【古典文學】此情可待成追憶，只是當時已惘然——李商隱

259 回覆
188 Like 0 Dislike
2017-05-16 16:30:58

「多情卻被無情惱」，東坡這一句詞若孤立來看，正可用作李商隱一生的總括。多情者本已易於自傷，況欲於無情的世界裡尋覓情的歸所，而終於無處堪用其情，便只覺得世界辜負了自己。這話對李商隱而言，沒有半分矯情，畢竟他所有的委屈都是應該的，因為這世界當真辜負了他。
——《多情卻被無情惱：李商隱詩傳》



呢個Post咩黎架
歡迎各位巴絲打又黎睇我傾吓文學嘢
我係到會以文學家為主題
介紹佢嘅生平、作品
講講點樣發現古典文學嘅美

上次我地講左陶淵明被人忽略嘅一面
作為古典文學閱讀嘅入門，係好好嘅開始
大家如果未睇，不妨可以入去睇埋佢：
http://deliver90.blogspot.tw/2017/02/blog-post_18.html

今次我會講嘅文學家同陶係非常唔同
佢係晚唐詩人大三家之一
又無辜捲入政治黨爭
佢嘅性情善感浪漫
係一粒多情多才嘅種子
佢成日去青樓偷歡
偏偏又好鍾意道教同佛教
佢寫嘅詩「香艷纏綿，淒迷婉約」
千百年來引起無數人嘅討論



呢一個就係李商隱啦
接下來我會不斷講佢嘅作品
同時間講講同古典文學相關嘅概念
一黎比大家了解李商隱呢位文人
二黎作為古典文學閱讀入門
咁其實我都係第二次用呢種形式去講
希望唔會悶親大家啦



介紹吓我參考嘅原典
《玉谿生詩集箋注》
玉谿生係李商隱外號黎
研讀中國古典詩歌
成日會見到所謂嘅集、箋注
呢兩個字各有意思
集：
詩人作品集
集評、集說（前人對每一首所有相關重要評論）
箋注：
分析前人之評論、注解，再加上自己意見分析
例如本書編者馮浩就會分析人地講法
再講出自己認為較好的理解
2017-05-16 16:32:54
相信如果有追開嘅巴絲打
都會知道呢個Post係舊文重發
最主要嘅原因係，之前用連登up圖死哂
而家改用返係blog到up圖
為左方便閱讀，決定重發一次
同埋要加少少更正咁

歡迎大家隨時討論
唔會一次過放哂上黎
應該一日一篇咁
記得留名同正評啦，堆圖都整左幾粒鐘

陶淵明系列都重發緊
未睇可以追埋佢：
https://lihkg.com/thread/244538/page/1
最後放返個Blog比大家分享
http://deliver90.blogspot.tw/
2017-05-16 16:37:46
推
2017-05-16 16:48:35

簡介基本古典文學概念：唐代 兼談李商隱晚唐悲慘的一生


文學係離唔開時代嘅
正所謂一代有一代之文學
中國古典文學最出名嘅，一定係唐詩
唐代係詩歌嘅高峰，高於其他時期
我地以前學過嘅咩絕詩律詩
屬於近體詩，係果陣係好新潮嘅嘢
都係唐代先開始成熟、完整
簡單黎講：
古體詩＞近體詩＞新詩

正因為唐代咁重要
所以文學史特登係唐代入面再分左四期黎講
即係所謂四唐說啦，略舉入面勁出名嘅人：
1.初唐（陳子昂）
2.盛唐（李白、杜甫）
3.中唐（白居易、韓愈）
4.晚唐（李商隱）

如果出生時地係有分難度嘅話
相信李商隱係㨂左地獄級
有咩慘得過見到昔日嘅輝煌
但自己就生活係一切都要終結嘅時代？
睇到呢到，大家係咪好有共嗚呢


《唐詩別裁集‧李商隱小傳》載曰：
李商隱，字義山，河內人。開成中進士，觀弘農尉。會昌中，王茂元鎮河陽，辟為掌書記，得侍御史。茂元以子妻之。李德裕秉政，厚遇之。李宗閩黨與德裕為仇，卒不遇......大中末，仲郢左遷，商隱罷，未幾卒。

下面我會劃分幾個重點：
1.童年嘅悲劇
李商隱老豆叫李嗣，做過縣官
但係佢十歲左右就死左啦
佢可以話係一個沒落嘅中產階級
好彩佢有個阿叔叫李房
細細個就開始教佢寫古文
叫做有機會試吓用知識改變命運


