【科幻冒險多甜】《一場末日危機，令患上中二病的我變成救世者》

各位早晨

我利用緊迫嘅生存時間搵到電腦嘅終端機裝置，由於事前有預先彩排過，結果好容易被我搵到中轉站對上一次訪客，亦即係我同夏娃嘅生物數據。

我根據電腦手冊上嘅程序將夏娃嘅生物數據上載到傳送天線，點知當我完成後，

電腦卻顯示傳送天線因為電力故障，未能夠成功啟動，必須依靠外部電源先可以傳送資料，OMG！

嚮呢一刻，我望一下室內嘅維生指數，電腦估計呢度嘅氧氣只足夠我生存多十分鐘，但喺極低溫之下，情況可能會更差。

最恐怖嘅係，依家我仲要利用有限嘅生命時間上天台替傳送天線接駁外部電源！

推

多謝貓貓支持

第六十三章：死亡倒數

我依照地圖上嘅指示上頂層搵到唯一嘅外部電源，但由於呢度非常接近受破損嘅天花圓頂，令氣溫驟降，

幾經辛苦克服重重障礙，先可以從圓頂邊緣爬到傳送天線嘅位置，最終為天線插上電源。

成功啟動數據傳送程序後，後方突傳嚟「彭」一聲嘅巨響！我立即回頭一望，發現剛才爬上嚟嗰條維修工作橋竟然倒塌！

我望返落去十幾米對落嘅地面，如果跳落去肯定會粉身碎骨。

正當我擔心緊下一步應該要點樣落返去，繼而將我嘅大腦意識數據經PORTAL傳送返去地球嗰陣，

我全身嘅手腳已經凍僵無法再郁，光脫脫嘅皮膚表面毫無血色，就好似結咗冰一樣掛喺傳送天線上方。

絕望嘅我望住支天線不斷閃爍，知道任務已經完成。喺嗰陣，我全身已經凍到冇晒知覺。

由於空氣中嘅氧氣流失，我開始進入缺氧狀態。我明白一旦最終死喺度，意識就會喺外太空流浪..........

迷糊之間，我凍到開始唔識得分辨發夢同現實，呢一刻手腳雖然結晒冰，但仍然感覺到自己全身輕飄飄，身體升穿圓頂形天花板，就好似脫離咗肉體束縛一樣。

離開中轉站後，我去到外面嘅世界，睇到泰坦表面充滿住橙色嘅雲霧，就好似去咗仙境一樣。

唔知點解，我個腦不自覺咁出現好多以往嘅生活片段，我分別見到媽媽、曉彤、辛梓玲、彌賽亞、上戶彩同蘿莉，佢哋就好似同我一齊經歷人生一樣，有講有笑，

最後我見到嘅竟然係一絲不掛嘅夏娃，當佢走過嚟用雙手攬實我嗰陣，我先發現我哋出現嚮一處白朦朦嘅平原，嗰度係一個四周空蕩蕩乜都冇嘅世界。

「能夠見到妳真係好，係我唔啱，妳失蹤後我冇主動去搵妳，累妳被撒旦班禽獸.........我抵死，我知就算我講咩都彌補唔到，妳要鬧我打我都可以.......」我忍唔住眼濕濕咁講。

