【科幻冒險多甜】《一場末日危機，令患上中二病的我變成救世者》

各位早晨！

我望住前面，見到洛不凡喺身邊利用權杖變咗一個結界出嚟，就喺佢進入結界之前，突然發狂掟咗梓玲落街！

我大驚，馬上想再次使用時空夾縫，無奈失敗，隨即撲向天台邊緣，結果喺梓玲硬著陸前最後半秒再一次將時空夾縫成功啟動。

我喺天台高處見到梓玲墜地前一刻嗰個細小嘅身影，完全無法接受眼前嘅一切係事實。

望住將要失去寶貴生命嘅未婚妻，眼前影像歷歷在目，直至被凍結嘅時間耗盡，最後對方墜地身亡為止。

嗰一刻我先明白，時空夾縫唔係萬能，面對至愛死亡，即使身為彌賽亞亦唔可以力挽狂瀾，一種慘絕人寰嘅感覺喺我內心不斷徘徊，嗰種心情甚至無法用筆墨去形容，下一秒，我眼前一黑。

古兄午安

貓貓午安

第七十九章：殘酷的宿命

我從昏迷狀態中清醒過嚟，眼前係夏娃以及一眾使徒，原來我正置身老洞嘅指揮室。

「梓玲喺邊！我要去救佢！」我大聲向所有人質問。

「你當時暈咗，係我將你帶番嚟呢度。對唔住，辛梓玲喺墜地嗰一刻已經證實救唔返！係我冇用，阻止唔到撒旦利用旁人行兇........」約翰忍唔住開口。

「係你同我講只有呢個方法先至可以救梓玲！你講大話！」約翰講唔到一半，立即被我出言制止。

「我明白你嘅感受，但世事嘅野永遠都係估唔到，我哋一班人亦都冇預知能力，請你唔好再責怪約翰。」就喺呢刻，馬太立即擋嚮約翰前面回應，我諗佢估到我下一秒會出手打約翰先至咁做。