（呢個先係佢慘情真樣黎）
2.沈淪下僚，成世仔無咩出色
佢考左兩次科舉，兩次都Fail左
26歲仔考第三次呀，佢先考得上進士
進士只算係低空飛過，佢一開始分左去做文書官仔
後來因為佢受黨爭影響
成世仔都係做人地嘅幕僚，做吓文書咁
功就上頭攞，嘢比哂你做
呢種情況係咪又係好鬼熟呢
古代稱之為「沈淪下僚」

3.時代嘅崩壞，牛李黨爭
既然係地獄級難度
咁呢個末世緊係好多亂況啦
中央權力失衡，藩鎮之亂，好多地方都自把自為
國君又無咩用，奸臣當道，就有所謂嘅牛李黨爭啦
點解李商隱呢個小人物又關事呢？
咁佢其實好無辜嘅

講返佢細個，老豆死左
就有個人叫令狐楚嘅人救左佢，請佢做吓嘢
又教埋佢寫駢文（即係唐代公文）
所以令狐楚係佢恩人黎
令狐呢派，係被劃分為「牛黨」
咁又點啫，都可以有著數架
好可惜，李商隱個老婆係「李黨」王茂元嘅女
結果就兩邊都唔係人，個個當你係鬼呀

成世仔都因為咁而不得志
死前都無真正一展抱負，揚眉吐氣過呀陰公
以上悲劇嘅人生，好深遠咁影響左佢嘅詩歌文章
2017-05-16 20:16:42

紅顏薄命與懷才不遇的感通 讀李商隱流鶯詩



係古代黎講，文人去青樓係一件好平常嘅事
平常到文人成日會寫詩講佢點去青樓玩
個情況好似叫完雞上fb打返個卡
寫吓個食評咁樣
所以絕對係正常過而家嘅

李商隱作為一個出色嘅文人
加埋一個正常嘅男人
會去青樓叫叫雞，寫吓詩，大佬搵題材啫
藝術嘅嘢，真係識條春咩
所以佢係成日去又成日用黎寫詩嘅

今日我地黎讀李商隱有首詩叫做流鶯
流鶯之意，即係流動嘅，無固定場所嘅妓女
呢首詩好能夠睇出李對妓女有好深刻嘅了解
絕對係叫到有心得，叫得好有感情
大家不妨黎學吓嘢啦


李商隱 流鶯
流鶯漂蕩復參差，度陌臨流不自持。

參差：高低
度：越過
陌：小路
呢句直接係講解返題目
用黃鶯呢種雀仔黎比喻妓女，無一個安身立命嘅地方
古代女仔做妓女九成九都被迫架
一個苦命女子只能夠漂蕩四方，待遇參差
去咩路，過咩河，又點會係自己控制到呢？


巧囀豈能無本意，良辰未必有佳期。

雀仔嘅叫聲，又點會唔係表達緊佢嘅心意？
妓女都係人，點會唔想有安定嘅好日子過？
良辰係客觀嘅，係季節
佳期係主觀嘅，係講緊搵到心上人結婚
女仔嘅青春，隨著客觀嘅時間逝去
但要等到一個心上人，又願意接受佢
係一件幾咁難嘅事呀


風朝露夜陰晴裏，萬戶千門開閉時。

呢句寫得好到不得了
前面係將無數次重複嘅時間壓縮左係一句
後面係將千百次經歷嘅空間精簡成為一句
任何時間地方，都係「漂蕩」，都係「不自持」
當中嘅「本意」，期待嘅「佳期」
到底係邊到呢

曾苦傷春不忍聽，鳳城何處有花枝？

鳳城：即唐代首都長安
直到呢邊詩人李商隱終於出現啦
妓女同文人，係中國傳統文化當中好重要嘅一環
妓女往往係紅顏薄命，不遇佳期
文人成日係懷才不遇，無人賞識
正因為呢點，好多文人去搵妓女，唔止身體慰藉
更重要係雙方都成為彼此嘅紅粉知己
古代妓女好多都係才藝雙全，係一種心靈慰藉

「曾苦傷春」，何以傷春？
傷春悲秋，春是青春易逝
應該有嘅佳期
應該有嘅知遇
都從來無出現到
詩人身同感受，先會講「不忍聽」

因此李商隱好感傷咁問：
而長安呢個最多機會，最繁華嘅首都
到底幾時先會有美好嘅棲息之所呢？
「何處」
係一種期待
係一種不確定嘅尋覓

最後黎自己讀一次：
李商隱 流鶯
流鶯漂蕩復參差，度陌臨流不自持。
巧囀豈能無本意，良辰未必有佳期。
風朝露夜陰晴裏，萬戶千門開閉時。
曾苦傷春不忍聽，鳳城何處有花枝？
2017-05-16 20:21:52