點知夏娃以手勢示意我停止再講落去。佢心口貼住我，然後以薄薄兩片嘴唇錫咗我一啖代替千言萬語。

就喺我同夏娃互相深情對望嘅時候，我立即明白到自己原來已經離開咗泰坦，呢一刻唔通我已經安全抵達地球？

「你喺度見到我代表你已經死咗。」點知夏娃一開口就向我講出殘酷嘅真相。

「到……到底呢度係邊度？」我當堂被佢嚇咗一嚇。

「有人叫呢度做天堂，亦有人叫地獄，呢度其實係由生物意志所組成嘅意識墳場.......」

「意識墳場.......乜原來我已經死咗.......但點解妳會喺度？我明明已經將妳嘅生物數據備份傳送返去地球，妳應該可以透過打印機復活.......」

「我估到你會不惜一切嚟泰坦救我，亦知道你最終會凶多吉少，所以我專登嚟呢度救你。」

第六十四章：異界之戰

「吓？妳能夠嚟到呢度唔係代表有路返去地球嘅裡世界咩？」

「呢度唯一通往裡世界嘅數據閘門一早被人關閉咗。我幾經波折先可以打開一個臨時缺口，我哋距離缺口重新關閉仲剩返唔夠一小時，唔好再耽誤時間，快啲跟我走！」

一絲不掛嘅夏娃如今竟以一本正經嘅口吻向我發出警告，兩者之間嘅反差令我產生一種起伏不定嘅心情。

「既然係咁，我哋要點走？」面對眼前四周圍白朦朦嘅平原，我根本分唔清方向。

「我入嚟嗰陣喺缺口放咗個能量座標，就喺嗰度！」夏娃指向遠方一條巨型光柱。就係咁，我哋兩個向住數據閘門嘅缺口方向逃亡，希望趕得切喺閘門被關上之前全身而退。

輾轉之間走咗一半路，就喺目的地在望嘅時候，地上突然一下子裂開，凹陷嘅深處隨即冒出白煙，一隻身體背後有蜥蜴尾巴，兩邊背部長有巨型蝙蝠翅膀，皮膚有鱗片，頭上擁有一對長角，身高約三米嘅妖怪突然破土而出！

推一下

怪物出現後，第一時間以一雙陰森邪惡嘅碧綠眼睛鎖定我。嘩！搞乜佢個樣成隻異形咁醜惡㗎……

「呢隻係意識墳場嘅守門者，佢專門吞噬人類靈魂，小心！」面對強敵，夏娃向我喊話。

我立即用元氣手槍射向怪物全身，點知呢隻野皮糙肉厚，三兩下手勢就將元氣手槍嘅能量悉數反彈，同時使出全力向我撲殺。

夏娃眼見情勢危急，突然用手推開我，再引開怪物。

怪物眼見目標落空，轉而遷怒另一人，隨即以強而有力嘅手臂將夏娃捉住！

與此同時，佢突然張開大口，然後伸出一條粗長而且濕淋淋嘅舌頭緊纏夏娃唔放，企圖將對方吞噬！

貓貓早晨！

上次因為我嘅疏忽，導致夏娃無辜死亡，因此我絕對唔會俾佢再次受到傷害。

眼見夏娃情況岌岌可危，我立即使出時空夾縫嘅能力將怪物定格，繼而利用元氣手槍瞄準隻野嘅血盆大口射擊！

呢招果然奏效，一槍之內竟然可以將怪物爆頭，之後佢戰鬥力盡失，令夏娃得以解圍。

「妳冇事嘛？」我立即撲向夏娃進行拯救，並且將遊走對方身上屬於怪物嘅斷舌移走。

「我.......冇事，但點解你會承繼咗彌賽亞嘅能力？」身上佈滿怪物口水黏液嘅夏娃好驚訝咁問。

「彌賽亞同撒旦一幫人戰鬥，最後力盡而亡，佢臨死前傳授咗時空夾縫嘅能力俾我，希望我可以打敗撒旦，講起就一匹布咁長.........事不宜遲，依家我首先要救妳返出去！」

推

各位早晨

第六十五章：回歸

想唔到夏娃一言不發，只係默默對住我流眼淚，今次亦係我第一次見到佢流淚。

我同夏娃最後嚟到一個叫轉生之湖嘅地方。全靠夏娃話我知，數據閘門一直隱藏嚮湖底。

由於缺口關閉在即，危急之下，我哋一邊擁抱對方身體一邊跳入湖，然後雙雙沉入湖底，途中我以接吻方式去幫夏娃換氣。就喺缺口消失前五秒鐘，我哋成功穿過數據閘門，重新進入裡世界。

結果，夏娃成功獲得重生。喺眾目睽睽之下，一個濕淋淋嘅赤裸女子從巨型生物打印缸步出。

與此同時，我嘅意識亦重新回歸身體。我望住夏娃，然後走上前用力攬緊佢，並且以彌賽亞嘅身份同佢講：「夏娃，歡迎妳返嚟。」

我向夏娃交代有關佢離開我直至復活之間老洞發生嘅所有事情，佢聽完之後竟然變得眼濕濕。就喺嗰一刻，我聞到一陣好濃烈嘅咖啡味。

「彌賽亞，你要嘅咖啡。」原來係上戶彩以呷醋嘅表情同我講。