感謝貓貓支持！

「對唔住.......我實在控制唔到我自己.......呢一刻.......我真係好痛苦。」

「阿當，你聽我講，你嘅事我十分難過，但歷史係唔可以改寫，只有時間先可以令傷口撫平，我哋支持你，但亦需要你一齊去解決面前嘅難關。

自從上次撒旦走甩，依家佢利用惡意靈體肆意操縱各地嘅政府核心，世界嘅秩序喺一夜之間被佢徹底改寫，目前只剩返我哋潛伏者先可以出手制止佢。」

夏娃選擇喺呢個時候俾我心理上嘅支持，佢捉緊我隻手，我感覺到佢嘅意識進入咗我大腦向我喊話：

「我哋需要你，世上嘅人都需要你，只有你結合我哋嘅力量，先可以打低如今變成撒旦嘅洛不凡，我認為即使你未婚妻亦一樣會支持你咁做。」

夏娃講得啱。當年彌賽亞面對喪妻之痛，尚且一直跟撒旦糾纏作戰至今，佢所面對嘅壓力應該極為沉重。將心比己，我終於理解到身為一個救世者嘅痛苦。

「冇錯。為咗梓玲同阿媽，我要戰勝撒旦！」突然間，一種復仇嘅意志喺我內心蔓延，令我決定重新投入潛伏者嘅行列，成為真正嘅彌賽亞。

唔使客氣~~加油呀

第八十章：終極之戰

時間輾轉又過咗一年。係呢短短一年之內，世界嘅格局出現翻天覆地嘅變化。

各國政府紛紛出現激進組織，一啲倒戈相向嘅軍人更伺機成立軍人政權接管位於世界各地嘅政府。

我收到嘅情報顯示幕後策劃人係洛不凡，佢以惡意靈體入侵同控制嗰啲有勢力人士嘅思想，令佢哋成為撒旦嘅傀儡。

由於情報顯示，撒旦嘅人間傀儡已經部署好準備對老洞發動總攻擊。

基於安全上嘅考慮，我哋一班潛伏者決定於敵人進攻前全面棄守老洞，並且將秘密基地改成另外一個地方，避開撒旦嘅狙擊。

原來早喺上任彌賽亞乘坐太空船抵達地球之前，世界各地嘅元祖級潛伏者已經秘密建成多個位於地球上唔同角落嘅秘密基地，以便日後應付世界末日嘅來臨。

對屬於次世代潛伏者嘅夏娃嚟講，目標自然係接管元祖級潛伏者留喺地球上嘅一切。

夏娃喺上次對付彼得嘅時候，利用藏寶室內緊急應變箱所收藏嘅資料棒，學識咗上任彌賽亞傳授俾佢嘅結界術，並且一次過獲得所有地球基地嘅傳送點數據。

佢利用結界接通咗其中一個傳送點，令所有人安全咁轉移去一個全新嘅地底基地，一個長年與世隔絕嘅古怪建築物，位於西伯利亞地獄之門嘅天然地洞內。

「依家外面敵眾我寡，加上我哋一班人已經失去昔日藏身地點，我哋日後應該點做？」喺新基地入面一個巨大六角型大廳內，菲臘以下屬嘅身份問我。

「呢個地方係我同夏娃一早計劃好，作為長期作戰用途嘅基地。放心，我哋手上面仲有足以反敗為勝嘅籌碼。」說話期間，我向菲臘展示數具巨型喇叭。

「呢幾件野係馬太最新嘅發明，名字叫腦震盪器，係專門為人類驅魔嘅工具，目前所有嘅測試已經順利完成，並且進入咗量產嘅階段，佢除咗可以直接嚮大氣輸出電波之外，亦可以利用電腦網絡滲透入互聯網世界為人類進行淨化。」

結果我哋利用由馬太發明嘅腦震盪器，喺大氣中投入中和腦電波，逼使惡意靈體脫離宿主。

呢招似乎收到預期效果，形勢開始逆轉，世界上唔同角落出現好多回復原本意識嘅人，有啲甚至唔知道自己曾經被人幕後操縱同利用，當佢哋知道事實真相後，亦紛紛宣佈加入對抗撒旦嘅傀儡集權。

由於形勢危急，我哋一班潛伏者決定兵分兩路，分別喺表世界消滅由惡意靈體操縱嘅人類喪屍同嚮裡世界直接消滅惡意靈體，終於經過咗兩年嘅戰爭，洛不凡身邊嘅爪牙被我哋逐一消滅，世界開始回歸日常。喺走投無路之下，洛不凡隻身逃走前往南非。

第八十一章：末日來臨(上)

菲臘利用佢最擅長嘅追蹤術得悉洛不凡最後藏身嘅地方。嚟到呢一刻，我終於可以為梓玲同阿媽，以及所有被撒旦迫害嘅人討回公道。

喺夏娃嘅結界引領之下，我哋一班潛伏者終於跟洛不凡喺位於南非一個地下礦井底部面對面交鋒，各人出絕招一齊同佢打咗十幾個回合。

「投降啦，撒旦，你已經無路可逃啦！」呢句係我唯一對洛不凡嘅忠告。

「哈哈......一班患上自大症嘅潛伏者，你哋.....知唔知......點解我要山長水遠咁引你哋嚟呢度？」手持權杖嘅洛不凡說話時面容憔悴，咀角流血，睇嚟身體已經受到好大程度嘅傷害。