紅顏薄命與懷才不遇的感通 讀李商隱流鶯詩



係古代黎講，文人去青樓係一件好平常嘅事
平常到文人成日會寫詩講佢點去青樓玩
個情況好似叫完雞上fb打返個卡
寫吓個食評咁樣
所以絕對係正常過而家嘅

李商隱作為一個出色嘅文人
加埋一個正常嘅男人
會去青樓叫叫雞，寫吓詩，大佬搵題材啫
藝術嘅嘢，真係識條春咩
所以佢係成日去又成日用黎寫詩嘅

今日我地黎讀李商隱有首詩叫做流鶯
流鶯之意，即係流動嘅，無固定場所嘅妓女
呢首詩好能夠睇出李對妓女有好深刻嘅了解
絕對係叫到有心得，叫得好有感情
大家不妨黎學吓嘢啦


李商隱 流鶯
流鶯漂蕩復參差，度陌臨流不自持。

參差：高低
度：越過
陌：小路
呢句直接係講解返題目
用黃鶯呢種雀仔黎比喻妓女，無一個安身立命嘅地方
古代女仔做妓女九成九都被迫架
一個苦命女子只能夠漂蕩四方，待遇參差
去咩路，過咩河，又點會係自己控制到呢？


巧囀豈能無本意，良辰未必有佳期。

雀仔嘅叫聲，又點會唔係表達緊佢嘅心意？
妓女都係人，點會唔想有安定嘅好日子過？
良辰係客觀嘅，係季節
佳期係主觀嘅，係講緊搵到心上人結婚
女仔嘅青春，隨著客觀嘅時間逝去
但要等到一個心上人，又願意接受佢
係一件幾咁難嘅事呀


風朝露夜陰晴裏，萬戶千門開閉時。

呢句寫得好到不得了
前面係將無數次重複嘅時間壓縮左係一句
後面係將千百次經歷嘅空間精簡成為一句
任何時間地方，都係「漂蕩」，都係「不自持」
當中嘅「本意」，期待嘅「佳期」
到底係邊到呢


曾苦傷春不忍聽，鳳城何處有花枝？

鳳城：即唐代首都長安
直到呢邊詩人李商隱終於出現啦
妓女同文人，係中國傳統文化當中好重要嘅一環
妓女往往係紅顏薄命，不遇佳期
文人成日係懷才不遇，無人賞識
正因為呢點，好多文人去搵妓女，唔止身體慰藉
更重要係雙方都成為彼此嘅紅粉知己
古代妓女好多都係才藝雙全，係一種心靈慰藉

「曾苦傷春」，何以傷春？
傷春悲秋，春是青春易逝
應該有嘅佳期
應該有嘅知遇
都從來無出現到
詩人身同感受，先會講「不忍聽」

因此李商隱好感傷咁問：
而長安呢個最多機會，最繁華嘅首都
到底幾時先會有美好嘅棲息之所呢？
「何處」
係一種期待
係一種不確定嘅尋覓

最後黎自己讀一次：
李商隱 流鶯
流鶯漂蕩復參差，度陌臨流不自持。
巧囀豈能無本意，良辰未必有佳期。
風朝露夜陰晴裏，萬戶千門開閉時。
曾苦傷春不忍聽，鳳城何處有花枝？
2017-05-16 20:27:21
留名支持
2017-05-17 02:35:12
lm 樓主好用心
2017-05-17 02:43:37
留名支持
2017-05-17 06:18:34
留名支持

多謝巴打
呢排會慢慢出返舊文先
新文：
東坡
法家
好快會係周末更新返
2017-05-17 16:56:05
lm 樓主好用心

用心係最基本出文要求
最緊要各位睇得開心
2017-05-17 17:08:03
留名留名
高汁高汁
2017-05-17 17:10:37
留名支持

即刻出新文
2017-05-17 17:11:02
讀文學lm

可以睇埋我其他Post
2017-05-17 17:19:38

簡介古典文學基本概念：無題 兼讀無題兩首其一(鳳尾香羅薄幾重)



李商隱最出名最令人好奇嘅作品
正正係今日要介紹嘅無題詩
要了解李商隱呢一個文學創變之舉
我地必須問：
點解李商隱會寫出咁多無題詩？

如果我地睇返最早期《詩經》
本身入面嘅「詩三百」都係無題
只不過係編輯自己加個題目
文學創作本身係為左表達自我情感
而標題只係一個「閱讀定向」，係後尾先有

例如我地曾經講過嘅陶淵明
佢寫《歸去來辭並序》
唔單止有題目，仲有序言
讀者係無咩空間自己FF
因為題目序文固定左讀者嘅方向
呢種情況已經成為左一種主流

李商隱偏偏要顛覆解構呢一樣嘢
無題嘅出現
正係作者有意同讀者講：吹呀？
因為李睇得到，太過繁瑣嘅題目
必然會令作品嘅曖昧、多義消失
《詩經》之美，在於佢多向嘅詮釋空間
無題詩亦然，可以話係一反潮流嘅創變之舉


