【科幻冒險多甜】《一場末日危機，令患上中二病的我變成救世者》

「月闇個身體有好多蛋白質同胺基酸成份，我哋唔可以隨便浪費宇宙間嘅生物資源㗎！」

夏娃呢句野令我聽完毛管戙！佢咁珍惜生物資源，估唔到一個手勢就將成隻方舟入面所有嘅生物殺晒，巧驚呀！

「啲動植物冇死到！所有數據都備份咗喺個生物打印機網絡入面，唔信你睇下......」

夏娃講完之後，又對部機做另一個手勢，個缸入面啲噴頭即時配合行動。

由內臟同骨骼逐一開始打印起，之後到血管同肌肉，然後輪到毛髮，跟住變成咗一隻狗仔嚮個缸底由一個輸送台升上水面，最後仲成隻生勾勾濕淋淋咁跳出嚟添！

「佢叫小白，原本我諗住帶埋佢去系外行星旅行嘅，依家佢唯有跟我返地球暫住一下先。」

我望住小白，再望下我同夏娃個裸體，先知道大家嘅器官組織係來自同一缸材料，感覺十分噁心..........

係喎，唔知啱先夏娃有冇被上戶彩扑親個頭呢？

「我冇事，只係暈咗一陣同失去少少血，呢啲傷絕對唔會影響我嘅日常表現同判斷能力。」

嘩！個頭流晒血仲可以咁鎮定，唔通外星人係冇感覺㗎？真係難以理解到一個點..........

正當我發呆之際，突然醒起阿媽同阿妹一定以為我死咗！依家返去仲趕得切補飛！

「你依家返屋企，只係可以用來賓嘅身份參加你嘅葬禮。」點知夏娃忽然答我一句嚇到個心離一離嘅說話。

推一下~

多謝鶴兄支持！😃

再幫你推

第十四章：回家

「就算你返咗屋企，你屋企人一定認唔出你。」

點解會咁？聽到佢咁講，我立即響附近搵塊鏡嚟照下，我好肯定我個樣一啲都冇改變到！

「有冇聽過曼德拉效應 Mandela Effect？」

嘩？曼德拉效應？咩嚟㗎？

「曼德拉效應一詞起源於2010年由一位愛好超自然現象嘅美國博客布梅發表，佢發現記憶中嘅南非總統曼德拉應該喺20世紀80年代就已經於監獄中死亡，

但現實係曼德拉冇喺20世紀80年代過身，後來更被釋放，仲當上南非總統，直至2010年時仍然在世，曼德拉本人喺2013年先至逝世。

對於呢段虛假記憶，布梅聲稱有數千人一齊相信自己。由於大眾嘅集體記憶同史實不符，主流科學界認為呢個效應係錯誤記憶嘅一種體現，

但其實係由我哋潛伏者製造嘅一個實驗，目的用嚟測試集體記憶屏障，抹去人類對複製人嘅所有記憶。」

吓，點解要咁做呀？

「為咗避免產生獨裁者利用呢個方式去延續統治，設計呢個打印程式嘅開發人員，亦即係一班元祖潛伏者嘅成員，喺個程式入面加裝咗會令地球人忘記複製人原來身份嘅外掛，

所以你家人一定認唔出你，除非佢哋擁有接近潛伏者嘅智商。」夏娃又講咗一啲普通人聽極都唔明嘅野。

我唔信！我偏要去！我返得嚟地球就要見阿媽.........

「我同你一齊去，希望你到時唔會後悔，不過去之前要執一下個身先。」

夏娃講完呢句，就喺回收工場附近一個隱藏位置攞出兩套一早預備好嘅衣服，然後快快手將一套白色吊帶背心裙穿上身，而我就穿起另外一套深綠色連帽T加牛仔褲。

睇真啲，夏娃頭頂個傷口話咁快已經唔見咗。我同佢離開工場之後，行咗一陣就去到高速公路附近。

夏娃一見到有架的士駛近，諗都唔諗就揚手截車，跟住問都冇問我就叫司機車我返屋企。我想講我冇錢搭車㗎！

「唔駛怕。司機被我催眠咗，佢只會跟我指令辦事。」雙手一直抱住小白嘅夏娃突然開口同我講，最離奇係個司機完全冇搭咀，好明顯佢連呢句都聽唔到。

結果我哋順利搭的士返到屋企。但奇怪嘅係，我一返到屋企樓下大堂，平日個看更竟然唔認得我。

「先生請問你搵邊個？」實蕉哥哥問我。

「我係洛太個仔，你唔認得我啦？」

「洛太個仔？唔通你就係洛生個仔？唔好意思，差啲唔認得........」原來個實蕉認錯咗我係後父個親生獨仔，一個唔嚮度住，甚至我連名都唔想提起嘅人渣。

「洛太得一個仔，唔該你睇真啲！」

「先生講笑搵第樣，洛太今晚去咗九龍殯儀館同個仔辦.........」

各位早晨！

推

「知道，唔該晒！」同實蕉哥哥傾完，我同夏娃下一秒即刻趕去殯儀館。

當我同夏娃好辛苦咁趕到殯儀館嗰陣，我見到自己張車頭相掛嚮靈堂，當堂嚇到唔識講野。

「媽，係我，子奇呀！我仲未死㗎！」我即刻第一時間衝入靈堂搵阿媽。

正當我想同阿媽解釋清楚嗰陣，突然被個堂官攔住：「來賓請留步！一鞠躬，再鞠躬，三鞠躬.......」

點知阿媽完全唔認得我係乜水，當堂官叫家屬謝禮嗰陣，佢竟然鞠躬回禮！

第十五章：詭異葬禮

「阿媽、曉彤，我係子奇呀，我返咗嚟啦！妳哋睇真啲！」我向住阿媽同阿妹叫。

「請問你係邊位？」點知我後父忽然上前問我。

「阿爸，我係子奇呀，我唔認得我啦？」

「唔好玩啦，你雖然個樣似佢，但你哋根本就係兩個人！」原來後父覺得我玩佢。

「佢叫阿當史密夫，係子奇嘅朋友嚟，我哋兩個由哈薩克嚟到香港之後，令郎曾經幫過我哋好多，

所以佢依家見唔返好朋友就覺得好唔安樂，甚至當咗自己係令郎，真係唔好意思。」點知夏娃突然出現向佢解釋。

點知嚮呢個時候，我最憎恨嘅哎呀阿哥出現嚮我面前。

「呢位朋友有心啦，我細佬啱先死咗，阿媽同阿妹依家唔受得外界刺激，希望你可以俾佢哋靜下。」

「不凡，你識唔識得呢個人？」輪到後父問佢親生仔。

「我識，阿當史密夫嘛，上次見過，同個女仔由哈薩克嚟嘅.......」

「你.........」我肯定洛不凡認得我，但為免場面尷尬同俾面夏娃，我冇同佢嘈。

「我帶你瞻仰遺容，睇完你好走.......」洛不凡細細聲嚮我耳邊講。