多謝貓貓

「死心啦，今日我哋係專程嚟收拾你嘅！」我講完之後，身體隨即進入時空夾縫模式，

然後我利用手上嘅元氣手槍，直接射擊撒旦嘅真身，亦即係洛不凡手執嗰支權杖，直至權杖完全粉碎為止。

點知當時空夾縫完結之後，出現喺洛不凡面上嘅竟然係一沬邪惡嘅笑容。

「哈哈......彌賽亞.......你終於.......親手.......毀滅地球啦。」洛不凡居然一邊講一邊咀角流血，畫面令人不寒而慄。

「你到底想講乜野？」我反問對方。

早晨呀

早晨貓貓

「支權仗......除咗係我意識嘅容器之外，我亦已經將佢.......改造成一個地球終結啟動器，你.......剛剛啟動咗一個埋藏於地底深處嘅反物質炸彈。」

「我係唔會被你大倒我嘅，我依家就要將你送去一個令你接受人類制裁嘅地方！」

「我引你哋嚟之前.......已經吞咗毒藥，我冇打算繼續生存，我只係想.........攬住你哋一齊死！哈哈！係喎，你係神，咁你知唔知幾時係世界末日？」

洛不凡面上擺出一副魔鬼般嘅表情，精神出現歇斯底里狀態嘅佢向現場所有人咧嘴而笑，就好似宣佈自己獲勝一樣。

第八十二章：末日來臨(下)

「既然你哋阻我統治地球，我亦唔會.......俾你哋生存喺地球！其實個反物質炸彈........係由史前嘅元祖潛伏者留低，目的係.......摧毀現今嘅地球磁場。

呢個炸彈會引發地球磁極逆轉，喺二十年之內，地球磁場就會消失，最後地球就會.......完全暴露喺太陽嘅有害輻射同致命嘅宇宙射線底下，人類到時就會滅絕。」

想唔到洛不凡講完呢句之後，隨即吐血而亡。

我望住洛不凡條屍，本應大仇得報嘅我，嗰一刻唔知點解心裡面得唔到一絲救贖嘅感覺，心情反而向下沉。

突然間，我聽到一下源自地心嘅哀號，聲音嘅頻率好低，就好似由地獄傳嚟咁恐怖。

「睇嚟我哋要立即利用結界離開呢度。撒旦冇講錯，個反物質炸彈爆炸已經令地殼產生地震，地震更觸發火山爆發，相信唔駛等一分鐘，呢度就會移為平地！」

果然，夏娃利用手上儀器偵測到地殼活動。

就喺下一秒，成個礦井好似地動山搖一樣，頭頂仲不斷有大石墜落。夏娃見狀，索性向礦井地面施法，令各人所站立嘅位置變成結界。結果，我哋所有人幾乎同一時間穿越地面，跌落位於結界下方約一米半嘅位置，亦即係新基地入口所在地。

「我哋能夠返嚟基地係咪代表能夠避過一劫？」眾人驚魂甫定後，月闇率先開口提問。經過深刻反省後，月闇三年前已經重新加入成為我方潛伏者成員之一。

「撒旦今次真係決心攬炒，佢個反物質炸彈已經令地球磁場炸開咗一個缺口，個缺口面積仲不斷擴大，按照呢個模式推算，相信喺未來二十年之內，地球磁場就會消失，到時人類就會直接受到來自外太空致命幅射嘅威脅。」夏娃以物理學家嘅身份解答對方。

估唔到撒旦引我破壞佢支權杖，目的只係想我成為導致世界末日嘅千古罪人，想我一世內疚。

.

「咁我哋可以點做去拯救世界？」我問夏娃。

「地球磁場逆轉所做成嘅磁場消失，係唔會一時三刻就可以復原。我哋唯一可以做嘅，係通知母星立即派遣第二隻方舟號嚟地球，但即使咁做亦只可以令極少數地球生物移居系外行星。」

我一邊聽夏娃分析，一邊想起最初跟隨對方上方舟號嘅往事。

冇錯，去到系外行星的確可以過住二人世界，繼續風流快活，但如今我已經成為彌賽亞，身為一個救世者，我覺得自己嘅意識已經融入其他人嘅生命當中。

同樣，走咗嘅梓玲同媽咪亦有部份意識存在喺我生命之內。以彌賽亞角度去睇，人類嘅生命，亦即係我嘅生命，我要拯救全部人。

「夏娃，我決定通知母星，請佢哋破例派遣所有太空船嚟地球，我想令所有地球人都可以安全離開，去其他系外行星移民暫避風頭，我唔想再有人因為潛伏者而死。」

「冇問題，我立即去辦，好高興知道你會咁諗。」夏娃以欣慰嘅眼神望住我，就好似昔日望住上任彌賽亞一樣，最後竟然喜極而泣。