無題兩首其一
鳳尾香羅薄幾重？碧文圓頂夜深縫。

鳳尾香羅：有鳳紋嘅綺羅斗帳
碧文圓頂：青碧花紋嘅圓頂
深縫：掩合
兩句都係形容緊同一樣嘢
女性閨房嘅床上面可以垂落黎嘅布

我地可以想像
李商隱訓係人地張床見到嘅景象
又「香」又「薄」又「夜」
嗅覺觸覺視覺皆有
似乎比緊人一種留連再三嘅渴望

「薄幾重」同「夜深縫」係一問一答
詩詞入面嘅對答成日有對比、張力
前者形容輕紗嘅薄
後者卻係將輕紗掩合，化薄為厚


扇裁月魄羞難掩，車走雷聲語未通。

扇裁月魄：形似圓月嘅扇子
雷聲：車聲
出自司馬相如長門賦：
「雷殷殷而響起兮，聲像君之車。」

上一句仲係講緊一種留連、挽留
呢到描繪離別嘅情況
李商隱眼中都仲浮現緊情人嘅紅卜卜樣
但呢次離別係好突然，係趕住走嘅
「語未通」三字
講緊佢地無好好咁Say goodbye


曾是寂寥金燼暗，斷無消息石榴紅。

詩人突然情景一轉
話比你知，原來頭先係對往事嘅追憶
好多人解唔透呢一句
點讀都唔Make sense囉

我地稱呼呢種手法叫「情景並置」
人情　　　　景物
曾是寂寥　　金燼暗
斷無消息　　石榴紅
情同景之間，必然有所相似連結
呢一種連結係言外之意
要靠讀者不斷去連結兩者先能夠感受嘅

「曾是寂寥」係過去嘅孤獨
「金燼暗」成為呢種感情嘅對應
幻想吓香燭燒盡果一刻光芒嘅灰暗
所有嘅光都化成灰燼
呢種感覺
真係要燃點香煙飲啖酒先解得到愁呀

「斷無消息」，呢種離別係意外
「斷」意味左突然，又無法改變的感覺
「石榴紅」，石榴開花先會紅
而佢開花果陣又係春天完結之時
正正係一種好強烈嘅對比
等呀等花都開啦，所有美好嘅日子都要完啦
開花本身代表歡樂之情，但而家更加神傷
而「紅」，又何嘗唔係詩人情感嘅熾熱呢


斑騅只繫垂楊岸，何處西南待好風。

斑騅：毛色青白相間的馬
呢邊有一個好關鍵嘅字：「只」
點解斑騅只能夠繫於垂落嘅楊柳岸邊呢？
楊柳除左離別之意
呢到嘅「垂楊」係另有典故
韓翃《章臺柳·寄柳氏》：
章臺柳，章臺柳，昔日青青今在否？
呢個典故，係韓翃寫比一名娼妓
章臺柳亦都成為左妓女嘅比喻
睇到呢邊，無錯
呢首都係李商隱對某位妓女嘅情詩
你，最近還好嗎？

曹植《七哀詩》：
浮沉各異勢，會合何時諧？
願為西南風，長逝入君懷。
李商隱結句正係化用左呢個典故
離別，但我會永遠掛住你
等我搵到個好地方
化成西南嘅風，投入你嘅懷抱
PS，I LOVE U

再讀一次，下次講埋佢下一首
對解返呢首都好重要：

鳳尾香羅薄幾重？碧文圓頂夜深縫。
扇裁月魄羞難掩，車走雷聲語未通。
曾是寂寥金燼暗，斷無消息石榴紅。
斑騅只繫垂楊岸，何處西南待好風。
2017-05-17 17:25:44
記得高登有個巴打叫 小李老杜
2017-05-17 17:26:25
2017-05-17 18:19:09
留名留名
高汁高汁


多謝巴打追足咁耐
2017-05-18 00:01:13
記得高登有個巴打叫 小李老杜

連登有個叫李商隱
呢位巴打之前有追Post
2017-05-18 01:12:54
巴打好清泉feel
第一次入黎睇 留個名先
2017-05-18 01:18:34
留名 高質不能不推
2017-05-18 01:30:34
高汁 留名
2017-05-18 16:26:44
見到樓主引用漢賦，想請教下漢賦可以點入手，市面上嘅注釋寫得未必好，文選注又太難明。
吹水台自選台熱　門最　新手機台時事台政事台World體育台娛樂台動漫台Apps台遊戲台影視台講故台健康台感情台家庭台潮流台美容台上班台財經台房屋台飲食台旅遊台學術台校園台汽車台音樂台創意台硬件台電器台攝影台玩具台寵物台軟件台活動台電訊台直播台站務台黑　洞