淡，夠普遍。
夜來幽夢，所指唔一定係從前，可以係依家，好平淡嘅一件事。
只係物是人非。
就好似「黯然銷魂者，惟別而已矣。」
又或者係「悲莫悲兮生別離」
有咩悲哀得過別離呢，就係別離後又夢見相思果個人或者事物，可望而不可即。
又或者相顧有言又如何，可以傾到幾多嘢，最後都係要醒，咁不如唔講嘢重好。
別離唔一定係「愛情」，可以係「親情」，甚至係「志向」，甚至係「人生」，所以呢闋詞真係填得好好。

雖然我鍾意賀鑄嘅半死桐多啲。

好嘅讀者，可以做到「入乎其內，出乎其外」
呢句雖然係王國維詩人論，但套入讀者都一樣得

能夠深入文學作品嘅底層，由文字嘅表層中領悟情意嘅深層
呢一步已經唔易做，但只要多加閱讀，係慢慢會做到嘅
讀書而不掩卷，即係無方法由作品中感通人生
掩卷而嘆，先係讀書嘅最高境界，先係精神嘅昇華

可以經由作品發現自己嘅人生
以讀者自己嘅人生經驗去連結藝術作品，係好難得
一黎作品要寫得好，由具體至抽象，提煉出人世間嘅普遍經驗
二黎要有緣份，讀者要「遇」到合適嘅作品，唔係咁簡單

巴打能夠做到「入乎其內，出乎其外」，真係唔簡單
我尋日都發惡夢，夢到別離，醒返果吓好真實好悲傷
然後就諗，東坡果一刻一定更加難受
夢境係真係假，其實又有邊個講得清，古人可能覺得係顯靈呢
東坡詞入面，講到夢嘅好多，之後會繼續連結去講
應該會讀得更加深刻，更有得著